Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Oktober 2017

”Sinta Hapan Sinta je Bujur, je Imbukti Hapan Gawin Itah”

”Sinta Hapan Sinta je Bujur, je Imbukti Hapan Gawin Itah”

”Ela keton sinta baya huang totok biwih atawa baya kotak bewei. Keleh itah sinta hapan sinta je bujur, je imbukti hapan gawin itah.”​—1 YOHANES 3:18.

NYANYIN: 72, 124

1. Sinta kilen ampi je paling gantung? Nenga penjelasan. (Payah gambar hong tamparan artikel.)

SINTA te lembut bara Hatalla. (1 Yohanes 4:7) Sinta je paling gantung iete sinta je indasar prinsip je bujur. Huang Alkitab, sinta macam tuh inyewut agape huang bahasa Yunani. Pire-pire hal je manjadi bagian bara sinta tuh iete angat sayang tuntang rantep dengan uluh beken. Tapi, sinta tuh dia baya angat atei. Sinta tuh imparahan mahalau gawi akan manpaat uluh beken tuntang dia mamenting arep. Sinta tuh manampa itah handak mandohop uluh beken. Jituh manampa pambelum itah barega tuntang sanang.

2, 3. Kilen ampi cara Yehowa mamparahan sinta je dia mamenting arep akan kalunen?

2 Helu bara Adam tuntang Hawa inampa, Yehowa mahin jadi mamparahan sintan-Ai akan kalunen. Iye maatur tuntang manampa bumi mangat tau manyukup taluh je imerlu itah. Dia baya jite, bumi kea inampa uka itah tau mangkeme kamangat pambelum. Yehowa malalus jituh beken akan kepentingan Arep’ah. Iye manampa uras tuh akan itah. Metuh  bumi jadi siap ielai, haru Iye manampa kalunen tuntang manenga ewen kesempatan uka belum katatahi hong bumi pirdaus.

3 Limbah te, Yehowa mamparahan sintan-Ai je dia mamenting arep akan kalunen dengan cara je tamam tutu. Aluh Adam tuntang Hawa malawan, Yehowa yakin tutu amun pire-pire bara turunan ewen akan sinta Denga. Awi te, Iye langsung maatur mangat tege tewusan Anak-Ai uka manyalamat turunan Adam tuntang Hawa. (Genesis 3:15; 1 Yohanes 4:10) Metuh Yehowa manyewut janji te, tewusan kila-kilau jadi inenga. Limbah te, 4.000 nyelu limbah janji inampa, Yehowa manenga Anak-Ai je tunggal akan kalunen. (Yohanes 3:16) Sintan Yehowa pasti manampa itah basukur tutu!

Parahan sinta aluh dia purah

4. Mbuhen kalunen je dia sempurna tau mamparahan sinta je dia mamenting arep?

4 Itah dia sempurna. Tapi en itah tau mamparahan sinta je dia mamenting arep? Iyoh, itah tau. Yehowa manampa itah manumun gambar-Ai. Jite rima itah tau manyuntu Iye. Mamparahan sinta je dia mamenting arep dia harajur purah, tapi itah tau malalus’ah. Abel sinta Hatalla. Iye dengan kahias manenga je paling bahalap akan Hatalla. (Genesis 4:3, 4) Noah kea mamparahan sinta je dia mamenting arep. Iye tarus manyampai barita akan Hatalla katahin banyelu-nyelu aluh uluh dia peduli. (2 Petrus 2:5) Tuntang, Abraham mamparahan amun sintan ayu dengan Hatalla labih kuat bara narai bewei. Iye pahias manenga anak’ah je inyinta, Ishak, akan parapah. (Yakobus 2:21) Kilau ewen, itah kea handak mamparahan sinta je dia mamenting arep aluh dia purah.

NARAI SINTA JE BUJUR TE?

