Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Mei 2017

Ela Manalua Sintan Pahari Sasar Nihau

Ela Manalua Sintan Pahari Sasar Nihau

”Kapapa sasar tayap dia lue-luen sampai are oloh dia olih tinai malalus gawin asi.”MATEUS 24:12.

NYANYIN: 60135

1, 2. (a) Sulak’ah, auh Yesus hong Mateus 24:12 manjadi akan eweh? (b) Kilen ampi buku Gawin Rasul mamparahan amun are uluh Kristen abad pangkasulak mahaga sintan ewen tatap dehen? (Payah gambar hong tamparan artikel.)

METUH hong bumi, Yesus mansanan kare tanda mangat uluh tau mangatawan ”kalepah kalunen”. Ije bara kare tanda iete ”are oloh dia olih tinai malalus gawin asi”. (Mateus 24:3, 12) Uluh Yahudi abad pangkasulak mangaku amun ewen ungkup Hatalla, tapi je manjadi sintan ewen akan Hatalla sasar nihau.

2 Tapi, dia uras kalute. Are uluh Kristen hong abad pangkasulak mahaga sintan ewen. Ewen dengan basemangat mansanan ”Barita Bahalap tahiu Yesus” tuntang mamparahan sintan ewen akan Hatalla, pahari seiman, tuntang aluh akan ewen je hindai manarima katutu. Ewen harajur mahaga mangat sintan ewen dengan Hatalla tatap dehen. (Gawin Rasul 2:44-47; 5:42) Tapi, tege kea pire-pire uluh Kristen  hong abad pangkasulak je manalua sintan ewen sasar nihau. Narai bukti?

3. Mbuhen sinta pire-pire uluh Kristen sasar nihau?

3 Yesus mansanan akan uluh Kristen abad pangkasulak hong Epesus, ”Ikau djari undur bara sintam, idje solake te”. (Pangarinah 2:4, Surat Barasih 1983) Mungkin, je manampa ewen kalute awi pengaruh kare uluh hong kaliling ewen je pambelum’ah baya akan manyanang arep. (Epesus 2:2, 3) Epesus iete lewu je tatau. Uluh hong lewu te labih manomor ije kamangat arep ewen kabuat bara hal beken. Taluh gawin ewen dia bamoral tuntang ewen dia marega hukum Hatalla. Ewen labih rajin manyanang arep ewen kabuat bara manyanang Hatalla tuntang uluh beken.

4. (a) Narai bukti amun sinta hong jaman itah sasar nihau? (b) Telu sinta narai je musti harajur ihaga itah?

4 Auh Yesus tahiu sinta je sasar nihau manjadi kea hong jaman itah. Sinta are uluh akan Hatalla sasar nihau. Labih are uluh percaya dengan organisasi kalunen akan mamberes masalah dunia tuh, beken dengan Hatalla. Awi te, sintan ewen sasar nihau. Sinta rewar Yehowa mahin tau sasar nihau, kilau je manjadi hong ungkup Epesus huran. Awi te, ayo itah mambahas telu sinta je musti ihaga itah mangat dia sasar nihau: (1) sinta akan Yehowa, (2) sinta akan katutun Alkitab, tuntang (3) sinta akan kawan paharin itah.

SINTA AKAN YEHOWA

5. Mbuhen itah musti sinta Hatalla?

5 Sapuna, eweh je musti paling inyinta itah? Yesus mansanan, ”’Sinta [Yehowa] Hatallam dengan salepah ateim, dengan salepah hambaruam, tuntang dengan salepah kaharatim. Jete parentah je mambatang tuntang je pangkahaie!’” (Mateus 22:37, 38) Awi itah sinta Hatalla, itah akan manumun hukum-Ai, sabar manyarenan kapehe, tuntang manyingi kapapa. (Mbasa Masmur 97:10.) Tapi, Setan tuntang dunia je jahat bausaha mampalemu tuntang mampahancur sintan itah akan Hatalla.

