Skip to content

Skip to table of contents

Tau Fakamoli a Iehova

Fifili e vagahau Faka-Niue

 VALA TALA FAKAAKO 8

Ko e Ha ke Fakakite e Loto Fakaaue?

Ko e Ha ke Fakakite e Loto Fakaaue?

“Kia mahani foki a mutolu ke fakaaue.”​—KOLO. 3:15.

LOLOGO 2 Fakaaue a Mautolu ki a Koe, Iehova

FAKAMAAMAAGA KŪ *

1. Fakakite fēfē he Samaria ne fakamalolō e Iesu e loto fakaaue?

KUA matematekelea lahi e tau tagata taane tokohogofulu. Moua a lautolu he lepela ti nakai amaamanaki ke malolō. He taha aho ne kitia mamao atu e lautolu a Iesu, ko e Faiaoga ne Mua. Logona e lautolu kua fakamalolō e Iesu e tau gagao kehekehe, ti mauokafua ai to maeke a Iesu ke fakamalolō a lautolu. Ne tauui a lautolu: “Ko e Iki na e, ma Iesu, kia fakaalofa mai a koe kia mautolu.” Kua maulu katoatoa e tau tagata taane tokohogofulu. Nakai noa kua fakaaue a lautolu oti ke he totonu ha Iesu. Ka e taha ia lautolu ne lahi atu e logonaaga, ati fakakite haana loto fakaaue * ki a Iesu. Ko e tagata ia ne malolō ko e Samaria, ti omoomoi lahi ke fakaheke e Atua “mo e leo lahi.”​—Luka 17:12-19.

2-3. (a) Ko e ha ne liga kaumahala a tautolu ke fakakite e loto fakaaue? (e) Ko e heigoa ha tautolu ka fakatutala ki ai he vala tala nei?

2 Ke tuga e Samaria, manako a tautolu ke fakakite e loto fakaaue ki a lautolu ne totonu. Ka e he falu magaaho, liga nimo e tautolu ke fakakite e loto fakaaue ke he tau kupu po ke tau gahua.

3 He vala tala nei, to fakatutala ai ke he kakano aoga ma tautolu ke fakakite e loto fakaaue he tau mena ne talahau mo e taute e tautolu. To fakaako mai a tautolu he tau fakafifitakiaga he falu tagata he Tohi Tapu ne loto fakaaue mo e falu ne nakai pihia. Mo e to fakatutala ke he tau puhala pauaki kua maeke a tautolu ke fakakite e loto fakaaue.

 KO E HA KUA LATA A TAUTOLU KE FAKAKITE E LOTO FAKAAUE?

4-5. Ko e ha kua lata a tautolu ke fakakite e loto fakaaue?

4 Fakatoka e Iehova e fakafifitakiaga ma tautolu ke fakakite e loto fakaaue. Taha puhala ne taute e ia e mena nei ko e fakamonuina a lautolu ne fakafiafia a ia. (2 Samu. 22:21; Sala. 13:6; Mata. 10:40, 41) Ti fakamafana he tau Tohiaga Tapu a tautolu ke “fifitaki . . . ke he Atua tuga e tau fanau fakahelehele.” (Efeso 5:1) Ko e matapatu kakano kua lata a tautolu ke fakakite e loto fakaaue ha kua manako a tautolu ke muitua e fakafifitakiaga ha Iehova.

5 Manamanatu ke he taha kakano foki kua manako a tautolu ke fakakite e loto fakaaue ke he falu. Tatai e loto fakaaue mo e kai lolo, kua mua atu e mitaki ka kai mo e falu. Ka logona hifo e tautolu e loto fakaaue, kua fiafia a tautolu. Ka fakakite e tautolu e loto fakaaue, kua fakafiafia e tautolu e falu. Ko e tagata ne loto fakaaue a tautolu ki ai kua iloa ko e laliaga haana ke lagomatai a tautolu, po ke foaki mai taha mena ne lata mo tautolu, kua aoga mooli. Ti ko e fua, kua malolō fakahaga e fakafetuiaga kapitiga ha tautolu mo e tagata ia.

