Skip to content

Skip to table of contents

Tau Fakamoli a Iehova

Fifili e vagahau Faka-Niue

 VALA TALA FAKAAKO 14

Fakakatoatoa Nakai e Koe e Fekafekauaga Haau?

Fakakatoatoa Nakai e Koe e Fekafekauaga Haau?

“Kia eke e gahua he tagata fakamatala vagahau mitaki, kia fakakatoatoa ni hāu a feua.”​—2 TIMO. 4:5.

LOLOGO 142 Fakamatala ke he Tau Tagata Oti Kana

FAKAMAAMAAGA KŪ *

Mole e liu tū mai ha Iesu, feleveia a ia mo e tau tutaki haana ti poaki ke “o atu a . . . ke eke e tau motu oti kana mo tutaki” (Kikite paratafa 1)

1. Ko e heigoa kua manako e tau fekafekau oti he Atua ke taute, ti ko e ha? (Kikite fakatino he kili.)

KUA poaki e Keriso Iesu ke he tau tutaki haana ke “o atu a a mutolu ke eke e tau motu oti kana mo tutaki.” (Mata. 28:19) Manako e tau fekafekau fakamooli oti he Atua ke fakaako e puhala ke “fakakatoatoa” e fekafekauaga nei kua tuku age ki a lautolu ke taute. (2 Timo. 4:5) Ko e gahua nei kua mua atu e aoga, mua atu e uho, mo e mafiti lahi ke he falu gahua he moui. Ka e paleko foki ke foaki fakalahi e magaaho he fekafekauaga ke tuga e manako ha tautolu.

2. Ko e heigoa e tau paleko ne fehagai mo tautolu he fakakatoatoa e fekafekauaga ha tautolu?

2 Fai matagahua aoga foki ne manako lahi ma e magaaho mo e malolō ha tautolu. Liga lata a tautolu ke gahua tupe ke he loga e tulā he aho ke leveki aki e tau momoui ha tautolu mo e magafaoa. Liga taufetului a tautolu mo e falu matagahua he magafaoa, tatalu, gagao fakaatukehe, po ke tau matulituli mo e tau mamahi he vahā motua. Maeke fēfē a tautolu ke fakakatoatoa e fekafekauaga ha tautolu ka e fahia ke he tau tutūaga paleko pihia?

3. Ko e heigoa ka fakahiku e tautolu mai he tau kupu ha Iesu ne moua ia Mataio 13:23?

3 Ka fakakaupā he tau tutūaga e lahi he magaaho ha tautolu ke fakaaoga he fekafekauaga ha Iehova, ua loto lolelole a tautolu. Iloa e Iesu to nakai maeke e tau tagata oti ke tatai e fua he Kautu ka moua mai. (Totou Mataio 13:23.) Uho lahi ki a Iehova e tau mena oti ha tautolu ne taute he gahua haana kaeke kua eketaha ai a tautolu. (Hepe. 6:10-12) He taha faahi, liga logona hifo e tautolu kua fakaatā he tau tuaga ha tautolu ke lahi  atu e gahua ka taute. He vala tala nei, to kumikumi e tautolu e puhala ka tuku fakamua e fekafekauaga he moui, tumau e fakamukamuka he moui, ti fakaholo ki mua e tau lotomatala ke fakamatala mo e fakaako atu. Ka e fakamua, ko e heigoa e kakano ke fakakatoatoa e fekafekauaga, po ke feua ha tautolu?

4. Ko e heigoa e kakano ke fakakatoatoa e fekafekauaga ha tautolu?

4 Tuku fakakū ai, ke fakakatoatoa e fekafekauaga ha tautolu, lata ke fakalataha katoatoa ke he gahua fakamatala mo e fakaako atu. Ka e nakai ni ko e lahi he magaaho kua putoia ai. Ko e fatuakiloto ha tautolu kua aoga ki a Iehova. Ha kua fakaalofa a tautolu ki a Iehova mo e katofia, gahua loto katoa a tautolu he fekafekauaga Kerisiano. * (Mare. 12:30, 31; Kolo. 3:23) Ko e fekafekau ke he Atua mo e loto katoa kua kakano ke foaki fakalahi e tau malolō ha tautolu he gahua Haana. Ka loto fakaaue a tautolu ke he kotofaaga he taute e gahua fakamatala, to lali a tautolu ke tala age e tala mitaki ke he tau tagata tokologa.

