Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  September 2017

”Auch Hatalla . . . Bara Kuasa”

”Auch Hatalla . . . Bara Kuasa”

”Auch Hatalla puna belom tuntang bara kuasa.”—IBRANI 4:12, Surat Barasih 1983.

NYANYIN: 114, 113

1. Narai je manampa Pahari yakin amun Firman Hatalla tege kuasa? (Payah gambar hong tamparan artikel.)

REWAR Hatalla yakin amun Firman-Ai, iete Peteh’ah akan kalunen, ”belom tuntang bara kuasa”. (Ibrani 4:12, Surat Barasih 1983) Itah pasti tau manampayah kuasan Alkitab huang pambelum itah tuntang pambelum uluh beken. Helu bara manjadi Saksi Yehowa, tege je manjadi panakau, maobat, atawa mawi hubungan seks dia sah. Je beken mungkin tatau atawa basewut, tapi ewen mangkeme pambelum ewen masih tege je kurang. (Pangabar 2:3-11) Itah pasti hanjak awi uluh je sulak’ah jatun kaharap, wayah tuh tege tujuan pambelum tuntang harapan. Huang Menara Pengawal, itah jadi mambasa are pangalaman je bahalap kilau tuh huang seri artikel ”Alkitab Mengubah Kehidupan”. Tuntang aluh jadi manjadi uluh Kristen, uluh musti harajur manukep dengan Yehowa mahalau pandohop Alkitab.

2. Narai pengaruh kuasan Firman Hatalla akan uluh hong abad pangkasulak?

2 Itah dia hengan amun pambelum are uluh hubah limbah balajar Alkitab. Kawan paharin itah hong abad pangkasulak je tege harapan belum hong sorga manampa  perubahan kilau te kea. (Mbasa 1 Korintus 6:9-11.) Metuh Paulus bakesah tahiu uluh je dia akan mawaris Karajaan Hatalla, iye hamauh, ”Pire-pire bara keton bihin puna kilau te hadat dasare.” Firman Hatalla tuntang roh barasih-Ai mandohop kare uluh te uka hubah. Tapi aluh limbah manjadi uluh Kristen, masih tege je mawi kasalan je hai, tuntang hal tuh manampa hubungan ewen dengan Yehowa dia rantep hindai. Suntu, Alkitab mangesah tahiu ije biti pahari terurap je musti impalua bara ungkup. Tapi limbah te, iye hubah mangat tau manjadi bagian bara ungkup Kristen hindai. (1 Korintus 5:1-5; 2 Korintus 2:5-8) Itah pasti hanjak metuh manampayah kawan pahari bahasil manampa are perubahan awi kuasan Firman Hatalla.

3. Narai je akan imbahas itah hong artikel tuh?

3 Firman Hatalla hai tutu kuasa. Jituh panengan Yehowa akan itah. Jadi, itah handak buju-bujur mangguna. (2 Timoteus 2:15) Artikel tuh akan mambahas kilen ampi itah tau mangguna kuasa Firman Hatalla (1) huang pambelum itah, (2) huang dinas, tuntang (3) metuh manyampai hotbah. Uras tuh akan mandohop itah mamparahan amun itah sinta tuntang marega Yehowa, je majar kare hal je baguna akan itah.—Yesaya 48:17.

HUANG PAMBELUM ITAH

4. (a) Narai je tau ilalus itah mangat Firman Hatalla tau mampengaruh itah? (b) Narai je jadi inggawi Pahari mangat tau mambasa Alkitab?

4 Mangat Firman Hatalla tau mampengaruh pambelum itah, itah perlu harajur mambasa. Jadi, itah perlu mambasa genep andau. (Yosua 1:8) Are bara itah sibuk. Tapi itah ela manalua uras te, aluh tanggung jawab itah, manampa itah dia mambasa Alkitab. (Mbasa Epesus 5:15, 16.) Itah mungkin tau mambasa hanjewu, bentuk andau, atawa hamalem. Itah pasti setuju dengan je manyurat Masmur, ”Paham aku sinta hukum Aim; aku mangumange hapus andau.”—Masmur 119:97.

