Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Mei 2017

Sanang Awi Belum Sederhana

Sanang Awi Belum Sederhana

DANIEL TUNTANG MIRIAM kawin hong bulan September nyelu 2000 tuntang melai hong Barcelona, Spanyol. Pambelum ewen mangat. Daniel hamauh, ”Awi gawi ikei mangat, ikei tau kuman hong restoran je bahalap, rao-raon akan luar negeri, tuntang mamili baju je hai rega. Ikei kea harajur badinas.” Limbah te, narai je manjadi?

Daniel mahining ije hotbah hong kebaktian nyelu 2006. Hong hotbah te je bahotbah misek, ”En itah handak malalus narai bewei uka mandohop uluh je ’kanjerae iimbit akan tihang gantongan’ mangat ewen tau manyundau jalan je mimbit akan pambelum katatahi?” (Sewut Salomo 24:11) Hotbah tuh mangesah amun barita Alkitab tau manyalamat pambelum uluh, tuntang tanggung jawab itah uka mambarita. (Gawin Rasul 20:26, 27) Daniel mangesah narai je ingkeme metuh te, ”Metuh te aku mangkeme kilau Yehowa je bapander langsung dengangku.” Je bahotbah kea mansanan amun sasar are je ilalus itah akan Yehowa, sasar are kea kasanang itah. Daniel katawan amun auh te bujur awi kabali jadi nampara merintis tuntang hanjak tutu.

Hotbah tuh mangana atei Daniel sampai akhir’ah iye mamutus uka maubah pambelum’ah. Iye mangurang jam bagawi tuntang nampara merintis. Iye kea bapikir amun iye tuntang Miriam pasti akan hanjak tutu amun tau melayani hong eka je perlu labih are penyiar Karajaan.

SULAK’AH BAHALI, KAJARIA SANANG

Metuh bulan Mei 2007, Daniel tuntang Miriam balua bara gawin ewen tuntang pindah akan ije negeri je puji ingguang ewen, iete Panama. Daerah dinas ewen hong pire-pire pulau hong Kare Pulau Bocas del Toro intu Laut Karibia. Tapa are uluh hong kanih uluh Ngabe. Hapan duit tabungan ewen, Daniel tuntang Miriam tau melai hong Panama kira-kira katahin hanya bulan.

Ewen kanih-kate hapan kapal tuntang sapeda. Metuh sulak manyapeda hong kanih, ewen manyuru jalan je manukat 30 kilometer marak andau balasut tutu. Daniel handak tujah awi heka tutu. Tapi uluh Ngabe je inyundau ewen bajenta tutu, mahin hindai limbah ewen tau bapander bahasa Ngabe isu-isut. Dia tahi limbah te, ewen malalus 23 palajaran Alkitab.

Narai je manjadi metuh tabungan ewen lepah? Daniel hamauh, ”Danum matan ikei mahasur metuh maniruk amun ikei musti buli akan Spanyol. Ikei pehe atei awi musti malihi uras uluh je balajar Alkitab dengan ikei.” Tapi ije bulan limbah te, ewen mandinun kabar je mampasanang. Miriam mansanan, ”Ikei mandinun undangan akan manjadi perintis istimewa. Ikei hanjak tutu awi tau tatap batugas hong hetuh!”

KASANANG PANGKAHAI

Hong nyelu 2015, tege je hubah hong Organisasi. Jituh manampa Daniel tuntang Miriam dia hindai manjadi perintis istimewa. Narai je inggawi ewen? Ewen yakin dengan janji hong Masmur 37:5, ”Keleh sarah pambelom aim akan [Yehowa], keleh harap Ie, Ie kareh mandohop ikau.” Akhir’ah, ewen mandinun gawi je tau mendukung ewen merintis biasa. Wayah tuh, ewen melayani hong ije ungkup hong Veraguas, Panama.

Daniel mansanan, ”Metuh masih hong Spanyol, ikei dia yakin en ikei tau belum sederhana. Tapi wayah tuh, ikei dia ragu-ragu hindai, tuntang uras je imerlu ikei tege.” Narai kasanang pangkahai akan ewen? Ewen mansanan, ”Kasanang pangkahai akan ikei iete tau mandohop uluh je randah atei uka mangasene Yehowa!”