Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  November 2017

En Pahari Bakalindung dengan Yehowa?

En Pahari Bakalindung dengan Yehowa?

”[Yehowa] manyalamat kare reware; je bakalindong intu Ie dia kareh ihukum.”—MASMUR 34:23.

4965

1. Narai je ingkeme are rewar Hatalla je satia awi mawaris dosa?

’KAYAH aku, oloh calaka!’ kuan Rasul Paulus. (Roma 7:24) Wayah tuh, are rewar Hatalla je satia mangkeme kacewa tuntang pehe atei kilau Paulus. Mbuhen? Awi itah handak manampa Yehowa sanang, tapi itah uras mawaris dosa tuntang rancak mawi kasala. Jadi, metuh itah dia bahasil manyanang Yehowa, itah tau mangkeme kacewa. Pire-pire uluh Kristen je malalus dosa serius mahin mangkeme amun Yehowa dia baka mampun ewen.

2. (a) Bara Masmur 34:23, mbuhen rewar Hatalla dia perlu harajur mangkeme basala? (b) Narai je akan ilajar itah? (Payah kotak ” Palajaran atawa Lambang?”)

2 Alkitab manenga itah jaminan amun itah bakalindung dengan Yehowa, itah dia perlu harajur mangkeme basala. (Mbasa Masmur 34:23.) Tapi narai rima bakalindung dengan Yehowa? Narai je musti ilalus itah mangat Yehowa masi dengan itah tuntang mampun itah? Itah tau mandinun jawaba dengan balajar tahiu lewu eka kalindung hong Israel huran. Pengaturan  te inampa sasuai janjin Hukum, je ingganti hong Pentakosta nyelu 33 M. Tapi, Hukum te bara Yehowa. Jadi, bara pengaturan tuh, itah tau balajar cara Yehowa manampayah dosa, uluh je malalus’ah, tuntang uluh je hubah. Je sulak, ayo itah mbahas tujuan tuntang manpaat lewu eka kalindung hong Israel.

”INTIH LEWU TE”

3. Narai je musti ilalus uluh Israel akan ije biti pamunu?

3 Yehowa pehe atei metuh tege ije biti uluh matei awi uluh beken. Amun ije biti uluh Israel mampatei uluh beken, pahari je paling tukep dengan uluh je impatei ”tau malalus hukum matei”. Iye musti mampatei pamunu te. (Numeri 35:19) Jituh ilalus awi uluh je mampatei te jadi mampanihau pambelum uluh je dia sala. Iye musti mambayar dengan pambelum’ah kabuat awi iye jadi utang daha. Amun pamunu dia jeleng ihukum matei, Petak Janji papa, atawa dia barasih hindai. Yehowa hamauh, ”Ela mamapa petak je ielai keton” dengan mampatei uluh beken.—Numeri 35:33, 34.

4. Kilen ampi amun ije biti uluh Israel dia sengaja mampatei uluh beken?

4 Kilen ampi amun ije biti uluh Israel dia sengaja mampatei uluh beken? Aluh jite dia sengaja, iye tatap basala awi jadi mampatei uluh je dia sala. (Genesis 9:5) Tapi huang kaadaan tuh, Yehowa hamauh amun uluh te tau mandinun asi. Uluh je dia sengaja mampatei te tau mandari arep bara pambaleh daha tuntang buhau akan ije bara jahawen lewu eka kalindung. Amun iye inarima uka melai hong lewu te, iye akan ingalindung. Tapi, iye musti melai hong lewu te sampai imam hai matei.—Numeri 35:15, 28.

5. Mbuhen pengaturan lewu eka kalindung tau manampa itah labih mangasene Yehowa?

5 Yehowa kabuat je manampa pengaturan lewu eka kalindung tuh, beken kalunen. Iye marentah Yosua, ”Hamauh kilau toh akan oloh Israel,  . . . ’Toh intih kare lewu te.’” (Yosua 20:1, 2, 7, 8) Yehowa je mansanan lewu kueh je musti iintih. Jadi, bara pengaturan jituh itah tau balajar tahiu Yehowa. Suntu, itah tau labih paham tahiu asin Yehowa.  Tuntang, itah tau balajar tahiu cara bakalindung dengan Yehowa.

