Skip to content

Skip to table of contents

Tau Fakamoli a Iehova

Fifili e vagahau Faka-Niue

Eke kia a Iakopo mo tupuna he Mesia ha kua fakafua mai e ia e tonuhia ha Esau ko e tama uluaki?

Tau Hūhū he Tau Tagata Totou

Tau Hūhū he Tau Tagata Totou

He tau vahā ha Isaraela, ko e tama taane uluaki ni kia kua lata ke eke mo tupuna he Mesia?

He tau magaaho kua mole ne manatu pihia a tautolu ha ko e talahauaga ia Heperu 12:16. Talahau ai ko Esau “kua fakateaga ke he tau mena tapu” ti foaki ki a Iakopo e “tufaaga uluaki hana ke fakafua aki e taha mena kai.” Manatu a tautolu ko e magaaho ne moua e Iakopo e “tufaaga uluaki,” kua putoia he tau mena nei e lilifu he eke mo tupuna he Mesia.​—Mataio 1:2, 16; Luka 3:23, 34.

Ka ko e fakaako fakamitaki e falu tala he Tohi Tapu kua fakakite ne nakai ni ko e tama taane uluaki ke eke mo tupuna he Mesia. Kia manamanatu la tautolu ke he falu tala nei:

Ko e tama taane uluaki ha Iakopo ne fanau mo e hoana ko Lea ko Reupena. Ko e tama taane fakamua ha Iakopo mo Rahela ko Iosefa. Ko e magaaho ne mahani feuaki a Reupena, ne galo e tonuhia haana ko e tama uluaki ti moua e Iosefa e tonuhia nei. (Kenese 29:31-35; 30:22-25; 35:22-26; 49:22-26; 1 Nofoaga he Tau Patuiki 5:1, 2) Ka e nakai tupu mai e Mesia ia Reupena po ko Iosefa. Tupu mai ia Iuta, ko e tama taane ke fāaki ha Iakopo mo Lea.​—Kenese 49:10.

Ne tokolima foki e tupuna he Mesia ne tohi ia Luka 3:32, ti tuga ko e tau tama uluaki oti a lautolu. Ma e fakatai, ko Poasa ko e matua taane ha Opeta, ko Opeta ko e matua taane ha Iese.​—Ruta 4:17, 20-22; 1 Nofoaga he Tau Patuiki 2:10-12.

Ko e tama taane ha Iese ko Tavita ne nakai ko e tama uluaki. Ko ia e tama fakahiku he tau tama taane tokovalu. Ka e tupu mai e Mesia ia Tavita. (1 Samuela 16:10, 11; 17:12; Mataio 1:5, 6) Pihia foki, ko e tupuna he  Mesia ko Solomona ne nakai ko e tama uluaki ha Tavita.​—2 Samuela 3:2-5.

Nakai kakano e mena nei kua fakateaga e tama taane uluaki. Moua he tama taane uluaki e tau kotofaaga ne nakai moua he falu tama taane. Mahani ai, ko ia e ulu ke uaaki he magafaoa, ti moua e ia fakalahiua e tufaaga.​—Kenese 43:33; Teutaronome 21:17; Iosua 17:1.

Ka ko e tonuhia he tama uluaki kua maeke ke hiki mai he taha tama taane ke he taha tama taane. He fakafano kehe e Aperahamo a Isamaeli, ne hiki atu e tonuhia haana ko e tama uluaki ki a Isaako. (Kenese 21:14-21; 22:2) Fitā he fakatutala e tautolu, ko e tonuhia ha Reupena ko e tama uluaki ne hiki ki a Iosefa.

Ko e heigoa mogoia e manatu ne talahau he aposetolo ko Paulo ia Heperu 12:16? Totou ai e tautolu: “Neke ha i ai ha tagata feuaki, po ke taha kua fakateaga ke he tau mena tapu, tuga na Esau, ko ia ne āge e tufaaga uluaki hana ke fakafua aki e taha mena kai.”

Nakai tutala ai a Paulo hagaao ke he tau tupuna he Mesia. Ka e foaki e ia e hatakiaga ke he tau Kerisiano. Tala age a ia ki a lautolu: “Kia eke fakamolemole e tau puhala ma e tau hui ha mutolu” neke “nakai moua he taha tagata e fakaalofa noa he Atua.” Momoko ai, tupu e mena nei ka taute e lautolu e mahani feuaki. (Heperu 12:12-16) He mena ne tupu, to tuga a Esau a lautolu “kua fakateaga ke he tau mena tapu” ka e loto ke fakamakona e tau manako ni haana.

Hagaao ke he aga fakamotu he magaaho ia, liga moua e Esau e lilifu he falu magaaho ke foaki e tau poa ki a Iehova. (Kenese 8:20, 21; 12:7, 8; Iopu 1:4, 5) Ka kua hagaaki lahi a Esau ke he tau manako ni haana ti foaki e ia e tau kotofaaga haana ko e tama uluaki ma e polu atasemo. Liga manako a Esau ke kalo kehe he matematekelea ne talahau tuai e Iehova ka tupu ke he fanau ha Aperahamo. (Kenese 15:13) Fakakite foki e ia kua fakateaga a ia ke he tau mena tapu he faihoana ke he tokoua e fifine pouliuli, ko e mena ne fakamomoko lahi e tau matua haana. (Kenese 26:34, 35) Kehe mamao a ia mai ia Iakopo ne mataala ke faihoana ni ke he fekafekau he Atua mooli!​—Kenese 28:6, 7; 29:10-12, 18.

Ko e heigoa kua fakaako he tau tala Tohi Tapu nei ki a tautolu hagaao ke he tau tupuna he Mesia? Falu ia lautolu ko e tau tama taane uluaki, falu ne nakai. Ko e mena nei ne maama mo e talia he tau Iutaia. Iloa fēfē e tautolu e mena nei? Ha kua talahau e lautolu na tupu mai a Keriso he magafaoa ha Tavita, ko e tama taane fakahiku ha Iese.​—Mataio 22:42.