Itah ela manalua narai bewei, aluh tanggung jawab itah, manampa itah dia mambasa Alkitab

5, 6. (a) Mbuhen itah perlu mangumang? (b) Kilen ampi mandinun labih are manpaat bara narai je ingumang itah? (c) Ngesah kilen ampi dengan mambasa tuntang mangumang Alkitab jadi mandohop Pahari?

5 Tapi baya mambasa Alkitab dia sukup. Itah perlu mamikir buju-bujur tuntang mangumang narai je imbasa itah. (Masmur 1:1-3) Dengan kalute, haru itah tau malalus narai je ilajar itah. Jadi, itah perlu mambasa tuntang mangumang Alkitab, dia soal je tercetak atawa elektronik, mangat tau maubah pambelum itah.

6 Kilen ampi mandinun labih are manpaat bara narai je ingumang itah? Metuh mambasa Alkitab, itah perlu tende hanjulu uka mamikir, ’Narai je ilajarku tahiu Yehowa bara ayat tuh? Kilen ampi aku jadi malalus’ah huang pambelum? Narai hindai je perlu inyasuaiku?’ Amun  itah mangumang Firman Hatalla tuntang balakudoa tahiu narai je imbasa itah, itah handak malalus’ah. Dengan kalute, itah akan mangkeme kuasa Firman Hatalla huang pambelum itah.—2 Korintus 10:4, 5.

HUANG DINAS

7. Kilen ampi itah mahapan Alkitab dengan bahalap huang dinas?

7 Metuh itah mangabar tuntang maajar, itah perlu rancak mahapan Firman Hatalla. Ije biti pahari hamauh, ”Amun itah mangabar dengan Yehowa bara huma kan huma, en itah je tarus bapander atawa itah balaku Yehowa je bapander?” Amun itah mambasa Alkitab akan ije biti uluh, jite sama kilau Yehowa je bapander dengan uluh te. Ayat je iintih labih baguna bara narai bewei je tau insanan itah. (1 Tesalonika 2:13) Metuh itah badinas, en itah bausaha mambuka Alkitab pea bewei tau?

Amun itah mambasa Alkitab akan ije biti uluh, jite sama kilau Yehowa je bapander dengan uluh te

8. Mbuhen baya mambasa Alkitab metuh badinas dia sukup?

8 Tapi, baya mambasa Alkitab dia sukup. Are uluh wayah tuh dia harati Alkitab. Hong abad pangkasulak mahin are je dia harati Alkitab. (Roma 10:2) Jadi, ela capat bapikir amun uluh huma harati ayat je imbasa itah. Itah perlu mandohop iye dengan maulang kata kunci bara ayat te, limbah te mamparahan narai rima. Dengan kalute, Firman Hatalla tau maubah pikiran tuntang atei uluh.—Mbasa Lukas 24:32.

9. Narai je tau inggawi itah mangat uluh labih marega Alkitab? Nenga suntu.

9 Narai je insanan itah helu bara mambasa ayat kea tau mandohop uluh huma labih marega Alkitab. Suntu, itah tau mansanan, ”Coba itah manampayah narai kuan Panjapa tahiu hal tuh.” Atawa amun itah bapander dengan uluh je beken Kristen, itah tau mansanan, ”Coba itah manampayah narai kuan Kitab Suci tahiu hal tuh.” Amun itah sundau dengan ije biti uluh je dia peduli dengan agama, itah tau misek, ”En Pahari puji mahining nasehat bahalap uluh huran kilau tuh?” Amun itah mingat genep uluh dia sama, itah akan bausaha manampa auh magah je sasuai akan ewen.—1 Korintus 9:22, 23.

10. (a) Ngesah pangalaman ije biti paharin itah. (b) Ngesah pangalaman Pahari kabuat metuh mangkeme kuasa Firman Hatalla huang dinas.

10 Are pangalaman je mamparahan manpaat mahapan Firman Hatalla huang dinas. Akan suntu, ije biti pahari hatue maja ije biti uluh je jadi bakas je manarima majalah itah katahin banyelu-nyelu. Ije katika, metuh pahari tuh manenga aka Menara Pengawal je taheta, iye kea mamutus uka mambasa aka ije ayat. Iye mambasa 2 Korintus 1:3, 4, je mansanan, ”Bapa je paham kahalap ateie tuntang ie Hatalla je mandehen pambelom hambaruan oloh kalunen . . .  Ie mandehen atei-huang ikei hong gagenep kapehe je ingkeme ikei.” Ayat tuh mangana atei uluh bakas te. Iye nyamah balaku ayat te imbasa hindai. Limbah te, iye bakesah amun ewen due sawa kanjera pehe atei tuntang handak tutu ihibur. Awi ayat tuh, iye handak mangatawan labih are tahiu Alkitab. Amun itah mahapan Firman Hatalla huang dinas, manpaat’ah hai tutu!—Gawin Rasul 19:20.

