Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Mei 2017

”En Ikau Sinta Aku Labih bara Awang Tuh?”

”En Ikau Sinta Aku Labih bara Awang Tuh?”

”Simon anak Yohanes, en ikau sinta aku labih bara awang tuh?”YOHANES 21:15, Terejemahan Dunia Baru [NW].

NYANYIN: 12845

1, 2. Limbah malauk ije ale-alem, palajaran narai je indinun Petrus?

UJU BITI murid Yesus jadi ije ale-alem malauk hong Danau Galilea. Tapi, ije kungan mahin jatun je indinun ewen. Metuh andau hanjewu, Yesus je jadi impisik bara pampatei mendeng hong saran danau manampayah ewen. Limbah te, ”Yesus hamauh dengan ewen, ’Birik jalan keton akan hila gantaun arut, kareh keton tau dinon lauk.’ Palus ewen mambirik jala te, tapi dia olih manjijite awi paham kare lauk intu huange”.Yohanes 21:1-6.

2 Yesus manyarungan kare murid ai dengan rote tuntang lauk akan panginan hanjewu. Limbah te, iye misek dengan Simon Petrus, ”Simon anak Yohanes, en ikau sinta aku labih bara awang tuh?” Yesus mangatawan amun Petrus rajin malauk. Mungkin tujuan Yesus misek iete uka mangatawan en Petrus labih sinta iye tuntang ajara bara usaha manggau lauk. Petrus tumbah, ”Tuan, ikau katawan amun aku sinta  dengam.” (Yohanes 21:15, NW) Petrus balajar hal penting, iye musti labih sinta Kristus bara kare narai bewei. Bara katika te, iye mamparahan sintan ai dengan harajur sibuk huang pengabaran tuntang iye tege peran je penting huang ungkup Kristen.

3. Uluh Kristen perlu bua-buah dengan hal narai?

3 Itah tau balajar narai bara pander Yesus dengan Petrus? Itah perlu bua-buah mangat sintan itah akan Kristus dia sasar nihau. Yesus katawan pambelum hong dunia tuh dia purah tuntang itah akan manaharep tantangan tuntang kikeh. Huang paribasa tahiu panawur binyi, Yesus mansanan akan tege je basemangat metuh ”mahining barita te” huang tampara. Tapi limbah te, ”ewen gogop angate tahiu pambelom ewen tuntang mipen handak belom mangat”. Jite manampa ”barita bara Hatalla te ingalambon”, awi te ewen dia basemangat hindai. (Mateus 13:19-22; Markus 4:19) Amun itah dia bua-buah, kikeh dengan hal je biasa manjadi huang pambelum genep andau tau manderoh pelayanan itah akan Yehowa. Jadi Yesus mampingat kare murid ai, ”Keleh manjaga arep keton, ela sampai keton lalau deroh mawi pesta tuntang mihop danum je tau mambusau atawa lalau manirok kare soal pambelom keton.”Lukas 21:34.

4. Narai je tau imikir itah uka mangatawan sapire dehen sintan itah akan Yesus? (Payah gambar hong tamparan artikel.)

4 Kilau Petrus, itah kea tau mamparahan sinta akan Kristus dengan manomor ije pengabaran huang pambelum itah. Bara kueh itah katawan amun itah harajur malalus hal tuh? Coba mikir, ’Huang pambelum, aku paling rajin dengan narai? Aku hanjak awi melayani Yehowa atawa awi manggawi je beken?’ Akan manjawab due paisek tuh, ayo itah mariksa telu hal huang pambelum itah je tau mampalemu sintan itah akan Kristus. Telu hal tuh iete gawi, hiburan, tuntang panatau.

CARA JE PATUT MANILAI GAWI

5. Narai tanggung jawab kapala keluarga?

5 Petrus malauk dia baya awi iye rajin malalus hal te. Jite usaha akan manyukup kebutuhan keluarga. Kapala keluarga wayah tuh kea inenga tanggung jawab awi Yehowa uka manyadia kebutuhan keluarga. (1 Timoteus 5:8) Jadi, ewen musti cangkal bagawi. Tapi, hong kare andau je pangkarahia tuh, gawi tau manampa stres.

