Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  September 2017

Nyuntu Kataun Yehowa

Nyuntu Kataun Yehowa

”Aku [Yehowa], iete Hatalla je kontep katau tuntang asi.”—EKSODUS 34:6.

NYANYIN: 142, 12

1. Kilen ampi Yehowa mangesah tahiu Arep’ah akan Moses, tuntang mbuhen hal tuh penting?

SINDE katika, Hatalla mangesah tahiu Arep’ah akan Moses dengan mansanan Ara tuntang pire-pire sipat-Ai. Sapuna Yehowa tau mansanan tahiu kuasa tuntang kapintar-kaharatin-Ai. Tapi, je pangkasulak Iye malah manyewut tahiu kataun atei tuntang asin-Ai. (Mbasa Eksodus 34:5-7.) Moses handak katawan en Yehowa akan manenga dukungan aka. Jadi, Yehowa mangesah kare sipat-Ai je mamparahan amun Iye buju-bujur handak mandohop rewar-Ai. (Eksodus 33:13) Kilen ampi angat atei itah metuh mangatawan amun Yehowa peduli tutu dengan itah? Artikel tuh akan mambahas tahiu kataun atei. Jite rima umba mangkeme kapehen uluh beken tuntang kanahuang uka mandohop ewen.

2, 3. (a) Mbuhen dia aneh amun kalunen tege kataun atei? (b) Mbuhen itah perlu balajar tahiu kataun atei?

2 Yehowa Hatalla je kuntep katau, tuntang kalunen inampa manumun gambar-Ai. Jadi, dia aneh amun kalunen tau tuntang peduli dengan uluh beken. Uluh je dia mangasene Yehowa rancak kea mamparahan katau. (Genesis 1:27) Hong Alkitab tege are suntu tahiu uluh je mamparahan  kataun atei. Suntu, hong jaman Raja Salomo tege due biti uluh bawi je harabut ije anak awau. Uka mangatawan eweh sapuna indu anak te, Salomo manenga parentah mangat awau te inyila due. Bawi je buju-bujur indu anak te sayang tutu dengan anak’ah. Jadi, iye balaku dengan raja mangat awau te inenga ih akan bawi je harabut denga. (1 Raja 3:23-27) Suntu beken iete anak bawin Piraun. Metuh iye sundau awau Moses, iye katawan amun Moses uluh Ibrani tuntang sapuna musti impatei. Tapi, ”putri raja masi” dengan awau te. Awi te, iye manduan Moses manjadi anak angkat’ah.—Eksodus 2:5, 6.

3 Mbuhen itah perlu balajar tahiu kataun atei? Awi Yehowa handak itah manyuntu Iye. (Epesus 5:1) Aluh itah inampa dengan kasanggup uka mamparahan kataun atei, itah dia sempurna tuntang kanatek’ah baya mamikir arep. Tege katika, itah bahali mamutus pea itah perlu mandohop uluh beken tuntang pea itah perlu mamikir arep itah kabuat. Kilen ampi mangat itah tau labih peduli dengan uluh beken? Pangkasulak, itah perlu mangatawan cara Yehowa tuntang uluh beken mamparahan kataun atei. Kadue, itah perlu mamikir cara manyuntu kataun atei Hatalla tuntang hasil’ah akan itah.

YEHOWA—SUNTU KATAUN ATEI JE PANGKAHALAP

4. (a) Mbuhen Yehowa mangirim malekat akan Sodom? (b) Narai je tau ilajar itah bara pangalaman keluarga Lot?

4 Hong Alkitab tege are suntu tahiu kataun atei Yehowa. Suntu, coba mikir narai je ilalus Yehowa akan Lot. Lot ije biti uluh bahalap je ”buah kapehe paham” awi hadat papa uluh Sodom tuntang Gomora. Ewen dia mahormat Hatalla. Jadi, Yehowa mamutus amun ewen patut matei. (2 Petrus 2:7, 8) Yehowa mangirim malekat uka mansanan akan Lot amun Sodom tuntang Gomora akan impalumus tuntang iye musti hadari bara kota te. Alkitab mansanan, ”Lot bembang. Tapi [Yehowa] masi ie; awi te due-due [malekat] te magah Lot dengan sawae tuntang kadadue anake akan luar lewu.” (Genesis 19:16) Yehowa mangatawan narai je ingkeme Lot. Awi te, itah tau yakin amun Iye kea mangatawan masalah narai bewei je inaharep itah.—Yesaya 63:7-9; Yakobus 5:11; 2 Petrus 2:9.

