Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  November 2017

Keleh Manyanyi dengan Hanjak!

Keleh Manyanyi dengan Hanjak!

’Bahalap tuntang manyanang uka manyanyi tara akan Yehowa.MASMUR 147:1.

NYANYIN: 9138

1. Narai manpaat manyanyi huang ibadat itah?

IJE biti penulis lagu je basewut puji hamauh, ”Auh kutak mangana tiruk itah. Musik mangana atei itah. Tapi ije lagu mangana atei tuntang tiruk itah.” Hong kare lagu itah tege tara tuntang sinta akan Bapa itah, Yehowa. Manyanyi lagu te akan manampa itah sasar rantep Denga. Jadi jelas, en itah manyanyi kabuat atawa haya-hayak dengan kawan pahari, jite bagian je penting bara ibadat itah akan Yehowa.

2, 3. (a) Narai je ingkeme pire-pire uluh tahiu manyanyi hong ungkup? (b) Paisek narai bewei je akan imbahas?

2 En Pahari rajin manyanyi dengan auh je nyaring hong ungkup? Atawa, en Pahari mahamen? Hong pire-pire budaya, uluh hatue dia patuh manyanyi hong baun uluh beken. Jituh tau bapengaruh dia bahalap akan ungkup, mahin amun bakas ungkup deroh malalus gawi je beken atawa mahamen manyanyi.—Masmur 30:13.

3 Manyanyi te bagian bara ibadat akan Yehowa. Jadi, ela sampai itah dia umba manyanyi huang pumpung. Itah uras perlu mangumang, ’En aku maanggap manyanyi hong  pumpung te penting? Narai je tau inggawiku amun aku mahamen manyanyi hong baun uluh beken? Tuntang kilen ampi aku tau manyanyi bara atei?’

MANYANYI TE BAGIAN PENTING BARA IBADAT ITAH

4, 5. Kilen ampi musik tuntang nyanyin ihapan hong ibadat metuh jaman Israel huran?

4 Bara huran, rewar Yehowa santar manara Iye dengan musik. Metuh uluh Israel manumun Yehowa, manyanyi manjadi hal je penting bara ibadat ewen. Suntu, metuh handak mamangun bait, Dawid maatur 4.000 uluh Lewi uka manara Yehowa dengan musik. Tege 288 biti bara ewen ”tau nguan gawin musik je paceh” akan Yehowa.—1 Kronika 23:5; 25:7.

5 Metuh maresmi bait, musik tuntang nyanyin penting tutu. Alkitab mansanan, ’Maka hayak te ewen tatap mampahiau tarompet, manyanyi, sama auhe, impahayak auh tarompet, bisakbetong tuntang taloh usik awang beken, sana ewen manyanyi manara [Yehowa], kahain [Yehowa] jari manyuang human Hatalla.’ Coba niruk angat atei uluh Israel metuh te. Pasti ewen sasar percaya dengan Yehowa!—2 Kronika 5:13, 14, Surat Barasih 1983; 7:6.

6. Pengaturan narai je inampa Nehemia akan musik tuntang nyanyin?

6 Suntu beken iete Nehemia, gubernur Yerusalem. Beken bara maatur uluh Israel mamangun haluli tembok Yerusalem, iye kea maatur uluh Lewi uka manyanyi tuntang main musik. Metuh maresmi tembok te, musik ewen manampa acara sasar rami. Nehemia jadi maatur ”due kalompok panyanyi” akan manyanyi sukur. Due kalompok te mananjung hong hunjun tembok kota. Ije kalompok akan hila gantau. Je beken akan hila sambil. Akhir’ah, ewen supa intu bagian tembok je paling tukep dengan bait. Musik tuntang nyanyin ewen tau ihining bara kejau awi nyaring tutu. (Nehemia 12:27, 28, 31, 38, 40, 43) Pasti Yehowa hanjak metuh mahining ungkup-Ai manyanyi manara Iye dengan basemangat.

7. Kilen ampi Yesus mamparahan amun manyanyi te bagian penting akan ibadat uluh Kristen?

7 Metuh jaman Yesus, musik kea manjadi bagian je penting bara ibadat akan Yehowa. Nantuani narai je manjadi hong alem paling penting huang sejarah kalunen. Limbah Yesus malalus Panginan Hamalem Tuan, iye tuntang kare murid ai manyanyi tara akan Yehowa.—Mbasa Mateus 26:30.

