Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Juni 2017

Keleh Mendukung Hak Yehowa uka Marentah

Keleh Mendukung Hak Yehowa uka Marentah

”O [Yehowa], o Hatallan ikei! Ikau wei je patut mandino tara, hormat tuntang kuasa. Awi ikau je manjapa kare taloh handiai.”​—PANGARINAH 4:11.

NYANYIN: 112, 133

1, 2. Narai je perlu imasti awi itah uras? (Payah gambar hong tamparan artikel.)

KILAU je jadi imbahas itah hong artikel je helu, Setan mansanan amun Yehowa dia patut marentah kalunen. Kua, pamarentahan Yehowa dia adil tuntang kalunen akan labih sanang amun ewen marentah arep ewen kabuat. En dawa jituh bujur? Amun kalunen tau belum katatahi tuntang marentah arep ewen kabuat lapas bara Hatalla, en ewen akan labih sanang? Amun Pahari belum katatahi tuntang lapas bara Hatalla, en Pahari akan labih sanang?

2 Jatun je tau manjawab kare paisek tuh akan Pahari. Itah uras perlu buju-bujur mamasti jawaban akan kare paisek tuh kabuat. Dengan kalute, itah akan mangatawan amun cara Yehowa marentah je paling bahalap tuntang Iye patut mandinun dukungan itah salepah atei. Itah tau yakin dengan hal te awi narai je imbasa itah bara Alkitab. Coba itah manampayah narai kuan Alkitab tahiu hak Yehowa marentah alam semesta.

 BAYA YEHOWA JE TEGE HAK MARENTAH

3. Mbuhen Yehowa je paling patut marentah?

3 Baya Yehowa je paling patut marentah alam semesta, awi iye Panjapa tuntang Hatalla je pangkahai kuasa. (1 Kronika 29:11; Gawin Rasul 4:24) Huang ije paite tahiu sorga, 144.000 raja je bakuasa dengan Kristus mansanan, ”O [Yehowa], o Hatallan ikei! Ikau wei je patut mandino tara, hormat tuntang kuasa. Awi ikau je manjapa kare taloh handiai, tuntang tagal kahandak Ayum kea kare taloh handiai te jari manjadi tuntang belom.” (Pangarinah 4:11) Yehowa manjapa kare taluh handiai, jadi Iye tege hak marentah taluh je tege hong bumi atawa hong sorga.

4. Aluh itah bebas mintih, mbuhen itah jatun hak malawan Hatalla?

4 Setan jatun manjapa nara-narai. Jadi, iye jatun hak samasinde uka marentah alam semesta. Metuh Setan tuntang keluarga kalunen je pangkasulak malawan Hatalla tuntang handak marentah arep ewen kabuat, ewen sapuna malalus narai je dia ulih ilalus ewen. (Yeremia 10:23) Awi ewen bebas mintih, en jite rima ewen tege hak manolak pamarentahan Yehowa? Dia. Awi ewen bebas mintih, ewen tege hak mintih tuntang manampa keputusan. Tapi, jite beken rima ewen tege hak malawan Panjapa, Yehowa. Mbuhen? Awi itah kalunen, itah perlu irentah tuntang inantiring awi Yehowa. Jadi jelas, metuh ewen malawan Hatalla, ewen sala mangguna hak ewen uka bebas mintih.

Genep hukum, prinsip, tuntang keputusan je dumah bara Yehowa pasti bujur tuntang bahalap

5. Mbuhen keputusan Hatalla santar adil?

5 Alasan beken je mamparahan amun Yehowa tege hak marentah iete awi Iye marentah dengan cara je paling adil. Iye hamauh, ”Aku je sinta tuntang pamasi sampai katatahie tuntang Aku mandehen parentah tuntang kabujur hong kalunen. Uras taloh handiai te manyanang atei-Ku.” (Yeremia 9:24) Yehowa dia perlu hukum bara kalunen uka manampa keputusan je bujur. Iye je manampa patokan akan narai je bujur. Tuntang dengan kaadil-Ai je sempurna, Yehowa manenga hukum akan kalunen. Je manyurat Masmur hamauh, ”Katetek tuntang hukum jete galang karajaan Aim.” Jadi, genep hukum, prinsip, tuntang keputusan je dumah bara Yehowa pasti bujur. (Masmur 89:15; 119:128) Setan mandawa amun cara Yehowa marentah dia adil, tapi iye kabuat dia ulih mimbit kaadil hong bumi.

