Skip to content

Skip to table of contents

Tau Fakamoli a Iehova

Fifili e vagahau Faka-Niue

Fifitaki e Tua mo e Omaoma ha Noa, Tanielu, mo Iopu

Fifitaki e Tua mo e Omaoma ha Noa, Tanielu, mo Iopu

“Ko Noa, ko Tanielu, mo Iopu, po kua laveaki e lautolu a lautolu hoko lautolu ni ke he mahani tututonu ha lautolu.”​—ESEKIELU 14:14.

TAU LOLOGO: 120, 54

1, 2. (a) Ko e ha e kumikumi ke he tau fakafifitakiaga ha Noa, Tanielu, mo Iopu kua fakamalolō ki a tautolu? (e) Ko e heigoa e tau tutūaga he mogo ne tohi e Esekielu e tau kupu ia Esekielu 14:14?

KUA lauia kia a koe he tau tuaga uka ha kua gagao, lekua fakatupe, po ke favale? Uka kia falu magaaho ke tumau e fiafia haau he fekafekau ki a Iehova? Ka logona pihia a koe, kumikumi ke he tau fakafifitakiaga ha Noa, Tanielu, mo Iopu ke fakamalolō a koe. Ko e tau tagata taane nakai mitaki katoatoa anei ti tatai foki e tau paleko mo e ha tautolu he vahā nei. Falu mogo, ne liga hagahagakelea e tau momoui ha lautolu. Ka e fakatumau e fakamooli ha lautolu ki a Iehova, ti onoono a Ia ki a lautolu ko e tau fakafifitakiaga he tua mo e omaoma.​—Totou Esekielu 14:12-14.

2 Tohia e Esekielu e matakupu tohi he vala tala nei i Papelonia he tau 612 ato fai Keriso. * (Kikite matahui tala.) (Esekielu 1:1;  8:1) Nakai leva ti moumou a Ierusalema he tau 607. Gahoa ni e tagata i Ierusalema ne tua mo e omaoma tuga a Noa, Tanielu, mo Iopu ti fakahao a lautolu. (Esekielu 9:1-5) Ko Ieremia, Paruka, Epetameleka, mo e tau tagata Rakapā e falu ia lautolu.

3. Ko e heigoa ka fakaako e tautolu he vala tala nei?

3 Pihia foki he vahā nei, ko e tau tagata ni ne onoono a Iehova kua tututonu, tau tagata tuga a Noa, Tanielu, mo Iopu ka fakahao he moumouaga he lalolagi kelea nei. (Fakakiteaga 7:9, 14) Kia fakaako a tautolu ke he kakano ne fakaaoga e Iehova e tau tagata tokotolu nei mo fakafifitakiaga he tau tagata ne taute e tau mena kua tonu ke he fofoga haana. To fakatutala a tautolu (1) ke he tau paleko takitaha ha lautolu mo e (2) puhala ka fifitaki e tautolu e tua mo e omaoma ha lautolu.

TUA MO E OMAOMA A NOA KE MOLEA E 900 TAU!

4, 5. Ko e heigoa falu paleko ha Noa, ti ko e heigoa ne ofoofogia hagaao ki a ia?

4 Ko e heigoa falu paleko ha Noa? He magahala he matua tupuna ha Noa ko Enoka, fitā he mahani kelea lahi e tau tagata. Talahau e lautolu e “tau kupu favale” hagaao ki a Iehova. (Iuta 14, 15) Kua holo ki mua e mahani favale he lalolagi mogoia. He magahala ha Noa, kua “puke ni e lalolagi ke he favale.” Ko e tau agelu mahani kelea ne o hifo mai ke he lalolagi, ne fakafaliu tino tagata a lautolu ti faihoana ke he tau fifine. Ko e tau tama ha lautolu kua mahani vale. (Kenese 6:2-4, 11, 12) Ka e kitia he tau tagata oti kua kehe a Noa. Pehē e Tohi Tapu “ko Noa kua ofania a ia e Iehova.” Nakai tuga e tau tagata ne nonofo viko ia Noa, ne taute e ia e mena kua tonu. “Ne o fano ai e Atua mo Noa.”​—Kenese 6:8, 9.

