Skip to content

Skip to table of contents

Tau Fakamoli a Iehova

Fifili e vagahau Faka-Niue

Holo ki Mua he Eke mo Tagata Fakaagaaga!

Holo ki Mua he Eke mo Tagata Fakaagaaga!

“Kia mahani a mutolu ke lata mo e [a]gaga.”​—KALATIA 5:16.

TAU LOLOGO: 136, 10

1, 2. Ko e heigoa ne mailoga he taha matakainaga taane ki a ia, ti ko e heigoa ne taute e ia?

KO Robert ne papatiso he fuata mui, ne nakai mua e aoga he kupu mooli ke he moui haana. Pehē a ia: “Nakai fai mena hepe au ne taute ka kua nakai felauaki e tau logonaaga haaku mo e tau matagahua. Tuga na malolō fakaagaaga au he fano ke he tau feleveiaaga oti mo e paionia fakakū he falu magaaho he tau. Ka e fai mena ne galo.”

2 Nakai maama e Robert e mena ne galo ato mole e faihoana. Ne pelē a ia mo e hoana haana falu mogo he fehūhūaki e tau hūhū Tohi Tapu. Iloa mitaki he hoana haana e Tohi Tapu ti mukamuka ke tali e tau hūhū. Ka e nakai fa iloa e Robert e tau tali ti fuafuakelea a ia. Pehē a ia: “Tuga kua nakai iloa e au ha mena. Manamanatu hifo au ki a au, ‘Ke eke au mo ulu fakaagaaga he hoana haaku, kua lata au ke taute taha mena.’” Ti fai mena a ia ne taute. Pehē a ia: “Ne fakaako e au e Tohi Tapu ti fakaako tumau foki, ati kamata e tau vala kehekehe ke tuku fakalataha. Moua e au e maamaaga ti mua atu kua feaki e au e fakafetuiaga tata mo Iehova.”

3. (a) Ko e heigoa ka fakaako e tautolu mai he tala ha Robert? (e) Ko e heigoa e tau manatu aoga ka fakatutala a tautolu mogonei ki ai?

3 Maeke a tautolu ke iloa e tau fakaakoaga aoga mai he tala ha  Robert. Liga fai lotomatala Tohi Tapu a tautolu ti ō tumau he tau feleveiaaga mo e gahua he fonua, ka e nakai taute he mena nei a tautolu ke manamanatu fakaagaaga. Po ke fitā he eketaha a tautolu ke lahi e manamanatu fakaagaaga ka e he magaaho ka kumikumi hifo ki a tautolu ni kua kitia ai e tau puhala ka maeke ia tautolu ke holo ki mua. (Filipi 3:16) He vala tala nei, to tali e tautolu tolu e hūhū aoga: (1) Ko e heigoa ka lagomatai a tautolu ke iloa e tuaga fakaagaaga ha tautolu? (2) Ko e heigoa kua lata ke taute e tautolu ke tupu malolō lahi e tuaga fakaagaaga? (3) Lagomatai fēfē he tuaga malolō fakaagaaga ha tautolu e tau momoui ha tautolu he tau aho takitaha?

PUHALA KE ILOA KUA MANAMANATU FAKAAGAAGA A TAUTOLU

4. Ko hai ne hagaao ki ai e fakatonuaga ia Efeso 4:23, 24?

4 Ka kamata a tautolu ke fekafekau ke he Atua, taute e tautolu e tau hikihikiaga ne lauia e tau faahi oti he tau momoui ha tautolu. Nakai oti e puhala nei ka papatiso a tautolu. Tala mai he Tohi Tapu: “Kia fakafou a mutolu ke he manako he tau loto ha mutolu.” (Efeso 4:23, 24) Ha kua nakai mitaki katoatoa a tautolu, lata a tautolu ke taute tumau e tau hikihikiaga. Pete foki ka fekafekau a tautolu ke he loga e tau tau, lata a tautolu ke fakamalolō tumau ha tautolu a fakafetuiaga mo ia.​—Filipi 3:12, 13.

