Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA KE HE MOUI

Ko e Tufaaga Uho Faka-Kerisiano Ati Tupuolamoui Au

Ko e Tufaaga Uho Faka-Kerisiano Ati Tupuolamoui Au

KE HE tulotopō, ko e Niger River i mua ha mautolu hane tafe mo e teitei 1.6 e kilomita he laulahi. Ko e magahala he Nigerian Civil War a ia, ti hagahaga kelea lahi mahaki ke o atu ke he taha faahi he Niger. Ka e lata agaia a mautolu ke o atu, ti lagaloga foki. Hoko fēfē au ke he tuaga ia? Liliu la ki tua ke he magaaho ato fanau au.

He 1913 ne papatiso e matua taane haaku ko John Mills i New York City he 25 e tau he moui. Ko Matakainaga Russell ne taute e lauga papatiso. Nakai leva ne fina atu a Tete ki Trinidad ti mau mo Constance Farmer, ko e Tagata Fakaako Tohi Tapu makutu. Lagomatai e Tete e kapitiga haana ko William R. Brown ke fakakite e “Photo-Drama of Creation.” Taute pihia e laua ato kotofa e magafaoa Brown ki West Africa he 1923. Ko Tete mo Mami ne amanaki tokoua ke momoui he lagi, ne matutaki i Trinidad.

TAU MATUA NE OFANIA A MAUTOLU

Ne tokohiva e tama he tau matua haaku, ti fakahigoa e tama uluaki ko Rutherford, ko e pelesiteni mogoia he Watch Tower Bible and Tract Society. Fanau au ia Tesemo 30, 1922 ti fakahigoa aki a Clayton J. Woodworth, ko e etitoa he The Golden Age (mogonei ko e Awake!). Foaki mai he tau matua ki a mautolu oti e fakaakoaga aoga, ka e fakamalolō pauaki e laua e tau foliaga fakaagaaga. Ofoofogia e puhala ne fakamaama fakamitaki he matua fifine haaku mai he Tohi Tapu. Fiafia lahi a Tete ke tala mai e tau tala Tohi Tapu ki a mautolu, ti fakaaoga e tino katoa haana ke mooli e tala.

Kua fua mitaki e tau laliaga ha laua. Mai he tokolima e tama taane ne tokotolu ia mautolu ne o atu he Aoga Kiliata. Tokotolu e mahakitaga ha mautolu ne paionia ke he loga e tau i Trinidad mo Tobago. Ha ko e fakaakoaga mo e fakafifitakiaga mitaki he tau matua, ne to e laua a mautolu “ke he fale a Iehova.” Lagomatai he fakamalolōaga ha laua a mautolu ke nonofo i ai mo e tupuolamoui “ke he tau lotopā he Atua” ha tautolu.​—Sala. 92:13.

Ko e kaina ha mautolu e feleveiaaga ma e gahua fakamatala. O mai e tau paionia ti fa tutala hagaao ki a Matakainaga George Young, ko e misionare Kanatā ne fina atu ki Trinidad. Fiafia e tau matua haaku he tala hagaao ke he tau kapitiga fakamua  ha laua ko e tau Brown ne ha ha i West Africa mogoia. Omoomoi he tau mena oti nei au ke kamata gahua ke he fonua he hogofulu e tau he moui.

TAU MATAGAHUA FAKAMUA

Ne velagia e fekau he tau mekasini ha tautolu he magahala ia he fakatapakupaku e lotu fakavai, tau pisinisi lotokai, mo e kelea he tau mena fakapolitika. Ti hoko ke he 1936, ne fakaohooho he tau akoako e kovana fakakū ha Trinidad ke pā malu e tau tohi oti he Watch Tower. Fufū e mautolu e tau tohi ti matutaki ke fakaaoga ato oti ai. Foleni mo e heke a mautolu he tau pasikala he fakaaoga e tau lautohi mo e tau lapa fakailoa ke fakapuloa e tau vala tala. Fakalataha mo e matakau he motokā leo fakatagi mai he taone ko Tunapuna, ne fakamatala foki a mautolu ke he tau matakavi mamao i Trinidad. Ko e mena fiafia mooli! He takatakai fakaagaaga ia ne takitaki au ke papatiso he 16 e tau.

Matakau Tunapuna he motokā leo fakatagi

Ko e tufaaga he magafaoa ha mautolu mo e tau mena fakamua nei ne tutupu kua fakalagā e manako haaku ke eke mo misionare. Ti malolō agaia e manako ia haaku he fano ki Aruba he 1944 ti fakalataha mo Matakainaga Edmund W. Cummings. Fiafia lahi a maua he hogofulu e tagata ne o mai he Fakamanatuaga he 1945. He tau hake, ne fakatū e fakapotopotoaga fakamua he aelani.

