Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  September 2017

Harajur Mangendali Arep Te Penting

Harajur Mangendali Arep Te Penting

”Oloh je imimpin awi Roh Hatalla . . . harajur olih mahaga arepe.”—GALATIA 5:22, 23.

NYANYIN: 83, 52

1, 2. (a) Narai je manjadi awi kurang mangendali arep? (b) Mbuhen itah perlu mambahas tahiu mangendali arep?

MANGENDALI AREP te ije bara kare sipat je tau indinun itah dengan pandohop Yehowa. (Galatia 5:22, 23) Yehowa ulih mangendali Arep’ah dengan sempurna. Tapi, itah bahali mangendali arep itah awi dia sempurna. Are masalah je manjadi awi kurang mangendali arep. Suntu, ije biti uluh mungkin dia langsung manggawi hal je penting atawa kurang bahalap metuh malalus tugas hong sakula atawa eka bagawi. Tuntang, uluh je dia ulih mangendali arep bahut kasar, rajin manyapa, rajin babusau, kecanduan, are utang, tame penjara, cerai, kana panyakit awi hubungan seks, batihi helu bara kawin, atawa kapehen atei je malabien.—Masmur 34:12-15.

2 Uluh je dia ulih mangendali arep mangapehe arep ewen kabuat tuntang uluh beken. Wayah tuh, itah tau manampayah amun uluh puna sasar dia ulih mangendali arep. Tapi, itah dia tarewen awi Alkitab jadi manujum amun hong ”kare andau je pangkarahiae” uluh sasar dia ulih mangendali arep.—2 Timoteus 3:1-3.

3. Mbuhen itah perlu mangendali arep?

 3 Mbuhen itah perlu mangendali arep? Tege due alasan penting. Ije, uluh je ulih mangendali arep bahut masalah’ah labih isut. Hubungan ewen dengan uluh beken bahalap tuntang dia capat basingi, dia purah mikeh, atawa stres. Due, itah perlu malawan godaan tuntang mangendali kanahuang je sala mangat tau tatap hasobat dengan Hatalla. Jituh je dia ulih ilalus awi Adam tuntang Hawa. (Genesis 3:6) Kilau ewen, are uluh metuh tuh manaharep masalah je babehat awi dia mangendali arep.

4. Narai je tau mahibur ewen je kanjera bausaha mampakalah kanahuang je sala?

4 Yehowa katawan itah dia sempurna tuntang kanatek’ah bahali mangendali arep. Tapi, Iye handak mandohop itah mampakalah kanahuang je sala. (1 Raja 8:46-50) Awi Iye Sobat je bahalap, Iye mampaabas kare uluh je kanatek’ah bahali mangendali angat atei tuntang kanahuang ewen. Hong artikel tuh, itah akan balajar bara cara Yehowa mangendali Arep’ah. Itah kea akan balajar bara suntu je bahalap tuntang je dia bara Alkitab. Tuntang, itah akan mambahas pire-pire nasehat je baguna.

YEHOWA MANENGA SUNTU

5, 6. Suntu narai je inenga Yehowa?

5 Awi Yehowa sempurna, Iye tau mangendali Arep’ah dengan sempurna. (Deuteronomium 32:4) Tapi itah dia sempurna. Aluh kalute, itah tau bausaha mangendali arep dengan balajar bara cara Yehowa mangendali Arep’ah. Dengan kalute, metuh tege je manampa itah basingi, itah tau manaharep kaadaan te dengan bahalap. Itah akan mambahas pire-pire suntu je mamparahan kilen ampi Yehowa mangendali Arep’ah.

Awi Yehowa sempurna, Iye tau mangendali Arep’ah dengan sempurna

6 Coba mikir narai je inggawi Yehowa metuh Setan malawan. Mungkin, auh dawan bara Setan manampa uras malekat je baketep mangkeme tarewen, basingi, tuntang bajilek dengan Setan. Itah mungkin mangkeme hal je sama metuh mamikir uras kapehe je lembut awi Setan. Tapi, Yehowa ulih mangendali Arep’ah. Iye manaharep kaadaan te dengan cara je bujur. Awi Iye dia capat basingi tuntang adil, Iye manenga sukup waktu uka mamberes masalah tuh. (Eksodus 34:6; Yob 2:2-6) Mbuhen? Awi Iye dia handak eweh bewei impalumus, tapi ”kahandak Ayue te uka oloh samandiai uras hobah bara kare dosae”.—2 Petrus 3:9.

