Skip to content

Skip to table of contents

Tau Fakamoli a Iehova

Fifili e vagahau Faka-Niue

 TALA KE HE MOUI

Moua e Maua e “Penina Fakafua Lahi”

Moua e Maua e “Penina Fakafua Lahi”

KO WINSTON mo Pamela (Pam) Payne ne fekafekau he la ofisa ha Australasia. Fiafia e moui ha laua ka e ha ha ai e tau paleko, putoia e hikihiki ke he tau aga fakamotu kehekehe mo e fakauka ke he matematekelea he tō e tama. Ka e pete ne tau mena oti nei, ne fakatumau e fakaalofa ha laua ma Iehova mo e tau tagata haana ti pihia mo e fiafia ke he fekafekauaga. He hūhū tala ki a laua, uiina e mautolu ke talahau e falu he tau mena ne tutupu ki a laua.

Winston, tala mai hagaao ke he kumi haau ke he Atua.

Kua feaki au he kaina nakai ō tapu he faama i Queensland, i Ausetalia. Ha kua nonofo mamao a mautolu, tote lahi e matutakiaga haaku mo e ha tagata ka ko e magafaoa ni. Mai he kavi 12 e tau he moui, ne kamata au ke kumi hagaao ke he Atua. Ne liogi au ki a ia he ole ke iloa e kupu mooli hagaao ki a ia. Fakahiku ai ti toka e au e faama mo e moua e gahua i Adelaide, he Faahi Toga ha Ausetalia. He 21 e tau, ne feleveia au mo Pam he evaeva atu ki Sydney, ti tala mai e ia hagaao ke he matakau fakalotu British-Israel, nukua talahau ko e tau tagata Peritania kua tupu mai he tau magafaoa ne galo ha Isaraela. Ko e tau magafaoa ia, kua talahau he matakau ko e tau magafaoa tokohogofulu he kautu he faahi tokelau ne uta fakapaea he senetenari ke valuaki F.V.N. Ti ko e magaaho ne liu au ki Adelaide, ne tutala au hagaao ke he matakupu ia mo e kapitiga gahua ne kamata ke fakaako e Tohi Tapu mo e Tau Fakamoli a Iehova. He fai tulā he tutala mo ia​—laulahi hagaao ke he tau taofiaga he Tau Fakamoli​—ne mailoga e au kua tali tuai e liogi haaku he vahā tote. Hane fakaako au ke he kupu mooli hagaao ke he Tufuga haaku mo e haana Kautu! Kua moua tuai e au e “penina fakafua lahi.”​—Mata. 13:45, 46.

Pam, kamata foki a koe ke kumi e penina ia he vahā tote. Moua fēfē e koe?

Kua tupu hake au he magafaoa ō tapu he taone ko Coffs Harbour i New South Wales. Ko e tau matua mo e tau tupuna haaku kua talitonu ke he tau fakaakoaga he matakau British-Israel. Ko e haaku a tugaane tote, taokete, mo au, fakalataha mo e tau kasini loga kua feaki ke talitonu kua fiafia e  Atua ki a lautolu ne tutupu mai he tau tagata Peritania. Ka e nakai talitonu au ti logona hifo e nakai makona fakaagaaga. He 14 e tau haaku he moui, ne ahiahi atu au ke he tau tapu kehekehe he matakavi, putoia e Anglican, Baptist, mo e Seventh-day Adventist. Ka e matutaki ni e hoge fakaagaaga haaku.

Fakahiku ne hiki e magafaoa haaku ki Sydney, ti feleveia au mo Winston ne fina atu ke evaeva i ai. Tuga ne talahau e ia, ko e tau fakatutalaaga fakalotu ha maua ati takitaki atu ke he haana a fakaako mo e Tau Fakamoli. Mogo fakamui, ko e tau tohi haana ki a au kua puke ke he tau kupu tohi! Ko e tala mooli, he mogo fakamua kua tupetupe ti ita foki au. Ka e fai magaaho ti mailoga e au e kupu mooli.