5 Ko e heigoa ne talahau he tau kupu ia ki a tautolu hagaao ki a Noa? Fakamua, manamanatu ke he leva he fekafekau fakamooli ha Noa ki a Iehova he lalolagi matahavala ia ato hoko mai e Fakapukeaga. Nakai ni ke he 70 po ke 80 e tau ka e teitei 600 e tau! (Kenese 7:11) Uaaki, manatu kua nakai fai fakapotopotoaga ke lagomatai mo e fakamafana a ia tuga a tautolu he vahā nei. Tuga foki kua nakai lalago he tau lafu haana a ia. *​—Kikite matahui tala.

6. Fakakite fēfē e Noa e loto malolō lahi?

6 Nakai manamanatu a Noa kua lahi ni he mena ia ke eke mo tagata mitaki. Ne loto malolō a ia he tala age ke he falu hagaao ke he tua haana ki a Iehova. Pehē e Tohi Tapu ko ia “ko e ogo he tututonu.” (2 Peteru 2:5) Talahau he aposetolo ko Paulo hagaao ki a Noa: “Ko e tua . . . kua fakahala ai e ia e lalolagi.” (Heperu 11:7) Kua vā mo e lali foki e tau tagata ke taofi a ia. Liga fakamatakutaku foki a lautolu ke fakamamahi a ia. Ka e nakai matakutaku a Noa ke he tau tagata. (Tau Fakatai 29:25) Moua e ia e tua, ti foaki e Iehova e loto malolō ki a ia. Age foki e Iehova e loto malolō pihia ke he tau fekafekau fakamooli oti haana he vahā nei.

7. Ko e heigoa e tau paleko ne lauia a Noa he mogo ne tā e ia e vaka?

7 Leva tuai e mahani fakamooli ha Noa ki a Iehova ke molea e 500 tau he mogo ne tala age a Iehova ki a ia ke tā e vaka lahi. To fakaaoga ai ke fakahao e falu tagata mo e tau manu mai he Fakapukeaga. (Kenese 5:32; 6:14) Ko e tā he vaka lahi pihia ne liga kua mua e uka ki a Noa. Ti iloa mooli e ia to lahi  e vaiga he tau tagata ki a ia mo e uka lahi ma e moui haana. Ka e tua mo e omaoma a Noa ki a Iehova. “Ne eke pihia ai e ia.”​—Kenese 6:22.

8. Falanaki fēfē a Noa ki a Iehova ke leveki e magafaoa haana?

8 Fai paleko foki a Noa. Lata a ia ke leveki e hoana mo e fanau haana. Ato hoko e Fakapukeaga, ne lahi mahaki e gahua he tau tagata ke moua e tau mena kai. Gahua foki a Noa. (Kenese 5:28, 29) Ka e nakai fakaatā e ia e tau manako he magafaoa haana ke eke mo tupetupe lahi mahaki haana. Ko e fekafekau ki a Iehova kua aoga lahi tumau he moui haana. Pete kua lavelave a Noa he tā e vaka liga ke 40 po ke 50 e tau, ne fakatumau a ia ke hagaaki ki a Iehova. Ti taute pihia e ia ke 350 foki e tau he mole e Fakapukeaga. (Kenese 9:28) Ko Noa ko e fakafifitakiaga mitaki he tua mo e omaoma!

9, 10. (a) Fifitaki fēfē e tautolu e tua mo e omaoma ha Noa? (e) Ka eketaha a koe ke omaoma ke he tau matafakatufono he Atua, ko e heigoa ka iloa tonu e koe?