7. Narai je tau ilajar itah bara suntu je inenga Yehowa?

7 Suntu bara Yehowa majar itah penting tutu uka bapikir bua-buah sahindai mampalua pander tuntang dia capat manampa tindakan. Jadi, helu bara manampa keputusan penting, itah perlu bapikir bua-buah tuntang dia kajeng-kisu. Laku kapintar-kaharati mahalau lakudoa mangat itah tau mansanan atawa malalus gawi je bujur. (Masmur 141:3) Bahut, metuh tege kaadaan je dia  mangat, uluh bahali mangendali arep. Awi te, are uluh manyasal awi mansanan atawa malalus gawi je dia imikir!—Sewut Salomo 14:29; 15:28; 19:2.

SUNTU JE BAHALAP TUNTANG JE PAPA

8. (a) Hong kueh itah tau manyundau suntu bahalap tahiu mangendali arep? (b) Mbuhen Yosep dia manyarah dengan rayuan sawan Potipar? (Payah gambar hong tamparan artikel.)

8 Kesah Alkitab kueh bewei je mamparahan puna penting mangendali arep? Ije bara kare kesah te iete kesah Yosep anak Yakub. Iye malawan godaan metuh bagawi hong human Potipar, kapala pasukan Piraun. Sawan Potipar rajin dengan Yosep awi iye ”gagah hayak bakena”. Iye marayu Yosep pire-pire kali. Mbuhen Yosep ulih malawan rayuan tuh? Iye mungkin jadi mamikir bua-buah narai akibat’ah amun iye manyarah dengan rayuan te. Jadi, metuh bajun Yosep injijit awi sawan Potipar, Yosep hadari balua. Iye hamauh, ”Dia baka aku tau mawi gawi papa tumon te tuntang badosa dengan Hatalla.”—Genesis 39:6, 9; mbasa Sewut Salomo 1:10.

Keleh balaku bara Yehowa kapintar-kaharati tuntang kasanggup mangendali arep uka malawan godaan

9. Kilen ampi cara malawan godaan?

9 Narai je tau ilajar itah bara suntu Yosep? Amun itah dinun godaan uka malanggar hukum Hatalla, itah perlu malawa. Helu bara manjadi Saksi-Saksi Yehowa, are je bausaha uka manang malawan gawi sala kilau kuman malabien, mihup are alkohol, maroko, mahapan narkoba, hubungan seks dia sah, tuntang gawi papa beken. Aluh limbah impandui, ewen kanatek’ah mipen malalus kare hal te hindai. Amun jituh je ingkeme Pahari, mikir bua-buah narai pengaruh’ah akan hubungan Pahari dengan Yehowa. Pahari kea tau mamikir kaadaan narai bewei je tau manampa Pahari mipen, limbah te mikir kilen ampi mangejau’ah. (Masmur 26:4, 5; Sewut Salomo 22:3) Amun Pahari tantihu tege hong kaadaan kilau te, keleh balaku bara Yehowa kapintar-kaharati tuntang kasanggup mangendali arep uka malawan godaan te.

10, 11. (a) Narai je inaharep anak tabela hong sakula? (b) Narai bewei je tau mandohop anak tabela malawan godaan?

10 Je manjadi dengan Yosep inaharep kea awi are anak tabela Kristen wayah tuh. Ije bara ewen iete Kim. Kakawala hong sakula sanang bakesah amun ewen mawi hubungan seks hong pangkalepah minggu. Kim jatun pangalaman je kilau te. Awi iye dia sama dengan je beken, iye mangkeme ingejau tuntang jatun kawal. Tuntang awi iye jatun pacar, Kim inyewut mameh awi kakawala. Tapi, Kim sapuna pintar-harati awi iye katawan amun godaan uka mawi hubungan seks tau kuat tutu metuh wayah katabela. (2 Timoteus 2:22) Murid beken rancak misek en iye masih bujang. Jite manenga Kim kesempatan uka mangesah mbuhen iye dia handak mawi hubungan seks. Itah sanang awi are  anak tabela Kristen batekad uka malawan godaan uka mawi hubungan seks je dia sah. Yehowa kea sanang dengan ewen!