6. Narai je manjadi amun sinta ije biti uluh akan Hatalla sasar nihau?

6 Cara dunia manilai sinta te sala. Are uluh ”manggau taloh akan kepentingan arepe kabuat” awi ewen sinta arep ewen labih bara Hatalla. (2 Timoteus 3:2) Ewen baya mamikir taluh ”je ingipen awi sipat olon je badosa, je inampayah balalu impatamam”. (1 Yohanes 2:16) Rasul Paulus mampingat narai je tau manjadi amun itah manomor ije kasanang. Iye mansanan, ”Amon tirok keton inguasa awi sipat olon, maka kajariae keton buah pampatei.” Mbuhen? Awi dengan malalus hal te ewen sapuna hamusuh dengan Hatalla. (Roma 8:6, 7) Uluh je belum baya manggau duit tuntang manggau kasanang dengan mawi gawi je dia bamoral kajaria akan manyasal.1 Korintus 6:18; 1 Timoteus 6:9, 10.

7. Cara bapikir je bahaya narai je tau mampengaruh uluh Kristen?

7 Are uluh je dia percaya Hatalla, je percaya amun Hatalla dia peduli, tuntang je percaya evolusi. Ewen bausaha manampa uluh dia manyinta Hatalla atawa malah manampa uluh dia percaya amun Iye tege. Ewen handak mamparahan baya uluh humung atawa uluh je dia sakula percaya dengan Panjapa. Are uluh kea labih marega kare paneliti bara Panjapa.  (Roma 1:25) Uluh Kristen mahin tau tapangaruh dengan cara bapikir kilau tuh. Amun jituh je manjadi, hubungan dengan Yehowa dia rantep hindai, tuntang sinta akan Hatalla tau sasar nihau.Ibrani 3:12.

8. (a) Kaadaan narai bewei je tau manampa rewar Yehowa pehe atei? (b) Kilen ampi Masmur 136 mahibur itah?

8 Awi itah belum hong dunia je jahat, are hal je tau manampa itah pehe atei. (1 Yohanes 5:19) Tapi, amun itah lalau pehe atei, iman itah tau balemu tuntang sintan itah akan Hatalla tau sasar nihau. Suntu, itah mungkin manaharep masalah awi sasar bakas, kahaban je paham, atawa masalah duit. Atawa, itah mungkin pehe atei awi dia ulih manggawi ije hal kilau kahandak itah. Itah kea mungkin kecewa awi tege hal je manjadi dia kilau je iharap. Narai bewei tantanga, ela sampai itah mangkeme Yehowa jadi malihi itah. Ngumang auh kutak je mahibur hong Masmur 136:23 je mansanan amun Hatalla ”dia mangalapean itah katika itah impakalah; sintan Aie melai katatahie”. Yakin ih amun Yehowa mahining ’palakun’ itah tuntang akan manjawab’ah.Masmur 116:1; 136:24-26.

9. Narai je mandohop Paulus mahaga sinta akan Yehowa tatap dehen?

9 Rasul Paulus mangumang bua-buah kilen ampi Yehowa mendukung iye, tuntang hal tuh manampa iye tatap abas. Iye manulis, ”[Yehowa] te pandohopku, aku jaton mikeh. Narai taloh je tau iawi oloh dengangku?” (Ibrani 13:6) Awi maandal Yehowa, Paulus ulih manaharep are masalah. Metuh manaharep kapehe, iye tatap percaya dengan Yehowa. Aluh imenjara, iye tatap ulih mampaabas kawan pahari kristen mahalau surat je ingirim akan kare ungkup. (Epesus 4:1; Pilippi 1:7; Pilemon 1) Aluh manaharep are kapehe, iye harajur mahaga mangat sinta dia sasar nihau. Iye maandal ”Hatalla je mandehen pambelom hambaruan oloh kalunen. Ie mandehen atei-huang ikei hong gagenep kapehe je ingkeme ikei”.  (2 Korintus 1:3, 4) Kilen ampi itah tau manyuntu Paulus?