5-6. Fakatai e puhala ka maeke e tagata ne fakakaupā e magaaho ke tuku fakamua e fekafekauaga.

5 Manamanatu ke he tama fuata ne fiafia he tā e kitā. Fiafia a ia ke tā e leo kofe he ha magaaho kua maeke. Fakahiku, moua e ia e gahua tā kitā he fale inu kofe he matakavi he tau matahiku faahi tapu. Ka e nakai lahi e tupe haana ne moua he tā leo kofe ke totogi aki e tau fakamoleaga haana. Ti gahua a ia he fale koloa he Aho Gofua ke he Aho Faraile. Pete he lahi e magaaho haana he fale koloa, fiafia agaia a ia ke tā leo kofe. Manako lahi a ia ke fakaholo ki mua e lotomatala haana ke eke mo tagata tā leo kofe tumau. Pete ia, fiafia a ia he ha magaaho noa ni kua atā ke tā e leo kofe.

6 He puhala pihia, liga fakakaupā e lahi he magaaho haau ke fakaaoga he gahua fakamatala. Ka ko e mena haia ne fiafia a koe ke taute. Eketaha a koe ke holo ki mua e lotomatala ke hokotia e tala mitaki ke he tau loto he tau tagata. Ha kua loga e matagahua haau ke taute, liga manamanatu a koe ke he puhala ke tuku fakamua e gahua fakamatala.

 PUHALA KE TUKU FAKAMUA E FEKAFEKAUAGA HAAU

7-8. Fifitaki fēfē e tautolu e aga ha Iesu ke he fekafekauaga?

7 Fakatoka e Iesu e fakafifitakiaga mitaki lahi mahaki he aga haana ke he fekafekauaga. Ko e mena ne mua he moui haana ko e tutala hagaao ke he Kautu he Atua. (Ioane 4:34, 35) Mamao e tau mena ne fano hui a ia ke fakamatala ke he tau tagata tokologa. Fakaaoga e ia e tau magaaho oti ke tutala ke he toloaga he tau tagata mo e he tau kaina ha lautolu. Putoia katoa e moui ha Iesu ke he fekafekauaga.

8 Maeke a tautolu ke fifitaki e Keriso he moua e tau magaaho ke tutala hagaao ke he tala mitaki he ha magaaho mo e he ha matakavi. Makai a tautolu ke tuku kehe e tau foakiaga fakatagata ke taute e gahua fakamatala. (Mare. 6:31-34; 1 Pete. 2:21) Falu he fakapotopotoaga kua maeke ke eke mo tau paionia pauaki, tumau, po ke fakakū. Falu ne fakaako taha vagahau po ke hiki atu ke he taha matakavi ne lata ke tokologa e tagata fakamatala. Ka e lahi e gahua fakamatala ne taute fakamalolō he tau tagata fakailoa tumau he Kautu. He ha tuaga ni, nakai ole a Iehova ke he mena kua nakai fahia a tautolu ke taute. Manako a ia ki a tautolu oti ke fiafia e fekafekauaga tapu ha tautolu he fakailoa e ‘vagahau mitaki he lilifu he Atua fiafia.’​—1 Timo. 1:11; Teu. 30:11.

9. (a) Tuku fakamua fēfē e Paulo e gahua fakamatala pete he lata a ia ke gahua tupe? (e) Ko e heigoa ne fakakite ia Gahua 28:16, 30, 31 hagaao ke he aga ha Paulo ke he fekafekauaga haana?

