Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Oktober 2017

Kareta Parang tuntang Makota Mangalindung Itah

Kareta Parang tuntang Makota Mangalindung Itah

”Uras taloh te kareh manjadi amon ewen toto-toto manumon parentah-Ku, TUHAN [Yehowa], Hatallan ewen.”​—SAKHARIA 6:15.

NYANYIN: 17, 136

1, 2. Kilen ampi kaadaan uluh Yehudi hong Yerusalem limbah Sakharia mandinun paite je kauju?

SAKHARIA pasti mamikir are hal limbah mandinun paite je kauju. Iye pasti hanjak awi Yehowa bajanji mahukum uluh je dia jujur. Tapi, hong kaliling’ah hindai lalau hubah. Masih are je manampa kapapa tuntang manipu. Beken bara te, bait hong Yerusalem hindai jadi. Mbuhen uluh Yehudi capat manyarah tuntang malihi gawi bara Yehowa tuh? En tujuan ewen buli akan Yerusalem baya uka manampa pambelum je labih mangat akan arep ewen?

2 Sakharia katawan amun uluh Yehudi je haluli akan Yerusalem iete uluh je manempu Yehowa. Ewen tuh je ”ateie inggerek awi Hatalla” uka malihi huma tuntang usahan ewen hong Babel. (Esra 1:2, 3, 5) Ewen malihi huma uka mangguang eka je tapaare bara ewen hindai puji manampayah’ah. Akan uluh Yehudi, mamangun haluli bait  Yehowa penting tutu sampai ewen pahias manampa jalanan je bahaya kira-kira 1.600 kilometer mahalau jalan je habatu.

3, 4. Narai bewei masalah je inaharep uluh Yehudi je haluli akan Yerusalem?

3 Coba mikir jalanan panjang bara Babel akan Yerusalem. Katahin te, uluh Israel pasti rancak mamikir tuntang bapander tahiu kota je ingguang ewen. Uluh je jadi bakas jadi mangesah kilen kahalap Yerusalem tuntang bait. (Esra 3:12) Amun itah tege hayak ewen metuh te, kilen ampi angat atei itah metuh haru sinde te manampayah Yerusalem? En itah pehe atei metuh manampayah awan derep je ingalambun uru tuntang tembok kota je jadi baduruh tuntang rumbak-rumbaka? Itah mungkin mambanding tembok kota te dengan tembok Babel je hai tuntang segah. Tapi uluh Yehudi tatap semangat. Mbuhen? Awi katahin jalanan ewen je kejau, Yehowa harajur mandohop tuntang mangalindung ewen. Metuh sampai akan Yerusalem, ewen mamangun mesbeh hong awan eka bait tuntang nampara manenga parapah akan Yehowa genep andau. (Esra 3:1, 2) Ewen semangat tutu tuntang siap bagawi. Ampi jatun je ulih mahalang ewen.

4 Metuh mamangun bait, uluh Yehudi kea perlu mamangun kota tuntang human ewen. Ewen kea perlu bakabun mangat keluarga ewen tau kuman. (Esra 2:70) Are tutu je musti inggawi ewen. Dia tahi limbah te, kare musuh dumah tuntang bausaha mampatende gawin ewen. Tantangan tuh manjadi katahin 15 nyelu, tuntang sasar tahi uluh Yehudi nihau semangat. (Esra 4:1-4) Hong nyelu 522 SM, tege tantangan beken. Raja Persia manenga parentah uras gawin mamangun hong Yerusalem musti tende. Ampi kota te dia akan imangun haluli.​—Esra 4:21-24.

5. Narai je inggawi Yehowa uka mandohop rewar-Ai?

5 Yehowa katawan amun rewar-Ai perlu inenga semangat mangat bahanyi. Iye manenga Sakharia paite pangkahapus uka manampa ewen yakin amun Iye sinta ewen tuntang marega usahan ewen uka manempu Iye. Iye bajanji mangalindung ewen amun ewen haluli malalus gawi je Inenga akan ewen. Yehowa hamauh tahiu gawin mamangun bait, ”Uras taloh te kareh manjadi amon ewen toto-toto manumon parentah-Ku, TUHAN [Yehowa], Hatallan ewen.”​—Sakharia 6:15.