Parahan sinta akan Yehowa (Payah paragrap 10)

10. Kilen ampi itah tau mahaga mangat sintan itah akan Yehowa tatap dehen?

10 Paulus mangesah ije cara mangat sintan itah akan Hatalla tatap dehen. Iye manulis, ”Keleh balakudoa harajur.” Hong katika beken, iye kea manulis, ”Baketep huang lakudoa.” (1 Tesalonika 5:17; Roma 12:12) Mbuhen lakudoa tau manampa itah sasar tukep dengan Hatalla? Metuh balakudoa, itah bapander dengan Yehowa. Awi te, itah tau basobat Denga. (Masmur 86:3) Dengan manusuh angat atei tuntang pikiran itah akan Yehowa, itah akan sasar tukep dengan Yehowa. (Masmur 65:3) Tuntang metuh itah mangkeme lakudoa te injawab, itah akan sasar sinta Denga. Itah tau yakin amun Yehowa ”tokep dengan oloh je mantehau Ie”. (Masmur 145:18) Amun itah percaya sinta tuntang dukungan Yehowa, itah impaabas manaharep masalah narai bewei je mungkin manjadi wayah tuh tuntang hong andau harian.

SINTA AKAN KATUTUN ALKITAB

11, 12. Narai je tau inggawi itah mangat itah sasar sinta katutun Alkitab?

11 Awi itah uluh Kristen, itah manyinta katutu. Katutu te tege huang Firman Hatalla. Yesus mansanan akan Bapa, ”Auh Bapa jete katoto.” (Yohanes 17:17) Mangat itah tau sinta katutun Alkitab, itah musti balajar isi. (Kolose 1:10) Tapi, jite bewei dia sukup. Nantuani kilen ampi je manyurat Masmur 119 mandohop itah mengerti narai je perlu ilalus. (Mbasa Masmur 119:97-100.) Huang taluh gawin itah genep andau, itah musti harajur mangumang narai je imbasa itah bara Alkitab. Dengan mangumang narai guna malalus katutun Alkitab akan pambelum itah, itah akan sasar manyinta katutu.

12 Je manyurat Masmur kea hamauh, ”Lalehan kamanis auh Aim, angate labih manis bara mado!” (Masmur 119:103) Basaan je indasar bara Alkitab je inyiap organisasi Hatalla kilau panginan je mangat. Metuh kuman panginan je irajin itah, pasti itah dia handak capa-capat mampalepah’ah, tapi, itah handak rangka-rangkah mangekeme angat’ah. Kalute kea, metuh balajar, itah dia handak malalus’ah dengan kajeng-kisu. Dengan kalute, itah akan mangkeme ”auh ampong” bara katutu, tuntang itah labih purah mingat narai je imbasa itah tuntang mangguna akan mandohop uluh beken.Pangabar 12:10.

13. Narai je mandohop Yeremia manyinta Firman Hatalla? Kilen ampi jite mampengaruh iye?

13 Nabi Yeremia sinta Firman Hatalla. Iye hamauh, ”Sana aku djari mandino auchm, maka djete indu panginangku; auchm, te djari indu kahandjak tuntang karantang ateiku; karana aku puna djari injewut tumon aran ajum, o [Yehowa], Hatalla idje Tempon kare kawan taloh belom.” (Yeremia 15:16, Surat Barasih 1983) Yeremia mangumang kare auh kutak Yehowa je barega, tuntang iye maraji. Iye marega tugas’ah manjadi wakil Yehowa tuntang je mimbit peteh bara Hatalla. Amun itah sinta katutun Alkitab, itah akan sadar amun manjadi Saksi-Saksi Yehowa tuntang mangabar barita bahalap Karajaan hong andau je pangkaharia tuh istimewa tutu.

