Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  November 2017

Keleh Harajur Maniruk Hadiah bara Hatalla

Keleh Harajur Maniruk Hadiah bara Hatalla

”Ela keton manalua arep keton imparugi.”—KOLOSE 2:18.

NYANYIN: 32134

1, 2. (a) Narai hadiah je ientai rewar Hatalla? (b) Kilen ampi mangat itah tau harajur maniruk hadiah je injanji Hatalla? (Payah gambar hong tamparan artikel.)

ULUH Kristen je iintih atun harapan je bahalap. Ewen mentai uka belum hong sorga. Rasul Paulus mansanan ewen manarima hadiah tuh awi ’Hatalla mantehau ewen’. (Pilippi 3:14) Hong sorga, ewen akan mamarentah hayak Yesus huang Karajaa tuntang hayak denga mandohop kalunen manjadi sempurna. (Pangarinah 20:6) Hal tuh harapan je tamam tutu! Tabiri beken mentai hadiah je dia sama. Harapan ewen iete uka belum katatahi huang Pirdaus hunjun petak. Harapan tuh manampa ewen hanjak tutu!—2 Petrus 3:13.

2 Paulus handak mandohop kawan pahari je iintih kea akan sorga uka tatap baketep tuntang mandinun hadiah te. Iye hamauh, ”Keleh mansahan [atawa, manetep] kare tirok keton akan kare taloh intu kanih.” (Kolose 3:2) Ewen perlu harajur maniruk harapan ewen je barega. (Kolose 1:3-5) Uras rewar  Hatalla, je mentai harapan hong bumi atawa hong sorga, tau harajur maniruk hadiah je injanji dengan mangumang kare berkat je akan inenga Yehowa.—1 Korintus 9:24.

3. Narai pingat Paulus akan uluh Kristen?

3 Paulus kea mampingat uluh Kristen tahiu bahaya je tau mawi ewen dia mandinun hadiah te. Suntu, iye manyurat akan kare uluh hong Kolose tahiu uluh Kristen palsu je handak manyanang Hatalla dengan manumun Hukum Moses, beken baiman dengan Kristus. (Kolose 2:16-18) Paulus kea mambahas kare bahaya je tege sampai wayah tuh je tau mawi itah kea dia mandinun hadiah te. Iye majar cara manolak kanahuang je dia patut tahiu seks tuntang je perlu ilalus metuh tege masalah huang keluarga atawa dengan kawan pahari hong ungkup. Nasehat Paulus tau mandohop itah wayah tuh. Jadi, ayo itah mambahas pire-pire pingat je inyurat Paulus akan kare uluh hong Kolose.

PATEI KANAHUANG JE DIA PATUT TAHIU SEKS

4. Kilen ampi kanahuang je dia patut tahiu seks tau manampa itah dia mandinun hadiah bara Hatalla?

4 Limbah bakesah tahiu harapan je tamam akan kawan pahari, Paulus manyurat, ”Tagal te, keleh mampatei kare kipen kalunen je mamparise keton, kilau karayap, kare hal je dia sanonoh, kalasot kipen, kipen je papa, tuntang kabungo.” (Kolose 3:5) Kanahuang je dia patut tahiu seks tau kuat tutu. Jite tau marusak hubungan itah dengan Yehowa tuntang harapan itah tau nihau. Tege ije pahari je puji manyarah dengan kanahuang te tapi iye hubah tuntang haluli akan ungkup. Iye hamauh metuh te kanahuang’ah kuat tutu sampai iye ”haru barendeng metuh jadi talambat”.