6. Narai ije bukti amun Yehowa tege hak uka marentah?

6 Alasan beken mbuhen Yehowa tege hak marentah iete awi baya Iye je tege pangatawan tuntang kapintar kaharati akan mahaga alam semesta. Itah tau manampayah bukti bara kasanggup je inenga Yehowa akan Anak-Ai uka mampakeleh panyakit je dia ulih impakeleh awi dokter kueh bewei. (Mateus 4:23, 24; Markus 5:25-29) Akan kalunen jite mujizat. Tapi akan Yehowa, jite beken mujizat awi Iye katawan kilen ampi proses hong huang bitin itah tuntang tau mampakeleh panyakit narai bewei. Iye mahin tau malian  pambelum uluh je jadi matei tuntang maatur mangat bencana alam dia manjadi.

7. Mbuhen itah tau yakin amun baya Yehowa je labih pintar harati bara eweh bewei je tege hong dunia Setan?

7 Dunia je irentah awi Setan dia tau mahasil kadamai, aluh hong ije negara atawa ije negara dengan negara beken. Baya Yehowa je tau mampadumah kadamai hong hapus kalunen. (Yesaya 2:3, 4; 54:13) Pangkeme itah sama kilau Rasul Paulus je hamauh, ”Toto tamam katatau Hatalla! Toto hai kapintar-kaharatin Aie tuntang pangatawan Aie! Eweh je tau manantuani kare taloh je inukas Awie? Eweh je tau harati cara je ihapan Awie malalus gawin Aie?”.​—Roma 11:33.

PAMARENTAHAN YEHOWA JE PANGKAHALAP

8. Kilen ampi angat atei Pahari tahiu cara Yehowa marentah?

8 Alkitab manenga bukti je andal amun Yehowa tege hak marentah. Alkitab kea mamparahan amun Yehowa Panguasa je pangkahalap. Ije bara kare bukti iete Iye marentah hapan sinta. Itah pasti sanang awi cara Iye marentah. Iye hamauh tahiu Arep’ah, ”[Aku] kuntep katau tuntang asi. Asing-Ku malabien, Aku baketep tuntang dia murah balait”. (Eksodus 34:6) Hatalla marega itah, tuntang Iye labih katawan bara arep itah tahiu narai je imerlu itah. Iblis hamauh amun Yehowa dia buju-bujur paduli dengan kare rewar-Ai. Tapi jituh tanjaru. Hatalla sampai manenga Anak-Ai je Inyinta mangat itah tege harapan pambelum katatahi.​—Mbasa Masmur 84:12; Roma 8:32.

Yehowa labih katawan bara arep itah tahiu narai je imerlu itah

9. Narai bukti amun Hatalla paduli dengan genep biti rewar-Ai?

9 Yehowa sinta dengan uras rewar-Ai. Tapi, Iye kea paduli tutu dengan rewar-Ai mije-mije. Coba mikir kesah hong jaman huran. Katahin kira-kira telu ratus nyelu, Yehowa mahapan kare hakim uka manantiring bangsa je Iintih’ah tuntang manenga ewen kamanang huang parang. Tapi hong katika je sama, Yehowa kea manantuani rewar-Ai mije-mije. Ije bara ewen iete ije biti uluh bawi je ara Rut. Iye beken uluh Israel, tuntang iye manampa are pengorbanan mangat tau manempu Yehowa. Awi te, Yehowa manenga uluh hatue akan jadi bana tuntang ije biti anak hatue. Beken bara te, anak Rut manjadi tatu hiang Mesias. Yehowa manamean kesah Rut manjadi bagian bara ije bara kare buku Alkitab je mahapan aran Rut. Coba mikir, kilen ampi angat atei Rut kareh metuh iye impisik tuntang katawan uras hal tuh?​—Rut 4:13; Mateus 1:5, 16.

