Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Mei 2017

Mandohop Anak ”Oloh Bangsa Beken”

Mandohop Anak ”Oloh Bangsa Beken”

”Jaton taloh je labih mampahanjak aku, beken bara mahining tahiu kare anakku je belom manumon auh Hatalla.”3 YOHANES 4.

NYANYIN: 8841

1, 2. (a) Masalah narai je inaharep are anak bara uluh je pindah akan negara beken? (b) Paisek narai je akan imbahas itah?

”ULUH BAKASKU imigran,” kuan Joshua. * (Payah catatan penda.) ”Bara kurik aku jadi mahapan bahasa ewen hong ungkup tuntang hong huma. Tapi bara aku nampara sakula, aku jarang mahapan bahasa uluh bakasku. Huang pire-pire nyelu, aku baya mahapan bahasa uluh. Aku dia harati narai je imbahas hong pumpung. Tuntang, aku mangkeme dia cocok dengan budaya uluh bakasku.” Dia baya Joshua je mangkeme kalute.

2 Wayah tuh, tege labih bara 240.000.000 uluh je dia melai hong negara eka ewen lahir. Amun Pahari ije biti uluh bakas tuntang imigran, narai cara paling bahalap uka maajar anak Pahari sinta Yehowa tuntang uka ”belom manumon auh ajar ain Hatalla”? (3 Yohanes 4) Tuntang, narai je tau inggawi uluh beken uka mandohop?

 ULUH BAKAS, NENGA SUNTU BAHALAP

3, 4. (a) Suntu bahalap narai je tau inenga uluh bakas akan kare anak ewen? (b) Sapuna, uluh bakas dia maharap narai bara anak ewen?

3 Suntu bahalap uluh bakas penting tutu mangat kawan anak tau basobat dengan Yehowa tuntang belum katatahi. Amun anak manampayah Pahari ’manggau helu’ Karajaan Hatalla, ewen tau balajar maandal Yehowa huang pambelum ewen genep andau. (Mateus 6:33, 34) Keleh manomor ije Yehowa huang pambelum Pahari, beken duit atawa gawian. Sauli-ulih, ela bautang tapi keleh belum sederhana. Nggau ”ramo hong sorga” iete dengan malalus kare hal je manampa Yehowa sanang. Tuntang, ela manggau duit bewei atawa ”tara bara oloh.”Mbasa Markus 10:21, 22; Yohanes 12:43.

4 Ela lalau sibuk sampai Pahari jatun waktu akan kare anak Pahari. Parahan amun Pahari sanang dengan keputusan ewen manomor ije Yehowa, beken awi ewen manggau sukses atawa duit akan arep ewen atawa akan Pahari. Ela bapikir amun anak musti manyadia pambelum je mangat tutu akan uluh bakas. Keleh mingat, ”dia ie anak korik je musti manggau ongkos akan oloh bakas, tapi oloh bakas te je musti manggau ongkos akan kare anake”.2 Korintus 12:14.

ULUH BAKAS, ELA MANYARAH AWI BEDA BAHASA

5. Mbuhen uluh bakas musti rancak bapander tahiu Yehowa dengan anak ewen?

5 Alkitab jadi mansanan amun kare uluh ”bara kare basan utus oloh” dumah manalih organisasi Yehowa. (Sakharia 8:23, Surat Barasih 1983) Tapi amun anak Pahari dia lalau harati bahasa Pahari, Pahari bahali maajar ewen katutu. Bara kare uluh je balajar Alkitab dengan Pahari, anak Pahari je paling penting. Tuntang, amun ewen ”mangasene” Yehowa, ewen tau belum katatahi. (Yohanes 17:3) Mangat anak Pahari tau harati kare ajar Yehowa, Pahari musti harajur ”mamandere”.Mbasa Deuteronomium 6:6, 7.

Bara kare uluh je balajar Alkitab dengan Pahari, anak Pahari je paling penting

6. Narai manpaat amun anak Pahari harati bahasa Pahari? (Payah gambar hong tamparan artikel.)

6 Anak Pahari mungkin balajar bahasa eka Pahari melai wayah tuh bara sakula atawa lingkungan. Tapi, ewen akan balajar bahasa Pahari amun Pahari rancak bapander dengan ewen. Amun anak harati bahasa je ihapan Pahari, ewen akan labih purah mangesah angat atei ewen akan Pahari. Tapi, tege manpaat beken. Amun anak Pahari tau harati labih bara ije bahasa, kasanggup bapikir ewen sasar bahalap tuntang ewen labih marega pikiran uluh beken. Ewen kea tau malalus labih are hal hong dinas. Carolina, je uluh bakas’ah imigran, hamauh, ”Manempu Yehowa hong ungkup bahasa beken te rami. Tuntang, mandohop hong eka je labih mamerlu te mampahanjak.”

