Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Mei 2017

 KESAH PAMBELUM

Aluh Badengen, Aku tatap Tau Majar Uluh Beken

Aluh Badengen, Aku tatap Tau Majar Uluh Beken

Aku impandui nyelu 1941, metuh umurku 12 nyelu. Tapi, aku haru buju-bujur mengerti isi Alkitab metuh nyelu 1946. Mbuhen? Aku akan mangesah’ah.

METUH kira-kira nyelu 1910, uluh bakasku pindah bara Tbilisi, Georgia, akan Kanada. Ewen melai hong pasah bentuk tana tukep lewu Pelly, Saskatchewan, hong hila barat Kanada. Aku lahir nyelu 1928, tuntang aku anak tambusu bara jahawen hampahari. Jahawen bulan helu bara aku lahir, bapaku matei. Limbah te, induku matei metuh aku masih awau. Dia tahi limbah te, kaka tambakasku, Lucy, matei metuh umur 17 nyelu. Jadi, mamaku je ara Nick maurus aku tuntang kawan paharingku.

Ije katika metuh aku haru tau mananjung, keluargaku manampayah aku manjijit ikuh kuda ikei. Ewen mikeh kuda te manakir aku. Jadi, ewen manangkariak uka mampingat aku. Tapi, metuh te aku manalikut ewen, tuntang aku dia mahining kombak ewen. Untung aku dia calaka. Bara metuh te, keluargaku mangatawan amun aku badengen.

Tege uluh je patuh dengan keluarga ikei manenga saran mangat aku inyakula haya-hayak dengan anak je badengen kea. Jadi, Mama Nick manamean aku hong sakula khusus akan uluh badengen hong kota Saskatoon, Saskatchewan. Eka sakula tuh kejau bara huma keluargaku. Awi umurku masih lime nyelu, aku mikeh. Aku baya tau buli metuh libur sakula. Aluh kalute, aku balajar bahasa isyarat tuntang tau bangang dengan anak je beken.

 MANGASENE KATUTU

Hong nyelu 1939, kakaku Marion kawin dengan Bill Danychuck. Bara metuh te ewen maurus aku tuntang kakaku je beken, Frances. Hong keluarga ikei, ewen je pangkasulak balajar Alkitab dengan Saksi-Saksi Yehowa. Katahin wayah libur, ewen bausaha majar aku narai je ilajar ewen bara Alkitab. Tapi awi ewen dia tau bahasa isyarat, ikei bahali paham ije dengan je beken. Aluh kalute ewen katawan amun aku rajin dengan narai je ilajarku tahiu Yehowa. Awi katawan narai je ilalus ewen pasti bara Alkitab, aku umba mangabar dengan ewen. Dia tahi limbah te, aku handak impandui. Tuntang hong tanggal 5 September 1941, Bill mampandui aku hong bak sanaman je danum’ah induan bara sumur. Danum’ah kilau danum es!

Haya-hayak uluh je badengen beken melai kebaktian hong Cleveland, Ohio, nyelu 1946

Hong nyelu 1946, metuh aku libur tuntang buli akan huma, ikei umba kebaktian hong Cleveland, Ohio, AS. Andau pangkasulak kebaktian, ewen kakaku manulis catatan akangku mangat aku tau maumba acara. Tapi hong andau kadue, aku hanjak tutu awi tege eka khusus akan uluh badengen hong kebaktian. Hong hete tege uluh je menerjemah acara akan bahasa isyarat. Kajaria, aku hanjak awi tau bujur-bujur mengerti narai je inyampai hong kebaktian tuntang je iajar Alkitab. Luar biasa angat’ah!

MAJAR KATUTU

Buli bara kebaktian, aku haluli sakula. Metuh te, Perang Dunia II haru terai, tuntang are uluh handak mamparahan amun ewen setia dengan negara. Tapi awi aku jadi mangatawan katutu, aku batekad uka tatap baketep dengan Yehowa. Jadi, aku dia hindai manggatang lenge mahormat bendera, manyanyi lagu negara huang bahasa isyarat, tuntang maraya andau hai. Aku dia hindai hayak kawal sakula akan gereja. Kare guru dia rajin tuntang manindas, mananjaru aku mangat pikiranku hubah. Kare kawal sakula katawan hal te, tapi malah are kesempatan uka mangesah imanku akan ewen. Pire-pire bara ewen, kilau Larry Androsoff, Norman Dittrick, tuntang Emil Schneider, kajaria manempu Yehowa sampai wayah tuh.

Metuh aku mangguang lewu beken, aku santar bausaha uka mangabar dengan uluh je badengen. Suntu, metuh hong Montreal, aku mangguang eka uluh je badengen hakumpul. Hong kanih aku mangabar akan Eddie Tager, ije biti anggota geng je masih tabela. Sampai iye matei nyelu male, iye umba hong ungkup bahasa isyarat hong Laval, Quebec. Aku kea sundau dengan ije biti uluh hatue tabela je ara Juan Ardanez. Kilau uluh Berea huran, iye mariksa haluli narai je ilajar’ah uka mamasti en jite puna bujur bara Alkitab. (Gawin Rasul 17:10, 11) Iye kea impandui, tuntang manjadi bakas ungkup hong Ottawa, Ontario, sampai iye matei.

Mangabar hong jalan metuh tamparan 1950-an

Hong nyelu 1950, aku pindah akan Vancouver. Aluh aku rajin mangabar akan uluh badengen, aku tege pengalaman je bahalap metuh mangabar akan Chris Spicer, ije biti uluh bawi je dia badengen, metuh aku mangabar hong jalan. Iye handak harajur manarima majalah itah tuntang iye handak aku manyundau bana, Gary. Aku maja akan human ewen, tuntang ikei tuntang bakesah panjang dengan mahapan tulisan. Banyelu-nyelu limbah te haru ikei hasundau hindai hong kebaktian hong Toronto, Ontario.  Aku tarewen metuh ewen manabe aku. Gary impandui andau te! Bara pengalaman tuh, aku balajar penting tutu uka harajur mangabar, awi eweh tawa uluh je ingabar itah kajaria akan manarima katutu.

