Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Juni 2017

Keleh Mamberes Masalah tuntang Mausaha Kadamai?

Keleh Mamberes Masalah tuntang Mausaha Kadamai?

YEHOWA handak uluh je manempu Iye mangkeme kadamai. Iye handak mangat ewen mausaha kadamai dengan sama arep ewen. Dengan kalute, ungkup Kristen akan tatap damai. Hasil’ah, are uluh handak tame akan ungkup.

Akan suntu, tege ije biti dukun hong Madagaskar je manampayah kadamai bara kare rewar Yehowa. Iye bapikir, ’Amun aku musti mintih, aku akan umba dengan agama tuh.’ Kajaria, iye dia hindai manyembah kawan taluh. Iye kea mamasti mangat pangawin ayu sasuai dengan prinsip Alkitab, tuntang iye nampara manyembah Yehowa, Hatalla kadamai.

Kilau uluh hatue endau, genep nyelu tege baribu uluh je umba hinje dengan ungkup Kristen tuntang kajaria mandinun kadamai je katahin tuh inggau ewen. Tapi Alkitab mansanan akan itah amun ”pangabehu, pehe atei, tuntang manirok kare taloh handiai akan arep kabuat” tau marusak hubungan bahalap tuntang mimbit masalah huang ungkup. (Yakobus 3:14-16) Tapi, Alkitab manenga itah nasehat bahalap mangat tau mahakan masalah tuh tuntang sasar rantep dengan kawan paharin itah. Coba itah manantuani kilen ampi kare paharin itah indohop awi nasehat tuh.

MASALAH TUNTANG JALAN BALUA

”Bahali tutu bagawi sama-sama dengan pahari te. Ikei puji basoal jawab sampai auh ikei nyaring. Limbah te, tege due biti uluh je dumah tuntang manampayah kajadian tuh.”​—CHRIS.

”Aku rancak badinas dengan ije biti pahari. Salenga iye mambalang uras janji dinas ikei. Limbah te, iye dia handak hindai bapander dengangku. Aku dia katawan narai sabab’ah.”​—JANET.

”Aku tuntang due kawalku bapander mahalau telepon. Limbah te ije bara ewen due mansanan arep’ah tende, jadi aku bapikir iye manutup telepon. Awi te, aku bapander hal je dia bahalap tahiu iye akan kawalku je ije hindai. Tapi ampi iye hindai manutup telepon ayu.”​—MICHAEL.

”Hong ungkup ikei, tege due perintis je hakaridu. Je ije rajin basingi dengan je beken. Awi ewen hakaridu, pahari je beken dia mangat.”​—GARY.

Ampi kare masalah tuh dia lalau hai. Tapi, uras tuh tau manampa kapehe je hai huang atei kawan pahari je manaharep masalah tuh tuntang tau manderoh kadamai hong ungkup. Tapi untung, kawan pahari tuh maumba prinsip Alkitab tuntang haluli badamai. Prinsip Alkitab narai je mandohop ewen?

”Ela mawi karidu sama arep keton hong benteng jalan.” (Genesis 45:24) Nasehat tuh inenga awi Yosep akan kawan pahari je handak buli akan human ewen. Amun ije biti uluh dia mangendali angat atei’ah tuntang capat tersinggung, jituh tau mampahai masalah. Uluh beken tau umba basingi. Chris mangaku amun iye kanatek’ah dia randah  atei tuntang bahali maumba petunjuk. Iye handak hubah. Jadi, iye balaku maaf dengan pahari je sampet hasoal denga. Bara katika te, Chris karas bausaha mangendali emosi. Metuh pahari te manampayah usahan Chris, iye kea hubah. Tuh, ewen jadi badamai tuntang sama-sama melayani Yehowa.

”Rencana gagal amon dia inirok bua-buah [’dia barunding’, Terjemahan Dunia Baru].” (Sewut Salomo 15:22) Metuh kawal Janet dia handak hindai bapander denga, iye mamutus uka malalus nasehat hong ayat tuh. Jadi, iye bapander dengan pahari te. Janet misek denga en iye jadi manampa pahari te pehe atei atawa basingi. Metuh nampara bapander ewen due sama-sama dia lalau mangat. Tapi, ewen due tarus bapander bua-buah sampai kaadaa nampara mangat. Pahari bawi tuh haru mangatawan amun iye sala paham tahiu ije kejadian. Janet dia mawi kasala nara-narai. Jadi, iye balaku maaf dengan Janet. Ewen due haluli rantep hindai tuntang pakat bagawi melayani Yehowa.

