Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Mei 2017

Mandohop ”Bangsa Beken” uka ”Sombayang akan [Yehowa] dengan Kahanjak”

Mandohop ”Bangsa Beken” uka ”Sombayang akan [Yehowa] dengan Kahanjak”

”[Yehowa] mangalindong kare oloh bangsa beken.”MASMUR 146:9.

NYANYIN: 8473

1, 2. (a) Tantangan narai je inaharep pire-pire paharin itah? (b) Paisek narai je akan imbahas itah?

”METUH parang nampara hong Burundi, ikei ije keluarga tege hong kebaktian,” kuan ije biti pahari je ara Lije. ”Ikei manampayah uluh dari-daria kanih-kate tuntang hatembak. Uluh bakasku tuntang ikei 11 hampahari hadari manyalamat arep dengan pakaian je iimbit ikei akan kebaktian. Limbah manampa jalanan 1.600 kilometer, pire-pire bara keluarga ikei sampai hong eka pengungsi melai Malawi. Tapi, je beken tapisah.”

2 Metuh tuh, hong hapus dunia tege labih bara 65 juta pengungsi. Ewen terpaksa malihi huma awi parang atawa ingapehe. Hindai puji pengungsi kakaren tuh. * (Payah  catatan penda.) Baribu bara kare pengungsi tuh Saksi-Saksi Yehowa. Are bara ewen nihau ramu tuntang uluh je inyinta. Kapehe narai hindai je inaharep ewen? Kilen ampi itah tau mandohop kare paharin itah mangat ewen tatap manempu Yehowa dengan kahanjak metuh manaharep kapehe kilau tuh? (Masmur 100:2) Tuntang, narai cara paling bahalap uka mangabar dengan pengungsi je hindai mangasene Yehowa?

PAMBELUM PENGUNGSI

3. Mbuhen Yesus tuntang are bara murid ayu mengungsi?

3 Yesus tuntang uluh bakas’ah puji mengungsi akan Misir. Hal tuh manjadi limbah malekat Yehowa mampingat Yosep amun Raja Herodes handak mampatei Yesus. Ewen melai hong kanih sampai Herodes matei. (Mateus 2:13, 14, 19-21) Banyelu-nyelu limbah te, kare murid Yesus ”kasaburan akan hapus daerah Yuda tuntang Samaria” awi ingapehe. (Gawin Rasul 8:1) Yesus katawan amun are bara murid ayu terpaksa malihi human ewen. Iye mansanan, ”amon keton ingapehe hong ije lewu, hadari keton akan ije lewu je beken.” (Mateus 10:23) Narai bewei alasa, malihi huma pasti dia purah.

4, 5. Bahaya narai bewei je inaharep pengungsi metuh (a) manampa jalanan? (b) melai hong eka pengungsi?

4 Tege are bahaya je inaharep pengungsi metuh ewen manampa jalanan malihi huma atawa melai hong eka pengungsi. Andi Lije je ara Gad mansanan, ”Ikei mananjung pire-pire minggu tuntang mahalau are tutu hantun kalunen. Metuh te, umurku 12 nyelu. Paingku kembang tutu, jadi aku mansanan akan keluargaku mangat ewen malihi aku. Tapi, Bapaku dia handak malihi aku awi aku tau inawan pemberontak. Jadi, iye mangkipit aku. Genep andau, ikei bausaha tatap belum dengan balakudoa tuntang percaya dengan Yehowa. Kanatek’ah ikei baya kuman mangga je tumbu hong jalan.”Pilippi 4:12, 13.