IYE MUSTI ”MANARANG AKAN KARE PAMIMPIN INTU HETE TALOH JE JARI MANJADI”

6, 7. (a) Narai tugas kare pamimpin lewu akan uluh je dia sengaja mampatei uluh beken? (Payah gambar hong tamparan artikel.) (b) Mbuhen pamunu te perlu bapander dengan kare pamimpin lewu?

6 Amun ije biti uluh Israel dia sengaja mampatei uluh beken, iye musti mandari arep akan lewu eka kalindung tuntang ”manarang akan kare pamimpin intu hete” hong lawang lewu tahiu ”taloh je jari manjadi”. Ewen musti manarima uluh te. (Yosua 20:4) Limbah te, ewen musti malian iye haluli akan lewu eka pakara te manjadi uka masalah’ah iriksa awi kare pamimpin hong kanih. (Mbasa Numeri 35:24-28.) Amun kare pamimpin hong kanih mamutus pakara te puna dia sengaja, ewen musti malian haluli pamunu te akan lewu eka kalindung.

7 Mbuhen pamunu te musti bapander dengan kare pamimpin lewu? Awi kare pamimpin lewu perlu mamasti amun ungkup Israel tatap barasih. Ewen kea musti mandohop pamunu je dia sengaja te mangat iye tau mandinun asin Yehowa. Ije biti ahli Alkitab manulis amun pamunu te dia mangguang kare pamimpin lewu, iye tau impatei. Iye kea mansanan, awi uluh te dia manumun pengaturan je jadi inampa Yehowa, iye matei awi kasala kabuat. Jadi, iye musti balaku tuntang manarima pandohop mangat tau tatap belum. Amun iye dia mandari arep akan lewu eka kalindung, pahari bara uluh je jadi matei te tau mampatei iye.

8, 9. Mbuhen uluh Kristen je manggawi dosa serius musti bapander dengan kawan bakas ungkup?

8 Wayah tuh, mangat tau mangambuah hubungan bahalap dengan Yehowa, uluh Kristen je malalus dosa serius perlu mangguang kawan bakas ungkup mangat ewen tau mandohop iye. Mbuhen hal tuh penting tutu? Ije, Yehowa kabuat je matur mangat kawan bakas ungkup mariksa pakara dosa serius. (Yakobus 5:14-16) Due, tujuan kawan bakas ungkup iete uka mandohop uluh badosa je handak hubah mangat iye tau basobat hindai dengan Yehowa tuntang dia manguan kasalan je sama. (Galatia 6:1; Ibrani 12:11) Telu, kawan bakas ungkup inugas tuntang ilatih uka mahibur uluh badosa je handak hubah mangat iye dia hindai mangkeme basala tuntang kacewa. Yehowa manyewut kawan bakas ungkup te ”eka bakalindong bara riwut barat”. (Yesaya 32:1, 2) Pengaturan jituh ije cara Hatalla mamparahan asi akan itah.

9 Are rewar Hatalla mangkeme salawah limbah bapander tuntang mandinun pandohop bara kawan bakas ungkup. Suntu, ije biti pahari je ara Daniel puji manggawi dosa serius. Tapi katahin pire-pire bulan, iye dia bapander dengan kawan bakas ungkup. Iye hamauh, ”Awi jadi lalau tahi, aku bapikir kawan bakas ungkup pasti dia tau mandohop aku.” Iye mikeh eweh katawa tege uluh beken mangatawan dosa. Beken bara te, genep handak balakudoa iye mangkeme perlu balaku ampun helu dengan Yehowa. Akhir’ah, iye balaku pandohop bara kawan bakas ungkup. Iye mangesah, ”Aku mikeh tutu metuh handak bapander dengan ewen. Tapi limbah te, angat’ah kilau tanggungan je babehat jadi iangkat bara bahaiku.” Daniel tau mangat hindai bapander dengan Yehowa. Wayah tuh, atei nurani’ah barasih, tuntang haru-harun tuh iye manjadi hamba pelayanan.

