Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  November 2017

Keleh Manyuntu Kaadil tuntang Asin Yehowa

Keleh Manyuntu Kaadil tuntang Asin Yehowa

”Keton musti malalus taloh je adil, masi tuntang tau dengan sama arep keton.”—SAKHARIA 7:9.

NYANYIN: 2169

1, 2. (a) Kilen ampi angat atei Yesus dengan Hukum Hatalla? (b) Kilen ampi guru agama tuntang uluh Parisi malalus hukum Taurat dengan cara je sala?

YESUS manyanang Hukum Moses. Itah dia perlu hengan awi hukum te bara Yehowa, Bapa, Pribadi paling penting huang pambelum’ah. Alkitab manujum amun Yesus akan rajin tutu dengan hukum Hatalla. Masmur 40:9 mansanan, ”Aku sanang malalus kahandak Ayum, o Hatalla, hukum Ayum inaku hong ateiku.” Mahalau kutak tuntang gawi, Yesus mambukti amun Hukum Hatalla te sempurna, baguna, tuntang pasti akan manjadi.—Mateus 5:17-19.

2 Yesus pasti pehe atei manampayah guru agama tuntang uluh Parisi malalus hukum Taurat dengan cara je sala. Jite manampa hukum Taurat gitan dia tame akal. Yesus hamauh, ”Kare parapah kilau jintan, katumbar tuntang manyan mahi inenga keton bagi sapuluhe.” Jituh rima ewen bua-buah malalus hal paling kurik huang hukum Taurat. Jadi, narai masalah’ah? Yesus manjelas, ”Padahal kare taloh je mambatang huang kare hukum agama, paribasa kilau: Kabujur, asi, tuntang kaketep, dia keton padulie.” (Mateus 23:23) Jadi, uluh Parisi dia paham  narai riman hukum Taurat te, tuntang ewen mangkeme labih tamam bara uluh beken. Tapi, Yesus paham narai tujuan hukum te tuntang narai je tau ilajar tahiu Yehowa bara genep parentah huang hukum te.

3. Narai je akan imbahas itah hong artikel tuh?

3 Uluh Kristen dia wajib malalus hukum Taurat. (Roma 7:6) Maka, mbuhen Yehowa manamean hukum te huang Firman-Ai, Alkitab? Iye handak itah paham tuntang malalus ”kare taloh je mambatang”, iete kare prinsip je manjadi dasar hukum Taurat. Suntu, prinsip narai je tau ilajar bara pengaturan tahiu lewu eka kalindung? Artikel je halau jadi mambahas hal je musti ilalus ije biti pamunu tuntang palajara akan itah. Hong artikel tuh, itah akan mambahas kare hal je tau ilajar itah bara lewu eka kalindung tahiu Yehowa tuntang cara manyuntu kare sipat-Ai. Itah akan manjawab telu paisek: Kilen ampi lewu eka kalindung mamparahan asin Yehowa? Palajaran narai je tau induan itah bara pengaturan te tahiu cara Yehowa manampayah pambelum? Kilen ampi pengaturan te mamparahan kaadil Yehowa? Metuh mambahas hal tuh, niruk kilen ampi itah tau manyuntu Bapa itah hong sorga.—Mbasa Epesus 5:1.

EKA KARE LEWU TE MAMPARAHAN ASIN HATALLA

4, 5. (a) Narai pengaturan je inampa mangat ije biti pamunu purah mangguang lewu eka kalindung, tuntang mbuhen? (b) Hal tuh majar itah narai tahiu Yehowa?

4 Yehowa maatur mangat jahawen lewu eka kalindung purah ingguang. Iye balaku uluh Israel mintih telu lewu hong hila timur tuntang telu lewu hong hila barat Sungei Yordan. Mbuhen? Mangat ije biti pamunu capat tuntang purah mangguang ije bara kare lewu te. (Numeri 35:11-14) Jalan je mangguang kare lewu te ihaga mangat santar bahalap. (Deuteronomium 19:3, Surat Barasih 1983) Uluh Yehudi bahut manampa tanda hong jalan uka pamunu te ulih manyundau lewu te. Awi hong Israel tege kare lewu eka kalindung, uluh Israel je dia sengaja mampatei dia musti bakalindung hong daerah beken mangat iye dia manyembah hatalla beken.