5 Handak uras anggota keluarga Lije melai hong eka pengungsi Perserikatan Bangsa-Bangsa katahin banyelu-nyelu. Tapi hong kanih kea dia lapas bara bahaya. Lije, je metuh tuh manjadi pengawas daerah, mansanan, ”Are bara uluh je melai hong eka pengungsi jatun gawi. Ewen bagosip, babusau, bajudi, manakau, tuntang amoral.” Mangat dia tapangaruh awi kare hal papa tuh, kare Saksi perlu tatap sibuk hong ungkup. (Ibrani 6:11, 12; 10:24, 25) Ewen mahapan waktu dengan bahalap mangat tatap abas secara rohani, tuntang are je nampara merintis. Ewen tatap mingat amun kajaria kareh ewen balua bara eka pengungsi, kilau bangsa Israel je kajaria dia hindai mangumbang padang pasir. Jituh mahaga ewen tatap hanjak.2 Korintus 4:18.

PARAHAN SINTA AKAN PENGUNGSI

6, 7. (a) ”Sinta Hatalla” manggerek itah uka malalus narai? (b) Nenga suntu.

6 ”Sinta Hatalla” manggerek itah uka mamparahan sinta dengan kawan pahari, khusus’ah metuh ewen manaharep kasusah. (Mbasa 1 Yohanes 3:17, 18.) Akan suntu, metuh tege wayah lau, uluh Kristen abad pangkasulak hong Yuda perlu panginan. Awi te, ungkup maatur mangat ewen mandinun pandohop. (Gawin Rasul 11:28, 29) Rasul Paulus tuntang Petrus kea maanjur uluh Kristen uka  mamparahan kataun atei dengan sama arep. (Roma 12:13; 1 Petrus 4:9) Uluh Kristen inenga anjuran uka mamparahan katau dengan kawan pahari je maja. Labi-labih hindai ewen perlu mamparahan katau akan kawan pahari je huang bahaya atawa ingapehe awi iman ewen! * (Payah catatan penda.)—Mbasa Sewut Salomo 3:27.

7 Haru-harun tuh, tege baribu Saksi-Saksi Yehowa je musti malihi huma awi parang tuntang ingapehe hong daerah timur Ukraina. Je mangapehe atei, pire-pire bara ewen impatei. Tapi, are bara ewen je malihi huma inambang dengan bajenta tuntang inyuhu melai hong huma kawan pahari hong bagian beken Ukraina tuntang hong Rusia. Hong due negara tuh, kawan pahari tatap netral awi ewen ”dia hindai ain kalunen”, tuntang ewen harajur ”mambarita Barita Bahalap bara Hatalla”.Yohanes 15:19; Gawin Rasul 8:4.

PAABAS IMAN KARE PENGUNGSI

8, 9. (a) Tantangan narai bewei je inaharep pengungsi hong negara je taheta? (b) Mbuhen itah musti mandohop ewen dengan sabar?

8 Tege pengungsi je terpaksa pindah akan daerah beken hong negara ewen kabuat. Tapi, are kea je musti pindah akan negara beken je dia ingasene ewen. Bahut pamarentah negara te manyadia panginan, pakaian, tuntang eka melai akan pengungsi. Tapi, pambelum ewen tatap dia purah. Suntu, panginan je inenga mungkin samasinde dia sama dengan panginan hong eka ewen. Pire-pire pengungsi je dumah bara eka je balasut mungkin dia katawan pakaian narai je musti ihapan metuh wayah sadingen. Ewen kea mungkin musti balajar mahapan alat rumah tangga je hindai puji ihapan ewen.

9 Pire-pire pamarentah manyadia program je mandohop kare pengungsi manyasuai arep ewen hong negara je taheta. Tapi limbah pire-pire bulan, ewen iharap tau maurus arep ewen kabuat. Hal tuh tau mimbit tantangan. Coba mikir, ewen musti balajar are hal hong katika je sama, suntu bahasa taheta, kebiasaan taheta, tuntang aturan taheta kilau aturan hong sakula, cara mambayar tagihan tuntang pajak, tuntang cara maajar anak! Jadi metuh mandohop ewen je manaharep kare masalah tuh, en Pahari tau tatap mamparahan kasabar tuntang hormat?Pilippi 2:3, 4.