5. Kilen ampi itah tau mangalindung arep huang kaadaan je bahaya?

5 Itah perlu barendeng khusus’ah metuh tege hong kaadaan je tau manampa itah malanggar hukum Yehowa. Suntu, uluh je bapacar perlu manampa batas bara sula-sulak, kilau cara mamparahan sinta tuntang kilen ampi metuh ewen baya badue. (Sewut Salomo 22:3) Kaadaan beken je bahaya iete metuh itah bagawi hong luar kota atawa dengan lawan jenis. (Sewut Salomo 2:10-12, 16) Kilen ampi itah tau mangalindung arep? Ngesah itah tuh ije biti Saksi Yehowa. Haga taluh gawi, tuntang mingat manggoda te tau mimbit masalah. Itah kea musti barendeng metuh pehe atei atawa kabuat. Metuh te, itah mungkin handak ihibur awi uluh beken. Angat atei te tau kuat tutu sampai itah handak ih ihibur awi eweh bewei. Jituh bahaya. Amun itah mangkeme kalute kea, ela malalus narai bewei je tau mawi itah dia mandinun hadiah bara Hatalla. Kabalika, keleh balaku pandohop bara Yehowa tuntang kawan pahari.—Mbasa Masmur 34:18; Sewut Salomo 13:20.

6. Narai je musti imingat metuh mintih hiburan?

6 Uka mampatei kanahuang je dia patut tahiu seks, itah musti mangejau hiburan je dia sanonoh. Tapaare hiburan je tege wayah tuh mampingat itah tahiu Sodom tuntang Gomora. (Yudas 7) Kare hiburan te inampa mangat karayap gitan kilau hal je biasa tuntang dia bahaya. Jadi, itah musti harajur barendeng. Itah musti mintih hiburan je inampayah itah. Ela sampai hiburan te mawi itah dia mandinun hadiah bara Hatalla.—Sewut Salomo 4:23.

 KELEH PARAHAN SINTA TUNTANG ASI

7. Narai masalah je tau manjadi hong ungkup?

7 Itah hanjak tege melai ungkup. Hong pumpung, itah tau balajar Firman Hatalla tuntang mendukung ije dengan je beken. Jituh mandohop itah tatap mamikir hadiah bara Hatalla. Tapi, kanatek’ah itah tau sala paham dengan kawan pahari, tuntang jituh tau manjadi masalah. Amun dia imberes, hal tuh tau sasar hai tuntang manampa itah mingkes kasingi.—Mbasa 1 Petrus 3:8, 9.

8, 9. (a) Sipat narai je imerlu itah mangat tau mandinun hadiah bara Hatalla? (b) Narai je tau mandohop itah mahaga kadamai metuh ingapehe awi paharin itah?

8 Ela sampai kasingi manampa itah dia mandinun hadiah je injanji Hatalla. Paulus mansanan narai je perlu ilalus uluh Kristen, ”Keton toh ungkup ain Hatalla. Hatalla masi keton tuntang mintih keton uka manjadi oloh jalahan Ayue. Jete bukue keton musti mamparahan sinta tuntang asi, keton musti bahalap atei, randah atei, balemo-lowah, tuntang tahan manyarenan kapehe. Keton musti sabar dengan sama arep keton, tuntang tau mampun amon aton oloh je mingkes kasingi dengan kolae. Dengan sanang atei Tuhan handak mampun keton, jadi keton kea musti handak mampun sama arep keton. Tuntang je paling mambatang iete: keton musti hasinta sama arep keton basa sinta te je mampahinje-mambulat kare pahari samandiai sampai keton manjadi tinduh-barasih.”—Kolose 3:12-14.

9 Sinta tuntang asi tau mandohop itah mampun uluh beken. Amun itah pehe atei awi kutak atawa taluh gawin uluh beken, coba mikir metuh itah malalus sama kilau je ilalus’ah tapi itah iampun. Itah pasti basukur awi sinta tuntang asi je imparaha. (Mbasa Pangabar 7:21, 22.) Itah basukur awi Yesus dengan kahalap atei mampahinje uluh je handak manempu Yehowa. (Kolose 3:15) Itah uras sinta Yehowa, manyampai barita je sama, tuntang manaharep are masalah je sama. Amun itah mamparahan sinta tuntang asi hayak rajin mampun, ungkup akan sasar hinje tuntang itah tau harajur mamikir hadiah je injanji Hatalla.

