Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Oktober 2017

Palajaran bara Paite Sakharia

Palajaran bara Paite Sakharia

”Keleh mules haluli talih Aku, palus Aku kea kareh haluli manarima keton.”​—SAKHARIA 1:3.

NYANYIN: 120, 117

1-3. (a) Metuh Sakharia nampara manujum, kilen api kaadaan rewar Yehowa? (b) Mbuhen Yehowa handak rewar-Ai haluli Denga?

SAKHARIA mandinun paite je tamam tutu. Pire-pire hal je inampayah iete balun buku je tarawang, ije biti uluh bawi huang karanjang, tuntang due biti uluh bawi je tarawang dengan palapas kilau burung bangau. (Sakharia 5:1, 7-9) Mbuhen Sakharia mandinun paite je tamam kilau tuh bara Yehowa? Kilen ampi kaadaan uluh Israel metuh te? Tuntang, palajaran narai je tau indinun itah bara paite tuh?

2 Hong nyelu 537 SM, rewar Yehowa hanjak tutu. Limbah inawan hong Babel katahin 70 nyelu, kajaria ewen bebas! Ewen jadi dia sabar handak buli akan Yerusalem uka mamangun haluli bait tuntang manempu Yehowa. Ije nyelu limbah te ewen bahasil manampa pondasi bait. Ewen hanjak tutu tuntang surak ”ewen kalote kapahame sampai tarahining bara kejau”. (Esra 3:10-13) Tapi, usaha musuh uka mampatende gawin mamangun bait sasar karas. Uluh Israel mikeh tutu sampai ewen tende mamangun bait. Ewen malah deroh  mamangun human ewen kabuat tuntang bakabun. Jahawen belas nyelu limbah te, bait Yehowa masih hindai jadi. Rewar Hatalla perlu impingat uka dia mamikir arep ewen kabuat tuntang haluli akan Yehowa. Yehowa handak ewen baibadat Denga dengan bahanyi tuntang basamangat.

Manempu Yehowa musti ilalus dengan salepah atei itah

3 Jadi, huang nyelu 520 SM, Yehowa mangirim Nabi Sakharia uka mampingat uluh Israel mbuhen ewen imbebas bara Babel. Riman aran Sakharia iete ”Yehowa Jadi Mingat”. Aluh uluh Israel dia mingat narai je jadi ilalus Yehowa akan ewen, Hatalla tatap mingat dengan ewen. (Mbasa Sakharia 1:3, 4.) Yehowa bajanji Iye akan mandohop ewen mampendeng haluli ibadat je bujur. Tapi, Iye kea mampingat ewen amun manempu Iye musti ilalus dengan salepah atei. Ayo itah balajar tahiu paite Sakharia je kajahawen tuntang kauju. Itah akan balajar kilen ampi Yehowa manenga semangat akan uluh Israel tuntang manpaat due paite tuh akan itah.

HATALLA MAHUKUM PANAKAU

4. Narai je inampayah Sakharia huang paite je kajahawen? Mbuhen tege tulisan hong bagian huang tuntang luar balun buku te? (Payah gambar 1 hong tamparan artikel.)

4 Pasal 5 buku Sakharia inampara dengan paite je aneh. (Mbasa Sakharia 5:1, 2.) Sakharia manampayah balun buku je tarawang. Balun buku tuh panjang’ah tukep 9 meter tuntang kalumbah’ah tukep 4,5 meter. Balun buku te tabuka, tuntang tege peteh je tarasurat hong hete. (Sakharia 5:3) Peteh’ah iete barita tahiu keputusan hukum je penting. Bahut, uluh huran manulis peteh hong bagian huang bara balun buku. Tapi, peteh tuh penting tutu nyama-nyamah inulis hong bagian huang tuntang luar balun buku te.

Uluh Kristen musti mangejau arep bara genep macam gawin manakau (Payah paragrap 5-7)

5, 6. Kilen ampi Yehowa manilai genep macam gawin manakau?

5 Mbasa Sakharia 5:3, 4. * (Payah catatan penda.) Uras kalunen musti batanggung jawab dengan Hatalla akan taluh gawin ewen. Labi-labih hindai akan rewar Yehowa awi ewen mawakil Ara. Ewen sinta Iye tuntang katawan amun manakau tau mamapa Ara. (Sewut Salomo 30:8, 9) Tege je bapikir amun manakau dengan alasan je bujur te dia sala. Tapi, narai bewei alasan ije biti uluh manakau, jite mamparahan amun iye manomor ije kanahuang’ah je mamenting arep labih bara Yehuwa, Ara, tuntang hukum-Ai.

6 Nantuani amun hong Sakharia 5:3, 4, sapa te akan ”tame human oloh panakau” tuntang ”melai huang humae te, balalu mamparusak te lepa-lepah”. Jite rima Yehowa tau manampayah tuntang  mahakim taluh gawi papa narai bewei hong marak rewar-Ai. Uluh je manakau mungkin tau manyahukan gawi bara polisi, bos, bakas ungkup, atawa uluh bakas. Tapi, iye dia tau manyahuka bara Yehowa. Hatalla pasti akan manampa gawi te ingatawan. (Ibrani 4:13) Itah pasti hanjak awi tege hong marak uluh je bausaha uka tatap jujur ”huang kakare hal”!​—Ibrani 13:18.