9 Maeke fēfē a tautolu ke fifitaki e tua mo e omaoma ha Noa? Taute e tautolu e mena nei ka lalago e onoonoaga ha Iehova ke he mena kua tonu, ka nakai fai vala a tautolu he lalolagi ha Satani, mo e ka tuku fakamua e tautolu a Iehova. (Mataio 6:33; Ioane 15:19) Mooli, ko e tau kakano ia ati nakai fiafia e lalolagi ki a tautolu. Ma e fakatai, ha kua eketaha a tautolu ke omaoma ke he tau matafakatufono he Atua hagaao ke he mahani fakataane mo e fifine mo e fakamauaga, liga talahau he tau tagata e tau kupu fakahanoa hagaao ki a tautolu ke he tau vala tala uta fano. (Totou Malaki 3:17, 18.) Tuga a Noa, nakai matakutaku a tautolu he tau tagata. Matakutaku a tautolu ki a Iehova, kakano ai kua hokulo e fakalilifu ha tautolu ki a ia ti nakai manako a tautolu ke fakamamahi a ia. Iloa e tautolu ko Ia ni ka foaki ki a tautolu e moui tukulagi.​—Luka 12:4, 5.

10 Hūhū hifo ki a koe: ‘To taute tumau nakai e au e tau mena kua tonu ke he fofoga he Atua, pete he vaiga po ke tutuhia mai e falu ki a au? Falanaki nakai au to leveki e Iehova e magafaoa haaku, pete ka uka ke leveki e moui?’ Ka falanaki a koe ki a Iehova mo e omaoma ki a ia tuga he taute e Noa, maeke a koe ke iloa tonu to leveki e Iehova a koe.​—Filipi 4:6, 7.

TUA MO E OMAOMA A TANIELU HE NOFO HE MAAGA MAHANI KELEA

11. Ko e heigoa e tau paleko lalahi ne fehagai mo Tanielu mo e tau kapitiga tokotolu haana i Papelonia? (Kikite fakatino he kamataaga.)

11 Ko e heigoa falu paleko ha Tanielu? Ne poaki ki a Tanielu ke nofo i Papelonia ko e maaga kehe ne puke he tau atua fakavai mo e tau taulatua. Nakai fiafia e tau tagata he motu ia ke he tau Iutaia ti vaiga ki a lautolu mo e ha lautolu a Atua ko Iehova. (Salamo 137:1, 3) Liga fakamamahi lahi he mena nei a Tanielu mo e tau Iutaia ne fakaalofa ki a Iehova! Tokologa foki e tau tagata ne tokamata a Tanielu mo e tau kapitiga tokotolu haana ko Hanania, Mesaelu, mo Asaria ha kua amanaki a lautolu ke fakamahani ke gahua ma e patuiki ha Papelonia. Ne amanaki ki a lautolu ke kai e tau mena kai he patuiki, kua putoia e tau mena ne nakai manako a Iehova ke kai he tau tagata haana. Ka ko Tanielu ne “nakai kelea ai a ia he tau mena taumafa he patuiki.”​—Tanielu 1:5-8, 14-17.

12. (a) Ko e tagata fēfē a Tanielu? (e) Fēfē e onoonoaga ha Iehova ki a Tanielu?

12 Ha ha ia Tanielu foki e taha paleko ne  tuga kua nakai uka he mogo fakamua. Na lotomatala lahi a ia, ko e kakano haia ati tuku age he patuiki e tau kotofaaga pauaki ki a ia. (Tanielu 1:19, 20) Ka e nakai fakatokoluga po ke manamanatu a Tanielu kua hako tumau e manatu haana. Ne fakatumau a ia ke mahani fakatokolalo mo e mahani fakalatalata. Talahau tumau e ia ko Iehova ati kautū a ia. (Tanielu 2:30) Manamanatu la: Totoku e Iehova a Tanielu fakalataha mo Noa mo Iopu ko e tau fakafifitakiaga mitaki ke mumuitua. He magahala ia, kua fitā e fekafekau fakamooli a Noa mo Iopu ki a Iehova he tau momoui katoa ha laua, ka e fuata agaia a Tanielu. Mauokafua mooli a Iehova ki a Tanielu! Ti latatonu e mena ia ha kua tumau e fakamooli mo e omaoma ha Tanielu ke he Atua he moui katoa haana. He teitei 100 e tau he moui ha Tanielu, kua tala age he agelu he Atua e tau kupu totonu nei ki a ia: “Tanielu na e, ko e tagata kua ofania lahi.”​—Tanielu 10:11.