10. Metuh kare pengungsi dumah, kilen ampi itah tau mampaabas iman ewen? (Payah gambar hong tamparan artikel.)

10 Kanatek’ah awi aturan pamarentah, dia purah akan kawan paharin itah je mengungsi uka mahubung ungkup hong daerah hete. Pire-pire pamarentah maancam dia akan manenga hindai pandohop akan paharin itah je mengungsi. Ewen mungkin manenga gawi je manampa kare pengungsi bahali umba hapumpung. Amun ewen dia handak, kare pengungsi dia tau hindai melai hong negara te. Awi mikeh tuntang dia badaya, are je terpaksa manarima tawaran gawian te. Jadi, metuh kawan paharin itah je mengungsi dumah, itah musti capat manyundau ewen. Ewen perlu mangkeme amun itah paduli dengan ewen. Amun itah paduli tuntang mandohop ewen, itah tau mampaabas iman ewen.Sewut Salomo 12:25; 17:17.

 PANDOHOP JE BAGUNA AKAN PENGUNGSI

11. (a) Narai je pangkasulak’ah imerlu pengungsi? (b) Kilen ampi kare pengungsi tau mamparahan angat tarima kasih ewen?

11 Mungkin hal pangkasulak je tau inenga akan kawan pahari itah iete panginan, pakaian, atawa kebutuhan dasar beken. * (Payah catatan penda.) Panengan sederhana, kilau dasi, pasti baguna tutu. Pasti ih, kare pengungsi dia tau lalau menuntut, tapi ewen musti mamparahan angat tarima kasih akan narai je jadi ilalus uluh beken. Hasil’ah kare pahari je manenga akan sanang. Tapi kajaria, kare pengungsi musti bausaha uka maurus keperluan ewen kabuat. Dengan kalute, ewen akan tatap tege harga diri tuntang tau tege hubungan je bahalap dengan kare pahari je beken. (2 Tesalonika 3:7-10) Tapi, itah tatap perlu manenga pandohop je baguna akan kare pengungsi.

Narai je tau ilalus itah uka mandohop kawan paharin itah je mengungsi? (Payah paragrap 11-13)

12, 13. (a) Pandohop je baguna narai je tau inenga itah akan kare pengungsi? (b) Nenga suntu.

12 Itah dia perlu manjadi uluh tatau haru mandohop kare pengungsi. Je paling imerlu ewen iete waktu tuntang perhatian itah. Suntu, itah tau majar ewen cara mandai taksi atawa mansanan akan ewen eka mamili panginan je sehat tapi murah. Pahari tau kea mandohop ewen maajar cara manggau kare ramu kilau masin jahit, atawa alat beken je tau ihapan ewen manggau duit. Je paling penting,  Pahari tau mandohop ewen uka ewen tau mangkeme kamangat hong ungkup je taheta. Amun tau, metuh Pahari handak tulak hapumpung, nawar akan ewen uka umba Pahari. Pahari tau kea manjelas akan ewen cara mangabar akan kare uluh hong daerah Pahari tuntang mangawal ewen badinas.

13 Hong ije ungkup, metuh tege epat pengungsi tabela dumah, kare bakas ungkup langsung manenga pandohop je baguna akan ewen. Ewen iajar cara manyupir mobil, mangetik surat, tuntang cara manampa lamaran bagawi. Ewen kea mamparahan cara maatur jadwal mangat kaepat uluh tuh tau tatap tau manomor ije Yehowa. (Galatia 6:10) Dia pire limbah te, ewen baepat jadi perintis. Awi pandohop bara kare bakas ungkup tuntang usaha ewen kabuat uka mangguang cita-cita rohani, ewen bahasil manampa kemajuan tuntang dia mipen uka manjadi bagian bara dunia Setan.

14. (a) Godaan narai je perlu inolak pengungsi? (b) Nenga suntu.