7. Kilen ampi mangat sapa hong balun buku je tarawang dia manjadi dengan itah?

7 Yehowa dia rajin dengan genep macam gawin manakau. Itah pasti sanang awi tau mangatawan tuntang manumun prinsip Yehowa tahiu narai je bujur tuntang je sala. Itah kea hanjak awi cara belum itah dia mamapa Ara. Amun itah malalus hal tuh, Yehowa dia akan mahukum itah.

LALUS JANJIN ITAH ”GENEP ANDAU”

8-10. (a) Narai sumpah te? (b) Narai sumpah je ilanggar Raja Sedekia?

8 Limbah te, balun buku je tarawang te manyampai pingat akan kare uluh je ”sumpah tanjaro” mahapan aran Hatalla. (Sakharia 5:4) Sumpah iete auh je mamasti amun ije hal puna bujur. Jite kea janji penting uka malalus atawa dia malalus ije hal.

9 Basumpah mahapan aran Yehowa jite ije hal je serius. Jituh tau inampayah bara kesah Sedekia, raja terakhir je mamarentah hong Yerusalem. Iye basumpah mahapan aran Yehowa je mansanan amun iye akan mamenda raja Babel. Tapi, Sedekia dia malalus janji. Awi te, Yehowa mansanan tahiu Sedekia, iye akan ”matei hong Babel, awi ie jari mungkir sumpahe tuntang malanggar  janjie dengan raja Babel je jari mampondok ie hunjun padadusae”.​—Esekhiel 17:16.

10 Raja Sedekia basumpah mahapan aran Hatalla, tuntang Yehowa mangahandak iye malalus sumpah te. (2 Kronika 36:13) Tapi, Sedekia dia malalus janji tuntang balaku pandohop Misir uka mandohop iye malawan raja Babel. Aluh kalute, Misir dia ulih mandohop iye.​—Esekhiel 17:11-15, 17, 18.

11, 12. (a) Narai janji paling penting je tau inampa itah? (b) Sapuna, kilen ampi janjin manenga arep mampengaruh pambelum itah?

11 Bara kesah Sedekia, itah balajar amun Yehowa mahining kare janji je inampa itah. Uka manampa Iye sanang, itah musti malalus kare janjin itah. (Masmur 76:11) Janji je paling penting je inampa itah iete janji manenga arep itah akan Yehowa. Metuh bajanji manenga arep, itah bajanji amun narai bewei je manjadi, itah akan tatap manempu Yehowa.

12 Kilen ampi itah tau malalus janjin itah dengan Yehowa? ”Genep andau” itah manaharep kaadaan je tau mauji, je kurik tuntang je hai. Cara itah manaharep’ah akan mamparahan sapire rantep itah dengan Yehowa. (Masmur 61:8) Suntu, narai je ilalus itah amun tege je handak dengan itah hong eka bagawi atawa hong sakula? Metuh ewen bausaha manukep, en itah manolak tuntang mamparahan amun itah handak manumun Yehowa? (Sewut Salomo 23:26) Atawa, kilen ampi amun huang keluarga baya itah kabuat je manempu Yehowa? En itah balaku pandohop Yehowa mangat uras taluh gawin itah sasuai dengan jalan Kristen? Aluh narai bewei je inaharep itah, en itah batarima kasih dengan Yehowa genep andau awi Iye sinta tuntang manantiring itah? En itah manyampet mambasa Alkitab genep andau? Amun imikir, itah jadi bajanji uka malalus kare hal tuh metuh itah manenga arep akan Yehowa. Amun itah manumun tuntang manenga je paling bahalap Aka, itah mamparahan amun itah sinta Iye tuntang handak manyarah arep itah Denga. Itah Saksi Yehowa 24 jam, beken hong katika khusus ih. Tuntang awi itah baketep dengan Yehowa, Iye bajanji manenga itah andau rahian je bahalap.​—Deuteronomium 10:12, 13.

Itah tau balajar bara Yehowa amun itah perlu malalus janjin itah

13. Narai palajaran je tau indinun itah bara paite Sakharia je kajahawen?

13 Paite Sakharia je kajahawen majar itah amun itah sinta Yehowa, itah dia akan manakau atawa malanggar janjin itah. Itah kea balajar aluh bangsa Israel mawi are kasala, Yehowa tatap malalus Janji tuntang dia malihi rewar-Ai. Iye katawan amun kaadaan ewen bahali awi tege are musuh hong kaliling ewen. Yehowa malalus hal tuh mangat itah tau balajar bara Iye. Itah perlu malalus janjin itah. Tuntang, itah tau yakin amun Iye akan mandohop itah. Ije cara Iye  mandohop itah dengan manenga kaharap hong rahian andau. Dia pire hindai, Iye akan manganan uras kapapa hong bumi. Jituh tau inampayah bara paite Sakharia limbah tuh.