6. Mbuhen gawi wayah tuh tau manampa stres?

6 Bahut, labih are uluh je manggau gawi bara kesempatan akan mandinun gawi. Awi te, uluh hasanselu manggau gawi. Are je mangkeme ewen musti bagawi lembur aluh upah’ah kurik. Are perusahaan handak mahasil labih are ramu dengan labih isut uluh je bagawi. Awi te uluh je bagawi tau stres, heka tutu, tuntang tau haban. Awi mikeh nihau gawi, ewen handak malalus narai bewei je ingahandak awi bos ewen.

Uluh Kristen baketep dengan Yehowa labih bara dengan eweh bewei

7, 8. (a) Itah musti labih baketep dengan eweh? (b) Palajaran barega narai je indinun ije biti pahari hong Thailand tahiu gawi?

 7 Awi itah ije biti uluh Kristen, itah labih baketep dengan Yehowa bara eweh bewei, termasuk bos itah. (Lukas 10:27) Gawi tau manyukup kebutuhan dasar itah tuntang mendukung dinas itah. Tapi, amun itah dia bua-buah, tanggung jawab hong eka bagawi tau manderoh ibadat itah. Tege palajaran je tau induan itah bara pengalaman ije biti pahari hong Thailand. Iye hamauh, ”Aku sanang dengan gawingku, iete mangambuah komputer. Tapi, aku rancak lembur. Akibat’ah, handak jatun waktu akan kare hal rohani. Harian limbah te, aku sadar mangat tau manggau helu Karajaan, aku musti manggau gawi beken.” Narai je ilalus pahari tuh?

8 Iye mangesah, ”Limbah manampa rencana tuntang manabung katahin ije nyelu, aku manampa keputusan bajual es krim hong saran jalan. Sulak’ah, hasil je indinungku isut, tuntang aku pehe atei. Metuh kakawalan manampayah aku, ewen manantawe aku awi bingung mbuhen aku handak bajual es krim, padahal aku tau mangambuah komputer hong ruangan ba-AC. Aku balakudoa dengan Yehowa balaku kasabar tuntang mangat aku tau malalus tujuangku, iete mangat labih are waktu akan kegiatan rohani. Dia tahi limbah te kaadaa sasar bahalap. Aku jadi ulih mangatawan narai angat je irajin awi are uluh je mamili, tuntang aku jadi labih harati cara manampa es krim. Kajaria, genep andau es krim je injualku pasti lepah. Sapuna, hasil je indinungku labih hai bara metuh aku mangambuah komputer. Je manampa aku labih sanang awi gawingku metuh tuh dia manampa aku stres tuntang khawatir kilau gawingku je helu. Tuntang je paling penting, wayah tuh aku mangkeme labih tukep dengan Yehowa.”Mbasa Mateus 5:3, 6.

Je kueh je manampa aku labih sanang, bagawi manggau duit atawa bagawi akan Yehowa?

9. Narai je musti imikir itah uka mangatawan cara itah manilai gawi?

9 Yehowa sanang amun itah rajin bagawi. Amun itah rajin bagawi are manpaat’ah. (Sewut Salomo 12:14) Tapi itah musti mamasti ela sampai gawin itah manjadi labih penting bara pelayanan itah dengan Yehowa. Tahiu kebutuhan dasar itah, Yesus mansanan, ”Jadi, gau helo jalan mangat Hatalla marentah hong pambelom keton tuntang lalus kahandak Ayue. Maka kare taloh awang beken kareh inenga Hatalla kea akan keton.” (Mateus 6:33) Tapi, kilen ampi itah mangatawan amun itah jadi bujur hong cara manilai gawi? Coba mikir, ’Je kueh je manampa aku labih sanang, bagawi manggau duit atawa bagawi akan Yehowa?’ Amun itah mamikir bua-buah paisek tuh, itah akan mangatawan narai je sapuna inyinta itah.

10. Palajaran barega narai je inenga Yesus?

10 Yesus majar narai je sapuna nomor ije huang pambelum itah. Hong ije  katika, Yesus maja human Maria tuntang Marta. Metuh te, Marta langsung manyiap panginan akan Yesus. Tapi, Maria munduk tukep Yesus tuntang mahining auh ajar Yesus. Marta balaku Yesus maningak Maria mangat mandohop iye. Tapi, Yesus hamauh dengan Marta, ”Maria jadi mintih je bahalap, je jaton tau induan bara ie.” (Lukas 10:38-42) Yesus majar ije hal je barega. Mangat itah dia laya dengan gawin itah genep andau tuntang akan mamparahan sintan itah akan Kristus, itah musti ”mintih je bahalap”. Jituh rima hubungan itah dengan Yehowa musti harajur manjadi hal je paling penting huang pambelum itah.