14 Kilau uluh Kristen je beken, kare pengungsi perlu manolak godaan tuntang tekanan uka mamenting kare panatau labih bara Yehowa. * (Payah catatan penda.) Lije je inyewut hong tamparan artikel, ewen hampahari mingat palajaran penting tahiu iman je iajar bapa akan ewen metuh ewen buhau malihi lewu. Ewen hamauh, ”Bapaku nampara manganan ije-mije taluh imbit ikei je dia lalau penting. Kajaria, iye mimbing tas je buang, limbah te iye tatawe tuntang hamauh, ’Tuh iye, tikas jituh ih je imerlu itah!’”—Mbasa 1 Timoteus 6:8.

HAL JE PALING IMERLU PENGUNGSI

15, 16. (a) Kilen ampi itah tau mampaabas iman kawan paharin itah? (b) Kilen ampi sapuna cara itah mahibur ewen?

15 Je imerlu kare pengungsi dia baya panginan tuntang pakaian. Ewen perlu ihibur tuntang impaabas bara Alkitab. (Mateus 4:4) Kare bakas ungkup tau manggau publikasi huang bahasa pengungsi tuntang mandohop ewen manggau kare pahari je tau bahasa asal ewen. Jituh penting tutu awi are pengungsi terpaksa malihi narai bewei je ingasene ewen. Ewen pasti taharu dengan keluarga, kakawala, tuntang ungkup. Ewen perlu mangkeme amun Yehowa manyinta ewen mahalau kare pahari seiman. Amun dia, kare pengungsi tau manggau pandohop bara kare uluh je ije kalewu dengan ewen tapi beken Saksi-Saksi Yehowa. (1 Korintus 15:33) Amun ewen mangkeme mangat hong ungkup, jite rima itah bagawi sama-sama dengan Yehowa uka mahaga ”oloh bangsa beken”.Masmur 146:9.

16 Metuh kare uluh je jahat masih bakuasa, Yesus tuntang keluarga dia tau haluli akan huma. Kute kea kare pengungsi wayah tuh. Tapi, tege kea je puna dia handak haluli akan huma. Lije mansanan amun kakarean bara uluh bakas je manampayah anggota keluarga ewen imerkosa tuntang impatei hong lewun asal ewen, dia handak mimbit kawan anak ewen buli. Uka mandohop ewen, itah musti ’hapakat huang auh tiruk tuntang pangkeme, hasinta sama arep sama kilau uluh je hampahari tuntang mamparahan karandah atei’. (1 Petrus 3:8) Awi ingapehe, pire-pire pengungsi rajin mangabuat. Ewen kea mungkin mahamen  mangesah kapehen ewen, mahin hindai amun ihining awi kawan anak ewen. Jadi, coba mikir, ’Amun aku je mangkeme kalute, narai je iharapku bara uluh beken?’Mateus 7:12.

MANGABAR AKAN PENGUNGSI JE BEKEN SAKSI

17. Kilen ampi pengabaran itah tau mahibur kare pengungsi?

17 Are pengungsi dumah bara kare negara je mangahana pengabaran itah. Tapi awi kare Saksi mangabar dengan basemangat, baribu pengungsi kajaria tau mahining ”barita tahiu ampin Hatalla marentah”. (Mateus 13:19, 23) Are je ”mangkeme katanggongan” tahibur tuntang salawah metuh dumah akan pumpung. Ewen langsung manduan kesimpulan ”Hatalla puna toto aton hong bentok keton.”Mateus 11:28-30; 1 Korintus 14:25.

18, 19. Narai je musti iingat itah metuh mangabar akan kare pengungsi?

