Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  November 2017

Keleh Manolak Cara Bapikir Dunia

Keleh Manolak Cara Bapikir Dunia

’Jaga, bele oloh manamput keton kilau tawanan awi kapintar oloh kalunen, awi auh tipu awang hayang, lapik ajar kalunen.’—KOLOSE 2:8, Surat Barasih 1983.

NYANYIN: 6026

1. Narai je inyurat Paulus akan uluh Kristen hong Kolose? (Payah gambar hong tamparan artikel.)

KIRA-KIRA nyelu 60-61 M, metuh imenjara hong Roma, Rasul Paulus manyurat akan uluh Kristen hong Kolose. Iye mansanan akan ewen amun penting tutu uka ”mangatawan taloh je ingahandak Hatalla”, atawa tege kasanggup uka manampayah kakare hal sama kilau cara Yehowa. (Kolose 1:9) Kua, ’Maka aku manahiu jete, bele oloh mampalayang keton awi auh ije manehem, manamput oloh. Jaga, bele oloh manamput keton kilau tawanan awi kapintar oloh kalunen, awi auh tipu awang hayang, ije tumon sansanan oloh, tumon lapik ajar kalunen, jaton tumon Kristus.’ (Kolose 2:4, 8, Surat Barasih 1983) Limbah te, iye mansanan mbuhen pire-pire pandangan je umum te sala tuntang mbuhen are uluh rajin akan hal te. Suntu, tege je bapikir pandangan jite tau manampa ewen manjadi labih pintar atawa tamam bara uluh beken.  Jadi, Paulus mampingat kawan pahari mangat ewen tau manolak cara bapikir dunia tuntang tau mangejau hadat je sala.—Kolose 2:16, 17, 23.

2. Mbuhen itah perlu mambahas pire-pire suntu cara bapikir dunia?

2 Kare uluh je manumun cara bapikir dunia dia peduli dengan kare prinsip Yehowa. Amun itah dia barendeng, pandangan ewen tau rangka-rangkah mampalemu iman itah. Wayah tuh, cara bapikir dunia tege hong kueh bewei, suntu hong TV, Internet, eka bagawi, atawa sakula. Jadi, narai je tau ilalus itah uka dia tapangaruh? Hong artikel tuh itah akan mambahas lime suntu cara bapikir dunia tuntang cara mangat itah dia tapangaruh.

EN ITAH PERLU PERCAYA AMUN HATALLA TE TEGE?

3. Narai pandangan je umum wayah tuh? Mbuhen?

3 ”Aluh dia percaya Hatalla, itah tau jadi uluh je bahalap.” Pandangan tuh jadi umum hong are eka wayah tuh. Uluh je bapikir kilau te mungkin dia lalau peduli en Hatalla tege atawa dia. Ewen kalute mungkin awi handak bebas tuntang dia maku iatur. (Mbasa Masmur 10:4.) Je beken mangkeme labih harati amun mansanan, ”Aku tatap tau manjadi uluh je bahalap aluh dia percaya dengan Hatalla.”

4. Itah tau mansanan narai akan uluh je dia percaya Panjapa te tege?

4 Tapi, en tame akal amun itah bapikir Panjapa te jatun? Pire-pire uluh manggau jawaba bara ilmu pangatawan. Tapi, ewen malah bingung. Sapuna jawaba sederhana. Akan suntu: En tau huma lembut kabuat? Pasti dia. Musti tege je mamangun huma te. Taluh belum labih tamam bara huma. Amun lengen itah bahimang, iye tau keleh kabuat. Tapi, amun huma bakarak, huma te dia ulih mangambuah arep. Jituh mambukti amun Panjapa te tege. Alkitab mansanan, ”Genep huma puna aton oloh je mamangue, tapi je mamangun taloh handiai jete Hatalla kabuat.”—Ibrani 3:4.