Mo Oris, ne foou e puhala kua tupuolamoui au

Nakai leva, ne fakamatala au he magaaho noa ke he kapitiga gahua ko Oris Williams. Malolō e totokoaga ha Oris ke lalago e tau taofiaga ne iloa e ia. Ka e he fakaako e Tohi Tapu ne iloa e ia e talahauaga mooli he Kupu he Atua ti papatiso ia Ianuari 5, 1947. Fai magaaho he mole, ne fakaalofa loto fakavihi a maua ti mau. Kamata a ia ke paionia ia Novema 1950. Ne foou e puhala ne tupuolamoui au ha ko Oris.

FEKAFEKAUAGA OFOOFOGIA I NIGERIA

He 1955 ne uiina a maua ke o atu he Aoga Kiliata. Ke tauteute ma e kotofaaga ia ne fakaoti e tau gahua tupe haaku mo Oris, sela e kaina mo e tau koloa, ti toka hifo a Aruba. Ia Iulai 29, 1956 ne paase mai a maua he vahega ke 27 aki i Kiliata ti kotofa ki Nigeria.

Mo e magafaoa Peteli i Lagos, Nigeria he 1957

He liu onoono ki tua, pehē a Oris: “Maeke e agaaga ha Iehova ke lagomatai e tagata ke hikihiki ke he tau tuaga kehekehe he moui misionare. Manako e taane haaku ke misionare ka e nakai manako au. Loto au ke he kaina mo e feaki e tau fanau. Ka e hiki e manatu haaku he mailoga kua mafiti lahi e lata ke fakamatala e tala mitaki. Magaaho ne paase mai a maua i Kiliata, kua mau katoatoa au ke fakamatala ko e misionare. He o atu a maua ke he toga Queen Mary, ko Worth Thornton mai he ofisa he Matakainaga Knorr ne mavehe ki a maua ‘Bon voyage!’ Pehē a ia to gahua a maua he Peteli. ‘Oi nakai!’ he ui e au. Ka e mafiti au ke hikihiki mo e fiafia ke he Peteli, ti kehekehe e tau gahua haaku. Fiafia lahi au ke gahua tali telefoni mo e fakafeleveia ke he falu. Fiafia au ke he tau tagata, ti feleveia au mo e tau matakainaga Nigeria ha ko e gahua nei. Tokologa ne o mai mo e efu, mategūgū, fia inu, mo e hoge. Ko e mena fiafia ke leveki atu ke he tau manako ha lautolu mo e tokotoko mitaki ai. Ko e tau fekafekauaga tapu oti a ia ki a Iehova ti ko e tau mena ia ne makona mo e fiafia ai au.” Ē, ko e tau kotofaaga takitaha ati maeke a maua ke tupuolamoui.

He fakalatahaaga auloa he magafaoa i Trinidad he 1961, ne talahau he Matakainaga Brown falu mena ofoofogia ne tutupu i Aferika. Ti talahau e au e tupu ha mautolu i Nigeria. Ne kuku mafanatia mai he Matakainaga Brown au ti tala age ki a Tete: “Johnny, ai hoko a koe ki Aferika, ka e hoko a Woodworth!” He tali, pehē a Tete: “Eketaha ma Worth! Matutaki pihia!” Ko e tau fakamafana pihia mai he tau matua fakaagaaga ia ne fakamalolō e manako haaku ke taute fakamitaki e fekafekauaga haaku.

I William “Bible” Brown mo e hoana ko Antonia ne fakamalolō lahi a maua

He 1962 ne kotofa au ke moua foki taha fakamahaniaga he vahega ke 37 aki i Kiliata, ko e fakaakoaga ne hogofulu e mahina. Ko Matakainaga Wilfred Gooch e leveki he la ofisa he magaaho ia i Nigeria, ne fina atu he vahega ke 38 aki ti kotofa ki England. Leveki mogoia e au e la ofisa i Nigeria. He muitua ke he fakafifitakiaga he  Matakainaga Brown, ne loga e tau fenoga haaku ti iloa mitaki mo e fakaalofa ke he tau matakainaga fakahele i Nigeria. Pete kua nakai loga e tau koloa ha lautolu tuga ne fa mahani ke he tau tagata he tau motu monuina, ka kua kitia maaliali e olioli mo e fiafia ha lautolu nukua fakakite ko e moui fai kakano kua nakai fakavē ke he tau tupe mo e tau koloa he tino. He mailoga e tau tuaga ha lautolu, mitaki ha ia ke kitia kua meā, maopoopo, mo e lilifu a lautolu he tau feleveiaaga. Ka o mai a lautolu ke he tau fonoaga, tokologa ne o mai he tau tulaki mo e bolekajas * (tau pasi ne nakai puipui e tau faahi ne talaga he motu ia). Fa tohi he tau pasi nei e tau talahauaga fuluola. Taha ne pehē: “Ko e tau hihina ikiiki he vai kua moua mai e tahi lahi.”

