Pihia e logonaaga he taha tama fifine ne 13 e tau he moui he magaaho ne moua e ia e mena fakaalofa ko e kulī mo manu fao. Ko e fifine ne kautū e pisinisi ne ui ko e komopiuta ne age he matua taane haana he fano a ia he aoga tokoluga ko e mena fakaalofa ne hiki e moui haana. Ko e taane ne nakaila leva e faihoana ne logona hifo ko e lautohi ne taute he hoana haana he taha e tau he mau a laua ko e mena fakaalofa uho ne moua e ia.

He tau tau takitaha, tokologa e tagata ne lahi e magaaho mo e malolō ne fakaaoga ke kumi e mena fakaalofa “uho” ma e kapitiga po ke taha he magafaoa ke lata mo e magaaho pauaki. Ti laulahi ne manako ke logona e tali tuga ha lautolu ne totoku he kamataaga. Ka e kua a koe? Manako nakai a koe ke foaki po ke moua e tau mena fakaalofa ne loto fakaaue mooli ki ai?

Kua mitaki lahi e tuaga ia, nakai ni ha kua aoga e mena fakaalofa ke he tagata ne moua ai ka e pihia foki ha kua fiafia e tagata ne foaki e mena fakaalofa. Ko e mena ia, pehē e Tohi Tapu: “Kua mua e monuina hana ke foaki atu, ke he monuina hana ke talia mai.” (Gahua 20:35) Mooli ai, mua atu e fiafia po ke monuina he foaki ka tokiofa he tagata ne moua e mena fakaalofa.

Maeke fēfē mogoia a koe ke taute e foaki mena fakaalofa mo punaaga mooli he fiafia ma haau mo ia ka moua e mena fakaalofa? Ti ka nakai maeke ke foaki e mena fakaalofa “uho,” ko e heigoa ka taute e koe ke loto fakaaue mooli ke he mena fakaalofa haau?