5 Coba mikir: Yehowa manyuhu kare pamunu ihukum matei. Tapi, Iye kea maatur mangat uluh je dia sengaja mampatei ulih mandinun asi, katau, tuntang ingalindung. Ije biti ahli Alkitab mansanan amun uras hal hong pengaturan te inampa mangat uluh  purah paham tuntang malalus’ah. Yehowa beken hakim je kejam je manggau-gau cara mahukum rewar-Ai. Tapi ”dia lue-luen kahain sintan atei Hatalla”.—Epesus 2:4.

6. En uluh Parisi manyuntu asin Yehowa? Nenga penjelasan.

6 Tapi, uluh Parisi dia handak masi uluh beken. Suntu, intu sejarah Yehudi, uluh Parisi dia handak mampun uluh je telu kali malalus kasala je sama. Uka mamparahan kahain kasalan ewen, Yesus mangesah tahiu uluh Parisi je balakudoa hong silan oloh panagih pajak. Uluh Parisi te hamauh, ”O Hatalla, aku manyewut tarimakasih Akam, basa aku dia sama kilau oloh beken, je babungo, tulas, atawa pahabandong. Aku manarima kasih awi aku dia sama kilau panagih pajak te.” Jadi Yesus handak mamparahan amun uluh Parisi ”manampayah oloh beken randah” tuntang dia handak mamparahan asi.—Lukas 18:9-14.

En Pahari manampa uluh beken purah balaku maap dengan Pahari? Keleh randah atei tuntang bajenta (Payah paragrap 4-8)

7, 8. (a) Kilen ampi itah tau manyuntu asin Yehowa? (b) Mangat tau mampun, mbuhen itah musti randah atei?

7 Nyuntu Yehowa, beken uluh Parisi. Parahan asi tuntang katau. (Mbasa Kolose 3:13.) Ela manampa uluh beken bahali balaku maap dengan itah. (Lukas 17:3, 4) Coba mikir: ’En aku capat tuntang purah mampun uluh beken, aluh ewen mangapehe aku pire-pire kali? En aku buju-bujur handak badamai dengan uluh je mangapehe aku?’

8 Mangat tau mampun, itah musti randah atei. Uluh Parisi mangkeme labih tamam bara eweh bewei, jadi ewen dia maku mampun. Tapi, awi uluh Kristen randah atei, itah ”maanggap oloh beken labih bahalap” bara itah tuntang pahias mampun ewen. (Pilippi 2:3) Coba mikir, ’En aku manyuntu Yehowa tuntang randah atei?’ Amun itah randah atei, uluh beken labih purah balaku maap dengan itah tuntang itah kea labih purah mampun ewen. Ela capat tersinggung, tapi keleh capat mamparahan asi.—Pangabar 7:8, 9.

KELEH MAREGA PAMBELUM MANGAT DIA ”UTANG DAHA”

9. Kilen ampi Yehowa majar uluh Israel amun pambelum te barasih?

9 Ije alasan utama lewu eka kalindung iintih iete mangat uluh Israel dia utang daha dengan mampatei uluh je dia sala. (Deuteronomium 19:10, Surat Barasih 1983) Awi marega pambelum, Yehowa bajilek dengan pamunu. (Sewut Salomo 6:16-19) Awi Hatalla adil tuntang barasih, Iye dia tau manalua pampatei aluh dia sengaja. Uluh je dia sengaja mampatei puna tau mandinun asi. Tapi je pangkasulak, iye musti manjelas kaadaa dengan kare pamimpin lewu. Amun ewen mamutus pampatei te dia sengaja, pamunu te musti melai hong lewu eka  kalindung sampai imam hai matei. Jite rima pamunu te mungkin melai hong lewu te katahin pambelum’ah. Pengaturan tuh majar uluh Israel amun pambelum te barasih. Uka mahormat Pribadi je manenga pambelum, ewen musti malalus narai bewei mangat dia mambahaya pambelum uluh beken.

10. Kilen ampi Yesus mamparahan amun guru agama tuntang uluh Parisi dia marega pambelum uluh beken?

10 Dia kilau Yehowa, guru agama tuntang uluh Parisi dia marega pambelum uluh beken. Yesus hamauh, ”Kunci hapa muap bauntonggang pangatawan iingkes huang keton, tapi keton kabuat dia maku tame akan huang uka manggau pangatawan te. Malahan keton mahalang haream kare oloh je manggau jalan handak tame akan huange!” (Lukas 11:52) Narai maksud’ah? Guru agama tuntang uluh Parisi musti manjelas Firman Hatalla akan uluh tuntang mandohop ewen mandinun pambelum katatahi. Tapi, ewen malah mahalang kare uluh je handak manempu Yesus, ”ije batang pambelom”. (Gawin Rasul 3:15) Awi te, ewen manantiring uluh akan pampatei. Guru agama tuntang uluh Parisi te sombong tuntang mamenting arep. Ewen kejam tuntang dia pamasi!