CARA JE BUJUR MANILAI HIBURAN TUNTANG REKREASI

11. Narai je insanan Alkitab tahiu istirahat tuntang santa-santai?

11 Pambelum itah deroh tutu. Jadi, tege katika itah perlu santa-santai tuntang istirahat. Alkitab mansanan, ”Jaton je labih bahalap akan olon beken bara kuman, mihop tuntang mangkeme hasil gawie.” (Pangabar 2:24) Yesus katawan amun kare murid ai perlu istirahat. Suntu, limbah ewen sibuk bagawi huang pengabaran, Yesus hamauh dengan ewen, ”Has itah haguet akan eka je benyem, eka itah ngabuat arep itah tuntang keton tau malayan [atawa, ”istirahat”] hanjulo.”Markus 6:31, 32.

12. Mbuhen itah musti bua-buah dengan rekreasi tuntang hiburan? Nenga suntu.

12 Rekreasi tuntang hiburan tau mandohop itah santai tuntang istirahat. Tapi, itah musti bua-buah mangat jituh dia manjadi hal je paling penting huang pambelum itah. Hong abad pangkasulak, are je bapikir kilau tuh, ”Has itah kuman mihop tuntang hanja-hanjak, basa andau jewu itah toh matei.” (1 Korintus 15:32) Wayah tuh kea, are je bapikir kalute. Suntu, ije biti uluh hatue tabela bara Eropa Barat nampara pumpung. Tapi, awi iye rajin tutu dengan hiburan, iye tende bakawal dengan Saksi-Saksi Yehowa. Rahian andau, iye sadar amun cara belum ayu je lalau manomor ije hiburan mimbit are masalah. Jadi, iye nampara balajar Alkitab hindai. Kajaria, iye tau umba mangabar. Limbah impandui iye hamauh, ”Aku manyasal tutu awi are manganan waktu. Aku sadar amun belum akan Yehowa jite je manampa aku labih sanang bara belum akan manggau hiburan hong dunia tuh.”

13. (a) Mbuhen lalau are hiburan dia bahalap? Nenga suntu. (b) Narai je tau ilalus itah mangat seimbang huang hal hiburan tuntang rekreasi?

13 Tujuan hiburan mangat itah santai tuntang malian kaabas. Jadi, kilen kare waktu je sapuna ihapan itah akan hiburan? Coba mikir suntu jituh. Are uluh rajin panginan je manis-manis, kilau wadai. Tapi amun itah harajur kuman panginan kilau tuh, itah tau haban. Amun handak barigas, itah musti kuman panginan je sehat kea. Kalute kea, amun itah lalau rancak rekreasi tuntang hiburan, hubungan itah dengan Yehowa tau rusak. Jadi, kilen kare waktu je sapuna ihapan itah akan hiburan mangat tatap seimbang? Ije cara uka mangatawa iete dengan manulis pire jam je ihapan itah huang ije minggu akan Yehowa, suntu hapumpung, badinas, tuntang balajar Alkitab. Limbah te, nulis pire jam je ihapan itah hong minggu te akan hiburan, kilau olahraga, nonton tv, atawa main  game. Limbah te, payah jumlah kadadue. En tege je musti inyasuai itah?Mbasa Epesus 5:15, 16.

14. Narai je tau mandohop itah metuh mintih hiburan tuntang rekreasi je bahalap?

14 Yehowa maijin itah uka mintih hiburan. Kepala keluarga kea tau mintih hiburan akan keluarga. Tapi, itah perlu mamasti amun hiburan je iintih itah sasuai dengan prinsip Yehowa je tege hong Alkitab. * (Payah catatan penda.) Hiburan je bahalap ”panengan Hatalla.” (Pangabar 3:12, 13) Puna, hiburan je iintih genep uluh dia sama. (Galatia 6:4, 5) Tapi, hiburan narai bewei je iintih itah, itah musti rende-rendeng. Yesus mansanan, ”Hong kueh panataum, hete kea ateim!” (Mateus 6:21) Amun itah sinta Rajan itah, Yesus, cara itah bapikir, bapander, tuntang taluh gawin itah mamparahan amun Karajaan-Ai jite hal je paling penting.Pilippi 1:9, 10.