11 Tege kea suntu bara Alkitab tahiu uluh je dia ulih malawan godaan uka mawi hubungan seks je dia sah. Suntu tuh mamparahan hasil papa awi dia mangendali arep. Amun kaadaan ketun sama kilau je inaharep Kim, ngumang kesah tahiu ije biti anak tabela humung hong Sewut Salomo pasal 7. Ngumang kea gawin Amnon tuntang hasil papa taluh gawi. (2 Samuel 13:1, 2, 10-15, 28-32) Uluh bakas kea tau mandohop anak ewen uka sasar bahalap mangendali arep tuntang pintar-harati dengan mambahas kare suntu tuh hong alem ibadat keluarga.

12. (a) Kilen ampi Yosep mangendali angat atei’ah metuh hasundau dengan kawan pahari? (b) Hong kaadaan narai bewei itah perlu mangendali angat atei itah?

12 Hong kejadian beken, Yosep kea manenga suntu je bahalap. Metuh te, kawan pahari dumah akan Misir uka mamili panginan. Uka mangatawan en ewen jadi hubah, Yosep dia mansanan amun iye andi ewen. Metuh iye dia ulih hindai manyarenan angat atei’ah, iye manggau eka je benyem uka manangis. (Genesis 43:30, 31; 45:1) Mungkin, tege paharin itah je manampa itah pehe atei. Dengan manumun suntu Yosep mangendali arep, itah dia akan mansanan atawa malalus hal je mungkin kareh manampa itah manyasal. (Sewut Salomo 16:32; 17:27) Atawa keluarga itah mungkin tege je impalua bara ungkup. Amun kalute, itah perlu mangendali arep uka dia bapander denga amun dia perlu. Jituh mungkin bahali ilalus. Tapi, jituh labih purah ilalus amun itah mingat gawin itah te manyuntu Yehowa tuntang manumun Kahandak’ah.

Itah dia tau lalau percaya dengan arep kabuat, bapikir itah dia akan puji manyarah dengan godaan

13. Narai palajaran barega je indinun itah bara Raja Dawid?

13 Itah kea tau balajar bara Raja Dawid. Metuh Saul tuntang Simei handak manampa Dawid basingi, Dawid dia basingi atawa mambaleh ewen. (1 Samuel 26:9-11; 2 Samuel 16:5-10) Tapi, Dawid puji dia mangendali arep. Jituh tau inampayah bara dosa dengan Batseba tuntang cara iye manaharep Nabal je bakuhu. (1 Samuel 25:10-13; 2 Samuel 11:2-4) Narai palajaran barega je indinun itah? Ije, kare pengawas Kristen khusus’ah perlu mangendali arep ewen mangat dia mahapan wewenang dengan cara je sala. Due, itah dia tau lalau percaya dengan arep kabuat, bapikir amun itah dia akan puji manyarah dengan godaan.—1 Korintus 10:12.

JE TAU ILALUS PAHARI

14. Narai je inaharep Luigi, tuntang mbuhen itah perlu manyuntu iye?

14 Kilen ampi mangat itah sasar bahalap mangendali arep? Nantuani pangalaman Luigi. Tege mobil manantarang likut mobil ayu. Aluh je sala te supir  mobil je manantarang, supir te malait Luigi tuntang mimbit iye kalahi. Luigi balakudoa mangat tau tatap sabar. Limbah te, iye bausaha mampasabar supir te. Tapi uluh te tatap meha-mehang denga. Jadi, Luigi mancatat keterangan asuransi uluh te, limbah te iye malihi supir je masih meha-mehang te. Ije minggu limbah te, Luigi dinas tuntang maja haluli akan huma ije biti uluh bawi. Ampi, supir mobil endau banan uluh bawi te! Uluh hatue te mahamen tuntang balaku maap awi gawi je dia bahalap. Iye hamauh amun iye akan mangesah narai je sapuna manjadi dengan uluh asuransi mangat mobil Luigi tau capat ingambuah. Uluh hatue te umba dengan sawa huang palajaran Alkitab tuntang iye rajin tutu. Bara kejadian tuh, Luigi mangatawan penting tutu tatap sabar. Iye kea katawan amun iye basingi, akibat’ah papa tutu.—Mbasa 2 Korintus 6:3, 4.

