Mataio 8:1-34
8 KUA hifo mai a Iesu he mouga, ti kua mumui mai ai kia ia e lanu tagata tokologa.
2 Kitiala, kua hau e lepela mo e hufeilo mai kia ia, kua pehe mai, Ko e Iki na e, ka finagalo a koe ki ai kua maeke ia koe ke fakamea au.
3 Ti fakaolo ai e Iesu hana lima, kua piki atu kia ia, kua pehe age, Na loto au ki ai, kia mea a koe. Ati mea ai agataha hana lepela.
4 Ti tala age ai a Iesu kia ia, A koe, neke tala age e koe kia taha; ka e fano a koe, fakakite atu a koe ke he ekepoa, mo e uta e koe e poa ne poaki mai ai a Mose, ke eke mo fakamailoga kia lautolu.
5 Kua hoko atu a Iesu ki Kapanaumi, ati hau ai kia ia e takitaki he tokoteau, kua olelalo mai kia ia,
6 Kua pehe mai, Ko e Iki na e, kua takoto haku a fekafekau ke he fale kua gagao he pareluti, kua mamahi lahi ni.
7 Ti tala age ai a Iesu kia ia, To fina atu au ke fakamalolo a ia.
8 Ti tala mai e takitaki he tokoteau, kua pehe mai, Ko e Iki na e, nakai aoga au ke hu atu a koe ke he haku a fale, ka e vagahau hokoia a koe, ti malolo ai haku a fekafekau.
9 Ha ko au foki ko e tagata kua omaoma ke he pule, kua fanogonogo mai kia au e kau, ka tala age au ke he taha, Ati fano a, ti fano ai a ia; mo e taha, Kia hau a, ti hau ai; mo e haku a fekafekau, Kia eke a e mena ia, ti eke ai e ia.
10 Kua fanogonogo ai a Iesu, ti ofo ai a ia, kua pehe age foki kia lautolu ne mumui mai, Ko e moli, ke tala atu e au kia lautolu, nakai kitia e au i Isaraela ha tagata ne tua fakalahi pihia.
11 Ke tala atu foki e au kia mutolu to o mai e tokologa mai he fahi uta mo e fahi lalo ke tatakoto fakalataha mo Aperahamo, mo Isaako, mo Iakopo, ke he kautu he lagi;
12 Ka ko e fanau he kautu, to vega a lautolu ki fafo ke he pouli ha ha i ai e tagi aue mo e konokonoi he tau nifo.
13 Ti pehe age ai a Iesu ke he takitaki he tokoteau, Fano a koe, kia tuga na koe ne tua, kia eke foki pihia māu. Ati malolo ai hana fekafekau ke he magaaho ia.
14 Kua hu atu a Iesu ke he fale a Peteru, ti kitia ai e ia e matua fugavai fifine hana kua takoto ke he kafo vevela.
15 Kua piki atu a ia ke he lima he fifine, ati maulu ai ni e kafo vevela ia ia; ti matike a ia, mo e fekafekau kia lautolu.
16 Kua hoko ke he magaaho afiafi, ti ta mai ai kia ia e lautolu e tau tagata tokologa kua heketia he tau temoni; ti vega ai e ia e tau agaga ke he kupu ni, ne fakamalolo foki e ia a lautolu oti ne gagao.
17 Kia fakamoli ai e kupu he perofeta ko Isaia, ne pehe mai, Ko ia ni kua uta māna e lolelole ha tautolu, kua uta fano foki e ia e tau gagao ha tautolu.
18 Kua kitia e Iesu e lanu tagata tokologa kua agaagai mai kia ia, ti tala age ai a ia ke o ke he fahi atu.
19 Ati hau ai e taha tagata tohikupu, kua pehe mai kia ia, Ko e akoako na e, to mui atu au kia koe ke he tau mena oti ke haele a koe ki ai.
20 Ati tala age ai a Iesu kia ia, Na fai ofaga e tau alope, ne fai mena foki ke momohe ai e tau manu lele, ka ko e Tama he tagata, nakai fai mena a ia ke mohe ai.
21 Ko e taha he hana tau tutaki kua tala age kia ia, Ko e Iki na e, toka au ke fano fakamua ke tanu haku a matua tane.
22 Ka e tala age a Iesu kia ia, Mui mai a kia au, ti toka ai a lautolu kua mamate ke tanu ha lautolu a tau tagata mamate.
23 Kua hake a ia ke he foulua, ati mumui atu ai kia ia hana tau tutaki.
24 Kitiala, kua to mai e afa lahi ke he vai, kua hopo hake e tau peau ki luga he foulua; ka ko ia ha ne tugolo ni.
25 Ti o mai ai hana tau tutaki mo e fafagu a ia, kua pehe mai, Ko e Iki na e, kia fakamomoui mai a e koe a mautolu, ko e mahakava ha ne fai a mautolu.
26 Ati tala age ai a ia kia lautolu, Kua matakutaku a mutolu he ha, ko mutolu ne tua fakatote? Ti matike ai a ia, mo e hataki e matagi mo e vai, ati lahi ai e milino.
27 Ka e ofomate e tau tagata kua pehe age, Ko e tagata ha a enei he fanogonogo kia ia e matagi mo e vai?
28 Kua hoko a ia ke he fahi atu ke he fahi ko Kerekese, ati feleveia ai mo ia e na tagata kua heketia he tau temoni, kua o mai he tau tukuaga, kua favale lahi a laua, nakai maeke ai taha ke fano he hala ia.
29 Kitiala, kua tauui a laua, kua pehe mai, Ko heigoa kia hāu kia mautolu nai, Iesu na e, ko e Tama he Atua? Kua haele mai kia a koe ki hinai ke fakamamahi e koe a mautolu ka e nakaila hoko ke he vaha?
30 Ne mamao foki mo lautolu e fuifui puaka loga kua totolo.
31 Kua olelalo mai kia ia e tau temoni, kua pehe mai, Kaeke ke vega e koe a mautolu ki fafo, tuku mai a a mautolu ke o atu ke he fuifui puaka.
32 Ti tala age ai a ia kia lautolu, Ati o a. Ti o atu ai a lautolu, kua hu atu ke he fuifui puaka. Kitiala, kua hohopo hifo e fuifui puaka oti ke he mena pāpatī ke he vai, kua mamate ai ke he vai.
33 Ati fehola ai e tau tagata ne fagai ai, kua hoko ke he māga, kua talahau atu ai e tau mena oti, katoa mo e tau mena ne hoko ke he na tagata ne heketia he tau temoni.
34 Kitiala, kua o mai e māga oti ia ke fonofono a Iesu; kua kitia e lautolu a ia, ti olelalo mai ai a lautolu kia ia ke fano kehe a ia he fahi ha lautolu.