Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Oktober 2017

 KESAH PAMBELUM

Uluh je Malalus Palakun Yehowa Akan Imberkat

Uluh je Malalus Palakun Yehowa Akan Imberkat

Aku, banangku, hayak kakakku tuntang sawa, iisek en handak manarima ije tugas istimewa. Ikei palus tumbah, ”Ikei handak!” Mbuhen ikei handak manarima tugas te, tuntang narai berkat je inenga Yehowa akan ikei? Sulak’ah, aku akan mangesah helu tahiu keluarga tuntang pambelumku.

AKU lahir nyelu 1923 hong Hemsworth, ije kota hong Yorkshire, Inggris. Aku tege ije kaka hatue je ara Bob. Metuh umurku jalatien nyelu, Bapaku mandinun pire-pire buku je manjelas amun agama palsu jadi mananjaru uluh. Bapaku rajin tutu dengan narai je imbasa. Iye puna dia rajin dengan kare pamimpin agama je pander dengan gawin ewen hakabeken. Pire-pire nyelu limbah te, Bob Atkinson dumah akan human ikei tuntang mamutar ije bara kare rekaman hotbah Pahari Rutherford. Ikei katawan amun hotbah te impalua awi kelompok je sama dengan je mampalua buku je imbasa awi Bapaku. Uluh bakasku marawei Pahari Atkinson uka kuman dengan ikei genep alem tuntang manjawab are paisek Alkitab bara ikei. Iye marawei ikei uka umba hapumpung hong human ije pahari je kejau’ah pire-pire kilometer bara human ikei. Ikei nampara harajur hapumpung, tuntang ije ungkup impendeng hong Hemsworth. Limbah te, hamba zona (wayah tuh pengawas daerah) rancak bamalem hong human ikei tuntang kare perintis bara ungkup je tukep daerah ikei rancak kuman dengan ikei. Kare pahari te manenga pengaruh je bahalap akangku.

Metuh te, ikei tege usaha keluarga. Tapi, Bapa hamauh dengan kakakku, ”Amun ikau handak merintis, usaha tuh inutup itah.” Bob handak, tuntang metuh umur’ah 21 nyelu, iye pindah tuntang merintis. Due nyelu limbah te, aku kea merintis metuh umurku 16 nyelu. Hong andau Sabtu tuntang Minggu, aku badinas dengan uluh beken, tapi amun andau biasa, aku rancak badinas kabuat. Aku mahapan fonograf tuntang kartu kesaksian, kartu kurik dengan barita Alkitab pandak. Ije bara uluh je balajar Alkitab dengangku manampa kemajuan je bahalap. Tuntang akhir’ah keluarga bara uluh je balajar te manjadi Saksi kea. Jite puna berkat bara Yehowa. Ije nyelu limbah te, aku inugas manjadi perintis istimewa dengan Mary Henshall. Ikei inugas akan daerah je hindai puji inggawi hong Cheshire.

 Katahin Parang Dunia II, ije biti bawi musti umba malalus gawi mendukung parang. Awi uluh je malalus pelayanan rohani dia inyuhu baparang, ikei bapikir amun ikei kea dia inyuhu baparang awi ikei perintis istimewa. Tapi pengadilan dia setuju, tuntang aku imenjara katahin 31 andau. Ije nyelu limbah te, metuh umurku 19 nyelu, aku iriksa pengadilan due kali hindai awi atei nuraniku je tatap dia maku umba mendukung parang. Tapi, hong due katika te aku imbebas. Katahin manaharep uras’ah, aku yakin roh barasih tuntang Yehowa mampadehen tuntang mampaabas aku.​—Yesaya 41:10, 13.

KAWAL TAHETA

Hong nyelu 1946, aku hasundau dengan Arthur Matthews. Iye haru imenjara telu bulan awi dia maku umba baparang. Limbah imbebas, iye melai hong Hemsworth hayak dengan andi je ara Dennis, ije biti perintis istimewa. Bara kurik, ewen iajar tahiu Yehowa awi bapa ewen. Limbah te, ewen impandui metuh tabela tutu. Dia tahi limbah ewen merintis haya-hayak, Dennis inugas akan Irlandia. Jadi, Arthur jatun kawal merintis. Uluh bakasku sanang denga, awi iye ije biti perintis je rajin tuntang tau mimbit arep. Jadi, ewen marawei Arthur melai hayak ewen. Metuh aku buli, aku tuntang Arthur manawar arep akan menyau piring limbah kuman. Akhir’ah, ikei hakirim surat. Hong nyelu 1948, Arthur imenjara hindai katahin telu bulan. Ikei kawin Januari 1949, tuntang batekad uka tatap malalus dinas sepenuh waktu. Ikei bahemat, tuntang metuh andau libur, ikei bagawi mamutik bua. Awi berkat bara Yehowa, ikei ulih harajur merintis.