10, 11. (a) Mbuhen kahiri te bahaya? (b) Kilen ampi cara mangat itah dia bahiri?

10 Kahiri kea tau mawi itah dia mandinun hadiah bara Hatalla. Alkitab mamparahan amun kahiri te bahaya tutu. Suntu, awi Kain bahiri dengan Abel, iye mampatei Abel. Awi Korah, Datan, tuntang Abiram bahiri dengan Moses, ewen malawan Moses. Awi Raja Saul bahiri dengan Dawid, iye handak mampatei’ah. Firman Hatalla puna bujur, ”Hong kueh aton kahiri tuntang sipat je mingat arep kabuat, hong hete kea aton karidu tuntang sepsimpan kare gawi je papa.”—Yakobus 3:16.

11 Amun itah bausaha uka mamparahan sinta tuntang asi, itah dia akan capat bahiri. Alkitab hamauh, ”Sinta te sabar tuntang bahalap atei. Ie dia ingalasot awi kahirin atei.” (1 Korintus 13:4) Mangat dia bahiri, itah perlu bausaha manampayah uras hal dengan cara Yehowa. Itah uras ije bereng, iete ungkup. Alkitab hamauh, ”Amon ije bagian inara, bagian je beken uras omba hanjak.” (1 Korintus 12:16-18, 26) Jadi, amun tege paharin itah je mandinun hal je bahalap, itah umba hanjak  tuntang dia bahiri denga. Coba mikir suntu bahalap bara Yonatan, anak Raja Saul. Yonatan dia bahiri metuh Dawid je iintih manjadi raja, beken arep’ah. Iye malah mampaabas tuntang mendukung Dawid. (1 Samuel 23:16-18) En tau itah manyuntu asi tuntang sinta je imparahan Yonatan?

DOHOP KELUARGA PAHARI MANDINUN HADIAH

12. Narai nasehat bahalap je inenga Paulus akan kare keluarga?

12 Amun genep anggota keluarga malalus prinsip Alkitab, keluarga akan mangkeme kadamai, kahanjak, tuntang tau mandinun hadiah bara Hatalla. Paulus manasehat kare keluarga, ”Pahari handiai je manjadi sawan oloh hatue! Keleh keton manumon auh banan keton, basa jete kapatut hadat keton kilau oloh Kristen. Pahari handiai je manjadi banan oloh bawi! Keleh keton sinta sawan keton. Ela kasar dengan ewen. O kare anak oloh! Kilau oloh Kristen maka kapatut keton iete harajur manumon kare auh indu-bapa keton, karana jete je manyanang atei Hatalla. Pahari handiai je manjadi bapa! Ela mangapehe atei anak keton sampai ewen manjadi nihau kaharape.” (Kolose 3:18-21) En tau nasehat tuh mandohop keluarga Pahari?

13. Kilen ampi ije biti pahari bawi Kristen tau mandohop kabali mangat handak manempu Yehowa?

13 Coba mikir ije biti pahari bawi je bana dia manempu Yehowa. Kilen ampi amun kabali dia bahalap denga? Pahari bawi tuh mungkin tau basingi tuntang hasoal. Tapi en hal te baguna? Amun iye manang hasoal, en kabali handak manempu Yehowa? Mungkin dia. Tapi, amun iye marega kabali awi kabali te kapala keluarga, ewen akan mangkeme kadamai huang keluarga tuntang  jite akan mimbit tara akan Yehowa. Taluh gawin ije biti pahari bawi tuh mahin tau manampa kabali handak manempu Yehowa, tuntang ewen tau haya-hayak mandinun hadiah je injanji Hatalla.—Mbasa 1 Petrus 3:1, 2.

