Skip to content

Tau Fakamoli a Iehova

Fifili e vagahau Faka-Niue

Ko e Heigoa e Kautu he Atua?

Ko e Heigoa e Kautu he Atua?

Ko e tali he Tohi Tapu

Ko e Kautu he Atua ko e fakatufono mooli ne fakatū e Iehova ko e Atua. Ko e “kautu he Atua” ne fakahigoa foki ko e “kautu he lagi” i loto he Tohi Tapu, ha kua pule mai he lagi. (Mareko 1:14, 15; Mataio 4:17) Loga e puhala ne tatai mo e tau fakatufono he tagata, ka kua mua ue atu ai ke he tau puhala oti.

  • Lautolu kua Pule. Ne kotofa he Atua a Iesu Keriso ko e Patuiki he Kautu ti lahi e pule ne tuku age ki a ia ka e nakai ke he ha tagata. (Mataio 28:18) Fakaaoga e Iesu e pule haana ma e mitaki hokoia, ha kua fitā a ia he eke mo Takitaki ne mauokafua mo e fakaalofa hofihofi. (Mataio 4:23; Mareko 1:40, 41; 6:31-34; Luka 7:11-17) I lalo hifo he takitakiaga he Atua, ne fifili e Iesu e tau tagata mai he tau motu oti kana ke “eke . . . mo tau patuiki ke he lalolagi” ti pule mo ia he lagi.—Fakakiteaga 5:9, 10.

  • Loa he Pule. Nakai tatai mo e tau fakatufono he tagata ne fakatū mo e utakehe, ko e Kautu he Atua to “nakai fakaoti tukulagi.”—Tanielu 2:44.

  • Tau Tagata. Ha tagata ne omaoma ke he tau poakiaga he Atua to ha ha i lalo hifo he Kautu he Atua, nakai fakavē ke he tau tupuna po ke matakavi ne fanau ai.—Gahua 10:34, 35.

  • Tau Matafakatufono. Ko e tau matafakatufono (po ke tau poakiaga) he Kautu he Atua kua mua atu e aoga mai he fakahala hokoia ka mahani kelea. Kua fakaholo ki mua e mahani mitaki he tau tagata i ai. Ma e fakatai, pehē e Tohi Tapu: “Kia fakaalofa a koe ke he Iki [Iehova] hau a Atua mo e hau a loto katoa, mo e hau a agaga katoa, mo e hau a manatu katoa. Ko e poaki fakamua hanā mo e lahi. Kua pihia foki mo ia ne ua aki, Kia fakaalofa atu a koe kia ia ne katofia a mua, kia tuga foki na koe kia koe.” (Mataio 22:37-39) Ko e fakaalofa ke he Atua mo e katofia ka omoomoi e tau tagata he Kautu ke taute e tau mena mitaki ma e falu.

  • Fakaakoaga. Fakatoka he Kautu he Atua e tau tuaga tokoluga ma e tau tagata i ai, ti fakaako foki e tau tagata ke hokotia ke he tau tuaga ia.—Isaia 48:17, 18.

  • Matagahua. Ko e Kautu he Atua kua nakai fakaaoga e tau tagata ke fakamatalahi a lautolu kua pule. Ka kua fakakatoatoa e finagalo he Atua, putoia e maveheaga ma lautolu ne fakaalofa ki a ia to momoui tukulagi he lalolagi parataiso.—Isaia 35:1, 5, 6; Mataio 6:10; Fakakiteaga 21:1-4.