Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  September 2017

”Ikau Patut Mahapan . . . Kahanyim. Keleh Manampara Gawi Te”

”Ikau Patut Mahapan . . . Kahanyim. Keleh Manampara Gawi Te”

”Ikau patut mahapan salepah kapercayam tuntang kahanyim. Keleh manampara gawi te tuntang ela mikeh dengan en bewei. [Yehowa], Hatalla . . . kareh mandohop ikau.”—1 KRONIKA 28:20.

NYANYIN: 60, 29

1, 2. (a) Tugas penting narai je inarima Salomo? (b) Mbuhen Dawid khawatir dengan Salomo?

SALOMO mandinun tugas je istimewa. Yehowa mintih iye uka mamimpin gawi mamangun bait hong Yerusalem. Jituh ije bara kare gawin mamangun je paling penting hapus jaman! Bait te akan manjadi ”paham bahalap” tuntang basewut awi kahalap’ah. Je paling penting, bait te akan manjadi ”Human [Yehowa], Hatalla”.—1 Kronika 22:1, 5, 9-11.

2 Raja Dawid yakin amun Yehowa akan manenga dukungan akan Salomo. Tapi, iye katawan amun Salomo ”magon tabela tuntang dia are taloh je puji ie mawie”. En Salomo bahanyi manarima tugas tuh? Atawa, en iye akan manolak’ah awi tabela tuntang kurang pangalaman? Mangat bahasil, Salomo perlu bahanyi tuntang malalus gawi.

3. Palajaran narai je indinun Salomo bara bapa?

3 Salomo pasti are balajar tahiu kahanyi bara bapa  kabuat, Dawid. Metuh Dawid masih tabela, Dawid malawan metu basiak je manyarang kawan tabiri bapa. (1 Samuel 17:34, 35) Iye kea bahanyi tutu metuh malawan raksasa je mamut menteng tuntang mampalembut kikeh, Goliat. Dengan pandohop Hatalla tuntang ije kabawak batu, Dawid mampakalah Goliat.—1 Samuel 17:45, 49-51.

4. Mbuhen Salomo perlu bahanyi?

4 Itah tau manampayah amun Dawid uluh je buju-bujur pas manenga anjuran akan Salomo uka bahanyi tuntang mamangun bait. (Mbasa 1 Kronika 28:20.) Amun Salomo jatun kahanyi, tugas te tau manampa iye kurik atei tuntang nihau kaabas. Angat kikeh mahin tau manampa iye dia ulih manampara gawi te. Jituh labih parah bara amun iye dia bahasil mamberes tugas’ah.

Itah perlu pandohop Yehowa mangat tau bahanyi tuntang tau malalus tugas itah

5. Mbuhen itah perlu kahanyi?

5 Kilau Salomo, itah kea perlu pandohop Yehowa mangat tau bahanyi tuntang tau malalus tugas je Inenga akan itah. Jadi, ayo itah balajar bara suntu pire-pire uluh je bahanyi hong jaman huran. Limbah te, itah tau mamikir kilen ampi cara itah tau mamparahan kahanyi tuntang bahasil malalus tugas itah.

SUNTU KAHANYI

6. Akan Pahari, narai je tamam bara kahanyin Yosep?

6 Yosep mamparahan kahanyi metuh sawan Potipar marayu iye uka bahubungan seks. Iye katawan amun pambelum’ah tau bahaya amun iye manolak’ah. Tapi, iye dia mikeh tuntang dia manyarah. Iye bahanyi tuntang langsung manolak’ah.—Genesis 39:10, 12.

7. Kilen ampi Rahab mamparahan kahanyi? (Payah gambar hong tamparan artikel.)

7 Rahab kea uluh je bahanyi. Metuh mata-mata Israel mangguang human Rahab hong Yerikho, dia aneh amun iye mikeh tuntang manolak uka mandohop ewen. Tapi, awi iye percaya dengan Yehowa, iye bahanyi manyahukan due biti hatue te tuntang mandohop ewen balua bara Yerikho. (Yosua 2:4-6, 9, 12-16) Rahab percaya amun Yehowa Hatalla je bujur. Tuntang, iye yakin amun Yehowa akan manyarah kota te akan uluh Israel. Iye dia manalua angat kikeh dengan kalunen, aluh jite raja Yerikho tuntang uluh ayu, manampa iye dia malalus nara-narai. Tapi, iye malalus gawi je bahanyi je manampa iye tuntang keluarga salamat.—Yosua 6:22, 23.