7. Narai je tau ilalus Pahari amun tege tantangan bahasa huang keluarga Pahari?

7 Tapi, metuh anak Pahari sasar are balajar budaya tuntang bahasa taheta, ewen mungkin dia handak atawa malah dia tau  hindai bapander huang bahasa Pahari. Ketun uluh bakas, amun jite je manjadi dengan anak Pahari, en tau Pahari balajar sadadia isut bahasa je ihapan awi anak Pahari? Amun Pahari harati narai je imander ewen, hiburan je iintih ewen, tuntang narai je ilajar ewen hong sakula, Pahari akan labih purah mampahai anak Pahari manjadi uluh Kristen. Jituh kea manampa Pahari purah bapander dengan guru ewen. Puna, balajar bahasa taheta perlu waktu, usaha, tuntang karandah atei. Tapi tege hasil’ah. Suntu, amun anak Pahari badengen, en Pahari dia bausaha balajar bahasa isyarat uka tau bapander dengan anak Pahari? Kalute kea amun anak pahari dia mahapan bahasa je sama dengan Pahari, Pahari pasti akan tatap bausaha uka tau bapander dengan ewen. *—Payah catatan penda.

8. Amun Pahari dia lalau tau mahapan bahasa eka Pahari melai, narai je tau ilalus Pahari uka mandohop anak Pahari?

8 Akan pire-pire uluh bakas je imigran mungkin dia purah uka mangatawan uras riman bahasa je ihapan anak ewen. Jituh tantangan akan ewen huang maajar ”Surat Barasih” akan anak ewen. (2 Timoteus 3:15) Amun jituh je inaharep Pahari, Pahari masih tau mandohop anak Pahari mangasene tuntang manjadi sobat Yehowa. Ije biti bakas ungkup je ara Shan mansanan, ”Induku mampahai ikei kabuat. Tuntang iye dia lalau harati bahasa je ihapan ikei. Aku tuntang andiku dia lalau paham bahasa je ihapan induku. Tapi, metuh ikei manampayah iye balajar, balakudoa, tuntang bausaha sauli-ulih uka malalus ibadat keluarga genep minggu, kajaria ikei mengerti amun balajar tahiu Yehowa te penting tutu.”

9. Kilen ampi uluh bakas mandohop anak je mungkin perlu balajar huang due bahasa?

9 Tege anak je mungkin perlu balajar tahiu Yehowa huang due bahasa. Mbuhen? Awi bahasa je ihapan ewen hong huma tuntang hong sakula dia sama. Jadi, pire- pire uluh bakas mahapan buku,rekaman audio, tuntang video huang due bahasa. Maka, uluh bakas je imigran musti buju-bujur bausaha uka mandohop anak ewen manjadi sobat Yehowa.

UNGKUP BAHASA NARAI JE COCOK?

10. (a) Eweh je musti manampa keputusan uka mintih ungkup bahasa narai je cocok? (b) Narai je musti inggawi awi kapala keluarga helu bara manduan keputusan?

10 Amun hong daerah eka melai ”oloh bangsa beken” jatun Saksi je mahapan bahasa ewen, ewen perlu umba dengan ungkup je mahapan bahasa hong hete. (Masmur 146:9) Tapi, amun tege ungkup je mahapan bahasa asal ewen hong daerah eka ewen melai, kepala keluarga musti mamutus ungkup bahasa kueh je cocok akan keluarga. Helu bara manampa keputusan, iye perlu mamikir bua-buah tuntang mimbit hong lakudoa. Iye akan barunding helu dengan kabali tuntang kawan anak’ah. (1 Korintus 11:3) Narai je perlu  imikir’ah? Prinsip Alkitab narai bewei je tau mandohop iye manampa keputusan?

Kepala keluarga musti mamutus ungkup bahasa kueh je cocok akan keluarga

11, 12. (a) Kilen ampi bahasa bapengaruh dengan sapire kahai manpaat je indinun anak bara pumpung? (b) Mbuhen pire-pire anak dia handak balajar bahasa uluh bakas ewen?