PASUKAN MALEKAT

6. (a) Narai je inampayah Sakharia hong tamparan paite kahanya? (Payah gambar hong tamparan artikel.) (b) Mbuhen warna kare kuda te dia sama?

6 Paite Sakharia je pangkahapus iete je kahanya mungkin je paling mampaabas iman. (Mbasa Sakharia 6:1-3.) Coba mikir narai je inampayah Sakharia. ”Bara helat due bukit gantong” bara tambaga, dumah kare kuda je manjijit epat kareta parang. Je manungkang’ah purah imbeda awi kare kuda te hakabeken warna. Sakharia misek, ”Narai riman kare kareta parang toh?” (Sakharia 6:4) Itah kea handak mangatawan rima, awi jituh tege hubunga dengan itah.

7, 8. (a) Narai riman due bukit te? (b) Mbuhen due bukit te bara tambaga?

 7 Huang Alkitab, bukit tau manjadi lambang karajaan, atawa pamarentahan. Due bukit je inampayah Sakharia mirip dengan due bukit je incatat hong tujum Daniel. Bukit je pangkasulak jite manjadi lambang pamarentahan Yehowa je katatahi hong hapus alam semesta. Bukit je kadue manjadi lambang Karajaan Mesias je Raja iete Yesus. (Daniel 2:35, 45) Bulan Oktober 1914, Yesus manjadi Raja. Bara katika te, due bukit tuh jadi mendeng tuntang malalus tugas khusus uka manggenep tujuan Hatalla akan bumi.

Yehowa masih mahapan malekat uka mangalindung tuntang mampaabas rewar-Ai

8 Mbuhen due bukit tuh bara tambaga? Tambaga iete logam je barega tuntang malinyau. Yehowa balaku bangsa Israel uka mahapan tambaga metuh mamangun tabernakel tuntang bait hong Yerusalem. (Eksodus 27:1-3; 1 Raja 7:13-16) Due bukit tuh bara tambaga mamparahan amun pamarentahan Yehowa tuntang Karajaan Mesias puna tamam tutu. Mahalau due karajaan tuh, kalunen akan imberkat tuntang mangkeme aman.

9. Eweh je manungkang kareta parang, tuntang narai tugas ewen?

9 Narai riman kareta parang tuntang je manungkang’ah? Je manungkang’ah iete kare malekat, mungkin je imbagi huang pire-pire kelompok. (Mbasa Sakharia 6:5-8.) Ewen balua bara ’taharep Tuan salepah langit tuntang petak’ dengan tugas khusus. Kare malekat ingirim akan pire-pire eka mangat mangalindung rewar Hatalla khusus’ah je bara ”utara”, iete Babel. Mahalau paite tuh, Yehowa mansanan akan rewar-Ai amun ewen dia akan manjadi jipen hindai hong Babel. Jituh pasti manampa uluh Yehudi je mamangun bait hong jaman Sakharia sanang. Ewen katawan amun musuh dia akan ulih mampatende ewen.

10. Narai guna akan itah tujum Sakharia tahiu kareta parang tuntang je manungkang’ah?

10 Wayah tuh, Yehowa masih mahapan malekat uka mangalindung tuntang mampaabas rewar-Ai. (Maleakhi 3:6; Ibrani 1:7, 14) Hong nyelu 1919, rewar Yehowa ilapas bara Babel je Hai. Bara katika te, kare musuh ewen karas bausaha mangat ibadat je bujur dia sasar hai. (Pangarinah 18:4) Tapi, ewen dia bahasil. Itah dia perlu mikeh inawan agama palsu hindai awi kare malekat harajur mangalindung organisasi Yehowa. (Masmur 34:8) Itah akan tatap hanjak tuntang sibuk baibadat dengan Yehowa. Tujum Sakharia manampa itah yakin amun itah aman tuntang ingalindung awi due bukit te.