8. Narai pengaruh kahanyin Yesus akan kare rasul?

8 Kare rasul Yesus je baketep mamparahan kahanyi kea. Awi manampayah kahanyin Yesus, ewen manyuntu kahanyi te. (Mateus 8:28-32; Yohanes 2:13-17; 18:3-5) Metuh uluh Saduki bausaha mampatende gawin ewen, kare rasul dia handak tende maajar tahiu Yesus.—Gawin Rasul 5:17, 18, 27-29.

9. Palajaran narai je indinun itah bara 2 Timoteus 1:7 tahiu kahanyi?

 9 Yosep, Rahab, Yesus, tuntang kare rasul batekad uka malalus narai je bujur. Ewen bahanyi beken awi percaya dengan kasanggup ewen kabuat, tapi awi ewen maandal Yehowa. Metuh itah perlu kahanyi, itah kea musti maandal Yehowa, beken arep itah. (Mbasa 2 Timoteus 1:7.) Ayo itah mambahas kilen ampi itah tau mamparahan kahanyi huang keluarga tuntang ungkup.

KAADAAN JE PERLU KAHANYI

10. Mbuhen anak tabela Kristen perlu bahanyi?

10 Akan melayani Yehowa, tege are kaadaan je manampa anak tabela Kristen perlu mamparahan kahanyi. Ewen tau balajar bara Salomo, je bahanyi manampa keputusan bahalap uka mamberes gawi mamangun bait. Anak tabela puna perlu inantiring uluh bakas. Tapi tege keputusan penting je musti inampa ewen kabuat. (Sewut Salomo 27:11) Ewen perlu bahanyi metuh mamutus eweh je manjadi kawal ewen, mintih hiburan, mahaga moral je barasih, tuntang pea ewen akan impandui. Jadi, ewen perlu tege kahanyi awi keputusan je akan inampa ewen hakalawan dengan kahandak Setan, pribadi je mamapa Hatalla.

11, 12. (a) Kilen ampi Moses mamparahan kahanyi? (b) Kilen ampi anak tabela tau manyuntu Moses?

11 Anak tabela kea musti manampa keputusan penting metuh marencana cita-cita ewen. Hong pire-pire eka, anak tabela ianjur uka sakula gantu-gantung tuntang manggau gawi je tau mahasil are duit. Hong eka beken, kaadaan ekonomi dia bahalap. Jadi, anak tabela mungkin mangkeme ewen musti manggau duit akan keluarga. Amun jituh je inaharep ketun, coba mikir suntu Moses. Iye impahai awi anak bawin Piraun, jadi iye tau marencana cita-cita manjadi uluh tatau atawa basewut. Coba mikir tantangan je lembut bara keluarga, kare guru, tuntang kare panasehat’ah hong Misir je manyuhu iye malalus jite! Tapi, Moses mamparahan kahanyi tuntang mintih uka hinje dengan ungkup Hatalla. Limbah Moses malihi Misir tuntang panatau’ah, iye maandal Yehowa salepah’ah. (Ibrani 11:24-26) Hasil’ah, Yehowa manenga are berkat aka, tuntang Iye akan mamberkat labih are hindai hong rahian andau.

12 Amun anak tabela bahanyi marencana cita-cita uka melayani Yehowa tuntang manomor ije Karajaan-Ai, Yehowa akan mamberkat ewen. Yehowa akan mandohop ewen manyukup taluh je imerlu keluarga ewen. Hong abad pangkasulak, ije biti uluh tabela je ara Timoteus manomor ije pelayanan akan Yehowa huang pambelum’ah. Ketun kea tau malalus’ah. * (Payah catatan penda.)—Mbasa Pilippi 2:19-22.