9 Fakatoka he aposetolo ko Paulo e fakafifitakiaga mitaki he tuku fakamua e fekafekauaga he moui haana. He haia i Korinito ke he fenoga misionare haana ke uaaki, nakai lahi e tupe haana ti fai magaaho ne gahua ke talaga e tau fale ie. Ka e nakai onoono a Paulo ke he talaga he tau fale ie ko e matapatu gahua haana. Taute e ia e matagahua nei ke lalago aki a ia he fekafekauaga ke maeke ke fakailoa e tala mitaki ke he tau tagata Korinito ka e “nakai totogi mai” e lautolu a ia. (2 Kori. 11:7) Pete he lata a Paulo ke gahua tupe, matutaki a ia ke tuku fakamua e fekafekauaga ti fakamatala a ia he tau aho Sapati oti. He mole e holo ki mua e tau tuaga haana, maeke a Paulo ke hagaaki lahi ke he fakamatala. Ti “kua fakaatukehe tuai [lavelave] a Paulo ke he loto hana, he talahau atu ke he tau tagata Iutaia, ko Iesu ko e Keriso a ia.” (Gahua 18:3-5; 2 Kori. 11:9) He mogo fakamui ne puipui a ia ki loto he fale i Roma ke ua e tau, ne fakamatala a Paulo ke he tau tagata ahiahi mo e tohi e tau tohi. (Totou Gahua 28:16, 30, 31.) Eketaha a Paulo ke nakai fakaatā ha mena ke fakatauhele e fekafekauaga haana. Tohi e ia: “Kua nakai fakalolelole ai a mautolu ha ha ia mautolu e feua nai.” (2 Kori. 4:1) Tuga a Paulo, pete ka fakaaoga e tautolu e magaaho ke gahua tupe, maeke agaia a tautolu ke tuku fakamua e gahua he Kautu ke he tau momoui.

Loga e puhala ka fakakatoatoa e fekafekauaga (Kikite paratafa 10-11)

10-11. Fakakatoatoa fēfē e tautolu e fekafekauaga ka fakakaupā he malolō tino e tau mena ka taute e tautolu?

10 Ka fakakaupā e gahua fakamatala ha tautolu he taha gutuhala ke he taha gutuhala ha kua momotua po ke lekua e tau malolō tino, maeke a tautolu ke taute foki falu puhala fakamatala. Ko e tau Kerisiano he senetenari fakamua ne fakamatala ke he tau tagata he tau matakavi ne ha ha ai a lautolu. Fakaaoga e lautolu e tau magaaho oti ke tutala hagaao ke he kupu mooli​—mai he taha fale ke he taha fale, ke he toloaga, mo e nakai mautali​—ke he ha matakavi “ne feleveia” mo e tau tagata. (Gahua 17:17; 20:20) Ka nakai fahia a tautolu ke ō hui, liga maeke a tautolu ke nonofo he tau matakavi ne ha ha ai e tau tagata ke fakamatala ki a lautolu ne o fano. Po ke liga fakamatala mo e nakai mautali, tohitohi, po ke he telefoni. Tokologa e tagata fakailoa ne fakakaupā lahi  kua moua e olioli mo e fiafia ke he tau puhala nei he gahua fakamatala.

11 Pete e tau fakakaupā he malolō tino, maeke a koe ke fakakatoatoa e fekafekauaga haau. Liu ke manamanatu ke he fakafifitakiaga he aposetolo ko Paulo. Pehē a ia: “Kia ha ha he Atua e lahi ue atu he malolo, ka e nakai mai ia mautolu.” (2 Kori. 4:7) Lata a Paulo ke moua e malolō ia he mogo ne gagao a ia he taha he tau fenoga misionare haana. Fakamaama e ia ke he tau Kalatia: “Ko e lolelole he haku tino ne fakamatala atu fakamua ai e au e vagahau mitaki kia mutolu.” (Kala. 4:13) Pihia foki, ko e tau fakakaupā he malolō tino haau ka foaki ki a koe e tau magaaho ke fakailoa e tala mitaki ke he falu ke tuga e tau ekekafo, tau nosi, mo e tau tagata leveki. Tokologa e tau tagata nei hane gahua ka ahiahi atu e tau matakainaga ke he tau kaina ha lautolu.

