Skip to content

Skip to table of contents

Tau Fakamoli a Iehova

Fifili e vagahau Faka-Niue

To Fakamooli e Finagalo ha Iehova!

To Fakamooli e Finagalo ha Iehova!

“Ne vagahau atu e au, to fakahoko ai ni e au; ne fafati e au, to eke ai ni e au.”ISAIA 46:11.

TAU LOLOGO: 147, 149

1, 2. (a) Ko e heigoa ne fakakite e Iehova ki a tautolu? (e) Ko e heigoa e maveheaga ne moua e tautolu ia Isaia 46:10, 11 mo e 55:11?

KO E tau kupu hafagi he Tohi Tapu ne mukamuka ka e malolō lahi: “Ne eke he Atua e lagi mo e lalolagi ke he kamataaga.” (Kenese 1:1) Gahoa ni e tau mena ne kitia e tautolu he tau mena loga ne tufugatia he Atua he lagi mo e lalolagi, ti tote e mena ne iloa e tautolu ke he tau mena tuga e lagi likoliko, maama, mo e malolō taofi. (Fakamatalaaga 3:11) Ka e fakakite e Iehova ki a tautolu e fafati po ke, finagalo haana ma e lalolagi mo e tau tagata. Ne tufuga e ia e tau tagata ke he fakatai haana ti manako ki a lautolu ke moui fiafia he lalolagi. (Kenese 1:26) Ko e tau fanau haana a lautolu, ti ko ia ko e Matua ha lautolu.

2 Ia Kenese veveheaga tolu, ne iloa e tautolu i ai kua paleko e finagalo ha Iehova. (Kenese 3:1-7) Ka e nakai fai lekua ne nakai maeke a Iehova ke fakahako. Nakai fai tagata ke fakatauhele e puhala Haana. (Isaia 46:10, 11; 55:11) Maeke a tautolu ke mauokafua ko e finagalo fakamua ha Iehova to fakamooli ni he magaaho tonu!

3. (a) Ko e heigoa e tau fakaakoaga aoga kua lagomatai a tautolu ke maama e fekau he Tohi Tapu? (e) Fakatutala he ha a tautolu mogonei ke he tau fakaakoaga nai? (i) Ko e heigoa e tau hūhū ka fakatutala a tautolu ki ai?

 3 Iloa mooli e tautolu e finagalo he Atua ma e lalolagi mo e tau tagata, ti pihia mo e matagahua ha Iesu he finagalo ia. Ko e tau kupu mooli aoga lahi anei he Tohi Tapu ti liga ko e tau kupu mooli fakamua ne fakaako e tautolu he kamata a tautolu ke fakaako e Kupu he Atua. Mogonei kua manako a tautolu ke lagomatai e falu ke iloa e tau fakaakoaga aoga lahi nei. Ko e magaaho pauaki anei he tau ke uiina e tautolu e tau tagata ke o mai ke he Fakamanatuaga he mate he Keriso. (Luka 22:19, 20) Ka o mai a lautolu he Fakamanatuaga, to lahi foki e mena ka fakaako e lautolu ke he finagalo homo ue atu he Atua. Ti ko e magaaho mitaki anei ke manamanatu ke he tau hūhū pauaki ka fakaaoga e tautolu ke fakamafana e tau tagata ke fakalataha mai. He vala tala nei to fakatutala a tautolu ke he tolu e hūhū: Ko e heigoa e finagalo he Atua ma e lalolagi mo e tau tagata? Ko e heigoa ne hepe? Ti ko e ha e poa lukutoto ha Iesu ko e matapatu kua hafagi ke fakamooli e finagalo he Atua?

KO E HEIGOA E FINAGALO HE TUFUGA?