Mooli ha ia he talahauaga ia! Aoga oti e tau laliaga takitaha; ti lafi atu foki ha maua. He 1974 ko Nigeria e motu fakamua i fafo ha United States ke hokotia e numera he tau tagata fakailoa ke he 100,000. Tupuolaola mooli e gahua!

He malikiti nei, ne hoko foki e Nigerian Civil War mai he 1967 ke he 1970. Ti loga e mahina ne mamutu kehe e tau matakainaga he faahi Biafran he Niger River mai he la ofisa. Ne latatonu ni a mautolu ke ta atu e tau mena kai fakaagaaga ki a lautolu. Tuga ne talahau he kamataaga, ne liogi a mautolu mo e falanaki ki a Iehova ti lagaloga e o atu ke he taha faahi he vailele.

Manatu agaia e au e tau fenoga hagahaga kelea ia ke he taha faahi he Niger he foaki e moui ha ko e tau kautau ne mautali ke fakaaoga e tau fana, gagao, mo e falu mena hagahaga kelea. Ko e taha mena ke momole atu he tau kautau he fakatufono ne tuahā, ka kua mua atu e matakutaku ke o atu ke he faahi ha Biafran ne pātakai. Taha mogo, ne fina atu au ke he taha faahi he Niger River ne tafe lahi he pō he vaka lau tagata mai i Asaba ki Onitsha ti fina atu au ke fakamafana e tau leveki i Enugu. Taha fenoga ne fakamafana e au e tau motua he matakavi ko Aba ne poaki ke nakai fakapuho ha molī. Ne fakaoti fakaave e feleveiaaga ha mautolu i Port Harcourt aki e liogi he magaaho ne moumou he tau kautau he fakatufono e tau pā ha Biafran i fafo he taone.

Ko e tau feleveiaaga ia ne aoga lahi ke fakamafana e tau matakainaga fakahele ha tautolu na leveki e Iehova a lautolu mo e foaki age e tau tomatomaaga ne latatonu ke he tuuho mo e kaufakalataha. Ne kautū e tau matakainaga Nigeria he latauaga kelea lahi ia. Fakakite e lautolu kua mua atu e fakaalofa ke he fevihiatiaaki he tau matakau, ti fakatumau e kaufakalataha faka-Kerisiano ha lautolu. Ko e tuaga mitaki mooli ke kau mo lautolu he magaaho kamatamata ia!

He 1969, ko Matakainaga Milton G. Henschel e tagata nofoa he “Peace on Earth” International Assembly he Yankee Stadium i New York, ti lahi e mena haaku ne fakaako he lagomatai ki a ia. Aoga lahi e mena nei ha ko e 1970 ne taute e mautolu e “Men of Goodwill” International Assembly i Lagos, Nigeria. Nakaila leva ia e oti e latauaga he motu, ko e fakaholoaga nei ne kautū ni ha ko e fakamonuina ha Iehova. Ne 17 e vagahau he tau tagata toko 121,128 kua fakalataha ki ai. O mai a Matakainaga Knorr mo Henschel mo e tau tagata ahiahi he tau vakalele ne nō mai he United States mo England ti kitia e papatisoaga faka-Kerisiano ne mua atu e tokologa tali mai he Penetekoso, ko e 3,775 e tutaki foou! He lagomatai ke fakatokatoka e fakaholoaga ia ne liga ko e magaaho ne mua atu e lavelave he moui haaku. Tupu lahi e numera he tau tagata fakailoa ti tokologa lahi mahaki!

Ko e “Men of Goodwill” International Assembly ne o mai toko 121,128 e tagata ne 17 e vagahau kehekehe, putoia e Ibo

He molea e 30 e tau i Nigeria, ne fa gahua au ko e leveki faifano mo e leveki he faahi motu i West Africa. Loto fakaaue mooli e tau misionare ke moua e levekiaga mo e fakamafana ki a lautolu takitokotaha! Ko e fiafia ha ia ke fakamafana ki ai kua nakai nimo a lautolu! Fakaako he gahua nei au ko e fakakite e fiafia fakatagata ko e matapatu ke lagomatai a lautolu ke tupuolamoui mo e fakatumau e malolō mo e kaufakalataha he fakatokatokaaga ha Iehova.