6. Ko e heigoa e falu mena ne tatai e tau kupu fakaaue mo e tau fua moli auro?

6 Aoga e tau manatu fakaaue ne fakakite e tautolu. Pehē e Tohi Tapu: “Ko e tau kupu kua vagahau mo e lata ai kua tuga ne tau fua moli auro ia ke he tau kato ario kua lakuina.” (Fakatai 25:11) Manamanatu la ke he fulufuluola he fua moli auro he lakuina ario! Mo e kua uho lahi mooli ai! Fēfē e logonaaga haau ka moua e taha mena fakaalofa pihia? Ko e tau kupu fakaaue ne tala age e koe ke he falu to liga aoga pihia foki. Manamanatu ke he vala tala nei: To leva e toka he fua moli auro. Ti liga manatu mo e tokiofa pihia he tagata ne fakakite e tautolu e loto fakaaue ki ai e tau mena ia he moui katoa haana.

 FAKAKITE E LAUTOLU E LOTO FAKAAUE

7. Fakakite fēfē e Tavita, tuga ne kitia he Salamo 69:30, mo e falu ne tohia e tau salamo e loto fakaaue ha lautolu?

7 Tokologa e fekafekau he Atua he vahā fakamua ne fakakite e loto fakaaue. Taha ia lautolu ko Tavita. (Totou Salamo 69:30.) Loto fakaaue lahi a ia ke he tapuakiaga meā ti fakakite e tau logonaaga haana ke he tau gahua. Lahi mahaki e foakiaga haana ke talaga e faituga. Fakakite he tau hologa ha Asafo e loto fakaaue he tohi e tau salamo, po ke tau lologo fakaheke. He taha lologo, ne fakaheke, po ke fakaaue a lautolu ke he Atua mo e talahau e nava ke he “tau mana” ha Iehova. (Sala. 75:1) Maaliali ai, manako a Tavita mo e tau hologa ha Asafo ke fakakite ki a Iehova e loto fakaaue lahi ha lautolu ma e tau monuina oti ne moua mai ia Ia. Maeke nakai a koe ke manamanatu ke he tau puhala ke fifitaki e tau salamo ia?

Ko e heigoa he tohi ha Paulo ke he tau Roma ne fakaako mai hagaao ke he fakakite he loto fakaaue? (Kikite paratafa 8-9) *

8-9. Fakakite fēfē he aposetolo ko Paulo e loto fakaaue ke he tau matakainaga haana, ti liga ko e heigoa e fua?

8 Ko e aposetolo ko Paulo ne loto fakaaue ke he tau matakainaga haana ti fakakite ai ke he puhala ne tutala a ia hagaao ki a lautolu. Fakaaue tumau a ia he tau liogi haana ke he Atua ma lautolu. Fakakite foki e ia e loto fakaaue haana he magaaho ne tohi atu ki a lautolu. He 15 e kupu tohi fakamua he Roma 16, ne talahau e Paulo e tau higoa he tau matakainaga Kerisiano toko 27. Manatu pauaki e Paulo a Pisila mo Akula “ne tuku hifo ha laua a na ua” ke lata mo ia, ti fakamaama hagaao ki a Fipe “ko e lagomatai ke he tau tagata tokologa,” putoia a Paulo. Nava a ia ke he tau matakainaga fakahelehele ne gahua malolō.​—Roma 16:1-15.

9 Mailoga e Paulo kua nakai mitaki katoatoa e tau matakainaga haana, ka e fifili a ia ke hagaaki ke he tau mahani mitaki ha lautolu he matahiku he tohi haana ke he tau Roma. Liga atihake mooli e tau matakainaga ia ke logona e tau talahauaga ha Paulo ne totou fakaleolahi ke he fakapotopotoaga! Ko e fua, nakai noa ne malolō lahi e fakafetuiaga kapitiga ha lautolu mo Paulo. Fakaaue tumau nakai a koe ke he tau mena mitaki ne talahau po ke taute he tau matakainaga he fakapotopotoaga haau?