5. Kilen ampi itah tau manjawab uluh je mansanan amun kalunen tau malalus hal bahalap aluh dia percaya Hatalla?

5 Kilen ampi dengan pandangan itah tatap tau malalus hal je bahalap aluh dia percaya dengan Hatalla? Firman Hatalla puna hamauh amun kare uluh je dia percaya dengan Hatalla mahin ulih malalus hal je bahalap. (Roma 2:14, 15) Suntu, ije biti uluh mungkin marega tuntang sayang dengan uluh bakas’ah. Tapi huang hal beken, iye mungkin manampa keputusan je dia bahalap awi dia manumun prinsip Yehowa. (Yesaya 33:22, 23) Are uluh je pintar mangaku amun kalunen perlu indohop Hatalla uka mamberes masalah hong dunia. (Mbasa Yeremia 10:23.) Jadi, ela bapikir amun itah tau malalus je bahalap aluh dia indohop Hatalla tuntang prinsip Ayu.—Masmur 146:3.

EN AGAMA TE PENTING?

6. Narai kuan are uluh tahiu agama?

6 ”Itah tau hanjak aluh jatun agama.” Are uluh mangkeme amun agama te dia menarik tuntang jatun guna. Are agama kea majar apui naraka, mamaksa uluh manyumbang, atawa mendukung tokoh politik. Awi te, sasar are uluh hamauh amun ewen hanjak aluh jatun agama! Ewen mungkin mansanan, ”Aku handak katawan  tahiu Hatalla, tapi aku dia handak tame agama kueh bewei.”

7. Mbuhen agama je bujur tau mampahanjak itah?

7 En tutu itah tau hanjak aluh jatun agama? Iyoh, itah tau hanjak amun jatun agama palsu. Tapi, uka tau buju-bujur hanjak, itah perlu basobat dengan Yehowa, Hatalla je hanjak. (1 Timoteus 1:11) Kare hal je ilalus Yehowa te uka mandohop uluh beken. Awi itah rewar-Ai, itah kea hanjak awi mandohop uluh. (Gawin Rasul 20:35) Coba mikir kilen ampi ibadat je bujur tau manampa keluarga hanjak. Itah balajar uka marega tuntang satia dengan kabali, mampahai anak dengan hadat je bahalap, tuntang mamparahan sinta huang keluarga. Awi ibadat je bujur, rewar Yehowa tau pakat bagawi hong ungkup tuntang sinta dengan paharin ewen.—Mbasa Yesaya 65:13, 14.

8. Kuan Lukas 11:28, narai je buju-bujur manampa uluh hanjak?

8 Jadi, en tutu itah tau hanjak amun dia manempu Hatalla? Coba mikir: Narai je manampa uluh hanjak? Tege je hanjak awi gawian, olahraga, atawa hobi. Je beken hanjak metuh maurus keluarga tuntang mandohop kawal. Aluh kare hal tuh manampa itah hanjak, tujuan itah belum dia baya jite. Dia kilau metu, itah tau mangasene Panjapa itah tuntang manempu Iye. Itah inampa uka tau mangkeme hanjak metuh malalus’ah. (Mbasa Lukas 11:28.) Suntu, itah hanjak tuntang impaabas metuh hapumpung dengan kawan pahari uka manempu Yehowa. (Masmur 133:1) Itah kea hanjak awi mandinun pahari hong hapus dunia, mahaga pambelum tatap barasih, tuntang atun harapan je tamam tutu hong andau rahian.

EN ITAH MAMERLU ATURAN HONG PAMBELUM?

9. (a) Narai pandangan je umum tahiu seks? (b) Mbuhen Firman Hatalla mansanan amun bahubungan seks dengan uluh je beken kabalin itah te sala?

9 ”Narai kasala bahubungan seks dengan uluh je beken kabalin itah?” Kare uluh mungkin misek, ”Mbuhen ikau tuh kaku tutu? Santai ih.” Tapi, Firman Hatalla mangahana itah malalus gawi je harayap. * (Payah catatan penda.) (Mbasa 1 Tesalonika 4:3-8.) Yehowa patut manenga hukum awi Iye je manjapa itah. Iye hamauh amun tikas uluh je jadi kawin je tau bahubungan seks. Yehowa manenga itah hukum awi Iye sinta itah. Iye katawan amun hukum-Ai akan manampa pambelum itah labih bahalap. Keluarga je manumun hukum-Ai akan labih sinta, marega, tuntang percaya sama arep ewen. Tapi, Hatalla akan mahukum uluh je sengaja malanggar hukum-Ai.—Ibrani 13:4.