10. Bara kueh itah katawan amun cara Yehowa marentah dia kasar?

10 Cara Yehowa marentah te dia kasar atawa mamaksa. Jadi, uras je manumun Denga pasti masih mangkeme bebas, atawa mardeka, tuntang hanjak. (2 Korintus 3:17) Dawid hamauh tahiu Yehowa, ”Ie hasangkolep kahai tuntang kahalap, human Aie kontep kuasa tuntang kahanjak.” (1 Kronika 16:7, 27) Etan je manyurat Masmur hamauh, ”Salamat bangsa je manyembah Ikau dengan  kahanjak, je belom hong kalawa panumah Aim, [Yehowa]. Hapus andau ewen hanjak rantang tuntang tetep dehen, awi kahalap Aim.”​—Masmur 89:16, 17.

11. Kilen ampi itah tau sasar yakin amun cara Yehowa marentah paling bahalap?

11 Sasar rancak itah mangumang kahalap Yehowa, itah akan sasar yakin amun pamarentahan-Ai je paling bahalap. Angat atei itah sama dengan je manyurat Masmur je hamauh dengan Hatalla, ”Labih bahalap jandau intu Human Ayum bara sakoyan andau intu eka beken.” (Masmur 84:11) Yehowa je merancang tuntang manjapa itah. Jadi, Iye katawan narai je tau buju-bujur manampa itah sanang. Iye manenga labih bara je imerlu itah. Narai bewei je ilaku Yehowa uka ilalus pasti akan kahalap itah kabuat. Aluh amun itah musti manampa pengorbanan, itah tau tatap sanang amun itah manumun kuan Yehowa.​—Mbasa Yesaya 48:17.

12. Narai alasan utama itah mendukung hak Yehowa uka marentah?

12 Alkitab mansanan amun limbah pamarentahan Seribu Nyelu Kristus akan tege kare uluh je malawan Yehowa. (Pangarinah 20:7, 8) Mbuhen hal tuh tau manjadi? Metuh te, Iblis akan bausaha manampa uluh mamenting arep ewen. Jite je harajur inggawi Iblis. Iye mungkin bausaha manampa uluh yakin amun ewen tau belum katatahi aluh dia manumun Hatalla. Jituh dia bujur. Itah perlu bapikir, ’En aku percaya dengan tanjarun Setan?’ Amun itah bujur-bujur sinta Yehowa tuntang yakin amun Iye Panguasa je bahalap tuntang tege hak marentah alam semesta, itah dia akan percaya dengan tanjarun Setan. Itah akan santar mintih pamarentahan Hatalla je akan marentah hapan sinta.

SATIA MENDUKUNG HAK HATALLA UKA MARENTAH

13. Narai je tau ilalus itah uka mendukung hak Hatalla uka marentah?

13 Itah jadi mambahas kare bukti amun baya Yehowa je tege hak marentah tuntang Iye marentah dengan cara je paling bahalap. Jadi, itah pasti hanjak mendukung pamarentahan-Ai. Amun itah tatap baketep dengan Yehowa tuntang buju-bujur bausaha manyuntu cara bapikir-Ai, itah mamparahan amun itah sinta tuntang mendukung hak Yehowa marentah.​—Mbasa Epesus 5:1, 2.

14. Kilen ampi kare bakas ungkup tuntang kapala keluarga tau manyuntu Yehowa?

14 Alkitab mansanan amun Yehowa santar mangguna Kuasa dengan pamasi. Jadi, kare kapala keluarga tuntang bakas ungkup je sinta dengan cara Yehowa marentah akan manyuntu hal tuh. Ewen dia akan kasar atawa maatur uluh beken. Rasul Paulus karas bausaha manyuntu Hatalla tuntang Anak-Ai. (1 Korintus 11:1) Iye dia manampa uluh beken mahamen atawa mamaksa ewen uka malalus je bujur. Kabalika, iye maanjur uluh beken dengan cara je pamasi uka malalus je bujur. (Roma 12:1; Epesus 4:1; Pilemon 8-10) Jituh mamparahan amun Paulus manyuntu Yehowa. Jadi, amun itah malalus hal je sama, jite rima itah mendukung hak Yehowa uka marentah.

15. Narai hindai je tau ilalus itah uka mendukung hak Yehowa uka marentah?

15 Cara beken itah tau mendukung hak Yehowa uka marentah dengan mahormat tuntang maumba petunjuk bara kare uluh je ilantik. Aluh itah dia mangatawan uras  atawa itah dia setuju tahiu ije keputusan je inampa ewen, itah tatap mendukung ewen. Jituh dia sama dengan je inggawi uluh hong dunia, tapi jituh je inggawi itah amun itah manarima Yehowa manjadi Panguasa itah. (Epesus 5:22, 23; 6:1-3; Ibrani 13:17) Tuntang hasil’ah, itah hanjak, awi Hatalla mangahandak je paling bahalap akan itah.