10. Ko e heigoa kua fakaako e tautolu he puhala ne fakakite e Iesu e loto fakaaue ke he tau tutaki haana?

10 He tau matakupu ha Iesu ke he falu fakapotopotoaga i Asia Tote, ne fakakite e ia e loto fakaaue ke he gahua ne taute he tau tutaki haana. Ma e fakatai, kamata e fekau haana ke he fakapotopotoaga i Tuataira he pehē: “Kua iloa e au hau a tau gahua, mo e hau a fakaalofa, mo e hau a fekafekau mai, mo e hau a tua, mo e hau a fakauka, mo e hau a tau gahua, kua mua foki e tau mena fakamui ke he tau mena fakamua.” (Fakakite. 2:19) Talahau e Iesu kua lahi e gahua ha lautolu ti nava foki ma e tau aga ne omoomoi a lautolu ke taute e tau gahua mitaki. Pete kua lata a Iesu ke fakatonu falu i Tuataira, kamata mo e fakahiku agaia e ia e fekau haana aki e tau kupu atihake. (Fakakite. 2:25-28) Manamanatu la ke he pule ha Iesu ko e ulu he tau fakapotopotoaga oti. Nakai lata a ia ke fakaaue ki a tautolu ma e gahua ne taute ma haana. Pete ia, ne eketaha a ia ke fakakite e loto fakaaue. Ko e fakafifitakiaga mitaki ha ia ne fakatoka e ia ma e tau motua!

NAKAI FAKAKITE E LAUTOLU E LOTO FAKAAUE

11. Tuga ne fakakite ia Heperu 12:16, ko e heigoa e aga ha Esau ke he tau mena tapu?

11 Momoko ai, nakai fakakite he falu tagata he Tohi Tapu e loto fakaaue. Ma e fakatai, pete he feaki hake a Esau he tau matua ne fakaalofa mo e fakalilifu ki a Iehova, ne nakai loto fakaaue a ia ke he tau mena tapu. (Totou Heperu 12:16.) Puhala fe ne kitia e nakai loto fakaaue  haana? Fakatepetepe a Esau ke fakafua age e tufaaga uluaki haana ke he tehina ko Iakopo ke moua e polu mena kai. (Kene. 25:30-34) He mogo fakamui, ne momoko lahi a Esau ke he fifiliaga ne taute e ia. Ka kua nakai loto fakaaue a ia ke he tufaaga haana, ti nakai lata a ia ke gūgū he nakai moua e tufaaga he uluaki.

12-13. Puhala fe ne fakakite he tau Isaraela e nakai loto fakaaue, ti ko e heigoa e fua?

12 Loga e kakano he tau Isaraela ke fakakite e loto fakaaue. Ne fakatokanoa a lautolu mai he fakatupa he mole e fakahoko e Iehova e Tau Malaia ne Hogofulu ki Aikupito. Ti fakahao he Atua a lautolu mai he matematekelea he tamate e kautau katoa ha Aikupito he Tahi Kula. Loto fakaaue lahi e tau Isaraela mo e uhu e lologo kautū he fakaheke ki a Iehova. Ka e tumau nakai e loto fakaaue ha lautolu?

13 Magaaho ne feleveia e tau Isaraela mo e tau lekua foou, ne nimo vave e lautolu e tau mena mitaki oti kua taute e Iehova ma lautolu. Fakakite ai e nakai loto fakaaue ha lautolu. (Sala. 106:7) He puhala fe? “Ti loma ai e fakapotopotoaga katoa he fanau a Isaraela kia Mose mo Arona,” ka ko e kakano mooli ko Iehova ne loma e lautolu. (Esoto 16:2, 8) Ne mamahi a Iehova he nakai loto fakaaue e tau tagata haana. Fai magaaho he mole ne talahau tuai e ia to mamate e atuhau katoa ha Isaraela he tutakale, ko Iosua mo Kalepa ni ka momoui. (Nume. 14:22-24; 26:65) Kia kitekite la ke he tau puhala ke kalo mai he tau fakafifitakiaga kelea nei ka e mumuitua ke he tau fakafifitakiaga mitaki.

FAKAKITE E LOTO FAKAAUE HE VAHĀ NEI

14-15. (a) Puhala fe he tau hoa mau ka fakakite kua loto fakaaue a laua ko e taha ke he taha? (e) Puhala fe ka fakaako he tau matua e tau fanau ke fakakite e loto fakaaue?