”Tagal te amon aton ije bara keton metoh ie manyarah parapahe akan Hatalla, hete ie teraingat aton oloh je kapehe ateie dengae, keleh ie malihi helo parapahe te hong baun mesbeh, palus tolak badamai dengan oloh te.” (Mateus 5:23, 24) Yesus manenga nasehat tuh hong Hotbah intu Bukit. Michael dia mangat metuh lembut auh pander je kurang bahalap te. Iye manduan keputusan uka malalus kare hal mangat tau badamai. Jadi, iye manyundau pahari tuh tuntang buju-bujur balaku maaf denga. Narai hasil’ah? Michael hamauh, ”Pahari tuh buju-bujur maampun aku.” Ewen basobat hindai.

”Keton musti sabar dengan sama arep keton, tuntang tau mampun amon aton oloh je mingkes kasingi dengan kolae.” (Kolose 3:12-14) Due biti perintis je hakaridu endau indohop awi ije biti bakas ungkup uka manampayah amun gawin ewen manampa kawan pahari kacewa tuntang dia mangat. Ewen due inasehat uka basabar ije dengan je beken tuntang mahaga kadamai hong ungkup. Ewen manarima nasehat te tuntang manjala. Tuh, ewen bakawal hindai tuntang sama-sama mangabar barita bahalap.

Nasehat hong Kolose 3:12-14 tau kea mandohop itah randah atei, maampun uluh je mangapehe itah, tuntang dia hindai mamikir masalah te. Tapi, kilen ampi amun itah dia tau maampun padahal jadi bausaha? Itah tau mamikir prinsip hong Mateus 18:15. Aluh hong ayat jituh Yesus bapander tahiu dosa hai, itah tau kea manjalan nasehat tuh amun itah tege masalah dengan kawan paharin itah. Jadi, keleh randah atei tuntang bahas masalah tuh dengan cara je bahalap tuntang coba mamberes masalah’ah.

Huang Alkitab, are nasehat beken je baguna. Uka tau manjala, Pahari perlu ”imimpin awi Roh  Hatalla” mangat tau mahasil bua Roh. Uluh kalute tege sipat kilau, ”hasinta sama arepe, ewen hanja-hanjak, ewen mandino kadamai, ewen sabar tuntang ateie ewen sanai, ewen sabar tuntang bahalap budie, ewen buah ampie dengan oloh beken, ewen baketep, ewen randah ateie, tuntang harajur olih mahaga arepe”. (Galatia 5:22, 23) Kilau oli je manampa masin lancar, kare sipat bahalap bara Yehowa tau mandohop itah dia lalau manantuani sipat je hakabeken tuntang hubungan itah dengan kawan paharin itah manjadi lancar.

SIPAT JE HAKABEKEN MANAMPA KAADAAN HONG UNGKUP LABIH RAMI

Genep biti uluh dia sama. Sipat itah kea beke-beken. Cara itah bapikir tuntang bapander dia sama. Jituh manampa hubungan itah dengan kawan pahari jadi sasar rami tuntang manambah kasanang. Tapi, jituh kea tau mampalembut sala paham tuntang beda pikiran. Ije biti bakas ungkup je bapangalaman manenga ije suntu, ”Uluh je purah mahamen mungkin bahali bakawal dengan uluh je purah bakawal. Sipat je hakabeken kilau tuh aluh ampi hal kurik, tapi tau mampalembut masalah je hai.” Kilen ampi dengan uluh je sipat’ah puna dia sama. En ewen dia tau bakawal samasinde? Coba itah manampayah suntu kare rasul. Petrus mungkin uluh je rajin bapander langsung narai je tege hong pikira. Tapi Yohanes, mungkin pahari je paduli tuntang patuh bapikir helu bara bapander atawa helu bara malalus ije hal. Sipat ewen dia sama. Tapi ewen tau pakat bagawi akan Yehowa. (Gawin Rasul 8:14; Galatia 2:9) Wayah tuh kea, aluh tege uluh Kristen je sipat’ah puna dia sama, ewen tatap tau pakat bagawi haya-hayak.

