Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Oktober 2017

Ije Gawin Asi

Ije Gawin Asi

HONG ije kota kurik hong Gujarat, India, bapa bara John impandui manjadi ije biti Saksi Yehowa tukep nyelu 1960. Tapi, John, kaka, epat andi, tuntang indu ewen taat baibadat hong gereja Katolik Roma. Awi te, ewen dia rajin dengan agama bapa.

Ije katika, bapa balaku John magah amplop akan pahari je ije ungkup dengan bapa. Tapi hanjewu te, metuh John mambuka ije drum je hai, tunjuk’ah bahimang. Tapi, iye tatap handak malalus je inyuhu bapa. Jadi, iye mameteng tunjuk’ah je masih bahimang hapan benang tuntang magah amplop te.

Metuh John sampai, iye manenga amplop akan sawan pahari te. Iye kea Saksi Yehowa. Iye manampayah tunjuk John je bahimang tuntang handak mandohop. Iye manduan kotak obat, mamparasih himang John, tuntang mameteng perban. Limbah te, iye manenga John teh balasut. Metuh malalus te, iye dengan bajenta bapander tahiu Alkitab dengan John.

Awi asi je imparahan pahari te, angat atei John dengan Saksi nampara hubah. Jadi, iye misek tahiu due kapercayaan Saksi je dia sama dengan Gereja Katolik. Iye misek en kah Yesus te Hatalla tuntang en kah uluh Kristen musti balakudoa akan Maria. Awi jadi balajar bahasa Gujarati, pahari te manjawab John mahapan bahasa kabuat. Iye mamparahan jawaba bara Alkitab tuntang manenga John buku kurik ”Kabar Kesukaan dari Kerajaan”.

Limbah mambasa buku kurik te, John katawan je imbasa te katutu. Iye mangguang pastor’ah tuntang misek tahiu due hal endau. Pastor’ah basingi tutu tuntang mamedak Alkitab akan John. Iye hamauh dengan kasar, ”Ikau jadi manjadi Setan! Coba parahan kueh ayat je mansanan Yesus beken Hatalla. Kueh ayat je mansanan itah dia tau manyembah Maria! Kueh!” John tarewen manampayah tanggapan pastor’ah. Iye hamauh dengan pastor te amun iye dia baka tame gereja Katolik hindai. Jite puna ilalus’ah!

John nampara balajar Alkitab dengan Saksi, manarima katutu, tuntang nampara manempu Yehowa. Pire-pire keluarga John akhir’ah malalus je sama. Kira-kira 60 nyelu limbah te, awan himang hong tunjuk John masih mampingat iye tahiu gawin asi je manampa iye handak harajur manempu Yehowa.​—2 Korintus 6:4, 6.