5. Ko e heigoa e tau hūhū ka lagomatai ke iloa kaeke kua manamanatu fakaagaaga a tautolu?

5 He ikiiki po ke momotua a tautolu, lata ke kumikumi hifo fakamooli ki a tautolu ni. Hūhū hifo: ‘Mailoga nakai e au kua lahi fakahaga e manamanatu fakaagaaga haaku? Kua eke fakahaga nakai au ke tuga e Keriso? Ko e heigoa kua fakakite he aga mo e puhala he mahani haaku ke he tau feleveiaaga? Fakakite fēfē he tau fakatutalaaga haaku e mena ne manako mooli au he moui? Ko e heigoa ne fakakite hagaao ki a au ke he haaku a tau aga fakaako, tau mena tui mo e tau tauteuteaga, mo e puhala ne fehagai ke he tau fakatonuaga? Tali atu fēfē au ka kamatamata ke taute e mena hepe? Kua eke nakai au mo Kerisiano motua fakaagaaga?’ (Efeso 4:13) Maeke he tau hūhū nei ke lagomatai a tautolu ke kitia e lahi he tupu fakaagaaga ha tautolu.

6. Ko e heigoa foki falu mena ka lagomatai a tautolu ke iloa kaeke kua manamanatu fakaagaaga a tautolu?

6 Ha ha i ai e tau magaaho kua manako a tautolu ke he falu ke lagomatai a tautolu ke iloa kua manamanatu fakaagaaga a tautolu. Fakamaama he aposetolo ko Paulo ko e tagata he tino kua nakai maama ko e puhala moui haana kua nakai fakafiafia e Atua. Ka ko e tagata manamanatu fakaagaaga kua maama e puhala ne kitia he Atua e tau tutūaga. Iloa e ia kua nakai talia e Iehova e tau mena he tino. (1 Korinito 2:14-16; 3:1-3) Ko e tau motua ne moua e finagalo a Keriso ne mailoga mafiti ka kamata e tau matakainaga ke mahani he puhala he tino, ti lali e tau motua ke lagomatai a lautolu. Ka lali e tau motua ke lagomatai a tautolu, to talia nakai e tautolu e lagomatai ha lautolu mo e taute e tau hikihikiaga kua lata? Ka taute pihia, to fakakite e tautolu kua manako mooli  a tautolu ke tupu malolō fakaagaaga.​—Fakamatalaaga 7:5, 9.

KIA MALOLŌ LAHI FAKAAGAAGA

7. Iloa fēfē e tautolu ko e tagata manamanatu fakaagaaga kua nakai ni iloilo ke he Tohi Tapu?

7 Ko e iloilo ke he Tohi Tapu ne nakai koenaia ke moua e tautolu e manamanatu fakaagaaga. Lahi e mena ne iloa he Patuiki ko Solomona hagaao ki a Iehova, ti fakamau foki e falu kupu pulotu ha Solomona he Tohi Tapu. He magaaho fakamui, ne lolelole e fakafetuiaga haana mo Iehova ti nakai tumau e mahani fakamooli haana. (1 Tau Patuiki 4:29, 30; 11:4-6) Ko e heigoa taha mena foki ne lata a tautolu ke lafi ke he iloilo he Tohi Tapu? Lata a tautolu ke matutaki ke fakamalolō e tua. (Kolose 2:6, 7) Taute fēfē e tautolu e mena nei?

8, 9. (a) Ko e heigoa ka lagomatai a tautolu ke fakamalolō e tua? (e) Ko e heigoa e foliaga ha tautolu ka fakaako mo e manamanatu fakahokulo? (Kikite fakatino he kamataaga.)

8 He senetenari fakamua, fakamafana he aposetolo ko Paulo e tau Kerisiano ke “hohoko atu . . . ke he katoatoaga.” (Heperu 6:1) Fakagahua fēfē e tautolu e fakatonuaga ia he vahā nei? Taha puhala aoga ko e fakaako e tohi ‘Kia Fakatumau a Mutolu ke he Fakaalofa he Atua.’ To lagomatai he mena nei a koe ke maama e puhala ke fakaaoga e tau matapatu fakaakoaga he Tohi Tapu he moui haau. Ka fitā a koe he fakaako e tohi ia, ha ha i ai foki falu tohi ka fakaako e koe ka lagomatai ke malolō e tua haau. (Kolose 1:23) Lata foki a tautolu ke manamanatu fakahokulo ke he mena ne fakaako, mo e ole ki a Iehova ke lagomatai a tautolu ke kitia e puhala ke fakagahua ai.