14 I loto he magafaoa. Aoga ke he magafaoa katoa ka igatia a lautolu mo e fakakite e loto fakaaue. Ka lahi e loto fakaaue he tau hoa mau ki a laua ni, to tata lahi a laua. Mukamuka foki a laua ke fefakamagaloaki. Ko e taane ne loto fakaaue ke he hoana haana kua mailoga e tau mena mitaki ne talahau mo e taute foki he hoana ti “kua fakaheke atu kia ia.” (Fakatai 31:10, 28) Ti ko e hoana ne lotomatala kua tala age fakatonu ke he taane haana e tau mena ne loto fakaaue a ia ke he taane.

15 Tau matua, puhala fe ka fakaako e tau fanau ha mutolu ke fakakite e loto fakaaue? Manatu to fifitaki he fanau ha mutolu e tau mena ne talahau mo e taute e mutolu. Kia fakatoka e fakafifitakiaga mitaki he pehē fakaaue ka taute he fanau e tau mena mitaki ma  mutolu. Lafi ki ai, fakaako e fanau ke pehē fakaaue ke he tau tagata ne taute e tau gahua ma lautolu. Lagomatai e tau fanau ha mutolu ke maama ko e fakakite e loto fakaaue kua hake mai he loto mo e to aoga lahi e tau kupu ha lautolu. Ma e fakatai, ko e fifine fuata ko Clary ne pehē: “He 32 e tau he matua fifine haaku, ne toka fakaofo he matua taane haaku a ia mo e tolu e tama ke feaki tokotaha. Magaaho ne 32 e tau haaku, ne manamanatu au ke he uka he tuaga he matua fifine haaku he mogoia. Ti tala age au kua loto fakaaue lahi au ke he tau foakiaga oti haana ke feaki au mo e lafu tugaane haaku. Foou nei, ne tala mai a ia ki a au kua mafanatia lahi e loto haana ha ko e tau kupu haaku, ti fa manamanatu a ia ki ai mo e fakafiafia tumau e aho haana.”

Fakaako e tau fanau ha mutolu ke fakakite e loto fakaaue (Kikite paratafa 15) *

16. Talahau e fakafifitakiaga he fakakite e loto fakaaue ka atihake e falu.

16 I loto he fakapotopotoaga. Ka fakakite e tautolu e loto fakaaue ke he tau matakainaga, kua atihake e tautolu a lautolu. Ma e fakatai, ko Jorge ko e motua ne 28 e tau he moui ne gagao lahi. Nakai maeke a ia ke fina atu he tau feleveiaaga ke he taha e mahina. Pete he liu atu a ia ke he tau feleveiaaga, nakaila maeke a ia ke taute e tau vala he fakaholoaga. Pehē a Jorge: “Logona hifo e au e nakai aoga ha ko e kaupāaga haaku mo e nakai maeke ke taute e tau kotofaaga he fakapotopotoaga. Ka e oti e taha feleveiaaga, ne pehē e matakainaga taane ki a au: ‘Manako au ke fakaaue ke he fakafifitakiaga mitaki ne fakatoka e koe ma e magafaoa haaku. Fiafia lahi mooli a mautolu ke he tau lauga haau he tau tau gahoa kua mole. Ne lagomatai ai a mautolu ke malolō fakaagaaga.’ Aamotia au ti kamata ke tagi. Ko e tau kupu ia haana ne manako au ke logona.”

17. Tuga ne talahau ia Kolose 3:15, puhala fe ka fakakite e tautolu e loto fakaaue ke he fakamokoi ha Iehova?

17 Ke he Atua fakamokoi ha tautolu. Loga lahi e tau mena kai fakaagaaga ne foaki mai e Iehova. Ma e fakatai, moua e tautolu e tau takitakiaga aoga he tau feleveiaaga, tau mekasini, mo e tau faahi kupega hila ha tautolu. Kua logona nakai e koe e lauga, totou e vala tala, po ke kitekite ke he broadcast ti manamanatu, ‘Ko e mena tonu ia kua lata mo au’? Puhala fe ka fakakite e tautolu e loto fakaaue ki a Iehova? (Totou Kolose 3:15.) Taha puhala ko e fakaaue tumau ki a ia he tau liogi ha tautolu ma e tau mena fakaalofa mitaki nei.​—Iako. 1:17.