En Pahari batekad uka mamparahan kahanyi huang pambelum Pahari? (Payah paragrap 13-17)

13. Narai je bahasil ilalus ije biti pahari awi iye bahanyi?

13 Ije biti pahari bawi tabela hong Alabama, Amerika Serikat, perlu kahanyi uka marencana cita-cita rohani. Iye manulis, ”Bara kurik aku pamahamen. Aku dia lalau bahanyi bapander dengan  uluh hong Balai Karajaan, mahin hindai amun mangatok bauntunggang uluh je dia ingaseneku.” Tapi dengan pandohop uluh bakas’ah tuntang kawan pahari hong ungkup, iye bahasil malalus cita-cita ayu uka manjadi perintis biasa. Iye hamauh, ”Dunia Setan handak itah manomor ije sakula gantung, aran bahalap, duit, tuntang ramu panatau.” Tapi, iye kea katawan amun are uluh dia tau mandinun uras hal te tuntang jite malah manampa ewen stres tuntang pehe atei. Iye mansanan kea, ”Kabalika, dengan melayani Yehowa, aku hanjak tutu tuntang puas.”

14. Huang kaadaan narai bewei uluh bakas perlu bahanyi?

14 Uluh bakas Kristen kea perlu mamparahan kahanyi. Suntu, mungkin bos Pahari balaku Pahari bagawi labih bara jam biasa, padahal waktu te sapuna akan ibadat keluarga, badinas, tuntang hapumpung. Pahari perlu bahanyi uka manolak palakun bos Pahari tuntang manjadi suntu akan anak Pahari. Atawa, mungkin Pahari mangahana anak Pahari malalus ije hal, tapi pire-pire uluh bakas Kristen beken manalua anak ewen malalus hal te. Metuh ewen misek alasa dengan Pahari, en Pahari bahanyi manjelas’ah dengan cara je bahalap?

15. Kilen ampi Masmur 37:25 tuntang Ibrani 13:5 tau mandohop uluh bakas?

15 Itah perlu kahanyi uka mandohop anak itah marencana tuntang malalus cita-cita rohani ewen. Suntu, mungkin tege uluh bakas je dia handak anak ewen merintis, melayani hong eka je  labih mamerlu tenaga, melayani hong Betel, atawa mandohop proyek mamangun Balai Karajaan tuntang Balai Kebaktian. Ewen mungkin mikeh amun anak ewen dia tau maurus ewen amun ewen jadi bakas. Tapi, uluh bakas je bahalap akan bahanyi tuntang baiman amun Yehowa pasti malalus janjin-Ai. (Mbasa Masmur 37:25; Ibrani 13:5.) Uluh bakas je kilau te akan mandohop anak ewen malalus hal je sama.—1 Samuel 1:27, 28; 2 Timoteus 3:14, 15.

16. Narai je inggawi pire-pire uluh bakas uka mandohop anak ewen marencana cita-cita rohani, tuntang narai manpaat’ah akan anak ewen?

16 Ije uluh bakas hong Amerika Serikat mandohop anak ewen manomor ije pelayanan akan Yehowa. Kapala keluarga hamauh, ”Helu bara anak ikei tau mananjung atawa bapander, ikei jadi bakesah akan ewen tahiu kahanjak merintis tuntang mandohop ungkup. Wayah tuh, jite cita-cita ewen.” Iye mansanan kea awi kare anak’ah bahasil malalus cita-cita rohani, ewen tau malawan godaan bara dunia Setan tuntang manomor ije pelayanan akan Yehowa. Ije biti pahari hatue je tege due anak hamauh, ”Are uluh bakas bausaha mangat anak ewen bahasil hong bidang olahraga, sakula, tuntang hobi. Tapi labih tame akal amun itah bausaha mandohop anak itah tege hubungan je bahalap dengan Yehowa. Ikei hanjak tutu awi anak ikei bahasil malalus cita-cita rohani ewen tuntang awi ikei umba mandohop ewen.” Yehowa pasti hanjak dengan uluh bakas je mandohop anak ewen marencana tuntang malalus cita-cita rohani.

KAHANYI HUANG UNGKUP

17. Kilen ampi uluh hong ungkup mamparahan kahanyi?

17 Itah kea perlu mamparahan kahanyi huang ungkup. Suntu, kare bakas ungkup perlu bahanyi metuh maurus kasus dosa serius atawa metuh mandohop kawan pahari je perlu capat mandinun perawatan kesehatan. Pire-pire bakas ungkup dumah akan penjara uka maajar Alkitab akan uluh je tege minat atawa uka malalus pumpung. Kawan pahari bawi je masih bujang kea tege are kesempatan uka mamparahan kahanyi huang melayani Yehowa. Ewen tau merintis, pindah akan eka je labih mamerlu tenaga, mandohop program Rancang/Bangun Setempat, tuntang umba Sekolah bagi Penginjil Kerajaan. Pire-pire mahin irawei akan Sekolah Gilead.