Pire-pire katahi limbah te, aku haluli akan Saskatoon. Hong kanih, aku hasundau dengan ije biti uluh bawi je balaku mangat aku majar Alkitab akan due anak bawi kembar ayu je badengen, Jean tuntang Joan Rothenberger. Ewen sakula hong ekaku sakula bihin. Dia tahi limbah te, due anak bawi tuh mangesah narai je ilajar ewen akan kakawala ije kelas. Hasil’ah, lime biti kawal ewen ije kelas manjadi Saksi Yehowa. Ije bara ewen iete Eunice Colin. Aku puji hasundau dengan Eunice metuh tukep lulus hong sakula akan uluh badengen. Metuh te, iye manenga akangku gula batu tuntang misek en aku handak bakawal denga. Harian andau limbah te, iye manjadi uluh je penting tutu huang pambelumku. Iye manjadi sawangku!

Dengan Eunice nyelu 1960 tuntang 1989

Metuh indu Eunice katawan amun Eunice balajar Alkitab, iye balaku kapala sakula uka mangatau Eunice mangat tende balajar. Aluh kapala sakula jadi bausaha, sampai iye manduan bahan palajaran Alkitab ayun Eunice, tapi Eunice jadi batekad uka tatap baketep dengan Yehowa. Metuh iye handak impandui, uluh bakas’ah hamauh, ”Amun ikau jadi Saksi Yehowa, ikau dia tau hindai melai huma tuh!” Jadi metuh umur Eunice 17 nyelu, iye balua bara huma tuntang melai dengan keluarga Saksi. Iye tarus balajar tuntang kajaria impandui. Metuh ikei kawin nyelu 1960, uluh bakas Eunice dia dumah. Tapi, limbah banyelu-nyelu mahalau, ewen nampara marega kepercayaan ikei tuntang cara ikei majar kawan anak ikei.

YEHOWA HARAJUR MAHAGA AKU

Anakku Nicholas tuntang sawa, Deborah, melayani hong Betel London

Dia purah akan ikei je badengen uka mampahai uju biti anak hatue je tau bapander normal. Tapi, ikei tatap majar  ewen bahasa isyarat mangat ikei tau bapander dengan ewen tuntang majar ewen katutu. Kawan pahari hong ungkup are mandohop ikei. Suntu, ije biti pahari hong ungkup mansanan akan ikei mahalau tulisan amun ije biti anak ikei bapander papa hong Balai Karajaan. Jadi, ikei tau langsung maurus hal te. Epat biti anak ikei, James, Jerry, Nicholas, tuntang Steven, manjadi bakas ungkup tuntang dengan baketep melayani Yehowa dengan kabalin tuntang keluarga ewen. Nicholas tuntang sawa, Deborah, mandohop penerjemahan bahasa isyarat hong kantor cabang Inggris. Steven tuntang sawa, Shannan, mandohop tim penerjemahan bahasa isyarat hong kantor cabang Amerika Serikat.

Kare anakku James, Jerry, tuntang Steven dengan sawan ewen mendukung gawin mangabar huang bahasa isyarat dengan are cara

Aku pehe atei metuh Eunice matei awi kanker. Jituh manjadi ije bulan helu bara ulang tahun pangawin ikei je ka-40. Katahin manyarenan panyakit je babehat tuh, Eunice tatap abas awi iman akan kamisik. Aku jadi dia sabar handak hasundau iye hindai.

Faye tuntang James, Jerry tuntang Evelyn, Shannan tuntang Steven

Hong bulan Februari 2012, aku manjatu tuntang sapan tulang sapakku pelek. Aku katawan amun aku perlu  pandohop, jadi aku melai dengan ije bara anakku tuntang sawa. Ikei umba hong Ungkup Bahasa Isyarat Calgary, tuntang aku manjadi bakas ungkup. Sapuna, jituh ungkup bahasa isyarat eka pangkasulak aku umba! Helu bara jituh aku umba ungkup bahasa Inggris. Jadi, kilen ampi hubungangku dengan Yehowa tau tatap abas katahin tuh? Yehowa mandohop aku. Iye manggenep Janji uka mahaga anak nule. (Masmur 10:14, Surat Barasih 1983) Aku batarima kasih tutu dengan uras je katahin tuh handak manulis catatan, balajar bahasa isyarat, tuntang saulih ewen mandohop menerjemah akangku.

Umba sakula perintis bahasa isyarat metuh umur 79

Tege katika aku mangkeme dia harati narai je handak inyampai uluh atawa aku mangkeme jatunti je mengerti cara mandohop uluh je badengen. Jituh manampa aku stres tuntang handak manyarah. Tapi hong katika kilau tuh, aku akan mangumang auh Petrus akan Yesus, ’Tuan ikei haguet manalih eweh? Auh Tuan manenga pambelum je bujur tuntang katatahi.’ (Yohanes 6:66-68) Kilau are pahari je badengen beken je jadi tahi huang katutu, aku balajar basabar. Aku balajar uka percaya dengan Yehowa tuntang organisasi-Ai, jituh mimbit are manpaat. Wayah tuh are bahan balajar Alkitab bara organisasi je mahapan bahasa isyarat. Tuntang, aku hanjak awi tau dumah akan pumpung tuntang kebaktian hong Bahasa Isyarat Amerika. Pambelumku buju-bujur hanjak tuntang imberkat awi melayani Yehowa, Hatallan itah je tamam.