4. Maeke fēfē e tufugatia ke “talahau . . . e lilifu he Atua”?

4 Ko Iehova ko e Tufuga mua ue atu. Ko e tau mena oti ne tufugatia e ia kua mitaki lahi mahaki. (Kenese 1:31; Ieremia 10:12) Ko e heigoa ka fakaako e tautolu mai he fulufuluola mo e maopoopo ne kitia e tautolu he tufugatia? Fakaako e tautolu ko e tau mena oti ne tufugatia e Iehova kua aoga lahi, mai he tau mena ikiiki itikuhila ke hoko ke he tau mena lalahi mamahaki. Lafi ki ai, ka manamanatu a koe ke he tau tegatega ofoofogia he tagata, po ke kitia e tama mukemuke fanau foou, po ke kitekite ke he tōaga laā ofoofogia, fēfē e logonaaga haau? Nava a tautolu ke he tau mena nei ha kua tufugatia e Iehova a tautolu aki e lotomatala ke iloa e mena fulufuluola mooli.—Totou Salamo 19:1; 104:24.

5. Ko e heigoa ne taute e Iehova ke gahuahua fakalataha e tau tufugatiaaga oti haana?

5 Kua fakatoka fakamitaki e Iehova e tau fakakaupāaga ma e tau tufugatia oti haana. Ne fakatū e ia e tau matafakatufono ke he tau mena ne tufugatia, ti fakatoka foki e ia e tau matafakatufono he tau mahani. Taute e ia e tau matafakatufono nei ke maeke he tau mena oti kana he lagi mo e lalolagi ke gahuahua fakalataha. (Salamo 19:7-9) Fai fakavēaga mo e gahuahuaaga e tau mena oti kana he lagi mo e lalolagi. Ma e fakatai, ko e matafakatufono he malolō taofi ati tumau e takatakaiaga ke tata ke he fua lalolagi, ti tautaofi ai e moana mo e hokohoko po ke pakupaku he tahi. Ka nakai fai malolō taofi to nakai fai moui e lalolagi. Ko e tau fakakaupāaga ne fakatoka e Iehova ke lata mo e tufugatiaaga ne maopoopo mitaki e lagi mo e lalolagi katoatoa. Fakakite he mena nei kua fai amaamanakiaga po ke, finagalo a ia ma e lalolagi mo e tau tagata. He gahua fakamatala ha tautolu, maeke ia tautolu ke lagomatai e falu ke iloa e Tufuga he lagi mo e lalolagi ofoofogia nei.Fakakiteaga 4:11.

6, 7. Ko e heigoa falu mena fakaalofa ne foaki e Iehova ki a Atamu mo Eva?

6 Ko e finagalo ha Iehova ma e tau tagata ke momoui tukulagi he lalolagi. (Kenese 1:28; Salamo 37:29) Kua fakamokoi a ia ti foaki e ia ki a Atamu mo Eva e tau mena fakaalofa uho kehekehe. (Totou Iakopo 1:17.) Tuku  age e Iehova ki a laua e atāina ke fifili mo e lotomatala ke iloa e kakano, ke fakaalofa, mo e ke fiafia e tuaga kapitiga. Ne vagahau e Tufuga ki a Atamu ti fakaako ki a ia e puhala ke taute e tau mena kua mitaki. Iloa foki e Atamu e puhala ke leveki a ia, tau manu, mo e fonua. (Kenese 2:15-17, 19, 20) Tuku age e Iehova ki a Atamu mo Eva e lotomatala ke kamata, aamo, kitia, logona, mo e hohogi e tau mena mitaki ne eke e ia ma laua. He puhala nei, maeke a laua ke fiafia e moui he kaina fulufuluola ha laua. Loga e gahua kehekehe ha Atamu mo Eva ke taute. Ti maeke a laua ke tumau ke fakaako mo e iloa e tau mena foou.

7 Ko e heigoa foki e vala he finagalo he Atua? Tuku age e Iehova ki a Atamu mo Eva e lotomatala ke fanau e tau tama mitaki katoatoa. Ti fanafanau foki e tau fanau ha laua ato puke e lalolagi katoa ke he tau tagata. Manako a Iehova ke he tau matua ke ofania e tau fanau ha lautolu, tuga ni ne ofania e ia e tau fanau mitaki katoatoa fakamua haana ko Atamu mo Eva. Ne foaki e ia ke he magafaoa he tagata e lalolagi mo e tau mena fulufuluola mo e uho lahi. To eke ia mo kaina ha lautolu mo e to nakai utakehe ai mai ia lautolu.Salamo 115:16.