 IYE MUSTI ”HADARI AKAN IJE BARA KARE LEWU TE”

10. Mangat tau iampun, narai je musti ilalus pamunu te?

10 Mangat tau iampun, pamunu te musti jeleng mandari arep akan lewu eka kalindung je paling tukep. (Mbasa Yosua 20:4.) Amun iye handak tatap belum, iye musti mangguang lewu te tuntang melai hong kanih sampai imam hai matei. Jituh pasti dia purah. Iye musti malihi gawia, huma je mangat, tuntang dia tau hindai haguet kanih kate sakahandak atei. * (Payah catatan penda.) (Numeri 35:25) Tapi, usaha te dia sia-sia. Amun iye malihi lewu eka kalindung, iye mamparahan amun iye dia peduli dengan utang daha je iawi, tuntang iye tau kana patei.

11. Kilen ampi uluh Kristen je handak hubah tau mamparahan amun iye basukur tutu akan asin Hatalla?

11 Wayah tuh, uluh je handak hubah musti malalus pire-pire hal mangat tau iampun Hatalla. Iye musti tende mawi dosa. Iye kea musti mangejau arep bara narai bewei je tau manampa iye mawi dosa serius. Rasul Paulus manjelas narai je ilalus awi uluh Kristen hong Korintus je handak hubah. Iye manyurat, ”Jelas tutu amun kapehen atei ketun sasuai dengan kahandak Hatalla, awi te ketun bausaha tutu uka malalus narai je bujur. Ketun mamparasih aran ketun, basingi dengan taluh je sala, mikeh dengan Hatalla, atun kanahuang je bujur, tuntang basemangat mangambuah kasala!” (2 Korintus 7:10, 11, Terjemahan Dunia Baru) Jadi, itah perlu bausaha saulih-ulih’ah uka dia mawi dosa. Dengan kalute, itah mamparahan akan Yehowa amun itah handak buju-bujur hubah tuntang dia bapikir amun itah tau mandinun asin Hatalla aluh dia malalus nara-narai.

12. Narai je mungkin perlu ilalus awi uluh Kristen mangat tau harajur mandinun asin Yehowa?

12 Narai je mungkin perlu ilalus awi uluh Kristen mangat tau harajur mandinun asin Yehowa? Iye musti pahias mangejau arep bara hal je mungkin inyanang’ah amun jite tau manampa iye badosa. (Mateus 18:8, 9) Suntu, amun kawal Pahari manampa Pahari malalus hal je injilek Yehowa, en Pahari masih handak bakawal dengan ewen? Amun Pahari bahali mangendali arep metuh mihup taluh ihup je baalkohol, en Pahari akan mangejau arep bara kaadaan je tau manampa Pahari lalau are mihup? Amun Pahari bahali mangendali kipen seksual je sala, en Pahari akan mangejau film, situs web, atawa taluh gawi je tau mampalembut pikiran papa? Mingat, usaha narai bewei je inampa itah uka manumun hukum Yehowa pasti baguna. Amun itah manyarah, itah tau mangkeme amun itah jadi manampa Yehowa pehe atei tuntang Iye dia peduli hindai dengan itah. Jituh buju-bujur mangapehe. Amun itah dia manyarah, itah akan hanjak tutu awi mangkeme ”sinta je katatahie” ayun Yehowa.—Yesaya 54:7, 8.

KARE LEWU TE AKAN MANJADI ’EKA KALINDONG’

13. Mbuhen pamunu tau mangkeme aman tuntang hanjak hong lewu eka kalindung?

13 Amun pamunu te jadi melai hong lewu eka kalindung, iye jadi aman. Yehowa puji hamauh tahiu lewu eka kalindung amun kare lewu te akan manjadi ”eka oloh tau mandari arep uka mandino kalindong”. (Yosua  20:2, 3) Hong kanih, Yehowa dia akan balaku pamunu te iriksa hindai akan pakara je sama. Pambaleh daha kea dia tau tame akan lewu eka kalindung uka mampatei iye. Metuh pamunu te melai hong lewu te, iye ingalindung awi Yehowa. Tapi, lewu te dia kilau penjara. Iye tau bagawi, mandohop uluh beken, tuntang manempu Yehowa dengan damai. Pambelum’ah tau hanjak tuntang puas!