USAHAN ITAH MALAWAN SINTA PANATAU

15, 16. (a) Kilen ampi sinta panatau tau manjabak itah? (b) Nasehat bahalap narai je inenga Yesus tahiu panatau?

15 Wayah tuh, are uluh mangkeme ewen perlu tege kare ramu je taheta, kilau baju, hp, komputer, tuntang je beken. Ewen impengaruh awi sinta panatau, cara belum je manomor ije panatau tuntang duit bara uras je beken. Narai  je paling penting akan Pahari ije biti uluh Kristen? Coba mikir, ’En aku labih rancak mahapan waktu mamikir mobil tuntang baju paling taheta bara manyiap bahan akan pumpung? En aku lalau deroh dengan taluh gawi genep andau sampai aku jarang balakudoa tuntang mambasa Alkitab?’ Amun itah dia bua-buah, itah tau labih mamenting kare panatau bara sintan itah dengan Kristus. Itah perlu mamikir auh Yesus, ”Bua-buah tuntang rende-rendeng, ela sampai keton kamaha.” (Lukas 12:15) Mbuhen iye hamauh kilau te?

Itah dia mungkin tau manenga je pangkahalap akan Yehowa amun hong katika je sama itah kea manggau panatau

16 Yesus mansanan amun ”ije biti mahin jaton oloh tau bagawi akan due tuan.” Iye mansanan kea, ”Keton dia tau bagawi akan Hatalla tuntang akan ramon panatau.” Itah dia mungkin tau manenga je pangkahalap akan Yehowa amun hong katika je sama itah kea manggau panatau. Yesus mansanan amun itah akan ”sinta dengan ije bara je beken” atawa ”heret dengan tuan ije te bara je beken”. (Mateus 6:24) Awi dia sempurna, itah musti harajur malawan ”taloh je manyanang biti”, termasuk sinta panatau.Epesus 2:3.

17. (a) Mbuhen tege je bahali mahaga pandangan je bujur tahiu panatau? (b) Narai je tau mandohop itah malawan sinta panatau?

17 Are uluh lalau manomor ije kanahuang tuntang kasanang ewen kabuat. Jituh manampa ewen bahali mahaga pandangan je bujur tahiu panatau. (Mbasa 1 Korintus 2:14.) Awi te, ewen bahali mambeda narai je bujur tuntang je sala. (Ibrani 5:11-14) Kanahuang ewen dengan panatau tau manjadi sasar hai. Tuntang sasar are panatau je indinun ewen, sasar hai kea kanahuang te. (Pangabar 5:10) Tapi itah tau malawan sinta akan panatau dengan harajur mambasa Firman Hatalla. (1 Petrus 2:2) Awi Yesus mangumang Firman Yehowa, iye tau malawan kare godaan Iblis. (Mateus 4:8-10) Kalute kea dengan itah wayah tuh, amun itah handak malawan sinta akan panatau, itah musti manjalan nasehat Alkitab. Dengan kalute, Yesus akan mangatawan amun itah labih sinta iye bara panatau.

Narai je paling penting huang pambelum Pahari? (Payah paragrap 18)

18. Narai tekad Pahari?

18 Metuh Yesus misek Petrus, ”En ikau sinta aku labih bara awang tuh?”, iye sapuna majar amun melayani Yehowa musti manjadi hal je paling penting huang pambelum Petrus. Je patut kea inantuani aran Petrus rima ”Ije Batu”. Jituh ulih imbukti awi Petrus puna tege sipat-sipat je bahalap kilau bukit batu. (Gawin Rasul 4:5-20) Itah kea batekad mangat sintan itah dengan Kristus tatap dehen. Awi te, keleh harajur mamasti mangat gawi, hiburan tuntang panatau dia manjadi hal je paling penting huang pambelum itah. Dengan kalute, kilau Petrus, itah tau manenga jawaban akan Yesus, ”Tuan, ikau katawan amun aku sinta dengam.”

^ par. 14 Payah artikel ”Apakah Rekreasi Saudara Bermanfaat?” hong Menara Pengawal 15 Oktober 2011, hlm. 9-12, par. 6-15.