11. (a) Kilen ampi Paulus mamparahan pandangan je sama dengan Yehowa tahiu pambelum? (b) Narai je tau manampa itah mangabar dengan basemangat kilau Paulus?

11 Kilen ampi itah tau manyuntu Yehowa tuntang dia manjadi kilau guru agama tuntang uluh Parisi? Dengan mahormat tuntang marega pambelum. Rasul Paulus malalus’ah dengan mengabar akan eweh bewei. Awi te iye tau hamauh, ”Amon aton ije biti kareh binasa, jete dia sala aku.” (Mbasa Gawin Rasul 20:26, 27.) Tapi, en Paulus mengabar baya mangat dia mangkeme basala atawa awi inyuhu Yehowa? Dia. Paulus sinta dengan kare uluh. Aka, pambelum ewen barega tutu, tuntang iye handak ewen belum katatahi. (1 Korintus 9:19-23) Itah kea perlu marega pambelum sama kilau Yehowa. Iye handak uras uluh hubah mangat tau belum katatahi. (2 Petrus 3:9) Uka manyuntu Yehowa, itah musti sinta dengan kare uluh. Amun itah mamparahan asi, itah akan mangabar dengan basemangat. Hasil’ah, itah hanjak metuh mangabar.

12. Mbuhen kasalamat tuntang kaaman penting tutu akan rewar Hatalla?

12 Mangat tau marega pambelum kilau Yehowa, itah musti buju-bujur manantuani kasalamat tuntang kaaman. Metuh manyupir atawa bagawi, itah musti bua-buah. Jituh kea sama metuh itah mamangun, mahaga, atawa mangguang eka itah hapumpung. Metuh bagawi, pire-pire uluh handak capat atawa dia maku mangguna are duit. Hal tuh tau manampa calaka. Tapi kasalamat tuntang pambelum itah labih penting bara waktu atawa duit. Hatalla itah harajur malalus narai je bujur, tuntang itah handak manyuntu Iye. Je utama, kawan bakas ungkup perlu mamikir kasalamat ewen tuntang uluh beken. (Sewut Salomo 22:3) Amun ije biti bakas ungkup mampingat itah tahiu aturan kasalamat, hining buju-bujur. (Galatia 6:1) Keleh marega pambelum sama kilau Yehowa, maka itah dia akan ”utang daha”.

MUTUS TUMUN KARE PATUNJUK YEHOWA

13, 14. Kare pamimpin lewu musti malalus narai uka manyuntu kaadil Yehowa?

13 Yehowa manyuhu kare pamimpin lewu  jaman huran uka manyuntu kaadil-Ai. Je sulak, ewen musti mamasti kajadia. Limbah te, sahindai mamparahan asi, ewen musti maniruk alasan, tanggapan, tuntang kabiasaan pamunu te sahindai kajadian. Ewen kea musti mangatawan en pamunu te puna bajilek dengan uluh je matei tuntang en puna handak mampatei’ah. (Mbasa Numeri 35:20-24.) Amun tege saksi, pamunu te tau ihukum matei awi keterangan paling dia due saksi.—Numeri 35:30.

14 Limbah mangatawan narai je manjadi, kare pamimpin lewu musti mamikir uras tahiu pambelum pamunu te, dia baya narai je ilalus’ah. Ewen musti atun pemahaman mangat mangatawan je dia gitan tuntang paham mbuhen hal te manjadi. Je mambatang, ewen perlu roh barasih Yehowa uka ulih mamparahan pemahaman, asi, tuntang kaadil.—Eksodus 34:6, 7.

15. Narai beda pandangan Yesus dengan pandangan uluh Parisi akan uluh je badosa?

15 Metuh mariksa uluh je basala, uluh Parisi dia mahapan asi. Ewen baya manampayah taluh gawi, dia manampayah kilen ampi sipat uluh te. Metuh uluh Parisi manampayah Yesus kuman hong huma Mateus, ewen misek dengan murid Yesus, ”En sababe gurun keton kuman haya-hayak dengan panagih pajak tuntang kare oloh je dia bahalap?” Yesus tumbah, ”Oloh je barigas dia perlu dokter, baya oloh je haban bewei. Riksa narai rimae auh Surat Barasih toh: ’Aku mangahandak asi, tuntang dia mangahandak meto akan parapah’. Basa Aku dumah dia uka mantehau oloh je manyangka arepe jari bahalap, tapi oloh je ianggap papa.” (Mateus 9:9-13) En Yesus manalua gawin uluh badosa? Dia. Iye handak ewen hubah. Jite ije hal je penting bara barita je inyampai’ah. (Mateus 4:17) Yesus katawan tege ’are panagih pajak tuntang kare oloh je dia bahalap’ je handak hubah. Ewen dumah akan human Mateus dia baya akan kuman, tapi handak umba Yesus. (Markus 2:15) Dia kilau Yesus, tapaare uluh Parisi dia manampayah kaadaan kare uluh. Ewen bapikir uluh kilau te dia tau hubah. Akan ewen, kare uluh badosa dia tau indohop hindai. Ewen beda dengan Yehowa, Hatalla je adil tuntang pamasi.

