Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Oktober 2017

Katutu ”Dia Mimbit Kadamai Tapi Kalawan”

Katutu ”Dia Mimbit Kadamai Tapi Kalawan”

”Ela manyangka Aku toh mimbit kadamai akan kalunen toh. Aku dia mimbit kadamai tapi kalawan.”​—MATEUS 10:34.

NYANYIN: 125, 135

1, 2. (a) Due hal narai je tau ingkeme itah wayah tuh? (b) Mbuhen metuh tuh itah hindai tau buju-bujur mangkeme kadamai? (Payah gambar hong tamparan artikel.)

ITAH uras handak belum dengan damai, jatun angat kikeh. Jadi, itah basukur tutu awi itah mandinun ”kasanang bara Hatalla”. Jituh angat atei je sanang je mangalindung pikiran tuntang angat atei itah bara kare hal je manampa itah kurik atei. (Pilippi 4:6, 7) Awi itah jadi manenga arep itah akan Yehowa, itah kea mangkeme ”kadamai dengan Hatalla”. Jituh rima itah tege hubungan je rantep Denga.​—Roma 5:1.

2 Tapi hindai katika Hatalla mampadumah kadamai sempurna hong bumi. Itah belum hong kare andau je pangkarahia, jadi itah masih manaharep are masalah je manampa itah kurik atei. Itah ingaliling awi are uluh je kasar. (2 Timoteus 3:1-4) Itah kea musti baparang malawan Setan tuntang ajara je sala. (2 Korintus 10:4, 5) Tapi, je mungkin paling manampa itah kurik atei iete imusuh  awi keluarga je dia manempu Yehowa. Ewen mungkin mambaka narai je imercaya itah atawa mansanan amun itah manampa keluarga dia rantep hindai. Ewen mungkin mahin dia handak mangaku itah keluarga ewen amun itah tatap manempu Yehowa. Jadi, kilen ampi sapuna pandangan itah amun imusuh awi keluarga? Tuntang, kilen ampi itah tau tatap mangkeme kadamai metuh manaharep hal te?

KILEN AMPI SAPUNA PANDANGAN ITAH AMUN IMUSUH AWI KELUARGA?

3, 4. (a) Narai akibat’ah amun itah manumun ajaran Yesus? (b) Kaadaan narai je khusus’ah manampa itah bahali manumun Yesus?

3 Yesus katawan amun dia uras uluh akan rajin dengan narai je iajar’ah. Iye kea katawan amun kare murid ai perlu kahanyi awi akan tege je mamusuh ewen. Sikap mamusuh tuh tau manderoh kadamai huang keluarga ewen. Yesus hamauh, ”Ela manyangka Aku toh mimbit kadamai akan kalunen toh. Aku dia mimbit kadamai tapi kalawan. Aku dumah mawi sabab sampai anak hatue malawan bapae, anak bawi malawan indue, manantu bawi malawan empoe je bawi. Yoh, je kareh manjadi musoh je pangkahaie, iete oloh huang keluarga te kabuat.”​—Mateus 10:34-36.

4 Narai riman auh Yesus metuh iye hamauh ”Ela manyangka Aku toh mimbit kadamai”? Iye handak uluh mangatawan akan tege akibat amun ewen manjadi murid ayu. Puna, tujuan Yesus dumah akan bumi uka majar katutu tahiu Hatalla, tuntang beken uka mimbit kapusit hong keluarga. (Yohanes 18:37) Tapi, murid-murid ai perlu mangatawan amun ewen akan manaharep kapehe metuh manjadi murid ayu, khusus’ah amun kawal tuntang keluarga ewen dia handak manarima katutu.

5. Narai je musti inaharep murid Yesus?

5 Yesus mansanan amun uluh je manumun iye musti manaharep sikap mamusuh bara keluarga. (Mateus 10:38) Kare murid Yesus handak mampahanjak iye. Jadi, ewen tatap tahan manyarenan aluh keluarga ewen mambaka atawa manolak ewen. Tapi, upah je indinun ewen labih hai bara karugin ewen.​—Mbasa Markus 10:29, 30.

6. Amun imusuh awi keluarga, itah perlu mingat narai?

6 Aluh keluarga mamusuh itah awi manempu Yehowa, itah tatap sayang ewen. Tapi itah perlu mingat amun itah musti labih sinta Hatalla tuntang Kristus bara eweh bewei. (Mateus 10:37) Itah kea perlu mingat amun Setan tau mangguna angat sayang itah dengan keluarga uka manampa itah dia manumun Yehowa. Ayo itah mambahas pire-pire kaadaan bahali tuntang cara manaharep’ah.