Ko e lagomataiaga ni ha Iehova ati maeke a maua ke fahia ke he tau lekua ha ko e latauaga he motu mo e gagao. Kitia maaliali tumau e fakamonuinaaga ha Iehova. Pehē a Oris:

 “Lagaloga e moua a maua he malaria. Taha magaaho, ne uta a Worth ke he fale gagao i Lagos kua nakai ofoofo. Ne tala mai ki a au to liga nakai moui a ia, ka e fakaaue he malolō a ia! He liu ofo hake, ne tutala a ia hagaao ke he Kautu he Atua ke he nosi ne leveki a ia. Fai magaaho he mole, ne fano au mo Worth ke ahiahi e nosi ko Mr. Nwambiwe, ke feaki e fiafia haana ke he Tohi Tapu. Talia e ia e kupu mooli ti eke mo motua he magaaho fakamui i Aba. Tokologa foki e tagata ne maeke au ke lagomatai, putoia e tau tagata ne malolō ke he Muslim, ti eke mo tau fekafekau tukulele ha Iehova. Fiafia lahi a maua he iloa mo e fakaalofa hofihofi ke he tau tagata Nigeria, aga fakamotu, mo e vagahau ha lautolu.”

Ko e taha fakaakoaga anei: Ke tupuolamoui he kotofaaga ha maua he motu kehe, ne fakaako a maua ke fakaalofa ke he tau matakainaga pete ne kehe lahi e aga fakamotu ha lautolu ke he ha maua.

TAU KOTOFAAGA FOOU

He mole e gahua he Peteli i Nigeria, he 1987 ne moua e maua e kotofaaga foou ko e tau misionare he fonua ke he aelani fuluola ko St. Lucia he Caribbean. Ko e kotofaaga mitaki lahi, ka kua fai paleko foou. Nakai tuga i Aferika ne loga e hoana he tagata taane, ka e hinei i St. Lucia ko e lekua ne nonofo e fifine mo e taane ka e nakai mau. Ko e Kupu malolō he Atua ne omoomoi e tokologa he tau tagata fakaako Tohi Tapu ha maua ke taute e tau hikihikiaga kua lata.

Fakahelehele lahi e au a Oris he 68 e tau he mau a maua

He lolelole fakahaga a maua he momotua, ne totonu e Kau Fakatufono he hiki atu a maua ke he matapatu ofisa he lalolagi katoa i Brooklyn, New York, U.S.A., he 2005. Fakaaue agaia au he tau aho takitaha ki a Iehova ha ko Oris. Ne mate a ia he 2015, ti momoko lahi mahaki au he galo a ia. Ko e hoa mitaki lahi a ia mo e hoana loto fakaalofa hofihofi. Fakahelehele lahi e au a ia he 68 e tau he mau a maua. Iloa e maua ko e puhala ke moua e fiafia he fakamauaga mo e fakapotopotoaga, ko e fakalilifu e ulu pule, atāina ke fakamagalo, tumau e mahani fakatokolalo, mo e fakatātā e fua he agaaga.

Ka hihiga ke lolelole e tau loto, onoono a maua ki a Iehova ke lagomatai mai ke ua fakatauhele e tau foakiaga fakatagata ha maua. He matutaki ai ke taute e tau hikihikiaga, kitia e maua kua holo ki mua tumau e mitaki he tau tuaga, ti mua atu e mitaki nukua fakatoka mai i mua!​—Isaia 60:17; 2 Kori. 13:11.

I Trinidad mo Tobago, fakamonuina e Iehova e gahua he tau matua haaku mo e falu, ti kitia he tau hokotaki foou kua 9,892 ne fakalataha ke he tapuakiaga mooli. I Aruba, tokologa ne gahua ke fakamalolō e fakapotopotoaga ne fakatū fakamua i ai ne fakalataha atu foki au. He aelani ia mogonei kua 14 e fakapotopotoaga malolō lahi. Ma Nigeria, kua malikiti hake e numera he tau tagata fakailoa ke he 381,398. He aelani ko St. Lucia, kua 783 hane lalago e Kautu ha Iehova.

Ko au mogonei kua 90 tumā e tau. Pehē e Salamo 92:14 hagaao ki a lautolu ne to ke he fale a Iehova: “Ka hoko ke he vaha fuakau, ti fua agaia a lautolu; to lalahi mo e lauola a lautolu.” Fakaaue lahi au ke he moui haaku he fekafekauaga ha Iehova. Ko e tufaaga lahi faka-Kerisiano ne moua e au kua fakamalolō au ke fekafekau katoatoa ki a Iehova. Ha ko e fakaalofa mooli ha Iehova kua fakaatā au ke “tupuolamoui . . . ke he tau lotopā he Atua” haaku.​—Sala. 92:13.

^ para. 18 Kikite Awake! ia Mati 8, 1972, lau 24-26.