11. Mbuhen itah dia perlu mikeh metuh tege je manyarang rewar Hatalla hong andau rahian?

11 Dia pire hindai, kare kuasa politik dunia Setan akan hinje handak  mampahancur rewar Hatalla. (Esekhiel 38:2, 10-12; Daniel 11:40, 44, 45; Pangarinah 19:19) Huang tujum Esekhiel, kuasa politik inyama kilau baunandau je manutup bumi. Ewen manungkang kuda tuntang dengan basingi tutu siap manyarang rewar Hatalla. (Esekhiel 38:15, 16) * (Payah catatan penda.) En itah perlu mikeh dengan ewen? Dia! Pasukan Yehowa siap mandohop itah. Katahin kasusah je hai, kare malekat Yehowa akan mangalindung rewar-Ai tuntang akan mampalumus eweh bewei je malawan pamarentahan Yehowa. (2 Tesalonika 1:7, 8) Jite akan manjadi andau je istimewa. Tapi, eweh je akan mamimpin pasukan Yehowa?

YEHOWA MANGKEPAN MAKOTA AKAN RAJA TUNTANG IMAM-AI

12, 13. (a) Narai parentah Yehowa akan Sakharia? (b) Bara kueh itah katawa amun uluh hatue je inyewut Salundik iete Yesus Kristus?

12 Baya Sakharia je mandinun hanya paite kilau te. Tapi, tuh iye malalus ije hal je tau inampayah uluh, tuntang jituh akan mampaabas uras uluh je mamangun bait Hatalla. (Mbasa Sakharia 6:9-12.) Tege telu uluh hatue je dumah bara Babel. Ewen iete Heldai, Tobia, tuntang Yedaya. Yehowa manyuhu Sakharia manduan perak tuntang amas bara ewen, limbah te manampa ije ”makota”. (Sakharia 6:11) En makota tuh  inenga akan Gubernur Serubabel je lahir bara suku Yuda tuntang turunan Dawid? Dia. Yehowa manyuhu Sakharia uka mangkepan makota tuh hong takuluk Imam Hai Yosua. Uluh je manampayah hal tuh pasti tarewen.

13 En jituh rima Imam Hai Yosua iangkat manjadi raja? Dia. Yosua beken utus Dawid. Jadi, iye jatun hak uka manjadi raja. Kajadian tuh manenga gambaran je akan manjadi hong rahian andau dengan ije biti raja tuntang imam je inyewut Salundik. Alkitab manjelas amun Salundik tuh Yesus Kristus.​—Yesaya 11:1; Mateus 2:23. * (Payah catatan penda.)

14. Narai je akan inggawi Yesus ije biti Raja tuntang Imam Hai?

14 Yesus Raja tuntang Iman Hai. Iye mamimpin pasukan malekat Yehowa tuntang bausaha karas mangalindung rewar Hatalla huang dunia je papa tuh. (Yeremia 23:5, 6) Kristus manenga dukungan akan pamarentahan Hatalla tuntang mangalindung rewar Hatalla. Dia pire hindai iye akan mampakalah uras bangsa. (Pangarinah 17:12-14; 19:11, 14, 15) Tapi helu bara hal te manjadi, Salundik, atawa Yesus, musti malalus gawi je hai.

IYE AKAN MAMANGUN BAIT YEHOWA

15, 16. (a) Kilen ampi rewar Hatalla ilian haluli tuntang imparasih, tuntang eweh je malalus hal te? (b) Kilen ampi kaadaan bumi limbah pamarentahan Saribu Nyelu Kristus?

15 Beken bara manjadi Raja tuntang Imam Hai, Yesus kea inenga tugas uka ’mamangun human Yehowa’. (Mbasa Sakharia 6:13.) Hong nyelu 1919, iye malalus gawi mamangun tuh dengan malapas rewar Hatalla bara pengaruh agama palsu, atawa Babel je Hai. Yesus mampendeng haluli ungkup tuntang mintih ’jipen je baketep tuntang pintar harati’. Kawan pahari terurap tuh manenga arahan akan gawi je paling penting hong bumi, je manjadi bagian bara bait rohani je hai tutu. (Mateus 24:45) Katahin tuh, Yesus kea harajur mamparasih rewar Hatalla tuntang mandohop ewen malalus ibadat je barasih.​—Maleakhi 3:1-3.