He 1962, ne hiki au ki Adelaide ke tata ki a Winston. Kua fakatoka e ia ke nofo au mo e hoa Fakamoli ko Thomas mo Janice Sloman, ne fekafekau ko e tau misionare i Papua Niu Kini. Lahi mahaki e totonu ha laua ki a au; ne 18 laia e tau haaku ti lahi e lagomatai ha laua ki a au fakaagaaga. Kamata foki au ke fakaako e Kupu he Atua, ti nakai leva ne talitonu au kua moua tuai e au e kupu mooli. He mole e mau ha maua mo Winston, ne kamata agataha e maua e moui kua moua e palepale lahi he fekafekauaga​—pete ne tau kamatamata, ka kua fakaholo ki mua ni e loto fakaaue ha maua ma e penina mitaki ne moua.

Winston, tala mai hagaao ke he tau tau fakamua haau he fekafekau ki a Iehova.

A. Mepe he tau fenoga ha maua he gahua takaiaga

E. Tau ulutohi mai he falu aelani. Ko Kiripati mo Tuvalu ne iloa fakamua ko e Gilbert mo Ellice Islands

I. Ko e aelani fuluola mo e makamaka ko Funafuti he motu ha Tuvalu. Taha he tau aelani loga ne ahiahi e maua ato kotofa e tau misionare ki ai

Nakai leva he mole e mau ha maua mo Pam, kamata a Iehova ke foaki ki a maua e tau kotofaaga pauaki he fekafekauaga haana. (1 Kori. 16:9) Ko e gutuhala fakamua ne hafagi mai ki a maua he Matakainaga ko Jack Porter, ne fekafekau ke he fakapotopotoaga tote ha mautolu ko e leveki takaiaga. (Ko ia mogonei ko e matakainaga he La Komiti ha Australasia.) Fakamafana e Jack mo e hoana haana ko Roslyn a maua ke paionia tumau​—ko e kotofaaga ne fiafia a maua ke he lima e tau. He 29 e tau haaku he moui, ne ole ki a maua mo Pam ke fekafekau he gahua takaiaga he tau Motu he Pasifika Toga, ne leveki he la ofisa ha Fiti he magahala ia. Ko e tau aelani ko Amerika Samoa, Samoa, Kiripati, Nauru, Niue, Tokelau, Tonga, Tuvalu, mo Vanuatu.

He vahā ia, ko e tau tagata he falu aelani ne mamao lahi kua tuahā ke he Tau Fakamoli a Iehova, ti kua lata a maua ke fakaeneene mo e fakailoilo. (Mata. 10:16) Ikiiki e tau fakapotopotoaga ti falu kua nakai fai mena ke nonofo a maua. Ati kumi a maua ke he mena ke nonofo ai mo e tau tagata he maaga, ne totonu tumau a lautolu ki a maua.

Fiafia lahi a koe ke he gahua fakaliliu ma Winston. Ko e heigoa ati logona hifo pihia a koe?

I Samoa, taute he aoga ma e tau motua

He magaaho ia, ko e tau matakainaga he motu ko Tonga ne gahoa ni e tuleke mo e tohi tote ke he vagahau Tonga​—ko e vagahau aelani. He gahua he fonua, fakaaoga e lautolu e fufuta Peritania he tohi fakaako The Truth That Leads to Eternal Life. Ke he aoga ma e tau motua ne taute ke he fā e faahi tapu, talia e tau motua tokotolu ne nakai lahi e vagahau Peritania ke fakaliliu e tohi Kupu Mooli ke he vagahau Tonga. Ne type e Pam e tohi ti fakafano e mautolu ke he la ofisa i United States ke lomi. Kavi ke he valu e faahi tapu ne taute e matagahua nei. Pete kua nakai mitaki lahi e fakaliliuaga, ne lagomatai he tohi e tokologa he tau tagata vagahau Tonga ke fakaako e kupu mooli. Nakai ko e tau tagata fakaliliu a maua mo Pam, ka ko e mena ia ne tupu kua fakalagā e fiafia ha maua ke he gahua nei.

Pam, kehe fēfē e moui he tau aelani ke he moui i Ausetalia?

Taha he tau nonofoaga ha maua he gahua takaiaga

Kehe lahi mahaki! He falu matakavi ne fehagai a maua mo e muhu namu, vela lahi, tau kumā, gagao, mo e he falu mogo ne tote e mena ke kai. Ka e he taha faahi, he matahiku he tau aho takitaha ko e logonaaga fakatotoka ke ono atu ke he moana mai he ha maua a fale​—ko e higoa faka-Samoa  ke lata ma e fale aelani ne pola e tuafale ka e nakai fai kaupā. He tau pō ne kikila e mahina, maeke a maua ke kitia e ata he tau lau niu mo e maama he mahina he fuga tahi. Ko e tau magaaho uho pihia ne omoomoi a maua ke manamanatu fakahokulo mo e liogi, ti lagomatai a maua ke manamanatu ke he tau mena mitaki.