16. Helu bara manampa keputusan, narai je perlu imikir itah amun itah mendukung pamarentahan Hatalla?

16 Itah kea mendukung hak Hatalla uka marentah mahalau keputusan je induan itah. Yehowa dia manenga itah hukum je maatur genep hal huang pambelum. Tapi, Iye mansanan akan itah cara bapikir-Ai. Dengan kalute, itah tau mangatawan narai je perlu ilalus itah. Suntu, Yehowa dia manenga akan itah daptar pakaian je tau tuntang je dia tau ihapan itah. Tapi, Iye mansanan amun itah perlu bapakaian sederhana tuntang patut awi itah saksi-Ai. (1 Timoteus 2:9, 10) Iye handak itah mamikir kilen ampi keputusan itah mampangaruh uluh beken. (1 Korintus 10:31-33) Amun itah manampa keputusan je sasuai dengan cara bapikir Yehowa, jite rima itah mendukung tuntang sinta cara Yehowa marentah.

Keleh manenga dukungan akan hak Hatalla marentah metuh manampa keputusan tuntang huang pambelum keluarga (Payah paragrap 16-18)

17, 18. Kilen ampi uluh Kristen je jadi kawin tau mendukung hak Yehowa uka marentah?

17 Uluh Kristen je jadi kawin tau  mendukung hak Yehowa uka marentah. Metuh ewen kawin, kaadaa mungkin dia kilau je imikir ewen. Ewen kea mungkin manaharep masalah hai. Amun jite je manjadi, bahalap amun itah mamikir cara Yehowa baurusan dengan bangsa Israel jaman huran. Yehowa mansanan amun Iye kilau banan akan uluh Israel. (Yesaya 54:5; 62:4) Bangsa te rancak mangapehe atei Yehowa. Kaadaan tuh sama kilau pangawin je bamasalah. Tapi, Yehowa dia capat manyarah. Yehowa baula-ulang maampun uluh Israel tuntang mingat Janji dengan ewen.​—Mbasa Masmur 106:43-45.

18 Uluh Kristen je jadi kawin je sinta Yehowa pasti bausaha manyuntu Iye. Aluh are masalah huang pangawin, ewen dia manggau jalan balua je dia sasuai dengan Alkitab. Ewen katawan amun Yehowa maanggap serius janji pangawin tuntang handak mangat ewen tatap satia dengan kabalin ewen. Baya ije alasan bara Alkitab akan hatulang tuntang tau kawin hindai iete amun tege je manyaleweng. (Mateus 19:5, 6, 9) Amun uluh je jadi kawin malalus taluh handiai uka mahaga pangawin ewen, jite rima ewen mendukung hak Yehowa uka marentah.

19. Narai je perlu ilalus itah amun mawi kasala?

19 Itah uras dia sempurna tuntang tau mawi kasala je mangapehe atei Yehowa. Awi iye mangatawan hal te, Iye manyadia tewusan Kristus. Jadi, amun itah mawi kasala, itah musti balaku ampun bara Yehowa. (1 Yohanes 2:1, 2) Ela baya manyasal awi kasala je inggawi itah. Tapi, keleh balajar bara kasalan te. Itah handak tatap rantep dengan Yehowa je akan maampun itah tuntang kea mandohop malian kahanjak itah tuntang dia maulang kasala je sama.​—Masmur 103:3.

20. Mbuhen itah dia perlu manahan arep uka mendukung hak Yehowa marentah?

20 Hong dunia taheta, Yehowa akan marentah uras pribadi, tuntang ewen akan balajar kare jalan-Ai je bujur. (Yesaya 11:9) Tapi bara wayah tuh, itah kea tau balajar tahiu cara bapikir Yehowa mangat itah tau manduan keputusan je bujur. Dia pire hindai, jatunti je akan ragu-ragu en Hatalla tege hak uka marentah. Jadi wayah tuh, keleh itah mendukung hak Yehowa uka marentah, iete dengan manumun Denga, tatap baketep Denga, tuntang malalus taluh handiai uka manyuntu Iye.