YEHOWA MANGANAN ULUH PAPA

14, 15. (a) Narai je inampayah Sakharia hong paite je kauju? (Payah gambar 2 hong tamparan artikel.) (b) Eweh bawi je tege huang karanjang te, tuntang mbuhen karanjang te inutup?

14 Limbah Sakharia manampayah balun buku je tarawang endau, ije biti malekat hamauh denga, ”Ite!” Balalu Sakharia manampayah ije karanjang. (Mbasa Sakharia 5:5-8.) Karanjang te ”aton tutupe bara timah” je bunter. Metuh karanjang te imbuka, Sakharia manampayah ”intu huang karanjang te mondok ije biti oloh bawi”. Limbah te, malekat te mangesah amun uluh bawi huang karanjang te iete ”Kapapa”. Sakharia pasti mikeh manampayah uluh bawi te juju-juju handak balua! Tapi, malekat te langsung manamean haluli bawi te akan huang karanjang tuntang manutup’ah dengan timah je babehat. Narai riman paite te?

15 Paite te manampa itah yakin amun Yehowa dia akan manalua kapapa narai bewei tege hong marak kare rewar-Ai. Amun Yehowa manampayah hal je papa, Iye akan bajeleng mangana. (1 Korintus 5:13) Jituh imparahan awi malekat enah je langsung manutup karanjang dengan timah babehat.

Yehowa bajanji uka mahaga ibadat Aka tatap barasih (Payah paragrap 16-18)

16. (a) Narai je manjadi dengan karanjang te? (Payah gambar 3 hong tamparan artikel.) (b) Akan kueh karanjang te iimbit?

16 Limbah te, Sakharia manampayah due biti uluh bawi dengan palapas je  kuat kilau ayun bangau. (Mbasa Sakharia 5:9-11.) * (Payah catatan penda.) Due bawi tuh dia sama dengan bawi jahat je tege huang karanjang te. Limbah te, ewen tarawang mimbit karanjang je tege ”Kapapa” intu huang’ah. Akan kueh karanjang te iimbit? Jite iimbit akan ”tanah Sinear”, atawa Babel. Mbuhen iimbit akan kanih?

17, 18. (a) Mbuhen Babel ”eka ije patut” akan kapapa? (b) Narai tekad itah?

17 Uluh Israel je belum ije jaman dengan Sakharia katawan mbuhen Babel eka je cocok akan ”Kapapa”. Ewen katawan amun Babel te kota je jahat je kuntep dengan ibadat palsu tuntang kapapa. Sakharia tuntang uluh Yehudi je puji belum hong kanih musti bausaha karas genep andau uka malawan pengaruh je papa. Jadi, paite tuh manenga jaminan amun Yehowa akan mahaga ibadat-Ai tatap barasih.

18 Paite tuh kea mampingat uluh Yehudi amun ewen tege tanggung jawab uka mahaga ibadat ewen tatap barasih. Kapapa dia tau tuntang dia akan inalua tege hong marak rewar Hatalla. Wayah tuh, Yehowa kea jadi mimbit itah akan organisasi-Ai je barasih. Hong hetuh, itah akan mangkeme sinta tuntang kalindung-Ai. Jadi, itah uras tege tanggung jawab uka mahaga organisasi tuh tatap barasih. Jatun eka akan kapapa hong marak rewar Yehowa.

KARE ULUH JE BARASIH MANAMPA YEHOWA HANJAK

19. Narai palajaran je tau indinun itah bara paite Sakharia je tamam tutu?

19 Paite Sakharia je kajahawen tuntang kauju manjadi pingat je penting akan kare uluh je malalus kare hal papa. Yehowa dia benyem metuh manampayah kapapa. Awi itah rewar-Ai, itah musti bajilek dengan narai je papa. Peteh tuh manampa itah yakin amun itah bausaha manyanang Bapa itah je pamasi, Iye dia akan manyapa itah, tapi Iye akan mangalindung tuntang mamberkat itah. Aluh dia purah mahaga arep tatap barasih hong dunia je papa tuh, dengan pandohop Yehowa, itah tau bahasil. Tapi narai je tau manampa itah yakin amun ibadat je bujur tatap batahan? Tuntang, awi kasusah je hai sasar tukep, narai je tau manampa itah yakin amun Yehowa akan mangalindung organisasi-Ai? Uras tuh akan imbahas huang artikel limbah tuh.

^ par. 5 Sakharia 5:4, Surat Barasih 1983, ’Aku jari manyoho jete balua, koan Tuhan, Tempon kare kawan taloh belom, mangat Iye tame human oloh panakau tuntang tame human oloh panyumpah sala hapan arangku, palus melai huang humae te, balalu mamparusak te lepa-lepah kare kayue tuntang batue.’

^ par. 16 Sakharia 5:11, Surat Barasih 1983, ’Koae, tombah auhku: Mangat manampa huma akae hong tanah Sinear; amon jete jari mendeng, te ie ina hete intu eka ije patut ekae.’