Ko e Kau Fakatufono ko e matakau tote he tau Kerisiano motua fakaagaaga ne foaki e takitakiaga ma e Tau Fakamoli a Iehova he lalolagi katoa. Ua e vala he gahua ha lautolu:

•   Leveki e lautolu e taute he tau fakatonuaga ne fakavē ke he Tohi Tapu ne puhala mai he tau tohi, tau feleveiaaga, mo e tau aoga he Tau Fakamoli a Iehova.​​​—Luka 12:42.

•   Leveki e lautolu e gahua he Tau Fakamoli a Iehova he lalolagi katoa he takitaki e gahua fakamatala ha mautolu mo e leveki e fakaaoga he tau tupe foaki fakaalofa.

 Muitua he Kau Fakatufono e puhala ne fakatoka he “tau aposetolo mo e tau patu [i] Ierusalema” he senetenari fakamua ne taute e tau fifiliaga uho lahi ke lata ma e fakapotopotoaga Kerisiano katoa. (Gahua 15:2) Tuga e tau tagata taane fakamooli ia, ko e tau matakainaga i loto he Kau Fakatufono ne nakai ko e tau takitaki he fakatokatokaaga ha mautolu. Onoono a lautolu ki loto he Tohi Tapu ma e takitakiaga he fakakite ko Iehova ko e Atua ne kotofa a Iesu Keriso ko e Ulu he fakapotopotoaga.​​​—1 Korinito 11:3; Efeso 5:23.

Ko hai e tau matakainaga he Kau Fakatufono?

 Ko e tau matakainaga he Kau Fakatufono ko Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane, mo Jeffrey Winder. Fekafekau a lautolu he matapatu ofisa ha mautolu i Warwick, New York, U.S.A.

Fakatokatoka fēfē e Kau Fakatufono?

 Kua fakatū he Kau Fakatufono ono e komiti ke leveki e tau faahi kehekehe he gahua ha mautolu, ti igatia e matakainaga mo e gahua he taha po ke falu he tau komiti nei.

•   Komiti Leveki: Kua leveki ai ke he tau mena matafakatufono mo e fehagai ke he tau mena tutupu pauaki, tau tuaga ne favale ke he Tau Fakamoli a Iehova ha ko e tau taofiaga fakalotu, mo e falu tuaga mafiti ne lauia e Tau Fakamoli a Iehova.

•   Komiti Personnel: Leveki ke he tau fakatokaaga he tau matakainaga he magafaoa Peteli.

•   Komiti Publishing: Leveki he lomiaga mo e fakafano e tau tohi faka-Tohi Tapu mo e talaga he tau fale ke tapuaki, tau ofisa fakaliliu, mo e tau fale he la ofisa.

•   Komiti Service: Leveki e gahua ha mautolu he fakamatala e “tala mitaki . . . he kautu.”—Mataio 24:14.

•   Komiti Fakaako: Takitaki e tauteaga he tau fakatonuaga fakaagaaga puhala he tau feleveiaaga, tau aoga, mo e tau fakaholoaga autiō mo e tau vitiō.

•   Komiti Tohia: Takitaki e taute he fakatonuaga fakaagaaga ne tohia mo e he kupega hila ha mautolu mo e leveki e gahua fakaliliu.

 Lafi ke he gahua ne taute he tau komiti nei, fono e Kau Fakatufono he tau faahi tapu takitaha ke fakatutala ke he tau mena kua lata ma e fakatokatokaaga. He tau fonoaga nei, fakatutala e tau matakainaga nei ke he tau talahauaga he Tohi Tapu, ti fakaatā e lautolu e omoomoiaga he agaaga tapu he Atua he taute auloa e tau fifiliaga.​—Gahua 15:25.

Ko hai e tau lagomatai ke he Kau Fakatufono?

 Ko lautolu nei ko e tau Kerisiano ne mauokafua ti kua lagomatai e tau komiti he Kau Fakatufono. (1 Korinito 4:2) Ha ha ia lautolu e lotomatala mo e iloaaga he gahua ne leveki he komiti kua kotofa a lautolu ki ai, ti fakalataha a lautolu ke he fono he tau faahi tapu takitaha. Pete kua nakai putoia a lautolu he taute e tau fifiliaga, foaki e lautolu e fakatonuaga aoga mo e tau manatu ke he tau vala tala, ti fakagahua e tau fifiliaga he komiti, mo e matakite ke he fakakatoa mo e holo ki mua he tau gahua nei. Maeke foki a lautolu ke kotofa he Kau Fakatufono ke ahiahi atu ke he tau matakainaga he tau faahi kehekehe he lalolagi po ke lauga he tau toloaga tuga e tau fonoaga ne taute lagataha he tau po ke tau fakaholoaga he oti e aoga Kiliata.