Hong Hemsworth, limbah ikei kawin 1949

Ije nyelu limbah te, ikei inugas akan Irlandia Utara, sulak’ah akan Armagh limbah te akan Newry. Uluh je melai hong due kota te tapaare Katolik. Ewen rancak bajilek dengan agama beken. Jadi, ikei musti bua-buah tutu metuh mangabar. Ikei hapumpung hong human ije keluarga Saksi, 16 kilometer bara human ikei. Kira-kira tege hanya biti je dumah. Kanatek’ah ikei bamalem hong hete. Metuh hamalem ikei batiruh hong laseh. Metuh hanjewu ikei kuman haya-hayak. Hanjak tutu mahining wayah tuh tege are Saksi hong daerah te.

”IKEI HANDAK!”

Kakakku tuntang sawa, Lottie, manjadi perintis istimewa kea hong Irlandia Utara. Hong nyelu 1952, ikei baepat dumah akan kebaktian distrik hong Belfast. Tege pahari je mimbit ikei bamalem hong huma. Pryce Hughes, je metuh te manjadi hamba cabang hong Inggris, bamalem hong huma te kea. Ije katika, ikei mambahas buku kurik je taheta, God’s Way Is Love, je impalua khusus akan uluh Irlandia. Alem te, Pahari Hughes manjelas amun mangabar akan uluh Katolik hong Republik Irlandia te dia purah. Kare pahari imaksa malihi eka ewen bamalem, tuntang kare pastor manyuhu are uluh manyarang ewen. Pryce hamauh, ”Itah mamerlu pire-pire pasangan je tege mobil uka malalus gawin khusus manawar buku kurik tuh akan hapus negara te.” Metuh te kea ikei hamauh, ”Ikei handak!”

Hong motor dengan kawan perintis

 Hong Dublin, tege pahari je ara ”Umai” Rutland, iye te pahari je jadi tahi manempu Yehowa. Iye rajin mimbit kawan perintis uka bamalem hong huma. Maka ikei bamalem hanjulu hong hete tuntang manjual pire-pire ramun ikei. Limbah te, ikei mandai motor ayun Bob je tege gandenga tuntang haguet manggau mobil. Ikei mandinun mobil awan uluh je masih bahalap, tuntang ikei balaku uluh je manjual’ah magah mobil te awi ikei uras dia tau manyupir. Limbah te, katahin halemei, Arthur munduk hong eka batiruh tuntang dia tende-tende mahayal lagi manyupir. Metuh hanjewu, iye mancoba mampalua mobil te bara garasi. Metuh te kea, tege ije utusan injil je ara Mildred Willett (je harian andau kawin dengan John Barr) dumah. Iye tau manyupir! Iye mandohop ikei latihan manyupir, tuntang ikei siap tulak.

Mobil tuntang karavan ikei

Limbah te, ikei mamerlu eka melai. Kare pahari mansanan akan ikei uka dia melai hong karavan awi mikeh uluh je dia rajin dengan itah manusul’ah. Jadi, ikei manggau huma tapi jatunti je cocok. Alem te, ikei baepat batiruh hong mobil. Andau jewu, ikei baya mandinun karavan dengan eka tiruh je kurik. Maka ikei melai hong hete. Ikei dia manyangka tau parkir hong petak ayun uluh je bahalap atei. Daerah ikei mangabar kejau’ah 16 sampai 24 kilometer bara eka mamarkir karavan te. Metuh ikei pindah akan daerah beken, ikei mamindah karavan te kea. Limbah te, ikei haluli akan eka je ihapan ikei mamarkir karavan tuntang mangabar hong hete.

Ikei mangguang genep huma je tege hong Republik Irlandia hila tenggara, tuntang dia are je mamusuh ikei. Ikei mambagi kira-kira 20.000 buku kurik, tuntang ikei mangirim aran uluh je baminat akan kantor cabang Inggris. Wayah tuh, hong daerah te tege baratus Saksi. Jite berkat je hai tutu!

HALULI AKAN INGGRIS, LIMBAH TE AKAN SKOTLANDIA

Pire-pire nyelu limbah te, ikei inugas akan London selatan. Limbah pire-pire minggu, kantor cabang Inggris manelpon Arthur tuntang balaku iye uka manjadi pengawas daerah andau jewu! Ikei ilatih katahin ije minggu, limbah te ikei haguet akan daerah ikei hong Skotlandia. Jadi, dia are waktu akan Arthur uka manyiap hotbah’ah. Tapi, iye harajur handak malalus narai bewei tugas akan Hatalla, aluh jite bahali. Suntu je bahalap te buju-bujur mampadehen aku. Ikei hanjak tutu dengan tugas ikei te. Katahin banyelu-nyelu ikei mangabar hong daerah je hindai puji inggawi, hanjak tutu angat’ah tau haya-hayak bagawi dengan kawan paharin itah.