5. Kilen ampi itah tau mamparahan sinta je bujur?

5 Alkitab mansanan amun itah perlu mamparahan sinta je bujur beken ”baya huang totok biwih atawa baya kotak bewei. Keleh itah sinta hapan sinta je bujur, je imbukti hapan gawin itah”. (1 Yohanes 3:18) En jituh rima itah dia tau mamparahan sinta mahalau kutak pander? Beken kalute. (1 Tesalonika 4:18) Jituh rima baya bapander te dia sukup. Jituh perlu impahayak dengan gawi. Suntu, amun kawan paharin itah tapas panginan atawa pakaian, auh kutak bewei dia sukup akan mandohop ewen. (Yakobus 2:15, 16) Suntu beken, awi itah sinta Yehowa tuntang uluh beken, itah dia baya balakudoa mangat labih are je umba hong dinas. Tapi, itah kea akan bausaha karas badinas.​—Mateus 9:38.

6, 7. (a) Narai ”sinta je bujur” te? (b) Nenga suntu sinta je dia bujur.

6 Rasul Yohanes mansanan amun itah perlu sinta ”je bujur, je imbukti hapan gawin itah”. Jadi, sinta itah musti ”dengan katoton atei”, atawa ”hapan sinta je bujur”. (Roma 12:9; 2 Korintus 6:6) Kanatek’ah, tege uluh je pura-pura peduli. Jite beken sinta je bujur. Uluh kilau te tege kanahuang je dia gitan. Mamparahan sinta je pura-pura jatun guna samasinde.

 7 Ayo itah mambahas pire-pire suntu sinta je dia bujur. Auh Setan dengan Hawa hong Taman Eden ampi mamparahan amun Setan peduli dengan Hawa. Tapi gawin Setan mamparahan amun jite tanjaru. (Genesis 3:4, 5) Suntu beken, Raja Dawid tege kawal je ara Ahitopel. Tapi, Ahitopel bakhianat awi mamenting arep. Gawi mamparahan amun iye kawal palsu. (2 Samuel 15:31) Wayah tuh, uluh murtad tuntang uluh je mangahandak kapusit hong ungkup bapander ”dengan kataun ampie tuntang kare auh je manis”. (Roma 16:17, 18) Ewen pura-pura peduli dengan uluh beken tapi ewen sapuna tege kanahuang je mamenting arep.

8. Paisek narai je perlu imikir itah?

8 Mamparahan sinta je pura-pura te hal je papa awi jite ilalus akan mananjaru uluh beken. Itah mungkin tau mananjaru kalunen, tapi itah dia tau mananjaru Yehowa. Yesus hamauh amun uluh je pura-pura akan mandinun hukuman ’sakalepah belai’. (Mateus 24:51) Itah rewar Yehowa. Jadi itah dia handak manjadi uluh je pura-pura. Itah perlu bapikir, ’En sintangku bara atei? Atawa, en aku mamenting arep kabuat tuntang tege kanahuang je dia gitan?’ Ayo itah mambahas jalatien cara uka mamparahan ”sinta je bujur”.

CARA ”SINTA HAPAN SINTA JE BUJUR, JE IMBUKTI HAPAN GAWIN ITAH”

9. Amun sinta itah te bujur, narai je akan inggawi itah?

9 Siap mandohop aluh jatun je mangatawa. Itah perlu mamparahan kataun atei dengan pahias mandohop uluh beken aluh jatun je mangatawa. (Mbasa Mateus 6:1-4.) Sikap je hakalawan imparahan awi Ananias tuntang Sapira. Metuh ewen manenga sumbangan, ewen handak uluh beken mangatawan hal te. Ewen mananjaru tahiu pire karen sumbangan je inenga ewen. Awi sikap pura-pura te ewen ihukum. (Gawin Rasul 5:1-10) Amun itah buju-bujur sinta kawan paharin itah, itah hanjak mandohop ewen dengan kahias atei, beken awi handak inantuani uluh. Itah tau manyuntu kare pahari je mandohop Badan Pimpinan manyadia panginan rohani. Ewen dia handak manggau-nggau mangat inantuani uluh tuntang mangesah tahiu gawi je ilalus ewen.