13. Liga ko e heigoa taha kakano ne lagomatai e Iehova a Tanielu ke moua e tuaga tokoluga?

13 Ha ko e lalagoaga ha Iehova, ne moua e Tanielu e kotofaaga aoga lahi, fakamua ke he Kautu Papelonia ti pihia ke he Kautu Metai mo Peresia. (Tanielu 1:21; 6:1, 2) Liga eketaha a Iehova ke moua e Tanielu e tuaga tokoluga nei ke maeke a ia ke lagomatai haana a tau tagata tuga ni ne taute e Iosefa i Aikupito mo Eseta mo Moretikai i Peresia. * (Kikite matahui tala.) (Tanielu 2:48) Manamanatu la ke he logonaaga ha Esekielu mo e falu Iutaia ne uta fakapaea he mogo ne kitia e lautolu e puhala ne fakaaoga e Iehova a Tanielu ke lagomatai a lautolu. Liga fakamalolō lahi he mena ia a lautolu!

Tuga a Tanielu, uho a tautolu ki a Iehova ka fakatumau e fakamooli ki a Ia (Kikite paratafa 14, 15)

14, 15. (a) Tatai fēfē e tuaga haau ki a Tanielu? (e) Ko e heigoa he tau matua mogonei ka fakaako mai he tau matua ha Tanielu?

14 Maeke fēfē a tautolu ke fifitaki e tua mo e omaoma ha Tanielu? Ko e lalolagi ne nonofo ai a tautolu mogonei kua puke he mahani feuaki mo e tapuaki fakavai. Ko e tau tagata kua fakaohooho e Papelonia Lahi, ko e lotu fakavai he lalolagi katoa ne fakahigoa he Tohi Tapu ko e “mena ke nonofo ai e tau temoni.” (Fakakiteaga 18:2) Ka e tuga e tau tagata kehe a tautolu he lalolagi nei. Ti ko e  fua, maeke e tau tagata ke kitia kua kehe lahi a tautolu ti liga vaiga mai ki a tautolu. (Mareko 13:13) Ka e tuga a Tanielu, kia fakatata atu a tautolu ke he ha tautolu a Atua ko Iehova. Ka fakatokolalo a tautolu, falanaki ki a Iehova, mo e omaoma ki a ia, to onoono a ia ki a tautolu kua uho foki a tautolu.​—Hakai 2:7.

15 Maeke he tau matua ke iloa e tau fakaakoaga aoga mai he tau matua ha Tanielu. He tama tote a Tanielu i Iuta, tokologa e tau tagata ne nonofo viko ia ia kua lahi e mahani kelea. Ka e tupu hake a ia ke fakaalofa ki a Iehova. Tupu noa kia e mena nei? Nakai. Liga fakaako he tau matua haana a ia hagaao ki a Iehova. (Tau Fakatai 22:6) Ko e higoa ha Tanielu ne kakano foki Haaku a Fakafili ko e Atua, ne fakakite kua ofania he tau matua haana a Iehova. (Tanielu 1:6) Tau matua, kia fakamanavalahi ka fakaako e mutolu e tau fanau ha mutolu hagaao ki a Iehova. Ua fakalolelole. (Efeso 6:4) Liogi mo lautolu. Liogi ma lautolu. Eketaha ke fakaako a lautolu ke fiafia ke he mena ne talahau e Iehova kua tonu, mo e to fakamonuina fakalahi e Iehova a mutolu.​—Salamo 37:5.

TUA MO E OMAOMA A IOPU PETE HE MONUINA PO KE NOFOGATI A IA

16, 17. Ko e heigoa e tau paleko ne moua e Iopu he tau magaaho kehekehe he moui haana?