14. Narai je perlu ilalus ije biti kapala keluarga amun kabali je dia seiman dia marega iye?

14 Coba mikir ije biti pahari hatue je sawa dia manempu Yehowa. Kilen ampi amun kabali dia marega iye? Amun iye malait sawa mangat sawa marega iye, en tege guna? Dia! Hatalla handak mangat iye manjadi kapala keluarga je mamparahan sinta tuntang manyuntu Yesus. (Epesus 5:23) Yesus, iete kapala ungkup Kristen, harajur mamparahan kasabar tuntang sinta. (Lukas 9:46-48) Amun pahari te manyuntu Yesus, kajaria sawa mungkin handak umba manempu Yehowa.

15. Kilen ampi kapala keluarga tau mamparahan amun iye sinta sawa?

15 Yehowa majar kare kapala keluarga, ”Keleh keton sinta sawan keton. Ela kasar dengan ewen.” (Kolose 3:19) Ije biti kapala keluarga je mamparahan sinta akan marega sawa dengan mahining narai kuan sawa tuntang mansanan amun hal te penting aka. (1 Petrus 3:7) Aluh ije biti kapala keluarga dia harajur tau manumun kahandak sawa, mahining narai kuan sawa tau mandohop iye manduan keputusan je labih bahalap. (Sewut Salomo 15:22) Kapala keluarga je mamparahan sinta dia akan mamaksa sawa uka marega iye. Kabalika, iye bausaha mangat patut irega. Amun kapala keluarga sinta sawa tuntang kawan anak’ah, keluarga ewen tau labih sanang metuh manempu Yehowa tuntang tau mandinun hadiah bara Yehowa.

Kilen ampi itah tau tatap mandinun hadiah je injanji Hatalla aluh tege masalah keluarga? (Payah paragrap 13-15)

 KAWAN TABELA—ELA TENDE SAMPAI KETUN MANDINUN HADIAH TE!

16, 17. Kawan tabela, kilen ampi mangat ketun dia lalau rise metuh uluh bakas maningak ketun?

16 Amun ketun anak tabela, ketun mungkin mangkeme amun uluh bakas ketun lalau are manampa aturan tuntang dia paham narai je ingkeme ketun. Jituh mungkin tau manampa ketun rise nyamah ketun mangkeme bakulas manempu Yehowa. Tapi amun ketun malihi Yehowa, ketun akan katawan amun je sapuna paling sinta dengan ketun iete uluh bakas Kristen tuntang kare kakawalan hong ungkup.

17 Coba mikir: Amun uluh bakas dia puji maningak ketun, jituh rima ewen dia sinta dengan ketun. (Ibrani 12:8) Ewen puna dia sempurna. Jadi, cara ewen maningak mungkin tau manampa ketun rise. Tapi, ela baya manampayah cara ewen maningak. Coba niruk alasan uluh bakas maningak ketun. Keleh tatap tenang tuntang ela basingi. Firman Hatalla hamauh, ”Oloh je handalem tiroke dia are pandere. Oloh je pintar harati harajur taduh sanai.” (Sewut Salomo 17:27) Keleh bausaha manjadi dewasa dengan manarima nasehat tuntang balajar bara nasehat te aluh kilen ampi nasehat te inenga. (Sewut Salomo 1:8) Ela kalapean amun uluh bakas ketun sayang dengan Yehowa, jite hadiah je barega tutu bara Hatalla. Ewen handak mandohop ketun tau belum katatahi.

18. Mbuhen Pahari handak harajur maniruk hadiah je injanji Hatalla?

18 Itah uras mentai andau rahian je tamam tutu, iete belum katatahi hong sorga atawa hong pirdaus hunjun petak. Kaharap tuh buju-bujur akan manjadi. Jituh indasar awi janji bara Je Manjapa taluh handiai je hamauh, ”Hapus oloh lewu akan kontep awi pangatawan tahiu Hatalla.” (Yesaya 11:9) Dia pire hindai, uras uluh hong bumi akan iajar awi Hatalla. Aluh wayah tuh itah musti bausaha karas, jituh dia sia-sia. Jadi, harajur mingat narai je jadi injanji Yehowa. Ela tende bausaha sampai itah mandinun hadiah je injanji te!