Lagomatai ke fakameā e Fale he Kautu ko e puhala mitaki lahi ke fakakite ai e loto fakaaue (Kikite paratafa 18)

18. Ko e tau puhala fe ka fakakite e tautolu e loto fakaaue ma e ha tautolu a Fale he Kautu?

18 Fakakite foki e tautolu e loto fakaaue ki a  Iehova he leveki e tau matakavi tapuakiaga ha tautolu ke meā mo e maopoopo. Fakalataha tumau a tautolu ke fakameā mo e leveki e tau Fale he Kautu, mo lautolu ne fakagahua e tau leo fakatagi mo e tau vitiō he fakapotopotoaga ke fakaaoga fakamitaki ai. Ka leveki fakamitaki e tautolu e tau Fale he Kautu, to leva e mau mo e to gahoa e mena lalahi ke fakafoou. He puhala pihia, to maeke ke fakaaoga e tupe ia ke talaga mo e fakafoou e falu Fale he Kautu he lalolagi katoa.

19. Ko e heigoa haau ne fakaako mai he mena ne tupu ke he leveki takaiaga mo e hoana haana?

19 Ki a lautolu kua gahua malolō ma tautolu. Ka fakakite e tautolu e loto fakaaue, to liga hiki he tau kupu ia e logonaaga he taha tagata ke he tau paleko haana. Manamanatu ke he mena ne tupu ke he leveki takaiaga mo e hoana haana. He oti e fakamatala he taha aho he vahā makalili, ne liliu mai a laua ki kaina mo e mategūgū. Kua makalili lahi mahaki ti mohe e hoana mo e peleue mafana. He mogo pogipogi, tala age a ia ke he taane haana kua nakai fahia a ia ke matutaki ke he gahua faifano. Ka e taha magaaho he pogipogi ia, ne hoko mai e tohi he la ofisa ne tu ai e higoa haana. I loto he tohi ne nava mafanatia ki a ia ma e haana fekafekauaga mo e fakauka. Talahau ai kua uka mooli ke hiki e nonofoaga he tau faahi tapu takitaha. Pehē e taane haana: “Aamotia lahi e navaaga ia ke he hoana haaku ti nakai liu a ia tutala ke fakaoti e gahua faifano. Ti lagaloga he fakamafana e ia au ke matutaki ka manamanatu au ke fakaoti e gahua.” Ko e hoa mau ia ne fakatumau ke gahua faifano ke teitei 40 e tau.

20. Ko e heigoa ka lali a tautolu he tau aho takitaha ke taute, ti ko e ha?

20 Kia lali a tautolu he tau aho takitaha ke fakakite e loto fakaaue ke he tau mena ne talahau mo e taute e tautolu. Ko e tau kupu po ke tau gahua mafanatia ha tautolu kua liga felauaki tonu mo e tau mena kua lata ma e taha tagata ke fahia he lalolagi nakai loto fakaaue nei. Ka fakakite e tautolu e loto fakaaue to atihake e tau fakafetuiaga kapitiga kua tumau. Ka e mua atu, to fifitaki e tautolu e fakamokoi mo e loto fakaaue he ha tautolu a Matua ko Iehova.

LOLOGO 148 Foaki Mai e Koe e Tama Fuataha Haau

^ para. 5 Ko e heigoa ha tautolu ka fakaako mai ia Iehova, Iesu, mo e Samaria ne lepela hagaao ke he fakakite he loto fakaaue? He vala tala nei to kumikumi ke he tau fakafifitakiaga ia mo e falu foki. To fakatutala a tautolu ke he kakano ne aoga lahi ke fakakite e loto fakaaue mo e onoono ke he falu puhala pauaki ke taute pihia.

^ para. 1 FAKAMAAMA E TALAHAUAGA: Ke loto fakaaue ke he taha tagata po ke taha mena kua kakano ke mailoga e aoga he tagata ia po ke mena ia. Maeke ai ke hagaao ke he tau logonaaga fakaaue lahi mai he loto.

^ para. 55 FAKAMAAMA E FAKATINO: Ko e tohi ha Paulo ne totou ke he fakapotopotoaga Roma; Akula, Pisila, Fipe, mo e falu ne fiafia ke logona e tau higoa ha lautolu.

^ para. 57 FAKAMAAMA E FAKATINO: Ko e matua fifine ne lagomatai e tama fifine haana ke fakakite e loto fakaaue ke he fakafifitakiaga mitaki ne fakatoka he matakainaga fifine motua.