18. Kilen ampi pahari bawi je jadi bakas tau mamparahan kahanyi?

18 Itah sinta kawan pahari bawi je jadi bakas, tuntang itah hanjak awi ewen tege hong ungkup itah! Ewen mungkin dia tau malalus are hal kilau bihin. Tapi, ewen tatap tau mamparahan kahanyi tuntang malalus gawi. (Mbasa Titus 2:3-5.) Suntu, ije biti pahari bawi je jadi bakas perlu bahanyi metuh bakas ungkup balaku iye bapander dengan ije biti pahari bawi tabela tahiu cara bapakaian je bahalap. Iye dia akan malait pahari bawi tabela te awi cara bapakaia. Tapi dengan bahalap atei, iye akan mandohop pahari te mamikir amun cara bapakaia tau bapengaruh akan uluh beken. (1 Timoteus 2:9, 10) Amun kare pahari bawi je jadi bakas mandohop ungkup dengan sinta, ungkup akan sasar abas.

19. (a) Kilen ampi mangat kawan pahari hatue je jadi impandui tau bahanyi? (b) Kilen ampi Pilippi 2:13 tuntang 4:13 tau mandohop kare pahari hatue uka bahanyi?

 19 Kawan pahari hatue je jadi impandui kea perlu bahanyi tuntang malalus gawi. Amun ewen handak melayani manjadi hamba pelayanan atawa bakas ungkup, ungkup akan mandinun are manpaat. (1 Timoteus 3:1) Tapi, tege je mungkin mikeh manduan hak istimewa te. Ije biti pahari bihin mungkin puji manampa kasala, tuntang jituh manampa iye mangkeme dia cocok uka manjadi hamba pelayanan atawa bakas ungkup. Pahari beken mungkin mangkeme arep’ah dia sanggup malalus tugas te. Amun Pahari mangkeme kilau te, Yehowa tau mandohop Pahari bahanyi. (Mbasa Pilippi 2:13; 4:13.) Keleh mingat suntu Moses. Iye kea mangkeme dia ulih malalus narai je ilaku Yehowa. (Eksodus 3:11) Tapi dengan pandohop Yehowa, iye bahanyi tuntang tau malalus gawi. Kilen ampi mangat kawan pahari je jadi impandui tau bahanyi kilau Moses? Ewen perlu balaku pandohop dengan Yehowa mahalau lakudoa tuntang mambasa Alkitab genep andau. Ewen perlu mangumang suntu uluh je bahanyi hong Alkitab. Ewen kea perlu dengan randah atei balaku ilatih awi kare bakas ungkup tuntang manenga pandohop narai bewei je imerlu hong ungkup. Ikei handak kawan pahari je jadi impandui mamparahan kahanyi tuntang cangkal bagawi akan ungkup!

”[YEHOWA] . . . MANDOHOP IKAU”

20, 21. (a) Dawid mampingat Salomo tahiu narai? (b) Itah tau yakin akan hal narai?

20 Raja Dawid mampingat Salomo amun Yehowa akan mampahayak iye sampai gawi mamangun bait te hapus. (1 Kronika 28:20) Salomo pasti mangumang kare auh Dawid, jite manampa iye handak manarima gawi te aluh masih tabela tuntang kurang pangalaman. Iye dia mikeh. Dengan pandohop Yehowa, iye bahasil mamangun bait je bahalap tutu huang uju satengah nyelu.

21 Yehowa mandohop Salomo, tuntang Iye kea tau mandohop itah mamparahan kahanyi tuntang malalus tugas itah, en jite huang keluarga tuntang huang ungkup. (Yesaya 41:10, 13) Amun itah bahanyi melayani Yehowa, itah tau yakin amun Iye akan mamberkat itah wayah tuh tuntang hong rahian andau. Awi te, itah ’patut mahapan salepah . . . kahanyi’ tuntang malalus ”gawi te”.

^ par. 12 Tege are nasehat bahalap tahiu cara marencana cita-cita rohani hong artikel ”Gunakanlah Cita-Cita Rohani untuk Memuliakan Pencipta Saudara” huang Menara Pengawal 15 Juli 2004.