PUHALA KE FAKAMUKAMUKA TUMAU E MOUI HAAU

12. Ko e heigoa e kakano ke ‘fakamukamuka’ tumau e tau mata haau?

12 Pehē a Iesu: “Ko e hulu he tino ko e tau mata haia; kaeke foki ke mitaki [po ke, fakamukamuka] hau a tau mata, ti maama ai hau a tino oti.” (Mata. 6:22) Ko e heigoa e kakano haana? Kakano a ia kua lata a tautolu ke fakamukamuka po ke hagaaki tumau e tau momoui ha tautolu ke he taha e foliaga, he nakai fakatauhele po ke haga kehe mai i ai. Fakatoka e Iesu e fakafifitakiaga he hagaaki e moui haana ke he fekafekauaga, ti fakaako e ia e tau tutaki haana ke hagaaki tumau ke fekafekau ki a Iehova mo e Haana Kautu. Fifitaki e tautolu a Iesu he eke e fekafekauaga Kerisiano mo matapatu he tau momoui he “kumikumi fakamua  . . . ke he kautu he Atua mo e hana tututonu.”​—Mata. 6:33.

13. Ko e heigoa ka lagomatai ke hagaaki ke he fekafekauaga Kerisiano ha tautolu?

13 Taha puhala ke hagaaki ke he fekafekauaga ha tautolu ko e fakamukamuka e tau momoui ke maeke ke lahi e magaaho ke lagomatai e falu ke iloa mo e fakaalofa ki a Iehova. * Ma e fakatai, maeke nakai a tautolu ke hikihiki e tau tulā gahua tupe ke fakaaoga fakalahi e magaaho ke he fekafekauaga he vahā tapu? Maeke nakai a tautolu ke fakatote hifo falu fakafiafiaaga ne liga lahi e magaaho ka mole?

14. Ko e heigoa e tau hikiaga ne taute he taha hoa ke hagaaki fakalahi ke he fekafekauaga?

14 Ko e mena nei ne taute he taha motua ko Elias mo e hoana haana. Fakamaama e ia: “Nakai maeke a maua ke paionia he magaaho tonu ia, ka kua lata a maua ke kamata. Ti taute e maua e tau lakaaga ikiiki ke fakalahi e magaaho ha maua he fekafekauaga. Ma e fakatai, fakatote hifo e maua e tau mena ne fakamole ki ai e tau tupe, fakatote hifo e tau magaaho fakafiafia, ti ole ke he tau takitaki gahua ha maua ke hikihiki e tau magaaho gahua. Ko e fua, maeke a maua ke fakamatala he magaaho afiafi, tokologa foki e fakaako Tohi Tapu, ti fakalataha foki ke he gahua fakamatala he vahā tapu, lagaua he mahina. Fiafia mooli a maua!”

PUHALA KE HOLO KI MUA E LOTOMATALA HAAU KE FAKAMATALA MO E FAKAAKO ATU

Fakagahua e mena ne fakaako he feleveiaaga he vahā tapu ka lagomatai a tautolu ke matutaki e holo ki mua he fekafekauaga (Kikite paratafa 15-16) *

15-16. He fakatatau mo e 1 Timoteo 4:13, 15, tumau fēfē a tautolu ke holo ki mua e tau lotomatala ko e tau tagata fakamatala? (Kikite foki e puha “ Foliaga ke Lagomatai Au ke Fakakatoatoa e Fekafekauaga.”)

15 Taha puhala foki ke fakakatoatoa e fekafekauaga ha tautolu he fakaholo ki mua e tau lotomatala ha tautolu ke he gahua fakamatala. Ko e tau tagata he falu gahuaaga ne lata ke fakatumau e fakamahani mo e fakaako ke fakaholo  ki mua e iloilo mo e tau lotomatala ha lautolu. Mooli foki e mena nei ke he tau tagata fakamatala he Kautu. Lata a tautolu ke matutaki e fakaako fakalahi ke lotomatala ke he fekafekauaga ha tautolu.​—Fakatai 1:5; totou 1 Timoteo 4:13, 15.