Yehowa mangatawan masalah narai bewei je inaharep itah

5. Palajaran narai je tau indinun itah bara Alkitab tahiu kataun atei?

5 Yehowa kea majar rewar-Ai uka mamparahan kataun atei. Coba mikir ije bara kare hukum je Inenga akan bangsa Israel. Amun ije biti uluh minjam duit, je mahanjaman duit tau manduan pakaian luar uluh je minjam akan sanda utang’ah. (Mbasa Eksodus 22:26, 27.) Tapi je mahanjaman duit musti malian pakaian luar uluh te helu bara matanandau belep mangat je bautang dia sadingen metuh hamalem. Uluh je jatun kataun atei dia akan malian  baju te. Tapi, Yehowa majar rewar-Ai uka mamparahan kataun atei. Prinsip bara hukum tuh majar narai akan itah? Ela dia peduli tahiu narai je imerlu kawan paharin Kristen itah. Amun itah ulih mandohop kawan paharin itah je kapehe, itah perlu malalus’ah.—Kolose 3:12; Yakobus 2:15, 16; mbasa 1 Yohanes 3:17.

6. Palajaran narai je tau indinun itah bara kataun atei Yehowa dengan uluh Israel?

6 Yehowa tau dengan uluh Israel aluh metuh ewen badosa Denga. Alkitab mansanan, ”[Yehowa] Hatallan tato hiang ewen, jari lula-luli mangirim kare sarohae akan mampingat ungkup Ayue, awi Ie sayang dengan ewen tuntang dengan human Ayue.” (2 Kronika 36:15) Kalute kea, itah perlu mamparahan kataun atei dengan uluh je hindai mangasene Yehowa je mungkin akan batobat tuntang basobat Denga. Yehowa dia handak aluh ije biti uluh impalumus hong Harmagedon. (2 Petrus 3:9) Jadi pandehan masih tege waktu, itah handak mambarita pingat tuh akan are uluh je ulih ingabar itah mangat ewen kea mandinun kataun atei Hatalla.

7, 8. Mbuhen ije keluarga tau yakin amun Yehowa mamparahan kataun atei dengan ewen?

7 Are rewar Hatalla jadi mangkeme kataun atei Yehowa. Suntu, hong nyelu 1990-an hong Bosnia, kare suku baparang tuntang hapatei. Ije biti anak hatue je inyewut itah Milan umur 12 nyelu, melai hong kanih dengan keluarga. Milan, andi, uluh bakas’ah tuntang pire-pire Saksi beken haguet bara Bosnia akan Serbia mandai bis uka dumah akan kebaktian. Uluh bakas Milan akan impandui hong kebaktian te. Tapi hong perbatasan, pire-pire tantara manantuani amun keluarga Milan bara suku je beken. Jadi, ewen inyuhu balua bara bis, tuntang je beken inyuhu tarus miar. Ewen inahan katahin due andau. Kajaria, petugas je batanggung jawab hong kanih manelpon komandan ewen tuntang misek narai je musti inggawi dengan keluarga te. Keluarga Milan mendeng tukep hete tuntang tau mahining komandan te hamauh, ”Imbit ewen haguet bara hete tuntang tembak ih!”