KO E HEIGOA NE HEPE?

8. Ko e ha ne tuku age he Atua ki a Atamu mo Eva e matafakatufono ia Kenese 2:16, 17?

8 Nakai gahuahua agataha e tau mena ne manako a Iehova ki ai. Ko e heigoa ne tupu? Tuku age e Iehova ki a Atamu mo Eva e matafakatufono mukamuka ke maeke a laua ke iloa e fakakaupāaga ke he atāina ha laua. Pehē a ia: “Ko e tau akau oti kana ha he kaina ke kai ai ni e koe. Ka ko e akau ke iloa ai e mitaki mo e kelea, aua neke kai ai e koe; ha ko e aho ka kai ai e koe to mate ai ni a koe.” (Kenese 2:16, 17) Nakai uka e matafakatufono ia ke maama e laua. To nakai uka ma laua ke omaoma ha kua loga foki e tau mena kai mitaki he kaina.

9, 10. (a) Ko e heigoa ne tukupau aki e Satani a Iehova? (e) Ko e heigoa ne fifili a Atamu mo Eva ke taute? (Kikite fakatino he kamataaga.)

9 Fakaaoga e Satani ko e Tiapolo e gata ke fakavaia a Eva ke liuliu ke he haana a Matua ko Iehova. (Totou Kenese 3:1-5; Fakakiteaga 12:9) Fakatū e Satani e matakupu kua nakai fakaatā e tau fanau he Atua ke kai e “tau akau oti kana ha he kaina.” Tuga na pehē a ia: ‘Kakano kia kua nakai maeke a koe ke taute e mena kua manako a koe ki ai?’ Pehē foki a ia: “Nakai ni mamate a mua.” Ko e tala pikopiko. Ti lali foki a ia ke talitonu a Eva kua nakai lata ke fanogonogo ke he Atua. Pehē a Satani: “Kua fioia he Atua ko e aho ka kai ai e mua, ti fakaala ai ha mua a tau mata.” Tala age a Satani kua nakai manako a Iehova ki a laua ke kai e fua he akau ha ko e mena to foaki ki a laua e iloilo pauaki. Fakahiku ai, taute e ia e maveheaga fakavai nei: “[To] eke ai ni a mua ke tuga ne tau atua ke iloa ai e mitaki mo e kelea.”

10 Lata a Atamu mo Eva ke fifili e mena ke taute. To omaoma a laua ke he Atua, po ke to fanogonogo a laua ke he gata? Momoko ai, ne fifili a laua ke nakai omaoma ke he Atua. Tiaki e laua a Iehova ko e ha laua a Matua, ka e kau mo Satani. Ko laua ni hoko laua mogonei, ti nakai moua e puipuiaga mai ia Iehova.Kenese 3:6-13.

11. Ko e ha ne nakai tiaki noa e Iehova e agahala ha Atamu mo Eva?

11 He mogo ne moumou e Atamu mo Eva e fakatufono he Atua, ne nakai liu a laua mitaki katoatoa. Ati eke a laua mo tau fī he  Atua ha kua vihiatia e ia e mahani kelea. “Kua mua he mea e tau fofoga [haana], nakai fia kitekite a [ia] ke he mahani kelea.” (Hapakuka 1:13) Ane mai nakai fai mena ne taute e Iehova ke he agahala ha Atamu mo Eva, to hagahaga kelea e tau momoui he tau tufugatia oti haana. Liga manamanatu e tau agelu mo e tau tagata kua lata nakai a lautolu ke falanaki ke he kupu haana. Ka e tumau fakamooli a Iehova ke he tau tuaga ni haana; ti nakai moumou ai e ia. (Salamo 119:142) Pete he moua e Atamu mo Eva e atāina ke fifili, nakai maeke a laua ke kalo kehe he fakahikuaga ha laua he totoko ki a Iehova. Fakahiku ne mamate a laua ti liliu ke he efuefu ko e mena ne eke mai a laua.Kenese 3:19.