Parahan sinta akan katutun Alkitab (Payah paragrap 14)

14. Narai hindai je tau ilalus itah mangat labih sinta katutun Alkitab?

14 Mangat labih sinta katutun Alkitab, itah perlu rajin hapumpung. Hong pumpung,  itah iajar awi Yehowa. Ije cara utama itah iajar dengan balajar Alkitab genep minggu mahapan majalah Mambarita. Mangat mandinun manpaat je hai bara pumpung tuh, itah musti manampa persiapan. Suntu, itah tau mambasa uras ayat je tege huang artikel. Wayah tuh, purah akan itah men-download atawa mambasa Mambarita huang format elektronik awi majalah jituh tege huang are bahasa hong situs Web jw.org tuntang hong aplikasi JW Library. Pire-pire format elektronik mandohop itah manggau ayat Alkitab je inyadur. Tapi narai bewei cara je ihapan itah, itah akan sasar sinta Alkitab amun itah dia kajeng-kisu mambasa kare ayat’ah tuntang mangumang’ah.Mbasa Masmur 1:2.

SINTA AKAN KAWAN PAHARIN ITAH

15, 16. (a) Parentah narai je inenga Yesus hong Yohanes 13:34, 35? (b) Narai hubunga sinta Hatalla tuntang Alkitab dengan sinta kawan paharin itah?

15 Hong alem terakhir Yesus hong bumi, iye mansanan akan kare murid ai, ”Parentah taheta inenga-Ku akan keton: Keleh keton hasinta sama arep keton. Kilau aku jari sinta keton, kalote kea keton musti hasinta sama arep keton. Amon keton hasinta sama arep keton, oloh handiai kareh katawan je keton toh murid-Ku.”Yohanes 13:34, 35.

16 Sinta dengan kawan pahari tege hubunga dengan sinta akan Yehowa. Amun itah dia sinta Hatalla, itah dia mungkin tau sinta kawan paharin itah. Tuntang amun itah dia sinta kawan paharin itah, itah dia mungkin tau sinta Hatalla. Rasul Yohanes manulis, ”Oloh je dia sinta paharie je gitae, dia bakae ie tau sinta Hatalla je dia gitae.” (1 Yohanes 4:20) Sinta itah akan Yehowa tuntang kawan paharin itah tege hubunga kea dengan sinta itah akan Alkitab. Mbuhen? Amun itah sinta dengan narai ilajar itah bara Alkitab, itah akan tagerek uka manumun parentah Alkitab uka sinta Hatalla tuntang kawan paharin itah.1 Petrus 1:22; 1 Yohanes 4:21.

Parahan sinta akan kawan paharin itah (Payah paragrap 17)

17. Narai je tau inggawi itah uka mamparahan sintan itah?

 17 Mbasa 1 Tesalonika 4:9, 10. Narai je tau inggawi itah uka mamparahan amun itah sinta kawan paharin itah hong ungkup? Uluh je jadi bakas mungkin perlu induan akan pumpung tuntang iagah buli kan huma. Atawa, ije biti pahari balu mungkin perlu pandohop uka mangambuah huma. (Yakobus 1:27) Itah tau manantuani, manenga dukungan tuntang mahibur kawan pahari je pehe atei, stres, atawa manaharep masalah. (Sewut Salomo 12:25; Kolose 4:11) Mahalau kutak tuntang taluh gawin itah, itah tau mamparahan amun itah sinta ”kare paharin itah je sama kapercayae”.Galatia 6:10.

18. Narai je tau mandohop itah amun itah tege masalah dengan kawan pahari?

18 Alkitab mansanan amun ”hong andau je pangkarahiae”, are je mamenting arep tuntang bakuhu hong dunia je jahat tuh. (2 Timoteus 3:1, 2) Awi itah uluh Kristen, itah perlu bausaha uka harajur sinta Yehowa, Firman-Ai, tuntang sama arep. Awi dia sempurna, mungkin tau lembut masalah dengan kawan paharin itah. Tapi awi itah sinta sama arep, itah akan bajeleng mamberes masalah narai bewei dengan cara je pamasi. (Epesus 4:32; Kolose 3:14) Ela sampai sinta itah sasar nihau! Tapi, keleh harajur sinta Yehowa, Firman-Ai, tuntang kawan paharin itah.