Cara itah manaharep kaadaan tau mampengaruh dinas itah (Payah paragrap 14)

15, 16. Mbuhen itah tuntang keluarga tau sasar bahalap mangendali arep dengan balajar Alkitab?

15 Amun itah harajur balajar Alkitab, itah sasar tau mangendali arep. Keleh  mingat auh Hatalla akan Yosua, ”Buku parentah te harajur imbasam akan ungkup-Ku. Bajar bara buku te handau hamalem, mangat harajur ilalusm uras taloh je tarasurat intu huange. Amon ikau malalus uras taloh te, pambelom ayum akan mangat tuntang mandino hasil.” (Yosua 1:8) Tapi, mbuhen dengan balajar Alkitab itah sasar bahalap mangendali arep?

Amun itah harajur balajar Alkitab, itah sasar tau mangendali arep

16 Itah jadi balajar are suntu hong Alkitab je mamparahan narai guna mangendali arep tuntang akibat papa awi kurang mangendali arep. Yehowa manamean kare suntu tuh huang Alkitab akan kahalap itah. (Roma 15:4) Jadi, itah perlu mambasa, balajar, tuntang mangumang kare suntu tuh. Coba mikir narai manpaat’ah akan itah tuntang keluarga itah. Keleh balaku pandohop Yehowa mangat itah tau manumun nasehat huang Firman-Ai. Itah perlu jujur dengan arep kabuat. Amun itah mangatawan hong arep itah huang pire-pire kaadaan tau kurang mangendali arep, keleh balakudoa tuntang bausaha uka mangambuah’ah. (Yakobus 1:5) Nggau kare nasehat je baguna bara publikasi itah.

17. Kilen ampi uluh bakas tau mandohop anak ewen uka tau mangendali arep?

17 Kilen ampi uluh bakas tau mandohop anak ewen uka mangendali arep? Uluh bakas mangatawan amun sipat mangendali arep dia palus tege bara lahir. Jadi, ewen perlu majar kare sipat bahalap akan anak ewen dengan suntu ewen kabuat. (Epesus 6:4) Amun Pahari manantuani anak Pahari kurang mangendali arep, coba mikir en Pahari jadi manenga suntu bahalap. Pahari tau manenga suntu dengan badinas, hapumpung, tuntang harajur malalus ibadat keluarga. Ela mikeh manolak palakun anak Pahari amun jite malabien! Yehowa jadi manenga batas akan Adam tuntang Hawa. Sapuna, batas te tau mandohop ewen marega hak Yehowa marentah. Kalute kea, amun uluh bakas maningak tuntang majar anak ewen tuntang manenga suntu, anak tau balajar mangendali arep. Ije hal paling penting je tau iajar uluh bakas akan anak iete marega hak Yehowa uka marentah tuntang sinta hukum-Ai.—Mbasa Sewut Salomo 1:5, 7, 8.

18. Mbuhen itah perlu mintih kawal je bahalap?

18 Dia soal itah uluh bakas atawa dia, itah uras perlu bua-buah mintih kawal. Amun kawal itah sinta dengan Yehowa, ewen tau mandohop itah manampa tujuan je bahalap tuntang mahakan masalah. (Sewut Salomo 13:20) Ewen akan manenga pengaruh bahalap akan itah. Ije hal te tau inyuntu itah bara ewen iete sipat mangendali arep. Itah kea tau manenga pengaruh bahalap akan ewen. Kajaria, itah sasar bahalap mangendali arep. Awi te pambelum itah sanang tuntang itah manyanang atei Yehowa.