12. Ko e heigoa e mena ne tupu ke he fanau ha Atamu?

12 He mogo ne kai e Atamu mo Eva e fua he akau, kua nakai manako a Iehova ke talia a laua mo vala he magafaoa haana. Ne vega kehe e ia a laua he kaina ko Etena, ti nakai tuai liliu a laua ki ai. (Kenese 3:23, 24) Fakaatā e Iehova a laua ke fehagai mo e fakahikuaga kelea he fifiliaga ha laua. (Totou Teutaronome 32:4, 5.) Ko e fua, nakai liu a laua ke fifitaki katoatoa e tau mahani mitaki ha Iehova. Galo e Atamu e vahā homo ue atu anoiha ti pihia mo e tau fanau haana. Kua foaki ni e ia ke he fanau haana e nakai mitaki katoatoa, agahala, mo e mate. (Roma 5:12) Ne utakehe e Atamu e tuaga ha lautolu ke momoui tukulagi. Nakai maeke a Atamu mo Eva ke fanau e tau tama mitaki katoatoa ti nakai fanau foki he tau tama ha laua e tau tama mitaki katoatoa. Tali mai he liliu kehe e Satani a Atamu mo Eva mai he Atua, ne lali e Tiapolo ke fakaohooho e tau tagata oti ke taute pihia foki.Ioane 8:44.

KO E LUKUTOTO ATI MAEKE KE KAPITIGA MO E ATUA

13. Ko e heigoa ne manako a Iehova ma e tau tagata?

13 Fakaalofa agaia a Iehova ke he tau tagata. Pete kua tiaki e Atamu mo Eva e Atua, ne manako agaia a ia ke he tau tagata ke moua e fakafetuiaga mitaki mo ia. Ti nakai manako a ia ki a lautolu ke mamate. (2 Peteru 3:9) Ko e mena ia, ne taute agataha he Atua e tau fakatokaaga ke maeke he tau tagata ke liu moua e fakafetuiaga mo ia. Maeke fēfē a ia ke taute e mena nei ka e nakai totoko ke he tau tuaga ni haana? Kitekite la tautolu ki ai.

He mogo ne tiaki e Atamu mo Eva e Atua, ne taute agataha he Atua e tau fakatokaaga ke maeke he tau tagata ke liu moua e fakafetuiaga mo ia

14. (a) Hagaao ke he Ioane 3:16, ko e heigoa ne taute he Atua ke laveaki mai e tau tagata he agahala mo e mate? (e) Ko e heigoa e hūhū ka fakatutala e tautolu mo e tau tagata?

14 Totou Ioane 3:16. Tokologa e tagata kua uiina e tautolu ke he Fakamanatuaga ne iloa manatu e kupu nei. Ka e taute fēfē he poa ha Iesu ke moua e moui tukulagi? Moua e tautolu e tuaga ke lagomatai e tau tagata ke maama e tali ke he hūhū nei ka uiina a lautolu ke he Fakamanatuaga, ka haia a tautolu mo lautolu he Fakamanatuaga, mo e ka ahiahi atu a tautolu he mogo fakamui ki a lautolu. Ka maama mitaki e lautolu e lukutoto, to mailoga lahi e lautolu e fakaalofa ha Iehova  ke he tau tagata mo e lahi he pulotu haana. Ko e heigoa e tau manatu hagaao ke he lukutoto ka tala age e tautolu ke he falu?

15. Kehe fēfē a Iesu mai ia Atamu?

15 Fakafano mai e Iehova e tagata mitaki katoatoa ne maeke ke foaki haana moui mo lukutoto. Ko e tagata mitaki katoatoa ia ne lata ke mahani fakamooli ki a Iehova. Lata a ia ke makai ke foaki haana moui ma e tau tagata. (Roma 5:17-19) Ne hiki mai e Iehova e moui ha Iesu he lagi ke he lalolagi, ko e tufugatia fakamua haana. (Ioane 1:14) Ti eke a Iesu mo tagata mitaki katoatoa, tuga a Atamu he magaaho fakamua. He nakai tatai mo Atamu, ne muitua a Iesu ke he tau tuaga ha Iehova ko e mena ne amanaki a Iehova mai he tagata mitaki katoatoa. Pete foki i lalo he tau kamatamata mamahi, ne nakai moumou e ia ha matafakatufono he Atua.