11 Uluh bakas musti mamikir narai je buju-bujur imerlu awi anak ewen. Mangat tau mangatawan katutu dengan bahalap, anak dia sukup baya mahining ajar Alkitab katahin pire-pire jam genep minggu hong pumpung. Tapi, coba mikir. Amun ewen dumah akan pumpung huang bahasa je paling ewen mengerti, ewen tau labih purah mandinun manpaat bara pumpung te. Ewen mahin tau balajar labih are bara je imikir uluh bakas ewen. Tapi, hasil’ah dia sama amun ewen dia buju-bujur harati bahasa je ihapan hong pumpung te. (Mbasa 1 Korintus 14:9, 11.) Beken bara jite, bahasa je pangkasulak’ah ilajar awi ije biti anak, hindai pasti akan manjadi bahasa je mangana atei tuntang pikiran ewen. Tege anak je tau manenga komentar, bahotbah, tuntang pertunjukan hong bahasa uluh bakas ewen tapi sapuna dia bara atei tuntang pikira kabuat.

12 Dia baya bahasa je mampengaruh atei ije biti anak. Jituh je ingkeme Joshua, je inyewut endau. Paharin Joshua, Esther, hamauh, ”Akan anak, bahasa, budaya, tuntang agama uluh bakas jite ije paket.” Amun anak mangkeme budaya uluh bakas dia cocok dengan ewen, hai kemungkinan ewen dia handak balajar bahasa tuntang agama uluh bakas ewen. Narai je tau inggawi uluh bakas imigran?

13, 14. (a) Mbuhen ije keluarga imigran pindah akan ungkup bahasa eka ewen melai? (b) Narai je inggawi uluh bakas mangat tatap abas secara rohani?

13 Uluh bakas Kristen musti manomor ije kapentingan anak ewen bara kapentingan ewen kabuat. (1 Korintus 10:24) Samuel, bapa bara Joshua tuntang Esther hamauh, ”Aku tuntang kabalingku manantuani anak ikei uka manampayah bahasa narai je paling ewen mengerti metuh ewen balajar kare hal rohani. Ikei kea balakudoa mangat tau manampa keputusan je bahalap. Hasil’ah ikei perlu malalus je dia lalau mangat akan ikei. Ikei manampa keputusan pindah akan ungkup bahasa eka ikei melai, awi ikei manampayah amun anak ikei dia lalau mengerti bahasa je ihapan ikei hapumpung hong ungkup je sulak’ah. Hong ungkup je taheta, ikei hapumpung haya-hayak tuntang kea harajur badinas. Ikei kea marawei kare pahari hong daerah hete uka kuman haya-hayak tuntang rao-raon. Uras tuh mandohop kare anak ikei mangasene kawan pahari tuntang kea Yehowa, dia baya Hatallan ewen tapi kea Bapa tuntang Sobat ewen. Ikei bapikir, jituh labih penting bara ewen mengerti bahasa ikei.”

14 Samuel hamauh hindai, ”Mangat ikei tatap abas secara rohani, ikei kue kabalingku pumpung kea hong bahasa ikei kabuat. Ikei deroh tuntang heka, tapi ikei basukur awi Yehowa mambaleh narai je jadi ilalus ikei. Katatelu anak ikei uras melayani Yehowa hong dinas sepenuh waktu.”

NARAI JE TAU ILALUS ANAK TABELA

15. Mbuhen Kristina mangkeme amun iye labih baguna hong ungkup je mahapan bahasa eka iye melai?

15 Metuh ewen sasar hai, anak mungkin mangkeme ewen akan labih baguna akan Yehowa amun ewen melayani hong ungkup  je mahapan bahasa je paling ewen mengerti. Amun jituh je manjadi, uluh bakas ela bapikir amun anak ewen dia rajin dengan ewen. Kristina hamauh, ”Aku mengerti bahasa uluh bakasku. Tapi bahasa je ihapan hong pumpung bahali tutu akangku. Metuh umurku 12 nyelu, aku dumah hong kebaktian je mahapan bahasa je ihapanku hong sakula. Metuh te, aku haru mengerti amun je ihiningku te katutu! Beken bara te, aku kea mangkeme metuh balakudoa dengan Yehowa mahapan bahasa je ihapanku hong sakula, aku tau bapander dengan Yehowa bara atei!” (Gawin Rasul 2:11, 41) Metuh umur Kristina 18 nyelu, iye barunding tahiu hal te dengan uluh bakas’ah tuntang manampa keputusan je mahapan bahasa eka iye melai. Iye hamauh, ”Aku handak maju secara rohani awi balajar tahiu Yehowa hong bahasa je ihapanku hong sakula.” Dia tahi limbah te, Kristina manjadi perintis biasa tuntang mangkeme kahanjak.