Siap mandohop aluh jatun je mangatawa

10. Kilen ampi itah tau mahormat uluh beken?

10 Keleh mahormat uluh beken. (Mbasa Roma 12:10.) Yesus mahormat kare rasul ayu dengan menyau pain ewen. (Yohanes 13:3-5, 12-15) Itah perlu bausaha karas mangat tau randah atei tuntang mandohop uluh beken kilau Yesus. Kare rasul sulak’ah dia harati mbuhen Yesus malalus hal te, haru limbah manarima roh barasih ewen harati. (Yohanes 13:7) Itah tau mahormat uluh beken dengan dia bapikir amun itah labih tamam bara ewen, mungkin awi sakulan itah gantung, itah labih tatau, atawa awi hak istimewa itah. (Roma 12:3) Itah dia bahiri amun uluh beken  mandinun pujian. Tapi itah akan umba hanjak denga aluh itah mangkeme itah kea patut mandinun pujian macam te.

11. Mbuhen pujian je inenga itah musti bara atei?

11 Nenga pujian je buju-bujur bara atei. Itah perlu manggau kesempatan je bahalap uka manenga pujian akan uluh beken awi pujian te mampaabas ije dengan je beken. (Epesus 4:29) Itah perlu mamasti tujuan itah manenga pujian te bujur tuntang pujian itah buju-bujur bara atei. Keleh itah manenga pujian beken baya akan manyanang uluh atawa mangat itah dia perlu manenga nasehat je imerlu. (Sewut Salomo 29:5) Amun itah manenga pujian akan uluh beken, tapi limbah te manahiu kakurang’ah metuh iye jatun, jite ara pura-pura. Rasul Paulus mamparahan sinta je bujur. Metuh iye manulis surat akan uluh Kristen hong Korintus, iye manenga pujian akan kare hal bahalap je ilalus ewen. (1 Korintus 11:2) Tapi, iye kea manenga nasehat je imerlu ewen tuntang mansanan alasa dengan jelas tuntang cara je bahalap.​—1 Korintus 11:20-22.

Itah mamparahan sinta tuntang asi dengan mandohop paharin itah je mamerlu pandohop (Payah paragrap 12)

12. Kilen ampi itah tau malalus sinta je bujur dengan mamparahan asi?

12 Keleh manjadi uluh je pamasi. Yehowa marentah itah uka masi dengan kawan pahari. (Mbasa 1 Yohanes 3:17.) Tapi, itah perlu tege alasan je bujur metuh malalus jite. Coba mikir, ’En uluh je iraweiku akan huma baya kawal atawa uluh je inilaiku penting hong ungkup? En aku baya marawei uluh je kira-kira tau mambaleh? Atawa, en aku masi dengan kawan Pahari je dia lalau ingaseneku atawa je dia tau mambaleh kataungku?’ (Lukas 14:12-14) Coba mikir: Kilen ampi amun ije biti pahari perlu pandohopku awi kasala je inampa kabuat? Atawa, kilen ampi amun ije biti uluh je iraweiku akan huma dia puji mansanan tarima kasih? Yehowa marentah itah, ”Keleh keton hasambut sama arep keton huang gagenep human keton, hapan kahias atei.” (1 Petrus 4:9) Itah pasti hanjak amun itah mamparahan asi dengan alasan je bujur.​—Gawin Rasul 20:35.

13. (a) Pea itah perlu labih basabar? (b) Narai je tau inggawi itah uka mandohop ewen je balemu?

13 Dohop je balemu. Amun itah manumun parentah Alkitab uka ’mandohop oloh je perlu indohop tuntang sabar taharep oloh samandiai’, jite rima itah mamparahan sinta je bujur. (1 Tesalonika 5:14) Are kawan pahari je puji balemu wayah tuh tege iman je kuat. Tapi, are kawan pahari je santar mamerlu kasabar tuntang pandohop itah. Kilen ampi itah  tau mandohop ewen? Itah tau mahapan Alkitab uka mampaabas ewen, mimbit ewen badinas, atawa mahining metuh ewen bakesah. Tuntang kea, metuh itah manampayah kawan pahari, ela baya bapikir amun je jituh ”balemo” tuntang je jituh ”abas”. Tapi, itah perlu mangaku amun itah uras tege kalabih tuntang kakurang. Rasul Paulus kea mangaku amun iye tege kakurang. (2 Korintus 12:9, 10) Itah uras perlu hakadohop tuntang mampaabas.