16. Ko e ha e lukutoto ko e mena fakaalofa uho?

16 He mate a Iesu ko e tagata mitaki katoatoa, maeke a ia ke laveaki e tau tagata mai he agahala mo e mate. Tatai tonu a ia ke he tau mena oti kua lata ia Atamu ke taute. Ko e tagata mitaki katoatoa a Iesu he mahani fakamooli mo e omaoma katoatoa ke he Atua. (1 Timoteo 2:6) Ne mate a ia ma tautolu, ti foaki he poa haana ke he tau tagata taane, tau fifine, mo e tau fanau e tuaga ke moua e moui tukulagi. (Mataio 20:28) Ko e lukutoto ko e matapatu kua hafagi ke fakamooli e finagalo he Atua.2 Korinito 1:19, 20.

HAFAGI E IEHOVA E PUHALA MA TAUTOLU KE LILIU MAI

17. Ko e heigoa ne maeke he lukutoto ke taute?

17 Foaki e Iehova e lukutoto ko e mena uho lahi ki a ia. (1 Peteru 1:19) Ofania mooli e ia a tautolu ti makai ai ke fakaatā e  Tama fakahele haana ke mate ke lata mo tautolu. (1 Ioane 4:9, 10) Ti tuga ko Iesu e matua taane ha tautolu ka e nakai ko Atamu. (1 Korinito 15:45) Ne foaki mai e Iesu ki a tautolu e tuaga ke nakai ni momoui tukulagi ka e liliu foki ke he magafaoa he Atua a taha aho. Puhala he lukutoto, to mitaki katoatoa e tau tagata ti maeke a Iehova ke liu talia mai a lautolu ke he magafaoa haana he nakai moumou e tau matafakatufono haana. Manamanatu la ke he homo ue atu ka mitaki katoatoa a lautolu oti kua fakamooli ki a Iehova! Fakahiku ai, ko lautolu oti he lagi mo e he lalolagi to fakalataha auloa ko e magafaoa ne taha. To eke a tautolu oti mo fanau he Atua.Roma 8:21.

18. Magaaho fe ka eke a Iehova mo “tau mena oti kana” ke he tau tagata oti?

18 Pete he tiaki he tau matua fakamua ha tautolu a Iehova, ne nakai oti e fakaalofa Haana ke he tau tagata, ati foaki e ia e lukutoto. He agahala a tautolu, kua nakai maeke a Satani ke taofi a tautolu he fakamooli ki a Iehova. Puhala he lukutoto, to lagomatai e Iehova a tautolu ke katoatoa e tututonu. Manamanatu ke he moui ka maeke he tau tagata oti ke “kitekite ke he Tama, mo e tua kia ia” ati moua e moui tukulagi! (Ioane 6:40) Ko e Matua fakaalofa mo e pulotu ha tautolu to fakamooli e finagalo haana ti lagomatai e tau tagata ke mitaki katoatoa. Ati eke a Iehova mogoia mo “tau mena oti kana” ke he tau tagata oti.1 Korinito 15:28.

19. (a) Ko e heigoa kua lata he loto fakaaue ha tautolu ke he lukutoto ke fakalagalaga a tautolu ke taute? (Kikite puha “ Kia Tumau a Tautolu ke Kumi a Lautolu kua Lata.”) (e) Ko e heigoa ha tautolu ka fakatutala ki ai he vala tala ka mui mai?

19 Ko e loto fakaaue ha tautolu ke he lukutoto kua lata ke fakalagalaga a tautolu ke tala age ke he falu e mena fakaalofa mua ue atu nei. Lata e tau tagata ke iloa he puhala he lukutoto, kua foaki fakaalofa e Iehova ke he tau tagata oti e tuaga ke moua e moui tukulagi. Ka e fai mena foki ne taute he lukutoto. Ne fakatotoka e tau matakupu ne fakalagā e Satani he kaina ko Etena. To fakatutala a tautolu ke he puhala ne maeke e mena nei he vala tala ka mui mai.