18 Itah musti pintar harati tuntang ”barendeng” metuh mangabar dengan kare pengungsi. (Mateus 10:16; Sewut Salomo 22:3) Metuh ewen bakesah, hining dengan sabar, tapi ela mambahas kare hal politik. Itah musti maumba petunjuk bara kantor cabang tuntang pamarentah mangat itah dia mimbit arep itah tuntang uluh beken akan bahaya. Awi kare agama tuntang kebudayaan kare pengungsi dia sama, itah perlu balajar tuntang marega angat atei tuntang pikiran ewen. Suntu, are uluh bara pire-pire negara tege pikiran je dia sama tahiu cara uluh bawi musti bapakaian. Jadi metuh mangabar akan ewen, pakaian itah ela sampai manampa ewen tersinggung.

19 Itah handak mandohop uluh je buah kapehe, aluh uluh je beken Saksi-Saksi Yehowa. Dengan kalute itah manyuntu uluh Samaria huang kesah Yesus. (Lukas 10:33-37) Cara paling bahalap mandohop uluh beken iete dengan maajar katutu akan ewen. Ije biti bakas ungkup je are mandohop pengungsi hamauh, itah perlu mansanan langsung amun itah Saksi-Saksi Yehowa. Itah perlu mansanan amun tujuan utama itah mangguang ewen mangat ewen tau balajar harapan bahalap bara Alkitab, beken handak manenga pandohop ekonomi.

HASIL JE MAMPAHANJAK

20, 21. (a) Narai manpaat mamparahan amun itah buju-bujur peduli dengan kare pengungsi? (b) Narai je ilajar itah bara artikel limbah tuh?

20 Amun itah bujur-bujur peduli tuntang sayang dengan ”kare oloh bangsa beken”, hasil’ah pasti bahalap. Suntu, metuh kabali nihau, ije biti pahari je bagare Alganesh mimbit jahawen anak je masih kurik malihi lewun ewen hong Eritrea awi ancaman kakaras. Ewen musti manampa jalanan katahin hanya andau manyuru padang pasir. Kajaria limbah manetei jalanan je kejau, ewen sampai hong Sudan. Iye hamauh, ”Kare pahari hong kanih mawi ikei kilau keluarga, ewen manyadia panginan, pakaian, eka melai, tuntang ongkos akan jalanan. Eweh je handak mimbit uluh je dia ingasene akan huma baya awi manempu Hatalla je sama? Baya Saksi-Saksi Yehowa!”Mbasa Yohanes 13:35.

21 Kilen ampi dengan are anak je umba uluh bakas ewen mengungsi? Hong artikel limbah tuh, itah akan balajar kilen ampi itah uras tau mandohop keluarga kilau tuh uka manempu Yehowa dengan kahanjak.

^ par. 2 Huang artikel jituh, kata ”pengungsi” rima kare uluh je terpaksa malihi human ewen awi parang, kapehe, atawa bencana alam. Ewen mungkin musti pindah akan negara beken atawa daerah beken hong negara ewen kabuat. Komisaris Tinggi PBB Urusan Pengungsi (UNHCR) mansanan amun 1 bara 113 uluh hong hapus dunia terpaksa malihi human ewen.

^ par. 6 Payah artikel ”Berbaik Hatilah kepada Pendatang” hong Menara Pengawal Oktober 2016, hlm. 8-12.

^ par. 11 Metuh kare pengungsi dumah, kare bakas ungkup perlu jeleng maumba petunjuk bara buku Diorganisasi untuk Melakukan Kehendak Yehuwa, pasal 8, paragrap 30. Kare bakas ungkup tau manulis surat akan kantor cabang eka asal pengungsi te mahapan jw.org mangat tau mahubung ungkup eka ewen bihin. Pandehan manunggu jawaban, ewen tau misek bua-buah tahiu ungkup tuntang dinas’ah uka mangatawan kaadaan rohani pengungsi te.

^ par. 14 Payah artikel ”Tak Seorang Pun Dapat Melayani Dua Majikan” tuntang ”Tabahlah—Yehuwa Penolong Saudara!” hong Menara Pengawal 15 April 2014, hlm. 17-26.