KAWAL BELUM JE DIA IJE IMAN

7. Kilen ampi sapuna pandangan itah amun kabalin itah dia ije iman?

7 Alkitab mampingat itah amun uras uluh je kawin ”te kareh manaharep are kasusah”, atawa masalah. (1 Korintus 7:28) Amun kabalin itah dia ije iman, jite tau manambah stres tuntang angat khawatir huang pangawin. Tapi, itah perlu manampayah kaadaan te sasuai dengan cara Yehowa manampayah’ah. Iye mansanan amun itah dia tau bapisah atawa hatulang dengan kabalin itah baya awi iye dia manempu Yehowa. (1 Korintus 7: 12-16) Aluh kepala keluarga dia manempu Yehowa tuntang manantiring keluarga secara rohani, sawa perlu tatap mahormat iye. Tuntang, aluh ije biti uluh bawi dia manempu Yehowa, bana perlu tatap sinta tuntang manyukup taluh je imerlu sawa.​—Epesus 5:22, 23, 28, 29.

8. Narai bewei je tau imikir itah amun kabalin itah manenga batasan akan itah baibadat?

8 Narai je perlu inggawi amun kabalin itah manenga batasan akan itah baibadat? Banan bara ije biti pahari bawi itah hamauh amun pahari bawi te baya tau badinas pire-pire andau huang ije minggu. Amun itah mangkeme hal kilau te, coba mikir, ’En kabalingku handak mangat aku tende manempu Yehowa? Amun jite beken tujua, en aku tau manumun palaku?’ Amun itah tame akal, pangawin itah akan labih damai.​—Pilippi 4:5.

9. Kilen ampi itah tau majar anak itah uka mahormat uluh bakas’ah je dia manempu Yehowa?

9 Itah mungkin bahali majar anak itah amun kabalin itah dia manempu Yehowa. Suntu, itah perlu majar ewen uka manumun parentah Alkitab, ”Hormat bapam tuntang indum.” (Epesus 6:1-3) Tapi, kilen ampi amun kabalin itah dia manumun prinsip Alkitab? Itah tau manenga suntu je bahalap akan anak itah dengan tatap mahormat kabalin itah. Coba mikir kare sipat bahalap’ah, tuntang sanan aka amun itah marega uras hal bahalap je jadi inggawi kabalin itah. Ela bapander tahiu kakurang kabalin itah hong baun anak. Tapi, ngesah akan ewen amun genep uluh musti mamutus kabuat en iye akan manempu Yehowa atawa dia. Hadat je bahalap bara anak tau manampa kabalin itah handak balajar tahiu Yehowa.

Keleh majar Alkitab akan anak genep tege kesempatan (Payah paragrap 10)

10. Kilen ampi uluh bakas Kristen tau majar anak ewen uka sinta Yehowa?

10 Kabali je dia ije iman mungkin handak mangat anak’ah umba maraya andau kapir atawa balajar narai je iajar agama palsu. Tege kea uluh hatue  je mangahana sawa majar Alkitab akan anak ewen. Tapi aluh hong keadaan kilau te, sawa akan bausaha sauli-ulih uka majar katutu akan anak ewen. (Gawin Rasul 16:1, 2; 2 Timoteus 3:14, 15) Suntu, ije biti uluh hatue je dia ije iman mungkin dia handak sawa malalus palajaran Alkitab dengan anak ewen atawa mimbit iye hapumpung. Sawa pasti akan mahormat keputusan bana. Tapi, iye tatap tau mangesah narai je imercaya akan anak’ah genep katika amun tege kesempatan. Dengan kalute, anak tau balajar tahiu Yehowa tuntang cara Yehowa manilai je bujur tuntang je sala. (Gawin Rasul 4:19, 20) Kajaria, anak te je musti mamutus en iye akan manempu Yehowa atawa dia. * (Payah catatan penda.)—Deuteronomium 30:19, 20.