16. Narai je musti inantuani panitia pengadilan?

16 Wayah tuh, kawan bakas ungkup musti manyuntu Yehowa, je ’sinta dengan gawi je adil’. (Masmur 37:28) Je sulak, ewen perlu ”mariksae titi-titip” uka mamasti en tege dosa je jadi ilalus. Amun tege, ewen akan manumun nasehat Alkitab uka mamutus narai je perlu ilalus. (Deuteronomium 13:12-14) Amun manjadi anggota panitia pengadilan, ewen musti barendeng uka mamutus en uluh je jadi malalus dosa serius te buju-bujur hubah atawa dia. Kanatek’ah hal tuh dia purah. Uluh je badosa hubah atawa dia tau inampayah bara angat pangkeme tuntang pandangan ayu akan kasala. (Pangarinah 3:3) Uluh je badosa musti hubah mangat tau mandinun asi. *—Payah catatan penda.

17, 18. Kilen ampi bakas ungkup tau mangatawan en kah ije biti uluh buju-bujur hubah? (Payah gambar hong tamparan artikel.)

17 Yehowa tuntang Yesus katawan tutu pikiran tuntang pangkeme ije biti uluh awi ewen tau mangatawan isin atei. Tapi, kawan bakas ungkup dia. Jadi, amun Pahari ije biti bakas ungkup, kilen ampi Pahari  tau mangatawan amun uluh te buju-bujur hubah? Sulak’ah, balakudoa mangat tau mangatawan uras fakta tuntang mamutus dengan barendeng. (1 Raja 3:9) Kadue, hapan Firman Hatalla tuntang basaan bara jipen je baketep mangat tau manampayah beda ”kapehen atei je bara kalunen” dengan ”kapehen atei je ingahandak awi Hatalla”, tanda hubah je bujur. (2 Korintus 7:10, 11) Riksa kuan Alkitab tahiu kare uluh je hubah tuntang je dia, tuntang nantuani angat pangkeme, tiruk, tuntang taluh gawin ewen.

18 Katelu, mikir uluh’ah, dia baya taluh gawi. Mbuhen iye kalute? Mbuhen iye manampa kaputusan te? Narai bewei kasusah tuntang kalemu? Alkitab manujum amun Yesus, kapala ungkup, ”dia mamutus pakara hala-halau atawa manumon koan auh oloh. Oloh je belom susah imutuse dengan adil, oloh je jaton olih mandohop arepe, indohope hapan kabujur”. (Yesaya 11:3, 4) Ketun bakas ungkup jadi iintih Yesus uka mahaga ungkup ai. Iye akan mandohop ketun mamutus dengan adil tuntang asi. (Mateus 18:18-20) Itah basukur awi kawan bakas ungkup mahaga itah! Ewen kea mandohop itah mamparahan kaadil tuntang asi ije dengan je beken.

19. Bara palajaran tahiu lewu eka kalindung, kueh je handak ilalus Pahari?

19 Hukum Moses baisi ”kakare macam pangatawan tuntang auh ajar je bujur”, je majar itah tahiu Yehowa tuntang kare prinsip-Ai. (Roma 2:20) Lewu eka kalindung hong Hukum Taurat majar bakas ungkup cara ”malalus taloh je adil” metuh maurus kasus pengadilan. Jite kea majar itah uka ”masi tuntang tau” dengan sama arep. (Sakharia 7:9) Itah dia wajib manumun hukum Taurat. Tapi, Yehowa dia puji hubah. Akan Yehowa kaadil tuntang asi masih penting tutu. Awi te, itah basukur awi manyembah Hatalla je kilau te. Keleh itah manyuntu kare sipat-Ai je bahalap tuntang bakalindung Denga!

^ par. 16 Payah ”Pertanyaan Pembaca” hong Menara Pengawal 15 September 2006, hlm. 30.