8. Narai je tau inyuntu itah bara uluh Kristen je pangkasulak?

8 Suntu uka manara Hatalla dengan manyanyi imparahan awi uluh Kristen je pangkasulak. Dia kilau uluh Israel je baibadat akan Yehowa hong bait, ewen baibadat hong huma-huma. Kare huma te puna dia sama kahalap tuntang katamam’ah kilau bait. Tapi metuh baibadat, ewen tatap manyanyi dengan semangat. Rasul Paulus mansanan akan kawan pahari, ”Kare auh ajar Kristus je kontep berkat te keleh jete misap huang atei keton. Keleh keton hajar tuntang hatenga nasehat hapan salepah kapintar-kaharatin keton. Keleh manyanyi masmur tuntang nyanyi tara tuntang kare nyanyin ungkup; keleh manyanyi  akan Hatalla hapan angat tarimakasih huang atei keton.” (Kolose 3:16) Keleh itah ”manyanyi akan Hatalla hapan angat tarimakasih” metuh manyanyi kare lagu hong buku nyanyin itah. Jite kea bagian bara panginan je ”puna hong katikae” je inyadia awi ’jipen je baketep tuntang pintar harati’ akan itah.—Mateus 24:45.

MANYANYI DENGAN YAKIN

9. (a) Mbuhen tege je mahamen manyanyi hong pumpung tuntang kebaktian? (b) Kilen ampi sapuna itah manyanyi uka manara Yehowa, tuntang eweh je manjadi suntu? (Payah gambar hong tamparan artikel.)

9 Narai je tau manampa Pahari mahamen uka manyanyi? Mungkin, kare uluh huang keluarga tuntang budaya Pahari dia patuh manyanyi. Atawa, Pahari mambanding arep dengan penyanyi je tamam hong radio atawa TV, jadi Pahari mahamen atawa pehe atei dengan suara Pahari. Tapi mingat, itah uras tege tanggung jawab uka manyanyi tara akan Yehowa. Jadi, tengak takuluk, imbing gantung buku nyanyin, tuntang manyanyi dengan semangat! (Esra 3:11; mbasa Masmur 147:1.) Wayah tuh, hong are Balai Karajaan tege layar video je tau mamparahan tulisan bara lagu itah. Jadi, itah purah manyanyi dengan auh je nyaring. Patut inantuani kea, wayah tuh manyanyi lagu Karajaan manjadi bagian bara acara Sekolah Pelayanan Kerajaan akan kawan bakas ungkup. Jituh mamparahan amun kawan bakas ungkup perlu manjadi suntu metuh manyanyi hong pumpung.

10. Itah perlu mingat narai amun itah mikeh manyanyi dengan auh je nyaring?

10 Are uluh dia handak manyanyi dengan auh je nyaring awi mikeh amun suara ewen lalau nyaring tuntang dia bahalap. Tapi, coba niruk hal tuh. ”Itah  samandiai uras mawi kasalan” metuh bapander. Tapi, aluh kalute itah dia puji tende bapander. (Yakobus 3:2) Jadi, aluh suara itah dia sempurna, itah dia handak tende manyanyi uka manara Yehowa.

11, 12. Narai je tau ilalus mangat itah tau manyanyi dengan labih bahalap?

11 Itah mungkin mikeh manyanyi awi dia katawan cara manyanyi. Tapi tege pire-pire cara sederhana je tau ilalus mangat itah tau manyanyi dengan labih bahalap. *—Payah catatan penda.

12 Itah tau manyanyi dengan auh je nyaring amun itah katawan cara manahaseng je bujur. Suntu, lampu tau belum amun tege listrik. Kalute kea, itah tau manyanyi tuntang bapander dengan nyaring amun itah manahaseng dengan bujur. Kahain suara Pahari metuh manyanyi musti sama kilau bapander atawa labih hai hindai. (Payah nasehat hong Memperoleh Manfaat dari Pendidikan Sekolah Pelayanan Teokratis, halaman 181 sampai 184, hong penda judul kurik ”Mengatur Persediaan Udara Saudara dengan Baik”.) Alkitab kanatek’ah mansanan akan rewar Yehowa uka ”basasurak hanjak” metuh manyanyi tara.—Masmur 33:1-3.

13. Kilen ampi cara manyanyi dengan yakin?

13 Metuh ibadat keluarga atawa palajaran pribadi, coba lalus jituh: Intih ije lagu je paling inyanang Pahari bara buku nyanyin itah. Mbasa tulisa hapan auh nyaring dengan yakin. Limbah te, dengan kahain suara je sama, nyewut ije baris kata huang sinde kali manahaseng. Limbah te, Pahari tau manyanyi genep baris kata te dengan kahain suara je sama. (Yesaya 24:14) Suara Pahari pasti labih nyaring. Ela mikeh atawa mahamen manyanyi kilau te!

14. (a) Narai hindai je tau ilalus itah mangat tau manyanyi dengan auh je nyaring? (Payah kotak ” Cara Manyanyi je Bahalap”.) (b) Nasehat kueh je baguna akan Pahari?

14 Mangat tau manyanyi dengan auh je nyaring, Pahari perlu muap nyaman Pahari hai-hai. Jadi metuh manyanyi, muap nyaman Pahari labih hai bara metuh bapander. Tapi, kilen ampi amun Pahari mangkeme suara Pahari balemu  atawa dia bahalap? Tege nasehat je bahalap hong kotak ”Mengatasi Problem-Problem Spesifik” huang buku Memperoleh Manfaat dari Pendidikan Sekolah Pelayanan Teokratis, halaman 184.