16 Ko e heigoa falu paleko ha Iopu? Ne lalahi e tau hikihikiaga he moui ha Iopu. Fakamua, ko Iopu nukua “mua ue atu foki e tagata na he tau tagata oti ke he faahi uta.” (Iopu 1:3) Maukoloa a ia ti tokologa e tagata ne iloa a ia mo e fakalilifu lahi ki a ia. (Iopu 29:7-16) Pete ni e mena nei, ne nakai manamanatu a Iopu kua mua atu a ia ke he falu po ke logona hifo kua nakai lata a ia ke moua e lagomatai he Atua. Iloa e tautolu e mena nei ha kua fakahigoa e Iehova a ia ko e “fekafekau haku” ti pehē hagaao ki a ia: “Ko e tagata mahani hakohako mo e mahani tonu, kua matakutaku a ia ke he Atua mo e kalo kehe mo e tau mena kelea.”​—Iopu 1:8.

17 Ka e amanaki ni ti hiki katoatoa e moui ha Iopu. Ne galo e tau mena oti haana, ati fakaatukehe lahi mahaki a ia mo e manako ke mate. He vahā nei, iloa e tautolu ko Satani ne fakatupu e tau lekua ha Iopu. Pehē a ia kua fekafekau a Iopu ki a Iehova ha ko e tau kakano lotokai hokoia. (Totou Iopu 1:9, 10.) Ne uta fakahokulo e Iehova e tukupau fakakelea nei. Ko e heigoa Haana ka taute ke fakakite ko Satani ko e pikopiko kelea? Ne foaki e Ia ki a Iopu e magaaho ke fakakite e mahani fakamooli haana ke he Atua mo e ke fakakite kua fekafekau a ia ki a Iehova ha ko e fakaalofa.

18. (a) Ko e heigoa ne nava a koe hagaao ki a Iopu? (e) Ko e heigoa kua fakaako e tautolu hagaao ki a Iehova ke he puhala ne fehagai a ia mo Iopu?

18 Ne lagaloga e totoko favale e Satani a Iopu mo e taute a ia ke manatu ko e Atua ne fakatupu e tau totoko nei. (Iopu 1:13-21) Tokotolu mogoia e tagata ne totoku ke eke mo tau kapitiga ha Iopu ka e talahau e tau mena fakahukia ki a Iopu. Pehē a lautolu kua mahani kelea a Iopu ti fakahala he Atua a ia. (Iopu 2:11; 22:1, 5-10) Pete e tau mena oti nei, ne fakatumau a Iopu ke fakatokolalo ki a Iehova. Mooli na fa talahau e Iopu e tau mena goagoa. (Iopu 6:1-3) Ka e maama e Iehova kua pihia a Iopu ha kua mamahi mo e fakaatukehe a ia. Kitia e Iehova to nakai tiaki e Iopu a Ia pete he aga vale a Satani, ti lagaloga e fakamamahi mo e ekefakakelea a Iopu.  Mole e tuaga kelea nei, ne foaki e Iehova ki a Iopu fakalahi ua e tau mena ne moua e ia fakamua mo e foaki foki ki a ia 140 e tau he moui. (Iakopo 5:11) He magaaho ia, ne matutaki a Iopu ke fekafekau ke he Atua mo e loto katoa. Iloa fēfē e tautolu e mena ia? Ia Esekielu 14:14, ko e ha tautolu a matapatu kupu ne tohia he teau e tau tau he mole e mate ha Iopu.

19, 20. (a) Fifitaki fēfē e tautolu e tua mo e omaoma ha Iopu? (e) Fakakite fēfē e tautolu e fakaalofa noa ke he falu tuga ne taute e Iehova?