METUH MANYAMPAI HOTBAH

11. Narai tanggung jawab uluh je bahotbah?

11 Itah pasti hanjak dumah akan pumpung tuntang kebaktian. Alasan utama itah dumah iete uka manyembah Yehowa. Tapi, itah kea mandinun manpaat bara narai je iajar. Jadi, kawan pahari je majar mahalau hotbah tege tugas je istimewa tuntang serius. (Yakobus 3:1) Narai je iajar ewen musti bara Firman Hatalla. Amun Pahari mandinun tugas istimewa tuh, narai je tau inggawi Pahari mangat kuasa Firman Hatalla mangana atei je dumah?

12. Narai je tau inggawi ije biti uluh je bahotbah mangat hotbah’ah indasar bara Alkitab?

12 Huang hotbah narai bewei je inyampai itah, Alkitab musti manjadi bagian paling penting. (Yohanes 7:16) Jadi, Pahari perlu bua-buah tutu. Ela sampai pangalaman atawa gambaran je ihapan Pahari atawa cara Pahari  manyampai hotbah gitan labih bahalap bara Alkitab. Pahari perlu mingat kea amun baya mambasa bara Alkitab dia sama dengan majar bara Alkitab. Amun itah mambasa lalau are ayat, uluh je dumah dia akan mingat. Jadi, Pahari perlu bua-buah mintih ayat je akan ihapan. Mbasa rangka-rangkah ayat te. Limbah te, mbahas ayat te, nenga gambaran, mbahas kilen ampi malalus’ah. (Nehemia 8:8) Amun hotbah te bara ije rangka, Pahari perlu balajar buju-bujur rangka tuntang ayat’ah. Nggau hubungan rangka dengan ayat’ah. Limbah te, hapan ayat te uka manjelas gagasan je tege hong rangka. (Pahari tau manampayah nasehat je baguna hong palajaran 21 sampai 23 hong buku Memperoleh Manfaat dari Pendidikan Sekolah Pelayanan Teokratis.) Tuntang je paling penting, keleh balaku pandohop Yehowa mangat Pahari tau manyampai pikiran-Ai je barega je tege hong Alkitab.—Mbasa Esra 7:10; Sewut Salomo 3:13, 14.

13. (a) Ngesah pangalaman ije biti pahari bawi tahiu ije ayat je ihining’ah hong pumpung. (b) Ngesah pangalaman Pahari kabuat metuh ije ayat je imbahas hong pumpung mangana atei Pahari.

13 Tege ije biti pahari bawi hong Australia je metuh kurik pambelum’ah kuntep kapehe. Limbah te, iye manjadi Saksi Yehowa. Tapi, iye masih  dia percaya amun Yehowa sayang denga. Hong ije pumpung, pahari tuh mahining ije ayat je mangana atei’ah. Iye mangumang ayat te tuntang balajar labih are. Hasil’ah iye sundau pire-pire ayat beken. Kajaria, iye yakin amun Yehowa sayang denga. * (Payah catatan penda.) En Pahari puji mahining ije ayat hong pumpung atawa kebaktian je mangana atei Pahari?—Nehemia 8:12.

14. Kilen ampi itah tau mamparahan amun itah marega tuntang sinta Firman Hatalla?

14 Itah basukur awi Yehowa manenga itah Firman-Ai Alkitab. Iye bajanji amun Firman-Ai tatap tahan, tuntang Iye malalus janji te. (1 Petrus 1:24, 25) Jadi, itah pasti handak mambasa Alkitab genep andau, malalus’ah, tuntang mahapa uka mandohop uluh beken. Dengan kalute, itah mamparahan amun itah buju-bujur marega tuntang sinta panengan tuh tuntang Pangarang’ah, Hatalla Yehowa.

^ par. 13 Payah kotak ” Cara Bapikirku Hubah”.