9 Ka fakaako mo e manamanatu fakahokulo a tautolu, ko e foliaga ha tautolu kua lata ke feaki e manako hokulo ke fakafiafia mo e omaoma ki a Iehova. (Salamo 40:8; 119:97) Lata foki e tautolu ke tiaki e tau mena ka taofi a tautolu mai he tupu fakaagaaga.​—Tito 2:11, 12.

10. Ko e heigoa he tau fuata ikiiki ka taute ke malolō fakahaga e tuaga fakaagaaga?

10 Kaeke ko e fuata a koe, fai foliaga fakaagaaga nakai a koe? Taha e matakainaga taane ne fekafekau he Peteli ne fa tutala mo e tau fuata ikiiki ne amanaki ke papatiso he tau toloaga takaiaga ti hūhū ki a lautolu hagaao ke he tau foliaga fakaagaaga. Kitia e ia kua tokologa ne fitā he manamanatu fakahokulo ke he puhala kua manako a lautolu ke fekafekau ki a Iehova he tau vahā i mua. Falu kua pulega ke fekafekau mau ki a Iehova po ke hiki ke he matakavi  ne manako ke tokologa e tagata fakailoa. Ka e falu ia lautolu ne nakai iloa ke tali e hūhū haana. Kakano kia kua logona hifo kua nakai lata a lautolu ke fai foliaga fakaagaaga? Kaeke ko e tagata fuata a koe, hūhū hifo: ‘Fano kia au ke he tau feleveiaaga mo e gahua he fonua ha ko e manako he tau matua haaku? Po ke moua nakai e au e fakafetuiaga ni haaku mo e Atua?’ Mooli, lata a tautolu oti ke fai foliaga fakaagaaga, he ikiiki po ke momotua a tautolu. Ko e tau foliaga nei to lagomatai a tautolu ke malolō fakahaga e tuaga fakaagaaga.​—Fakamatalaaga 12:1, 13.

11. (a) Ko e heigoa ha tautolu kua lata ke taute ke manamanatu fakaagaaga? (e) Ko e heigoa e fakafifitakiaga he Tohi Tapu ka muitua e tautolu?

11 Mole e kitia e tautolu e tau mena kua lata ke holo ki mua, lata a tautolu ke kamata ke taute e tau hikihikiaga. Aoga lahi e mena nei ki a tautolu ha kua lauia ai e moui po ke mate. (Roma 8:6-8) Nakai amanaki a Iehova ki a tautolu ke mitaki katoatoa, ti tuku mai e ia ki a tautolu e agaaga tapu haana ke lagomatai a tautolu. Ka e lata agaia a tautolu ke gahua fakamalolō. Ko e Matakainaga ko John Barr ne fekafekau he Kau Fakatufono, ne talahau e ia hagaao ke he Luka 13:24 ti pehē: “Tokologa ne kaumahala ha kua nakai fakamakamaka a lautolu ke tupu malolō.” Lata a tautolu ke tuga a Iakopo ne laga mo e agelu ti nakai fakalolelole ato moua e ia e fakamonuina. (Kenese 32:26-28) Pete ko e mena fiafia ke fakaako e Tohi Tapu, lata a tautolu ke nakai amanaki ko e Tohi Tapu ko e pepa fakafiafia. Lata a tautolu ke eketaha ke kumi e tau kupu mooli uho lahi ke lagomatai a tautolu.

12, 13. (a) Ko e heigoa ka lagomatai a tautolu ke fakagahua e Roma 15:5? (e) Lagomatai fēfē he fakafifitakiaga mo e fakatonuaga ha Peteru a tautolu? (i) Ko e heigoa haau ka taute ke tupu malolō fakaagaaga? (Kikite puha “ Tau Mena ka Taute e Koe ke Tupu Fakaagaaga.”)