10. Kilen ampi cara mangat itah dia malalus karayap?

10 Alkitab majar itah cara uka dia malalus karayap. Itah musti mahaga matan itah. Yesus hamauh, ”Ewe-eweh je manampayah oloh bawi sampai lembut kipee, oloh te jari habandong dengan oloh bawi te huang ateie. Amon matam hila gantau mawi sabab ikau badosa, karuit tuntang kanan matam te!” (Mateus 5:28, 29) Jadi, itah dia tau manampayah pornografi tuntang mahining  musik je dia sanonoh. Paulus mansanan, ”Keleh mampatei kare kipen kalunen je mamparise keton, kilau karayap.” (Kolose 3:5) Itah kea musti mahaga tiruk tuntang pander itah.—Epesus 5:3-5.

EN ITAH PERLU MANOMOR IJE GAWIAN DUNIA?

11. Mbuhen itah mungkin mangahandak gawian je bahalap?

11 ”Gawian je bahalap akan mampahanjak itah.” Kare uluh mungkin mansanan mangat itah mahapan waktu tuntang tenaga uka manomor ije gawian, khusus’ah je tau manampa itah manjadi basewut tuntang tatau. Are uluh bapikir gawian je bahalap akan mampahanjak itah. Akibat’ah, itah tau tapangaruh.

12. En tutu gawian je bahalap tau mahasil kahanjak?

12 En tutu manjadi uluh je basewut tau mampahanjak itah? Dia. Coba mikir. Setan handak basewut. Ampi kahandak’ah manjadi. Tapi iye kuntep kalait, beken kahanjak. (Mateus 4:8, 9; Pangarinah 12:12) Kabalika, coba mikir kahanjak je indinun itah metuh mandohop uluh beken balajar tahiu Hatalla tuntang andau rahian je bahalap je Injanji. Jatun gawian dunia je tau manenga kahanjak kilau te. Malah, mangat tege gawian je bahalap, uluh handak manjadi je paling tamam hong gawia, rajin basingi, mamaksa, tuntang bahiri dengan uluh beken. Tapi, hasil’ah ewen tatap dia hanjak. Alkitab mansanan amun ewen tuh ”manggoang riwut”.—Pangabar 4:4.

13. (a) Kilen ampi sapuna itah manilai gawian? (b) Narai je buju-bujur mampahanjak Paulus?

13 Itah uras puna perlu bagawi, tuntang dia sala amun itah mintih gawian je itah rajin. Tapi, ela sampai itah manomor ije gawian. Yesus hamauh, ”Ije biti mahin jaton oloh tau bagawi akan due tuan. Basa ie kareh labih sinta dengan ije bara dengan je beken te. Atawa ie kareh labih heret dengan tuan ije te bara je beken. Kalote kea dengan keton. Keton dia tau bagawi akan Hatalla tuntang akan ramon panatau kea.” (Mateus 6:24) Itah tau hanjak tutu amun manempu Yehowa tuntang majar uluh beken tahiu Alkitab. Rasul Paulus mangkeme kabuat hal tuh. Metuh tabela, iye manomor ije gawian dunia. Tapi kajaria, iye buju-bujur hanjak metuh manampayah Firman Hatalla maubah pambelum kare uluh je ingabar’ah. (Mbasa 1 Tesalonika 2:13, 19, 20.) Jatunti gawian dunia je tau manampa  itah labih hanjak beken bara manempu Yehowa tuntang majar uluh beken tahiu Iye!

Itah hanjak metuh mandohop uluh beken mangasene Hatalla (Payah paragrap 12, 13)

EN KALUNEN TAU MAMBERES MASALAH DUNIA?

14. Mbuhen are uluh rajin dengan pandangan amun kalunen tau mamberes uras masalah?

14 ”Kalunen ulih mamberes uras masalah.” Mbuhen are uluh rajin dengan pandangan tuh? Awi amun pandangan tuh bujur, kalunen dia perlu inantiring awi Hatalla tuntang bebas malalus narai bewei je ingahandak ewen. Mungkin itah puji mahining uluh mansanan amun masalah kilau parang, kajahat, panyakit, tuntang kasusah sasar kurang. Ije laporan mansanan, ”Pambelum kalunen wayah tuh sasar bahalap awi kalunen bausaha mangambuah kaadaan dunia tuh.” En jite bujur? En kajaria kalunen mangatawan cara mamberes uras masalah dunia? Ayo itah mariksa pire-pire bukti.