Fiafia lahi a maua ke he tau fanau ne fefeua mo e fia iloa he mogo ka kitia a maua ko e tau tagata palagi mai he motu kehe. He aahi atu a maua ki Niue, oloolo he tama taane tote e taha he tau lima fulufulu ha Winston ti pehē, “Fuluola e tau fulufulu haau.” Maaliali ai, nakaila kitia e ia e tau lima fulufulu ti nakai iloa e puhala ke fakamaama ai!

Momoko ha ia ke kitia e tau nonofoaga mativa he tau tagata. Fulufuluola e takatakaiaga ha lautolu ka e nakai lahi e tau levekiaga ma e malolō tino mo e tote e vai inu. Ka e tuga na nakai tupetupe e tau matakainaga ha tautolu. Kua mahani a lautolu ke he moui ia. Fiafia a lautolu ha kua ha ha i ai e magafaoa, fai mena ke feleveia ma e tapuakiaga, mo e lilifu ke fakaheke ki a Iehova. Ko e fakafifitakiaga ha lautolu kua lagomatai a maua ke hagaaki ke he tau mena ne mua e aoga mo e fakatumau ke fakamukamuka e moui.

Falu magaaho ma Pam, lata a koe ke moua ne koe e vai inu mo e tauteute e tau mena kai he tau tutūaga foou. Taute fēfē e koe?

I Tonga, Pam ne unu e tau mena tui ha maua

Fakaaue au ke he lagomatai he matua taane haaku. Fakaako e ia au ke taute loga e tau mena kua aoga, tuga ke tafu e afi ti kaitunu i ai mo e puhala ke moui ka e gahoa ni e koloa fakatino. He taha ahiahi ki Kiripati, nonofo a maua he falepola tote ne makanini e foloa mo e tau kaupā ne puipui aki e tau kaho. Ke tunu e kai, ne aku e au e gutuafi he foloa ti tuku aki e tau pulu niu ke vela. Ke moua e vai inu, tū au he laini he vai keli mo e tau fifine he maaga. Ke tahake mai e vai, fakaaoga e lautolu e kākau ne kavi ke he ua e mita he loa ne pipi aki e kave toua he matahiku, ke tuga e akau hī. Ka e nakai pipi e matau ke he matahiku he kave toua, pipi e lautolu aki e gati apa. Igatia e fifine mo e tuku hifo haana kave ti fakamaviko e lima haana he magaaho tonu. Ne lifa e gati apa ti puke ai. Manatu au na mukamuka, ato hoko ke he mogo haaku. Lagaloga e tuku hifo e kave haaku ka e hili ni i luga he vai! He mole e fekī he tau tagata oti, taha he tau fifine ne lagomatai au. Lahi tumau e lagomatai mo e totonu ha lautolu.

Fiafia lahi a mua ke he kotofaaga he tau aelani. Maeke nakai a mua ke talahau falu he tau magaaho uho ia?

Winston: Fai magaaho ato maama e maua e falu aga fakamotu. Ma e fakatai, mogo ne taute he tau matakainaga e kai, fa mahani a lautolu ke foaki mai e tau mena kai oti ha lautolu. He mogo fakamua, nakai mailoga e maua na lata ke toka taha mena ma lautolu. Ti kai e maua e tau mena oti ne tuku i mua ha maua! Ka ko e magaaho ne iloa e maua e tuaga mooli, toka e maua e taha mena kai ma lautolu. Pete ne tau hehē ha maua, ne maama he tau matakainaga. Ti fiafia lahi a lautolu ke kitia a maua he tau mahina ono oti ka ahiahi atu a maua he gahua takaiaga. Fakalataha mo e tau matakainaga i ai, ko maua ni e Tau Fakamoli ne kitia e lautolu he magahala ia.

I Niue, uta he matakau ke he fonua

Eke foki e tau ahiahi ha maua mo fakamatala mitaki ke he tau maaga. Tokologa e tagata he maaga ne manatu ko e lotu he tau matakainaga ko e taha mena ne kamata ni e lautolu. Ti ko e mogo ne ahiahi e fekafekau mo e hoana haana mai he taha motu ke he tau matakainaga, ne maama he tau tagata he maaga ti nava foki a lautolu.