8 Pandehan petugas te bapander dengan tantara je beken, tege due biti uluh hatue je manukep keluarga Milan. Ewen hamauh bisi-bisik mansanan amun ewen kea Saksi Yehowa tuntang ewen insanan awi kare pahari hong bis tahiu narai je manjadi. Due Saksi te balaku Milan tuntang andi tame akan mobil ewen uka tau mahalau perbatasan awi dokumen anak kurik dia akan iriksa. Limbah te, due pahari te mansanan akan uluh bakas Milan uka mananjung mangaliling likut pos perbatasan tuntang hasundau hindai dengan ewen limbah mahalau perbatasan. Milan mikeh tutu sampai iye dia katawan musti hanjak atawa manangis. Uluh bakas Milan misek, ”En ewen akan manalua ikei haguet?” Tapi metuh ewen nampara haguet bara hete, kare tantara ampi dia manampayah ewen. Milan tuntang andi sundau hindai dengan uluh bakas ewen limbah mahalau perbatasan tuntang ewen manyambung jalanan akan eka kebaktian. Ewen yakin amun Yehowa manjawab kare lakudoan ewen. Itah katawan bara Alkitab amun  Yehowa dia santar mangalindung rewar-Ai dengan cara kilau te. (Gawin Rasul 7:58-60) Tapi hong kejadian tuh, Milan hamauh, ”Ampi, kare malekat manutup matan kare tantara tuntang Yehowa manyalamat ikei.”—Masmur 97:10.

Kilau Yesus, en itah buju-bujur handak mandohop uluh tuntang majar ewen tahiu Yehowa?

9. Kilen ampi angat atei Yesus dengan uluh are je manuntut iye? (Payah gambar hong tamparan artikel.)

9 Yesus manenga suntu je bahalap tahiu kataun atei. Iye masi dengan uluh je manuntut iye awi ewen ”heka toto ampie tuntang jaton katawan en taloh je musti iawi ewen, sama kilau tabiri je jaton bara sakatik”. Jadi, narai je ilalus’ah? ”Ie te nampara majar are hal akan ewen.” (Mateus 9:36; mbasa Markus 6:34.) Tapi, uluh Parisi jatun kataun atei tuntang dia handak mandohop uluh. (Mateus 12:9-14; 23:4; Yohanes 7:49) Kilau Yesus, en itah buju-bujur handak mandohop uluh tuntang majar ewen tahiu Yehowa?

10, 11. En santar mamparahan kataun atei te bahalap? Nenga penjelasan.

10 Aluh kalute, dia cocok kea santar mamparahan kataun atei. Suntu, Raja Saul mungkin bapikir amun iye mamparahan kataun atei dengan dia mampatei Agag, rajan uluh Amalek tuntang musuh rewar Hatalla. Saul kea dia mampatei uras metu ayun uluh Amalek. Sapuna, Yehowa jadi manyuhu Saul uka mampatei uras uluh Amalek tuntang metu ayun ewen. Awi Saul dia handak manumun Yehowa, Yehowa dia handak hindai iye manjadi raja. (1 Samuel 15:3, 9, 15, Surat Barasih 1983) Yehowa Hakim je adil. Iye tau mambasa atei kalunen tuntang katawan pea Iye dia perlu mamparahan kataun atei. (Tatum 2:17; Esekhiel 5:11) Dia pire hindai, Iye akan mampalumus uras uluh je dia handak manumun. (2 Tesalonika 1:6-10) Jite beken waktu akan Yehowa uka mamparahan kataun atei dengan uluh papa. Dengan mampalumus ewen, Yehowa mamparahan kataun atei dengan uluh bahalap je akan Inyalamat’ah.

11 Puna beken hak itah manjadi hakim uka mamutus en ije biti uluh patut belum atawa matei. Tapi, je tau ilalus itah wayah tuh iete mandohop uluh saulih itah. Narai bewei je tau ilalus itah uka mamparahan kataun atei dengan uluh beken? Coba itah manantuani pire-pire nasehat je tau ilalus.

CARA MAMPARAHAN KATAUN ATEI

12. Narai je tau ilalus itah uka mamparahan kataun atei?

12 Rajin mandohop uluh. Yehowa balaku dengan uluh Kristen uka mamparahan kataun atei dengan sama arep tuntang kawan paharin ewen. (Yohanes 13:34, 35; 1 Petrus 3:8) Ije bara kare riman kataun atei iete ”haya-hayak kapehe”. Uluh dengan kataun atei akan bausaha mandohop uluh je kapehe. Jadi, itah perlu manggau kesempatan  uka mandohop uluh beken, suntu dengan mandohop ewen bapili tuntang mamparasih huma.—Mateus 7:12.