15. Narai bukti amun masalah dunia sasar hai?

15 En kalunen tau mampaterai parang? Metuh Parang Dunia I tuntang II, labih bara 60 juta biti matei. Tapi nyelu 2015, tege 12,4 juta biti je musti malihi huma awi parang atawa ingapehe. Kajaria, uluh je terpaksa malihi huma uras’ah manjadi 65 juta. Kilen ampi dengan kajahat? Hong pire-pire eka, kare macam kajahat jadi bakurang. Tapi, kajahat huang Internet, kakaras  huang keluarga, teroris, tuntang korupsi sasar are. Kilen ampi dengan panyakit? Tege pire-pire panyakit je puna tau impakeleh. Tapi hong nyelu 2013, ije laporan mansanan amun genep nyelu tege jalatien juta uluh penda umur 60 nyelu je matei awi panyakit jantung, stroke, kanker, panyakit saluran tahaseng, atawa diabetes. Kilen ampi dengan kasusah? Bank Dunia mansanan hong Afrika bewei, uluh je susah batambah bara 280 juta biti hong nyelu 1990 manjadi 330 juta biti hong nyelu 2012.

16. (a) Mbuhen baya Karajaan Hatalla je ulih mamberes masalah dunia? (b) Narai kuan Yesaya tuntang je manyurat Masmur tahiu Karajaan Hatalla?

16 Itah dia hengan dengan kare bukti endau. Wayah tuh, organisasi ekonomi tuntang politik ingendali awi kare uluh je mamenting arep kabuat. Ewen dia akan ulih mampatende parang, kajahat, panyakit, tuntang kasusah. Baya Karajaan Hatalla je ulih. Coba mikir kare berkat je akan inenga Yehowa akan kalunen. Karajaan-Ai akan manganan uras hal je mawi parang, kilau sipat mamenting arep kabuat, korupsi, sinta negara, agama palsu, tuntang Setan. (Masmur 46:9, 10) Karajaan Hatalla akan mampatende kajahat. Wayah tuh kea, Karajaan Hatalla majar bajuta uluh uka percaya tuntang sinta sama arep ewen. Jatunti pamarentahan hong kueh bewei je ulih malalus hal tuh. (Yesaya 11:9) Dia pire hindai Yehowa akan manganan panyakit tuntang manampa uras uluh barigas hindai. (Yesaya 35:5, 6) Iye akan mampaterai kasusah tuntang manenga are tutu berkat jasmani tuntang rohani akan rewar-Ai. Jituh labih barega bara duit.—Masmur 72:12, 13.

”KELEH KETON KATAWAN KILEN AMPIE KAPATUT KETON TOMBAH”

17. Kilen ampi mangat itah dia tapangaruh pandangan dunia?

17 Jadi, amun tege pandangan dunia je tau mampalemu iman itah, coba balajar kuan Alkitab tahiu hal tuh. Mbahas hal te dengan kawan pahari je batue secara rohani. Coba mikir mbuhen kare uluh rajin dengan pandangan te, narai je mawi pandangan te sala, tuntang kilen ampi mangat itah dia tapangaruh. Itah tau mangalindung arep bara kare pandangan dunia dengan manumun nasehat Paulus tuh, ”Keleh keton belom pintar-harati . . . Keleh keton katawan kilen ampie kapatut keton tombah kare auh paisek oloh dengan keton.”—Kolose 4:5, 6.

^ par. 9 Pire-pire terjemahan Alkitab manamean kare ayat hong Yohanes 7:53–8:11, je sapuna jatun huang naskah asli Alkitab. Awi mambasa ayat tuh, tege je sala manduan kesimpulan amun baya uluh je dia badosa je tau mahakim uluh je habandung. Tapi, hukum je inenga Hatalla akan uluh Israel mansanan, ”Amon ije biti oloh hatue tarasondau kanjerae hinje dengan sawan oloh beken, kadaduee musti ihukum matei.”—Deuteronomium 22:22.