 12 Ka eketaha a tautolu ke tupu fakaagaaga, to lagomatai he agaaga tapu a tautolu ke hiki e puhala manamanatu ha tautolu. Fano ni fakahaga ti maeke a tautolu ke iloa ke manamanatu tuga a Keriso. (Roma 15:5) Lagomatai he agaaga tapu a tautolu ke huo kehe e tau manako kelea mo e feaki e tau mahani kua fakafiafia e Atua. (Kalatia 5:16, 22, 23) Ka mailoga e tautolu kua hagaaki a tautolu ke he tau mena he tino po ke tau fakafiafiaaga, lata a tautolu ke ua fakalolelole. Kia ole tumau ki a Iehova ma e agaaga tapu ke lagomatai a tautolu ke hagaaki ke he tau mena hako. (Luka 11:13) Manatu e aposetolo ko Peteru. Nakai manamanatu tumau a ia tuga a Keriso. (Mataio 16:22, 23; Luka 22:34, 54-62; Kalatia 2:11-14) Ka e nakai fakalolelole a ia, ti lagomatai e Iehova a ia. Fano ni fakahaga ti fakaako a Peteru ke manamanatu tuga a Keriso. Ti maeke foki a tautolu ke taute pihia.

13 Talahau e Peteru he mogo fakamui e tau mahani ka lagomatai a tautolu. (Totou 2 Peteru 1:5-8.) Lata a tautolu ke eketaha ke feaki e mahani fakalatalata, fakauka, fakaalofa ke he tau matakainaga, mo e falu mahani mitaki foki. Maeke a tautolu ke hūhū hifo he tau aho takitaha, ‘Ko e heigoa e mahani kua lata au ke gahua ki ai he aho nei ka lagomatai au ke malolō fakahaga e tuaga fakaagaaga?’

FAKAGAHUA E TAU MATAPATU FAKAAKOAGA HE TOHI TAPU HE TAU AHO OTI

14. Maeke fēfē he manamanatu fakaagaaga ke lauia e tau momoui ha tautolu?

14 Ka manamanatu a tautolu tuga a Keriso, to lauia ha tautolu a tau mahani he gahuaaga po ke aoga, puhala vagahau, mo e puhala taute fifiliaga he tau aho takitaha. Ko e tau fifiliaga ha tautolu to fakakite kua lali a tautolu ke fifitaki a Keriso. Ha kua manamanatu fakaagaaga, kua nakai manako a tautolu ke taute ha mena ke moumou ha tautolu a fakafetuiaga mo Iehova. Ka kamatamata a tautolu ke taute taha mena hehē, to lagomatai he tuaga fakaagaaga ha tautolu a tautolu ke totoko e kamatamata. Ato taute e tautolu e fifiliaga, to fakamanou a tautolu mo e hūhū hifo: ‘Ko e heigoa e tau matapatu fakaakoaga he Tohi Tapu ka lagomatai au? Ko e heigoa ha Keriso ka taute he tuaga nei? Ko e heigoa ka fakafiafia a Iehova?’ Lata a tautolu ke fakamahani ke manamanatu ke he puhala nei. Kia fakatutala a tautolu ke he falu tuaga ka tupu e mena nei. He tau tuaga takitaha, to onoono a tautolu ke he matapatu fakaakoaga he Tohi Tapu ka lagomatai a tautolu ke taute e fifiliaga pulotu.

15, 16. Maeke fēfē he manamanatu tuga a Keriso ke lagomatai a tautolu ke taute e fifiliaga pulotu hagaao ke he (a) fifili e hoa mau? (e) fifili e tau kapitiga ha tautolu?

15 Fifili e hoa mau. Ko e matapatu fakaakoaga he Tohi Tapu kua moua ia 2 Korinito 6:14, 15. (Totou.) Talahau fakamaali e Paulo ko e tau tagata manamanatu fakaagaaga kua nakai onoono ke he tau mena tuga e tau tagata he tino. Maeke fēfē he matapatu fakaakoaga nei ke lagomatai a koe ke fifili e hoa mau?