14. Narai je perlu inggawi itah uka mahaga kadamai dengan kawan pahari?

14 Mausaha kadamai. Kadamai dengan kawan paharin itah barega tutu. Aluh mungkin tege je sala paham dengan itah atawa itah manaharep gawi je dia adil, itah perlu tatap mausaha kadamai. (Mbasa Roma 12:17, 18.) Amun itah mangapehe atei uluh beken, balaku maap mungkin jadi sukup. Tapi jite musti bara atei. Suntu, itah dia akan hamauh, ”Maap lah amun ikau sala paham.” Labih bahalap amun itah mangaku kasalan itah dengan hamauh, ”Maap lah, auh ku manampa ikau pehe atei.” Kadamai kea penting tutu hong pangawin. Uluh je jadi kawin dia tau pura-pura jatun masalah tuntang sinta kabali hong baun uluh, tapi je manjadi ewen dia handak bapander, hasapa, atawa mahapan kakaras metuh jatun je manampayah.

15. Kilen ampi itah mamparahan amun itah buju-bujur maampun?

15 Pahias maampun. Amun tege je mangapehe itah, itah akan maampun uluh te tuntang manganan kapehen atei itah. Itah perlu manggawi hal tuh aluh uluh je mangapehe itah dia mangatawan iye jadi mangapehe itah. Itah dengan kahias atei maampun dengan ’kapanjang atei, hasarenan sama arep itah huang sinta, tuntang uku-ukuh mahaga bulat atei, hapeteng huang kasanang’. (Epesus  4:2, 3, Surat Barasih 1983) Mangat tau buju-bujur maampun, itah musti tende mamikir taluh gawin uluh je mangapehe itah. Sinta ”dia mingkes kasingi huang ateie”. (1 Korintus 13:4, 5) Amun itah mingkes kasingi, jite malah akan marusak hubungan itah dengan kawan pahari tuntang dengan Yehowa. (Mateus 6:14, 15) Itah mambukti amun itah buju-bujur maampun dengan balakudoa tahiu uluh je mangapehe itah.​—Lukas 6:27, 28.

16. Kilen ampi itah tau mamparahan amun sintan itah bujur metuh mandinun hak istimewa?

16 Manomor ije kepentingan uluh beken. Amun itah tege hak istimewa huang organisasi Yehowa, itah tau mamparahan amun sinta itah bujur dengan dia ”manggau jalan handak mandohop arepe kabuat. Genep bitin oloh musti manggau jalan akan mandohop oloh beken”. (1 Korintus 10:24) Akan suntu, metuh kebaktian, petugas tata tertib jadi tege hong ruangan helu bara kawan pahari beken tame. Ewen mungkin handak mintih eka munduk je paling bahalap akan ewen tuntang keluarga ewen. Tapi, are bara ewen mintih eka munduk je dia lalau mangat hong daerah tugas ewen. Jituh mamparahan amun ewen tege sinta je bujur. En tau itah manyuntu ewen?

17. Sinta je bujur tau manggerek uluh Kristen je malalus dosa serius uka malalus narai?

17 Tende tuntang sanan dosa je basahukan. Pire-pire uluh Kristen je mawi dosa serius bausaha manyahukan dosan ewen. Ewen mungkin mahamen atawa dia handak manampa uluh beken kecewa. (Sewut Salomo 28:13) Tapi, manyahukan dosa dia pamasi awi jite marugi arep ewen kabuat tuntang uluh beken. Mbuhen? Awi jite tau manderoh roh barasih Yehowa bagawi tuntang tau maancam kadamai ungkup. (Epesus 4:30) Amun ije biti uluh Kristen manggawi dosa serius, sinta je bujur akan manggerek iye uka bapander dengan kare bakas ungkup tuntang balaku pandohop je imerlu.​—Yakobus 5:14, 15.

18. Sapire barega sinta je bujur?

18 Sinta iete sipat je paling barega. (1 Korintus 13:13) Amun itah mamparahan sinta, uluh beken tau manampayah eweh je sapuna manumun Yesus tuntang manyuntu Yehowa, Sumber bara sinta. (Epesus 5:1, 2) Paulus mansanan amun iye jatun sinta, iye jatun rima. (1 Korintus 13:2) Semoga itah uras tau harajur mamparahan sinta dia baya ”huang totok biwih”, tapi kea ”hapan sinta je bujur, je imbukti hapan gawin itah”.