Tapi, kilen ampi amun tege ije biti uluh hong ungkup je mansanan atawa malalus ije hal je manampa  Pahari pehe atei? Keleh mingat amun Kristus jadi matei akan Pahari te kea. Tuntang, Pahari musti sinta dengan paharin Pahari. (Yohanes 13:34, 35; Roma 5:6-8) Jadi, bara mangkeme labih bahalap mangejau arep bara uluh kilau te, coba mikir, ’En paharingku malalus taluh je malanggar hukum Yehowa? En iye ihat handak mangapehe aku? Atawa, hal tuh manjadi baya awi sipat je dia sama? Sapuna, en iye tege sipat bahalap je tau inyuntuku?’

Suntu, amun iye rajin bapander tapi Pahari pambenyem, en handak Pahari badinas denga tuntang balajar ije hal bara iye? Atawa, amun Pahari mite iye tau dengan uluh, en Pahari manampayah amun iye labih sanang awi katau dengan uluh je bakas, haban, tuntang mamerlu pandohop? En tau Pahari balajar bara iye uka labih mamparahan katau? Jadi, aluh Pahari dia sama sipat dengan uluh beken hong ungkup, Pahari tau manantuani kare sipat bahalap ewen. Mungkin, aluh ketun dia manjadi sobat, tapi hubungan ketun akan sasar bahalap. Dengan kalute, Pahari akan mangkeme kadamai tuntang ungkup kea umba damai.

Hong abad pangkasulak, tege due biti pahari bawi je ara Ewudia tuntang Sintike. Ampi, sipat ewen puna dia sama. Tapi, Rasul Paulus maanjur ewen uka ”hinje bulat atei kilau oloh je sama kapercayae”. (Pilippi 4:2) Itah kea handak manempu Yehowa haya-hayak dengan kawan paharin itah tuntang mausaha kadamai huang ungkup.

JELENG MAMBERES MASALAH

Mbuhen itah perlu capa-capat manganan angat atei je dia bahalap narai bewei dengan uluh beken? Angat atei kilau tuh tau inyama dengan uru hong kabun kambang je bahalap. Amun uru tuh dia capa-capat injawut, iye tau mangalambun hapus  kabun. Kalute kea, angat atei je dia mangat amun inalua tarus tumbu, hapus ungkup tau tapangaruh. Tapi, awi sinta Yehowa tuntang kawan pahari, itah akan malalus narai bewei mangat ungkup tatap damai.

Amun Pahari tatap randah atei tuntang bausaha badamai, hasil’ah bahalap tutu

Amun itah bausaha badamai dengan uluh beken, hasil’ah bahalap tutu. Hal tuh je ingkeme awi ije biti pahari bawi. Iye hamauh, ”Aku mangkeme ije biti pahari bawi mawi aku kilau anak kurik. Aku puna dia rajin! Sasar tahi aku sasar bajilek, tuntang aku dia tahu-tahu denga. Aku bapikir, ’Iye kea dia marega aku. Jadi, narai guna aku marega iye?’”

Limbah te, pahari tuh mariksa arep’ah kabuat. ”Aku sadar amun sipatku kabuat tege kakurang’ah. Tuntang, aku kacewa. Aku katawan amun aku perlu mangambuah cara bapikirku. Limbah balakudoa dengan Yehowa, aku manenga pahari tuh hadiah tuntang manulis surat akan balaku maaf awi gawingku je dia bahalap. Ikei hapangkut tuntang ikei setuju mangalapean masalah tuh. Bara katika te, ikei dia puji hindai bamasalah.”

Uras uluh perlu kadamai. Tapi, sipat gantung atei tuntang bahiri tau marusak kadamai. Hong dunia tuh are uluh dengan sipat kilau te. Tapi, Yehowa handak kare rewar-Ai dia kilau te. Hong marak kare Saksi Yehowa, perlu tege kadamai tuntang kapakat. Yehowa manantiring Paulus uka manulis akan uluh Kristen mangat ewen ’belom tumon pangkat ewen kilau oloh je jari intehau Hatalla’. Ewen impaabas malalus jituh dengan ”randah atei, balemo, tuntang sabar. Parahan sintan keton awi keton mandohop sama arep keton. Keleh keton manggau akal toto-toto uka belom huang kadamai mangat mahaga kahinje je injapa awi Roh Hatalla”. (Epesus 4:1-3) ”Kadamai” hong marak rewar Yehowa barega tutu awi jite ”mahaga kahinje”. Jadi, itah perlu malalus narai bewei uka mampadehen kadamai tuntang mamberes masalah narai bewei je lembut hong marak itah.