16 Fifili e tau kapitiga ha tautolu. Ko e matapatu fakaakoaga he Tohi Tapu kua moua ia 1 Korinito 15:33. (Totou.) Ko e tagata manamanatu fakaagaaga kua nakai kapitiga mo e tau tagata ka fakalolelole e tua haana. Manamanatu ke he puhala ka fakagahua e koe e matapatu fakaakoaga nei he tau tutūaga kehekehe. Ma e fakatai, to maeke fēfē ke lagomatai a koe ke taute e tau fifiliaga ke matutaki mo e tau kapitiga he initanete? Maeke fēfē ke lagomatai a koe ke he fifiliaga ke pelē he initanete mo e tau tagata ne nakai iloa e koe?

To lagomatai nakai he tau fifiliaga haaku au ke lahi e manamanatu fakaagaaga? (Kikite paratafa 17)

17-19. To maeke fēfē he eke mo tagata manamanatu fakaagaaga ke lagomatai a koe (a) ke kalo kehe he tau matagahua nakai aoga? (e) ke fakatoka e tau foliaga mitaki? (i) ke iloa e puhala ke fakamafola e tau fekehekeheaki?

 17 Tau matagahua kua fakakelea e tuaga fakaagaaga ha tautolu. Moua e tautolu e hatakiaga aoga lahi ia Heperu 6:1. (Totou.) Ko e heigoa e “tau gahua ke mamate” kua lata a tautolu ke kalo kehe i ai? Ko e tau matagahua nei kua nakai aoga ti nakai lagomatai foki a tautolu ke lahi e malolō fakaagaaga. Ko e hatakiaga nei ke he tau gahua ke mamate ai ka lagomatai a tautolu ke tali e tau hūhū tuga e: ‘Aoga, po ke nakai aoga kia e matagahua nei? Lata nakai au ke putoia he fakatokaaga pisinisi nei? Ko e ha ne nakai lata au ke fakalataha ke he matakau ne lali ke hiki e tau tuaga he lalolagi?’

To lagomatai nakai he tau fifiliaga haaku au ke fakatoka e tau foliaga fakaagaaga? (Kikite paratafa 18)

18 Tau foliaga fakaagaaga. He Lauga he Mouga, ne tuku mai e Iesu ki a tautolu e fakatonuaga mitaki hagaao ke he tau foliaga. (Mataio 6:33) Ko e tagata manamanatu fakaagaaga kua tuku fakamua e Kautu he moui haana. Ko e matapatu fakaakoaga nei to lagomatai a tautolu ke tali e tau hūhū tuga anei: ‘Lata nakai au ke fano he univesitī ka oti e fakaakoaga kua fafati pauaki? Lata nakai au ke talia oti e tau gahua tupe?’

To lagomatai nakai he tau fifiliaga haaku au ke moua e mafola mo e falu? (Kikite paratafa 19)

19 Tau fekehekeheaki. Ko e fakatonuaga ha Paulo ke he tau Kerisiano i Roma ka lagomatai a tautolu ka fekehekeheaki mo e falu. (Roma 12:18) Fifitaki e tautolu a Keriso, ti eketaha “kia nonofo fakamitaki mo e tau tagata oti kana.” Tali atu fēfē a tautolu ka fekehekeheaki a tautolu mo e falu? Uka kia a tautolu ke talia e manatu he falu? Po ke iloa lahi nakai a tautolu ko e tagata kua lali ke taute mafola?​—Iakopo 3:18.

20. Ko e ha kua manako a koe ke holo ki mua fakaagaaga?

20 Maeke he tau fakafifitakiaga nei he tau matapatu fakaakoaga he Tohi Tapu ke lagomatai a tautolu ke taute e tau fifiliaga ne fakakite kua takitaki he agaaga he Atua a tautolu. Ka manamanatu fakaagaaga, to fiafia mo e makona e moui ha tautolu. Ko Robert ne totoku he kamataaga ne pehē: “He mole e feaki e au e fakafetuiaga mooli mo Iehova, kua eke au mo taane mo e matua taane mitaki. Logona hifo e au e aga fakalatalata mo e fiafia.” Ka taute e tautolu e tau mena oti kua maeke ke holo ki mua ke eke mo tagata fakaagaaga, to loga foki e fua mitaki ka moua e tautolu. To fiafia lahi e moui ha tautolu mogonei, mo e to moua e tautolu e “moui tukulagi” he vahā i mua.​—1 Timoteo 6:19.