16. Mbuhen Nadia hanjak awi balang pindah akan ungkup bahasa eka iye melai?

16 Anak tabela, en ketun handak pindah akan ungkup je mahapan bahasa eka ketun melai? Amun iyoh, mikir alasa. En pindah akan ungkup beken akan mandohop ketun labih tukep dengan Yehowa? (Yakobus 4:8) Atawa, en awi handak bebas bara uluh bakas atawa ketun dia handak bausaha? Nadia, je metuh tuh melayani hong Betel, hamauh, ”Metuh aku tuntang paharingku jadi nampara hai, ikei handak pindah akan ungkup je mahapan bahasa eka ikei melai.” Tapi, uluh bakas ewen mangatawan amun ewen pindah, jite tau bahaya akan hubungan ewen dengan Yehowa. Nadia hamauh hindai, ”Ikei hanjak awi metuh te uluh bakas ikei dia manalua ikei pindah tuntang bausaha maajar ikei bahasa ewen. Pambelum ikei jadi labih rami, tuntang labih are kesempatan akan ikei uka mandohop uluh beken mangasene Yehowa.”

CARA ULUH BEKEN TAU MANDOHOP

17. (a) Akan eweh Yehowa manenga tanggung jawab mampahai anak ewen? (b) Narai je tau inggawi uluh bakas uka mandohop anak ewen mangasene katutu?

17 Yehowa manenga tanggung jawab akan uluh bakas uka maajar anak ewen katutu. Iye dia manenga tanggung jawab jite akan tambi-bue atawa uluh beken. (Mbasa Sewut Salomo 1:8; 31:10, 27, 28.) Tapi uluh bakas je dia tau bahasa eka ewen melai mungkin perlu pandohop uluh beken uka mangana atei anak ewen. Amun uluh bakas balaku pandohop, jite beken rima amun ewen dia handak manduan tanggung jawab uka mampahai anak ewen. Jite bagian bara mampahai anak ”hapan atoran tuntang ajar bara [Yehowa].” (Epesus 6:4) Akan suntu, uluh bakas tau balaku nasehat bara kare bakas ungkup tahiu cara malalus ibadat keluarga tuntang balaku ewen manggau kare kawal je bahalap akan anak ewen.

Anak tuntang uluh bakas mandinun manpaat bara pergaulan dengan ungkup (Payah paragrap 18, 19)

18, 19. (a) Kilen ampi uluh bakas Kristen beken tau mandohop kare anak tabela? (b) Narai je musti harajur ilalus uluh bakas?

18 Uka mandohop anak ewen, uluh bakas tau marawei keluarga beken uka umba huang ibadat keluarga ewen. Beken bara te, are anak tabela tau balajar bara uluh Kristen beken metuh ewen badinas tuntang malalus kare hal beken haya-hayak. (Sewut Salomo 27:17) Shan je inyewut endau, hamauh, ”Aku mingat dengan kawan pahari je are mandohop aku.  Aku santar balajar are hal bara ewen metuh ewen mandohop aku manampa persiapan tugas hotbah akan pumpung. Aku kea sanang metuh aku nanju-nanjung dengan ewen.”

19 Pasti, amun Pahari ilaku awi uluh bakas imigran uka mandohop anak ewen, Pahari musti harajur maanjur anak ewen uka mahormat uluh bakas ewen. Cara iete dengan bapander dengan ewen kare hal bahalap tahiu uluh bakas ewen tuntang dia manduan tanggung jawab uka mampahai anak ewen. Beken bara te, ewen je mandohop musti mangejau gawi je tau manampa uluh hong huang atawa hong luar ungkup sala paham. (1 Petrus 2:12) Aluh uluh bakas tau balaku pandohop bara uluh beken, tanggung jawab uka majar katutu akan anak ewen tatap tugas uluh bakas. Ewen musti harajur manantuani pandohop je inenga uluh Kristen beken akan anak ewen.

20. Kilen ampi uluh bakas tau mandohop anak ewen uka manjadi rewar Yehowa je baketep?

20 Uluh bakas, keleh balaku pandohop Yehowa tuntang lalus je pangkahalap. (Mbasa 2 Kronika 15:7.) Keleh manomor ije hubungan anak Pahari dengan Yehowa bara kepentingan Pahari kabuat. Lalus taluh handiai mangat Firman Hatalla leket hong atei anak Pahari. Percaya ih amun anak Pahari tau manjadi rewar Yehowa. Metuh kawan anak Pahari manumun Firman Hatalla tuntang suntu bahalap Pahari, Pahari akan mangkeme kilau Rasul Yohanes. Iye mansanan akan kare anak rohani ai, ”Jaton taloh je labih mampahanjak aku, beken bara mahining tahiu kare anakku je belom manumon auh Hatalla.”3 Yohanes 4.

^ par. 1 ”Imigran” rima uluh je pindah akan negara beken tuntang melai hong hete awi pire-pire alasan.

^ par. 7 Payah artikel ”Anda Pasti Bisa Belajar Bahasa Lain!” hong Sedarlah! Maret 2007, hlm. 10-12.