Pam: Taha he tau magaaho uho lahi haaku ne manatu e au i Kiripati, ha ha i ai e fakapotopotoaga ne nakai tokologa e matakainaga. Na taha ni e motua ko Itinikai Matera, kua eketaha ke leveki a maua. Hoko mai a ia he taha aho mo e kato ne toka ai taha ni e fua moa. “Ma haau,” he ui e ia. Ko e fua moa ko e mena kai ne lavea ke moua e maua he  vahā ia. Ko e mahani fakamokoi ia ne aamotia e tau loto ha maua.

Fai tau he mole ma Pam, ne tō e tama haau ka e nakaila fanau. Ko e heigoa ne lagomatai a koe ke fahia?

Ne fatu au he 1973 he magaaho ne haia a maua mo Winston he Pasifika Toga. Fifili a maua ke liliu mai ki Ausetalia, ka e fā e mahina he fakafua ai ne tō e tama ha maua. Kua momoko lahi a Winston ha ko e tama foki haana. Galo fakahaga e mamahi he loto haaku, ka e nakai galo katoatoa ai ato moua e maua e fufuta he Ko e Kolo Toko, Aperila 15, 2009. He “Tau Hūhū he Tau Tagata Totou” ne pehē: “Fai amaamanakiaga nakai ke liu tu mai e tama mukemuke ne mate i loto he manava he matua fifine?” Fakamafana he vala tala a maua to fifili e Iehova e mena ke taute ti taute tumau e ia e mena hako. To fakamaulu e ia e tau matematekelea loga ne lauia ai a tautolu ha ko e moui he lalolagi kelea nei, ti poaki mafanatia e Ia e Tama haana ke ‘moumou e tau gahua ha Satani.’ (1 Ioa. 3:8) Lagomatai foki he vala tala a maua ke mua atu e loto fakaaue ke he “penina” uho lahi kua moua e maua ko e tau tagata ha Iehova! Ko fe la tautolu ane mai nakai fai amaamanakiaga he Kautu?

He mole e mate he tama ha maua, liliu a maua ke he fekafekauaga mau. Fai mahina he fekafekau a maua he Peteli i Ausetalia ti fakamui liu matutaki e gahua takaiaga. He 1981, he mole e fekafekau ke he fā e tau he tau faahi tua i New South Wales mo Sydney, ne uiina a maua ke he la ofisa ha Ausetalia, ne fakahigoa he magaaho ia, ti nonofo agaia a maua i ai mogonei.

Winston, lagomatai nakai he tau mena ne fakaako e koe he tau Motu he Pasifika Toga e gahua haau ko e matakainaga he La Komiti ha Australasia?

Ē, ke he loga e puhala. Fakamua, ne ole ki Ausetalia ke leveki a Amerika Samoa mo Samoa. Ti lafi fakalataha mogoia e la ofisa ha Niu Silani mo Ausetalia. Mogonei, ko e tau motu he la ofisa ha Australasia kua putoia a Ausetalia, Amerika Samoa mo Samoa, Atu Kuki, Niu Silani, Niue, Timor-Leste, Tokelau, mo Tonga​—loga kua moua e au e lilifu ke ahiahi ki ai ko e hukui he la ofisa. Ko e iloaaga haaku he gahua fakalataha mo e tau matakainaga fakamooli ia he tau aelani kua lagomatai lahi au he fekafekau au ma lautolu mogonei he la ofisa.

Winston mo Pam he la ofisa ha Australasia

Ke fakaoti ai ne manako au ke talahau, ke he loga e tau tau kua mailoga e au mo Pam ne nakai ni ko e tau tagata lalahi ne kumi ke he Atua. Manako foki e tau tagata fuata ke he “penina fakafua lahi” ia​—pete ka nakai fakakite he tau tagata he magafaoa e fiafia. (2 Patu. 5:2, 3; 2 Nofo. 34:1-3) Mauokafua ai, manako a Iehova ko e Atua fakaalofa ke he tau tagata oti ne fuata mo e momotua ke moua e moui!

Magaaho ne kamata a maua mo Pam ke kumi e Atua he molea 50 e tau kua mole, nakai iloa e maua to takitaki ki fe e kumiaga ia. Ko e kupu mooli he Kautu ko e penina fakafua lahi pauaki! Kua eketaha a maua ke taofi mau ke he penina uho ia!