19 Maeke fēfē a tautolu ke fifitaki e tua mo e omaoma ha Iopu? Pete ne tau tutūaga ha tautolu, manako a tautolu ke eketaha ke eke tumau a Iehova mo Atua ne mua ue atu ke he tau momoui ha tautolu. Manako a tautolu ke falanaki katoatoa ki a ia mo e omaoma mo e ha tautolu a tau loto katoa. Ti ha ha i ai foki ia tautolu e tau kakano loga ke taute pihia ka e nakai tuga a Iopu. Manamanatu ke he mena kua iloa e tautolu he vahā nei. Loga e mena ha tautolu ne iloa hagaao ki a Satani mo e haana tau lagatau. (2 Korinito 2:11) Ha ko e Tohi Tapu, mua atu ke he tohi ha Iopu ne iloa e tautolu e kakano ne fakaatā he Atua e matematekelea. Mai he perofetaaga ha Tanielu, iloa e tautolu ko e Kautu he Atua ko e fakatufono mooli kua pule e Iesu Keriso. (Tanielu 7:13, 14) Iloa foki e tautolu ko e Kautu nei to nakai leva ti pule ke he lalolagi katoa mo e fakaotioti e tau mamahi oti kana.

20 Ko e mena ne tupu ki a Iopu kua fakaako foki ki a tautolu ke fakakite e fakaalofa noa ka matematekelea e tau matakainaga ha tautolu. Tuga a Iopu, to liga talahau e lautolu e tau mena goagoa. (Fakamatalaaga 7:7) Ka e nakai lata ke manamanatu kelea a tautolu ki a lautolu po ke tukupau kua fai mena kelea a lautolu ne taute. Lata a tautolu ke lali ke maama. Ka taute pihia, to eke a tautolu ke tuga ha tautolu a Matua ko Iehova kua ofania mo e fakaalofa hohofi.​—Salamo 103:8.

“KIA FAKAMALOLO” E IEHOVA A MUTOLU

21. Fakamanatu fēfē he tau kupu ia 1 Peteru 5:10 ki a tautolu e mena ne tupu ki a Noa, Tanielu, mo Iopu?

21 Ko Noa, Tanielu, mo Iopu ne nonofo he tau magaaho kehekehe he fakamauaga tala tuai ti kehekehe lahi foki e tau tutūaga. Ka e fakauka a lautolu oti ke he tau paleko ha lautolu. Ko e tau mena ne tutupu ki a lautolu kua fakamanatu ki a tautolu e tau kupu ne talahau he aposetolo ko Peteru: “Ko e Atua foki hana e fakaalofa noa oti kana, . . . ka oti he mamahi a mutolu ke he tau aho gahoa, kia fakakatoatoa ni e ia a mutolu, kia fakatumau, kia fakamalolo, ti fakave a mutolu.”​—1 Peteru 5:10.

22. Ko e heigoa ka fakaako e tautolu he vala tala ka mui mai?

22 Ko e tau kupu ia 1 Peteru 5:10 kua mooli foki ke he tau tagata he Atua he vahā nei. Fakamafana e Iehova a tautolu to fakatumau mo e fakamalolō e ia e tau fekafekau haana. Manako oti a tautolu ki a Iehova ke fakamalolō a tautolu, ti manako a tautolu ke fakatumau mo e fakamooli katoatoa ki a Ia. Kakano haia kua manako a tautolu ke fifitaki e tua mo e omaoma ha Noa, Tanielu, mo Iopu. He vala tala ka mui mai, to fakaako e tautolu kua maeke e tau tagata nei ke fakamooli tumau ki a Iehova ha kua iloa mitaki e lautolu a Ia. Ti maeke foki ke “iloa e lautolu e tau mena oti” ne manako a Ia ke taute e lautolu. (Tau Fakatai 28:5) Maeke foki a tautolu ke taute pihia.

^ para. 2 Uta a Esekielu ki Papelonia he tau 617 ato fai Keriso. Ne tohi e ia e tau kupu ia Esekielu 8:1–19:14 he “tau ono” he mole e uta a ia ki ai, he tau 612.

^ para. 5 Ko e matua taane ha Noa ko Lameko, ne tua ke he Atua ka e mate kavi ke he lima e tau ato hoko e Fakapukeaga. Ane mai momoui agaia e matua fifine mo e tau lafu ha Noa he kamata e Fakapukeaga, kua nakai hao a lautolu.

^ para. 13 Liga taute pihia foki e Iehova ki a Hanania, Mesaelu, mo Asaria ke maeke a lautolu ke lagomatai foki e tau tagata Iutaia.​—Tanielu 2:49.