Parahan kataun atei dengan rajin mandohop (Payah paragrap 12)

13. Narai je inggawi rewar Hatalla amun tege bencana alam?

13 Mandohop korban bencana. Itah handak mamparahan kataun itah dengan uluh je kapehe awi bencana. Rewar Yehowa ingasene rajin mandohop korban bencana. (1 Petrus 2:17) Suntu, ije biti pahari bawi hong Japang melai hong daerah je hancur awi gempa bumi tuntang tsunami nyelu 2011. Iye impaabas tuntang ihibur metuh are je dumah mandohop dengan kahias atei bara are daerah hong Japang tuntang bara kare negara beken uka mangambuah huma tuntang Balai Karajaan. Iye mangesah, ”Bara pangalaman tuh aku mangkeme amun Yehowa te peduli. Saksi kea peduli dengan kare paharin ewen. Are kawan pahari hong hapus dunia balakudoa akan ikei.”

14. Kilen ampi itah tau mandohop uluh je haban atawa je bakas?

14 Mandohop ewen je haban atawa je jadi bakas. Itah mamparahan kataun atei dengan uluh je kapehe awi panyakit atawa awi kabakas. Itah mentai katika uras masalah tuh jatun hindai. Jadi, itah balakudoa mangat Karajaan Hatalla dumah. Pandehan mentai, itah manggawi narai je ulih inggawi itah uka mandohop ewen je haban tuntang je jadi bakas. Ije biti penulis je ara Jan Boon manulis amun indu je jadi bakas  buah panyakit Alzheimer. Ije katika, indu mahit hong salawar. Metuh indu mamparasih’ah, bel huma mahiau. Due pahari bawi je bahut maja iye dumah. Ewen misek en ewen tau mandohop iye. Indu hamauh, ”Aduh aku mahamen, tapi tau ih.” Due pahari bawi te mandohop iye mamparasih arep’ah, limbah te manampa teh aka tuntang bapande-pander denga. Jan Boon batarima kasih tuntang hamauh amun Saksi ”malalus narai je iajar ewen”. Awi kataun atei, en Pahari manggawi saulih Pahari uka mandohop uluh je haban atawa je jadi bakas?—Pilippi 2:3, 4.

15. Narai cara beken uka mandohop uluh?

15 Mandohop uluh mangasene Yehowa. Cara paling bahalap uka mandohop uluh iete dengan majar ewen tahiu Hatalla tuntang Karajaan-Ai. Cara beken iete dengan mandohop ewen mangatawan amun manumun parentah Yehowa mahasil kahalap akan ewen. (Yesaya 48:17, 18) Pangabaran iete cara je bahalap uka manara Yehowa tuntang mamparahan kataun atei akan uluh beken. En itah tau bagawi labih are huang dinas?—1 Timoteus 2:3, 4.

MANPAAT KATAUN ATEI AKAN ITAH

16. Narai manpaat kataun atei akan itah?

16 Kare ahli kesehatan mental mansanan amun dengan kataun atei, itah tau barigas tuntang hubungan itah dengan uluh beken akan labih bahalap. Amun itah mandohop uluh je kapehe, itah akan labih sanang, tuntang pikiran itah labih bahalap. Jadi, mamparahan kataun atei bahalap akan itah. (Epesus 4:31, 32) Amun itah mandohop uluh beken awi sinta, atei itah sanang awi itah malalus narai je ilaku Yehowa. Dengan kataun atei, itah akan manjadi uluh bakas, kabali, tuntang kawal je labih bahalap. Beken bara te, uluh dengan kataun atei bahut akan mandinun pandohop metuh ewen mamerlu pandohop.—Mbasa Mateus 5:7; Lukas 6:38.

17. Mbuhen itah handak mamparahan kataun atei?

17 Aluh itah mandinun manpaat awi mamparahan kataun atei, alasan utama itah mamparahan kataun atei awi itah handak manyuntu Yehowa tuntang manara Iye. Bara Iye sinta tuntang kataun atei. (Sewut Salomo 14:31) Iye manenga suntu paling bahalap akan itah. Jadi, keleh itah manggawi saulih itah uka manyuntu Hatalla dengan mamparahan kataun atei. Hasil’ah, itah akan labih rantep dengan kawan pahari tuntang tege hubungan je bahalap dengan uluh beken.—Galatia 6:10; 1 Yohanes 4:16.