16 Yesus tuntang 144.000 kawan raja tuntang imam akan mamarentah katahin saribu nyelu. Katahin te, ewen akan mandohop kalunen je baketep uka  manjadi sempurna. Limbah kare raja tuntang imam mamberes gawi tuh, baya uluh je manempu Yehowa je akan tatap tege hong bumi. Kajaria, ibadat je bujur akan buju-bujur ilian haluli!

KELEH UMBA MAMANGUN

17. Narai hindai je insanan Yehowa, tuntang narai pengaruh’ah akan uluh Yehudi?

17 Narai pengaruh peteh je inyampai Sakharia akan uluh Yehudi? Yehowa jadi bajanji uka mandohop tuntang mangalindung ewen mangat tau mamberes gawi mamangun bait. Janji tuh manenga harapan akan ewen. Tapi, ewen mungkin ragu en uras gawi tuh tau beres dengan baya isut uluh. Sakharia manyampai auh je mampanihau angat kikeh ewen. Yehowa mansanan akan tege are je dumah ”mandohop mamangun Humang-Ku”. Pire-pire bara ewen iete Heldai, Tobia, tuntang Yedaya. (Mbasa Sakharia 6:15.) Uluh Yehudi yakin amun Yehowa akan mandohop gawin ewen. Jite manampa ewen bahanyi tuntang nampara mamangun bait aluh gawi te ingahana awi raja Persia. Sulak’ah, parentah ela mamangun tuh kilau bukit je mahambang ewen, tapi dia pire Yehowa mampanihau’ah. Kajaria, bait te jadi hong nyelu 515 SM. (Esra 6:22; Sakharia 4:6, 7) Tapi, auh Yehowa te tege riman je labih hai akan itah wayah tuh.

Yehowa dia akan mangalapean sintan itah Aka! (Payah paragrap 18, 19)

18. Kilen ampi Sakharia 6:15 inggenep wayah tuh?

18 Wayah tuh, tege bajuta uluh je manempu Yehowa. Ewen sanang awi tau manenga ’kare panatau’ kilau waktu, kaabas, tuntang ramun panatau. Dengan cara kalute, ewen mendukung bait rohani Yehowa je hai. (Sewut Salomo 3:9) Itah kea tau yakin amun Yehowa marega dukungan itah. Mingat hindai amun Heldai, Tobia, tuntang Yedaya mimbit perak tuntang amas, tuntang Sakharia manampa manjadi makota. Makota tuh ”akan mampingat” narai je jadi ilalus ewen akan ibadat je bujur. (Sakharia 6:14) Yehowa dia akan mangalapean sinta tuntang narai je inggawi itah Aka.​—Ibrani 6:10.

Itah hanjak manjadi bagian bara organisasi je dehen, aman, tuntang katatahi

19. Paite Sakharia manenga pengaruh narai akan itah?

19 Hong kare andau je pangkarahia tuh, rewar Yehowa jadi malalus gawi je hai. Uras tuh tau ilalus awi berkat Yehowa tuntang imimpin Yesus. Itah hanjak manjadi bagian bara organisasi je dehen, aman, tuntang katatahi. Itah kea katawan amun tujuan Yehowa uka malian ibadat je bujur pasti manjadi. Keleh marega bagian itah huang organisasi Yehowa. Tuntang, keleh harajur ’manumon parentah Yehowa’. Dengan kalute, Raja tuntang Imam Hai itah tuntang kea kare malekat akan mangalindung itah. Keleh manggawi narai bewei uka mendukung ibadat je bujur. Yehowa akan mahaga itah sampai sistem tuh lepah tuntang sampai katatahi!

^ par. 11 Uka mangatawan labih are, payah ”Pertanyaan Pembaca” huang Menara Pengawal 15 Mei 2015, halaman 29-30.

^ par. 13 Kata ”oloh Nasaret” mungkin inerjemah bara kata Ibrani ”salundik”.