KELUARGA JE MAMUSUH IBADAT JE BUJUR

11. Narai je mungkin manampa hubungan itah dengan keluarga je dia manempu Yehowa bamasalah?

11 Metuh itah nampara balajar dengan Saksi-Saksi Yehowa, itah mungkin dia langsung mansanan dengan keluarga itah. Tapi, metuh iman itah sasar dehen, itah katawan amun itah perlu mansanan akan ewen tahiu kanahuang itah uka manempu Yehowa. (Markus 8:38) Keluarga itah mungkin mamusuh itah awi itah tatap baketep dengan Hatalla. Ayo itah mambahas pire-pire hal je tau inggawi itah uka mahaga kadamai huang keluarga tuntang tatap baketep dengan Yehowa.

Amun itah mangatawan angat atei keluarga itah, itah mungkin labih purah majar katutu akan ewen

12. Mbuhen keluarga mungkin mamusuh itah, tapi kilen ampi itah tau mamparahan amun itah peduli dengan narai je ingkeme ewen?

12 Keleh mancoba mangatawan angat atei keluarga je dia ije iman. Itah pasti hanjak tutu awi tau mangatawan katutu bara Alkitab. Tapi, keluarga itah mungkin bapikir amun itah jadi inanjaru atawa jadi umba ije kelompok agama je aneh. Ewen mungkin bapikir amun itah dia sayang ewen hindai awi itah dia maraya andau hai haya-hayak dengan ewen. Ewen mahin mungkin bapikir amun itah akan kapehe limbah itah matei. Itah perlu mancoba mangatawan angat atei ewen tuntang mahining bua-buah narai je insanan ewen mangat itah mangatawan narai sabab kikeh ewen. (Sewut Salomo 20:5) Rasul Paulus mancoba mangatawan ”oloh handiai” mangat iye tau majar barita bahalap akan ewen. Amun itah bausaha mangatawan angat atei keluarga itah, itah mungkin mangatawan kilen ampi cara majar katutu akan ewen.​—1 Korintus 9:19-23.

13. Metuh itah bapander dengan keluarga je dia ije iman, narai je perlu iingat itah?

13 Bapander hapan auh je mangat.  Alkitab mansanan, ”Keleh kare taloh je inyewut keton harajur mampamangat.” (Kolose 4:6) Jite mungkin dia purah. Tapi, itah tau balaku roh barasih bara Yehowa mangat itah tau bapander dengan auh je mangat tuntang bahalap dengan keluarga itah. Keleh itah dia basoal tahiu narai je imercaya ewen. Amun itah pehe atei awi narai je insanan atawa inggawi ewen, itah tau manyuntu kare rasul. Paulus hamauh, ”Amon ikei inyapa, ikei mambaleh hapan berkat; amon ikei ingapehe, ikei sabar; amon oloh mamapa ikei, ikei mambaleh hapan auh je mangat.”​—1 Korintus 4:12, 13.

14. Narai guna amun itah mamparahan hadat je bahalap?

14 Haga hadat je bahalap. Mbuhen penting? Bapander dengan auh je mangat tau mandohop itah mahaga kadamai huang keluarga. Tapi, hadat je bahalap tau labih tamam. (Mbasa 1 Petrus 3:1, 2, 16.) Parahan dengan taluh gawin Pahari amun pangawin Saksi Yehowa hanjak, ewen peduli dengan anak ewen, ewen belum tumun prinsip Alkitab, tuntang pambelum ewen barega. Aluh keluarga itah dia handak manarima katutu, itah tau tatap sanang awi katawan amun hadat itah je bahalap mampahanjak Yehowa.

15. Rencana narai je tau inampa itah mangat dia lembut kabantah dengan keluarga?

15 Nampa rencana. Coba mikir kaadaan narai bewei je tau mampalembut kabantah dengan keluarga. Limbah te, mintih narai je akan inggawi. (Sewut Salomo 12:16, 23) Jituh je inggawi awi ije biti pahari bawi hong Australia. Empu je hatue buju-bujur mamusuh katutu tuntang rancak basingi. Jadi helu bara maja bapa te, iye tuntang bana balaku pandohop Yehowa mangat dia basingi kea. Ewen manyiap hal bahalap je akan imander. Ewen kea manukas kilen katahi ewen maja, awi amun lalau tahi bapander, bahut tau lembut kabantah tahiu agama.