16 Maeke fēfē mogoia ke matutaki ke holo ki mua e fekafekauaga ha tautolu? He fanogonogo fakamitaki ke he tau fakaakoaga ne moua e tautolu he tau faahi tapu takitaha he Feleveiaaga he Moui mo e Fekafekauaga. Foaki he feleveiaaga nei e fakamahani aoga lahi ke fakaholo ki mua e tau lotomatala ha tautolu he gahua ke he fonua. Tuga anei, ka fakatonu he tagata nofoa a lautolu ne taute e tau kotofaaga he tagata fakaako, to maeke a tautolu ke iloa e tau lagomatai ke fakaholo ki mua e fekafekauaga ha tautolu. Maeke a tautolu ke fakagahua e tau manatu nei he taha magaaho ka tala age e tala mitaki ke he taha tagata. Maeke a tautolu ke ole ke he leveki he matakau gahua he fonua ma e lagomatai po ke gahua mo ia po ke taha tagata fakailoa, paionia, po ke leveki takaiaga ne lahi e iloaaga. He holo ki mua e lotomatala ha tautolu he fakaaoga e tau puhala he Puha Koloa Fakaako, to fiafia lahi a tautolu ke fakamatala mo e fakaako atu.

17. Ko e heigoa e fua kua moua e koe ka fakakatoatoa e koe haau a fekafekauaga?

17 Kua lilifu mooli a tautolu he fakaatā e Iehova ke eke mo “tau ekegahua” haana! (1 Kori. 3:9) Ka “mailoga ai e mutolu e tau mena kehekehe [“tau mena ne mua atu e aoga,” NW]” mo e hagaaki ke he fekafekauaga Kerisiano, to “fekafekau a mutolu kia Iehova mo e fiafia.” (Filipi 1:10; Sala. 100:2) He eke mo taha he tau fekafekau he Atua, maeke a koe ke mauokafua to foaki e ia ki a koe e malolō ne lata ke fakakatoatoa e fekafekauaga haau pete ne tau paleko po ke tau fakakaupāaga ne liga fehagai mo koe. (2 Kori. 4:1; 6:4) He fakaatā he tau tutūaga haau a koe ke tote po ke lahi e fakamatala, to ha ha ia koe e “mena ke hula ki ai” ka loto katoa a koe he fekafekauaga haau. (Kala. 6:4) Ka fakakatoatoa e fekafekauaga haau, kua fakakite e koe e fakaalofa ma Iehova mo e matakainaga haau. “Ka eke e koe e mena ia ti fakamoui ai e koe a koe, katoa mo lautolu kua fanogonogo kia koe.”​—1 Timo. 4:16.

LOLOGO 141 Kumi e Tau Kapitiga he Mafola

^ para. 5 Kua poaki ki a tautolu ke fakamatala e tala mitaki he Kautu mo e taute tutaki. Ko e vala tala nei to fakatutala ke he puhala ka fakakatoatoa ai e fekafekauaga ha tautolu, pete ka felauaki a tautolu mo e tau tutūaga paleko. To fakaako foki a tautolu ke he puhala ka taute e gahua fakamatala ne lauia lahi mo e palepale mitaki.

^ para. 4 FAKAMAAMA E TALAHAUAGA: Putoia he fekafekauaga Kerisiano ha tautolu e tau vala kehekehe he fakamatala mo e fakaako atu, talaga mo e leveki he tau fale tapuaki, mo e lagomatai ke he gahua matematekelea pauaki.​—2 Kori. 5:18, 19; 8:4.

^ para. 13 Kikite ke he fitu e lakaaga i loto he puha “Puhala ke Fakamukamuka e Moui Haau” he Ko e Kolo Toko, Iulai 2016, lau 8.

^ para. 62 FAKAMAAMA E TAU FAKATINO: Ne fakatātā he matakainaga fifine e liu aahi atu he feleveiaaga he vahā tapu. Mole ia, he foaki he tagata nofoa he feleveiaaga e fakatonuaga, ne fakamau hifo he matakainaga fifine e tau manatu he porosua Teaching haana. He matahiku vahā tapu mogoia, fakaaoga e ia he gahua fakamatala e mena ne fakaako e ia he feleveiaaga.