MANYANYI BARA ATEI

15. (a) Tege pengumuman narai hong pertemuan nyelu 2016? (b) Nyewut pire-pire alasan mbuhen buku nyanyin inyasuai.

15 Hong pertemuan nyelu 2016, uras je dumah hanjak metuh Pahari Stephen Lett bara Badan Pimpinan maumum buku nyanyin taheta dengan judul Bernyanyi Sepenuh Hati bagi Yehuwa. (Buku nyanyin tuh hindai tege hong bahasa Dayak Ngaju.) Mbuhen itah perlu buku nyanyin je taheta? Kilau je injelas Pahari Lett, ije alasa iete awi New World Translation of the Holy Scriptures jadi inyasuai. Awi tege pire-pire kata je dia ihapan hindai hong New World Translation, maka nyanyin itah perlu inyasuai kea. Beken bara te, lagu tahiu pangabaran tuntang tewusan inambah kea. Manyanyi te kea bagian penting bara ibadat itah. Jadi, Badan Pimpinan handak mampalua buku nyanyin je pangkahalap. Awi te, sampul’ah inampa sama kilau New World Translation.

16, 17. Parubahan narai bewei je inampa hong buku nyanyin je taheta?

16 Mangat buku nyanyin je taheta purah ihapan, kare lagu ingalompok sasuai  topik. Suntu, 12 lagu je sulak manyarita tahiu Yehowa, 8 lagu limbah te manyarita tahiu Yesus tuntang tewusan, tuntang sampai lepah inyusun kalute. Tege daptar lengkap hong tamparan buku te. Jituh tau baguna, suntu, akan ije biti pahari je perlu mintih nyanyin akan hotbah’ah.

17 Mangat uras tau manyanyi bara atei, pire-pire kata inyasuai mangat peteh bara lagu te sasar jelas. Kare kata je jarang ihapan kea ingganti. Kare judul lagu kea inyasuai. Suntu, judul lagu ”Berlaksa-laksa Saudara” manjadi ”Jutaan Saudara”, tuntang isi inyasuai kea. Beken bara te, judul lagu ”Jagalah Hatimu” je auh’ah sama kilau parentah iubah kea manjadi ”Kujaga Hatiku”. Mbuhen? Awi metuh ije biti uluh manyanyi hapan isi lagu je tahi, iye kilau mansanan narai je musti ilalus uluh beken. Awi te, uluh je haru impandui, uluh je balajar, anak tabela, tuntang kawan pahari bawi mangkeme dia mangat manyanyi hong pumpung tuntang kebaktian. Jadi, judul tuntang isi lagu te perlu inyasuai.

Keleh latihan manyanyi metuh ibadat keluarga (Payah paragrap 18)

18. Mbuhen itah perlu mangasene kare lagu huang buku nyanyin je taheta? (Payah catatan penda.)

18 Huang buku Bernyanyi Sepenuh Hati bagi Yehuwa, tege are lagu je isi kilau lakudoa. Kare lagu te mandohop itah uka manusuh angat atei itah akan Yehowa. Kare lagu je beken tau manggerek itah uka ”hasinta sama arep tuntang malalus kare taloh bahalap”. (Ibrani 10:24) Awi te itah perlu balajar nada, cara manyanyi, tuntang mangasene isi bara lagu itah. Metuh balatih manyanyi hong huma, keleh manyanyi dengan yakin tuntang bara atei. *—Payah catatan penda.

19. Narai je tau ilalus uras uluh hong ungkup uka manyembah Yehowa?

19 Keleh mingat manyanyi te bagian penting bara ibadat itah. Dengan manyanyi, itah mamparahan amun itah tutu-tutu sinta Yehowa tuntang basukur akan uras je jadi Inenga akan itah. (Mbasa Yesaya 12:5.) Amun Pahari manyanyi dengan basemangat, kawan pahari je beken tau tagerek uka malalus hal je sama. Uras hong ungkup, kawan tabela, uluh je jadi bakas, tuntang uluh je haru impandui, tau manara Yehowa dengan manyanyi. Jadi, ela mahamen manyanyi bara atei. Nyuntu je manyurat Masmur je hamauh, ’Keleh manyanyi akan Yehowa!’ Maka, nyanyi wei dengan hanjak!—Masmur 96:1.

^ par. 11 Tege labih are nasehat tahiu cara manyanyi hong video Persiapkan Diri untuk Menyanyikan Lagu Baru hong JW Broadcasting (hong bagian DARI STUDIO KAMI > KHOTBAH).

^ par. 18 Acara hanjewu tuntang bentuk andau hong kebaktian inampara dengan musik katahin sapuluh menit. Musik te manampa itah sasar basemangat uka manyanyi tuntang siap mahining acara. Jadi metuh musik imutar, itah uras musti munduk tuntang siap mahining.