Percaya ih Yehowa mampun Pahari (Payah paragrap 14-16)

14. Uluh Kristen je jadi hubah tau yakin akan hal narai?

14 Pire-pire rewar Hatalla je puji mawi dosa serius masih mangkeme basala, aluh ewen jadi hubah. Tege je mangkeme Yehowa dia akan mangalapean kare dosan ewen. Amun jite je ingkeme Pahari, yakin ih metuh Yehowa mampun Pahari, Iye mangalapean dosa te samasinde. Pahari dia perlu mangkeme basala hindai. Jituh je ingkeme Daniel endau. Limbah bakas ungkup maningak tuntang mandohop iye, atei nurani’ah barasih tuntang iye mangkeme salawah. Iye hamauh, ”Aku dia perlu mangkeme basala hindai. Amun dosan itah jadi iampun, jite jadi ingalapean. Kilau je insanan Yehowa, Iye akan manduan tanggungan itah tuntang manjakah’ah keja-kejau sampai itah dia tau manampayah’ah hindai.” Limbah pamunu te melai hong lewu eka kalindung, iye dia perlu mikeh pambaleh daha dumah tuntang mampatei iye. Kalute kea, limbah Yehowa mampun dosan itah, itah dia perlu mikeh amun Yehowa mingat’ah hindai tuntang mahukum itah hong rahian andau.—Mbasa Masmur 103:8-12.

15, 16. Dengan mangatawan amun pampatei Yesus manenga tewusan tuntang iye Imam Hai itah, mbuhen itah tau sasar percaya dengan asin Hatalla?

 15 Bara uluh Israel huran, itah tege labih are bukti uka percaya akan asin Yehowa. Limbah hamauh ’kayah aku, oloh calaka!’ awi mangkeme dia tau santar manumun Yehowa, Paulus hamauh, ’Aku manarimakasih intu Hatalla mahapang Yesus Kristus.’ (Roma 7:25, Surat Barasih 1983) Narai maksud’ah? Aluh masih bajuang malawan kahandak je sala tuntang puji mawi dosa, iye jadi hubah. Jadi, iye yakin amun Yehowa jadi mampun iye hapan parapah tewusan Yesus. Awi tewusan Yesus kea, atei nurani itah tau barasih tuntang mangkeme damai. (Ibrani 9:13, 14) Imam Hai itah Yesus ”tau manyalamat kare oloh je dumah manalih Hatalla mahalau Ie, awi ie belom sampai katatahie uka manyampai auh laku dengan Hatalla akan kare oloh te”. (Ibrani 7:24, 25) Huran, imam hai mandohop uluh Israel yakin amun Yehowa akan mampun kasalan ewen. Awi Imam Hai itah te Yesus, itah sasar yakin amun ”Hatalla kareh masi itah tuntang mamberkat itah mangat itah mandino pandohop hong katikae je buah”.—Ibrani 4:15, 16.

16 Jadi, uka bakalindung dengan Yehowa, itah perlu baiman dengan parapah Yesus. Ela baya bapikir tewusan te baguna akan uras uluh. Keleh baiman amun tewusan te puna baguna akan Pahari. (Galatia 2:20, 21) Keleh baiman Yehowa mampun kasalan Pahari awi tewusan. Keleh baiman tewusan manenga Pahari harapan belum katatahi. Tewusan Yesus te panengan Yehowa akan Pahari!

17. Mbuhen Pahari handak bakalindung dengan Yehowa?

17 Dengan balajar tahiu lewu eka kalindung, itah sasar paham asin Yehowa. Pengaturan bara Hatalla tuh majar itah amun pambelum te barasih. Jituh kea mamparahan tugas kawan bakas ungkup uka mandohop itah, cara uka buju-bujur hubah, tuntang mbuhen itah tau buju-bujur yakin amun Yehowa mampun dosan itah. En Pahari bakalindung dengan Yehowa? Yehowa eka bakalindung je paling aman! (Masmur 91:1, 2) Hong artikel limbah tuh, itah akan mambahas kilen ampi lewu eka kalindung tau mandohop itah manyuntu Yehowa, suntu pangkahalap akan kaadil tuntang asi.

^ par. 10 Kuan ahli sejarah Yehudi, mungkin tege keluarga tukep bara pamunu te je mangguang iye uka melai denga hong lewu eka kalindung.