Metuh Arthur irawei akan Sekolah Gilead nyelu 1962, ikei musti manampa keputusan je hai. Sekolah te ilalus katahin sapuluh bulan, tapi aku dia tau umba awi dia irawei. Ikei mamutus amun Arthur musti manarima parawei te. Awi aku jatunti kawal merintis, kantor cabang manugas aku manjadi perintis istimewa haluli akan Hemsworth. Limbah Arthur haluli ije nyelu limbah te, iye  inugas manjadi pengawas distrik. Pire-pire daerah je musti ingguang ikei iete Skotlandia, Inggris hila utara, tuntang Irlandia Utara.

TUGAS TAHETA HONG IRLANDIA

Hong nyelu 1964, Arthur inugas manjadi hamba cabang hong Republik Irlandia. Sulak’ah aku dia yakin tau sanang bagawi hong Betel, awi aku sanang tutu tugas keliling. Tapi wayah tuh aku basukur awi puji bagawi hong Betel. Aku yakin amun itah manarima ije tugas aluh itah dia lalau rajin dengan tugas te, Yehowa akan harajur mamberkat itah. Hong Betel, aku malalus tugas kantor, mambungkus basaan akan ingirim, mamparasih, tuntang bamasak. Arthur kea ilaku manjadi pengawas distrik, jadi ikei tau hasundau dengan kawan pahari hong hapus Irlandia. Awi tugas te tuntang awi manampayah kemajuan uluh je balajar Alkitab dengan ikei, ikei jadi rantep tutu dengan kawan pahari hong Irlandia. Puna berkat je hai!

KEJADIAN PENTING AKAN SAKSI-SAKSI YEHOWA HONG IRLANDIA

Kebaktian Internasional je pangkasulak hong Irlandia ilalus nyelu 1965, hong Dublin. Aluh tege tantangan je hai, kebaktian te tau ilalus. Tege 3.948 je dumah, tuntang 65 je impandui. Tege 3.500 pahari bara negara beken, tuntang ewen bamalem hong human kare uluh Dublin. Uras uluh je manyadia huma akan eka bamalem mandinun surat tarima kasih. Ewen kea manenga pujian awi taluh gawi bahalap kare paharin itah. Buju-bujur perubahan je bahalap hong Irlandia.

Arthur manambang Nathan Knorr hong kebaktian nyelu 1965

Arthur maumum Buku Cerita Alkitab huang bahasa Gaelik nyelu 1983

Hong 1966, Irlandia hila utara tuntang selatan iurus awi cabang Dublin. Jituh puna hakabeken dengan narai je manjadi hong negeri te, awi uluh imisah awi politik tuntang agama. Ikei hanjak manampayah are uluh Katolik balajar katutu tuntang manempu Yehowa haya-hayak kawan paharin ewen je bihin uluh Protestan.

TUGAS JE HUBAH TUTU

Hong 2011, kantor cabang Inggris tuntang Irlandia inggabung, tuntang ikei inugas akan Betel London. Pambelum ikei hubah tutu. Katika jite manjadi, aku nampara mamikir kaadaan Arthur. Iye buah panyakit Parkinson. Hong 20 Mei 2015, sobat je mangawal pambelumku katahin 66 nyelu matei.

Katahin pire-pire nyelu tuh, aku rancak mangkeme pehe atei. Bihin, Arthur harajur tege akangku. Aku taharu tutu denga! Tapi, amun itah manaharep kaadaan je kilau tuh, itah tau sasar rantep dengan Yehowa. Aku kea sanang awi katawan tege are je sayang dengan Arthur. Aku mandinun surat bara kakawalan hong Irlandia, Inggris, nyamah tege kea je bara Amerika Serikat. Aku tau tatap dehen awi mambasa kare surat tuh tuntang ihibur awi Dennis, andi Arthur, tuntang sawa, Mavis, tuntang akengku Ruth tuntang Judy.

Ayat je mahibur tutu akangku iete Yesaya 30:18 je mansanan, ”TUHAN [Yehowa] magon enta-entai katikae uka mamparahan sinta asi akan keton. Ie tatap akan masi keton. Awi TUHAN [Yehowa] te Hatalla je malalus taloh je buah. Salamat oloh je harap Ie.” Aku tahibur tutu awi Yehowa sabar mentai katika uka mamberes uras masalah itah tuntang manenga itah tugas je bahalap hong dunia taheta.

Metuh aku mingat pangalamangku, aku katawan amun Yehowa manantiring tuntang mamberkat pengabaran hong Irlandia! Aku hanjak tutu tau umba malalus gawin tuh. Puna bujur, uluh je malalus palakun Yehowa akan harajur imberkat.