Kaketep itah dengan Yehowa musti labih hai bara sintan itah dengan keluarga

16. Kilen ampi itah tau manganan angat dia mangat awi mangapehe atei keluarga?

16 Kanatek’ah, pandangan itah dengan keluarga je dia ije iman tau dia sama. Jadi, metuh hal te manjadi, itah mungkin mangkeme dia mangat awi itah sinta keluarga itah tuntang itah dia handak mangapehe atei ewen. Tapi itah musti mingat amun kaketep itah dengan Yehowa musti labih hai bara angat sintan itah dengan keluarga. Metuh keluarga itah manampayah hal tuh, ewen mungkin mangatawan amun manempu Yehowa te penting tutu. Itah puna dia tau mamaksa eweh bewei uka manarima katutu. Tapi, itah tau mamparahan akan ewen manpaat manempu Yehowa akan itah kabuat. Tuntang, Yehowa manenga kesempatan je sama akan ewen uka manempu Iye.​—Yesaya 48:17, 18.

 ANGGOTA KELUARGA JE MALIHI YEHOWA

17, 18. Amun tege ije biti anggota keluarga je malihi Yehowa, narai je tau inggawi itah mangat tatap abas?

17 Amun tege ije biti anggota keluarga je impalua atawa mangejau arep bara ungkup, itah pehe atei tutu. Angat’ah tau sama kilau inasang hapan padang. Kilen ampi itah tau tatap sabar manyarenan kapehen atei tuh?

18 Tatap sibuk melayani Yehowa. Amun itah mangkeme kapehe kilau te, itah perlu mampaabas iman itah. Keleh harajur mambasa Alkitab, manyiap tuntang umba pumpung, harajur badinas, tuntang balaku kaabas bara Yehowa mahalau lakudoa. (Yudas 20, 21) Kilen ampi amun itah jadi malalus uras te tapi angat kapehen atei masih hindai nihau kea? Ela manyarah! Tatap sibuk melayani Yehowa. Tege katika kareh, itah tau mangendali pikiran tuntang angat atei itah. Jite je ingkeme awi je manulis Masmur 73. Iye puji mangkeme bahali mangendali pikira tuntang angat atei’ah. Tapi dengan harajur melayani Yehowa, iye tau tege pandangan je bujur. (Masmur 73:16, 17) Itah kea tau kilau te.

19. Kilen ampi itah tau marega disiplin bara Yehowa?

19 Keleh marega disiplin bara Yehowa. Hatalla katawan amun disiplin baguna akan uras uluh. Jite kea baguna akan uluh je impalua. Metuh ije biti uluh je inyinta itah mandinun disiplin, itah tau pehe atei tutu. Tapi, jite tau mandohop iye haluli akan Yehowa hong rahian andau. (Mbasa Ibrani 12:11.) Katahin jite hindai manjadi, itah perlu manumun parentah Yehowa uka dia ”marampi arep”, atawa bergaul, dengan uluh je impalua. (1 Korintus 5:11-13) Jituh dia purah. Tapi, itah musti manahan arep mangat dia bergaul dengan ewen mahalau telpon, sms, surat, e-mail, atawa media sosial.

Itah harajur baharap uluh je inyinta itah haluli akan Yehowa

20. Itah perlu harajur maharap narai?

20 Ela nihau kaharap! ”Sinta te dia puji nihau kaharape”. Jadi, itah harajur baharap mangat uluh je inyinta itah haluli akan Yehowa. (1 Korintus 13:7) Amun itah manampayah anggota keluarga itah nampara manampa parubahan, itah tau balakudoa mangat iye impaabas mahalau Alkitab tuntang handak manarima parawei Yehowa, ”Keleh haluli talih Aku.”​—Yesaya 44:22.

21. Amun keluarga mamusuh itah awi itah maumba Yesus, narai je perlu inggawi?

21 Yesus mansanan amun itah musti labih sinta iye bara kalunen kueh bewei. Tuntang, Yesus yakin amun kare murid ayu akan bahanyi uka tatap baketep denga aluh tege sikap hamusuh bara keluarga. Jadi, amun itah imusuh keluarga awi itah maumba Yesus, itah perlu maandal Yehowa. Keleh balaku Pandohop’ah mangat itah tau tatap abas. (Yesaya 41:10, 13) Keleh hanjak awi katawan Yehowa tuntang Yesus sanang dengan itah tuntang ewen akan maupah kaketep itah.

^ par. 10 Uka mangatawan labih are tahiu kilen ampi cara majar ije biti anak je ije bara uluh bakas’ah dia manempu Yehowa, payah ”Pertanyaan Pembaca” hong Menara Pengawal 15 Agustus 2002.