”Hong kueh panatau keton, intu hete kea atei keton!”​—LUKAS 12:34.

NYANYIN: 153, 104

1, 2. (a) Telu panatau barega narai je inenga Yehowa? (b) Narai je akan imbahas itah bara artikel jituh?

PRIBADI je paling tatau hong alam semesta iete Yehowa. Iye tempun taluh handiai. (1 Kronika 29:11, 12) Tapi, Yehowa dia bukih. Itah pasti hanjak tutu awi Iye manenga are panatau rohani akan itah. Pire-pire bara kare panatau rohani tuh iete (1) Karajaan Hatalla, (2) pelayanan itah, tuntang (3) katutu je barega hong Alkitab. Tapi, amun itah dia bua-buah, sasar tahi itah tau maanggap panatau tuh beken hal je barega hindai. Itah musti harajur mingat nilai bara panatau tuh tuntang sasar marega awi Yesus hamauh, ”Hong kueh panatau keton, intu hete kea atei keton!”​—Lukas 12:34.

2 Tuh, itah akan mambahas kilen ampi cara uka harajur sinta tuntang marega Karajaan Hatalla, pelayanan, tuntang katutu. Ngumang kea narai je tau ilalus Pahari mangat sasar sinta dengan panatau rohani tuh.

 KARAJAAN HATALLA KILAU MUTIARA JE BAREGA

3. Narai je pahias ilalus awi ije biti uluh hatue huang kesah Yesus uka mamili ije kabawak mutiara? (Payah gambar hong tamparan artikel.)

3 Mbasa Mateus 13:45, 46. Yesus bakesah tahiu ije biti uluh dagang je manggau mutiara je bahalap. Huang ije katika, iye manyundau ije kabawak mutiara je labih barega bara mutiara beken. Iye handak tutu mutiara jite, awi te iye manjual narai bewei uka mamili mutiara te. Uluh hatue tuh pasti marega tutu mutiara te.

Amun itah sinta Karajaan kilau uluh dagang marega mutiara, itah akan pahias mangorban narai bewei

4. Narai je pahias ilalus itah akan Karajaan Hatalla?

4 Narai je tau ilajar itah bara kesah Yesus? Katutu tahiu Karajaan Hatalla kilau mutiara je barega te. Amun itah marega Karajaan Hatalla kilau ije biti uluh dagang endau, itah pahias mangorban narai bewei mangat tau harajur manjadi bagian bara Karajaan Hatalla. (Mbasa Markus 10:28-30.) Coba itah manantuani due uluh je malalus hal te.

5. Narai je pahias ilalus Sakeus akan Karajaan Hatalla?

5 Sakeus ije biti panagih pajak. Iye tatau awi manipu uluh beken. (Lukas 19:1-9) Tapi hong ije katika, Sakeus mahining Yesus mangesah tahiu Karajaan Hatalla. Iye rajin tutu dengan je ihining’ah, awi te iye handak maubah salepah pambelum’ah. Iye hamauh, ”[Tuan], satengah bara ramongku handak inyadakahku akan oloh je belom susah; tuntang eweh bewei je puji aku mamikire kareh imbayarku akae lipet epat karee!” Sakeus malian duit je indua tuntang iye umbet bakuhu.

6. Perubahan narai je inampa ije biti uluh bawi, tuntang mbuhen?

6 Pire-pire nyelu je halau, ije biti uluh bawi manampa hubungan romantis dengan sama bawi iye mahining tahiu Karajaan Hatalla. Iye ije biti ketua organisasi je mausaha hak uluh homoseks. Tapi, metuh iye balajar bara Alkitab amun Karajaan Hatalla te barega tutu, iye mangatawan amun iye perlu maubah pambelum’ah. (1 Korintus 6:9, Terjemahan Dunia Baru) Awi sinta Yehowa, iye balua bara organisasi te tuntang mamutus hubungan romantis’ah. Iye impandui nyelu 2009, tuntang ije nyelu limbah te, iye manjadi perintis biasa. Iye handak malalus perubahan hai jituh awi iye labih sinta Yehowa bara kanahuang narai bewei je dia patut.​—Markus 12:29, 30.

7. Kilen ampi itah mahaga sintan itah akan Karajaan Hatalla tatap dehen?

7 Mangat itah tau manjadi rakyat Karajaan Hatalla, are bara itah jadi manampa perubahan hai hong pambelum. (Roma 12:2) Tapi, itah masih perlu berjuang. Itah musti barendeng mangat sintan itah akan Karajaan Hatalla dia sasar balemu awi alasan narai bewei kilau panatau atawa kanahuang seksual je dia  patut. (Sewut Salomo 4:23; Mateus 5:27-29) Mangat itah tatap marega Karajaan Hatalla, Yehowa manenga itah panatau barega beken.

PELAYANAN ITAH MANYALAMAT PAMBELUM

8. (a) Mbuhen Paulus manyama pelayanan itah kilau panatau huang sarangan ramu bara petak? (b) Narai je ilalus Paulus uka mamparahan amun iye sinta dengan pelayana?

8 Yesus manugas itah uka mambarita tuntang majar barita bahalap tahiu Karajaan Hatalla. (Mateus 28:19, 20) Rasul Paulus mangesah amun pelayanan tuh kilau panatau huang sarangan ramu bara petak. (2 Korintus 4:7; 1 Timoteus 1:12) Awi dia sempurna, itah kilau sarangan ramu bara petak atawa balanai petak. Tapi barita bahalap je ingabar itah kilau panatau, awi barita tuh tau mahasil pambelum katatahi akan itah tuntang akan uluh beken je mahining. Awi te Rasul Paulus hamauh, ”Uras jete ilalusku akan Barita Bahalap bara Hatalla te, mangat aku kea tau tamput dinon berkat.” (1 Korintus 9:23) Hai usahan Paulus uka majar Karajaan Hatalla akan uluh beken. (Mbasa Roma 1:14, 15; 2 Timoteus 4:2.) Iye sinta tutu barita bahalap awi te iye tau harajur mangabar aluh ingapehe. (1 Tesalonika 2:2) Kilen ampi itah tau manyuntu Rasul Paulus?

Barita je ingabar itah kilau panatau, awi tau mahasil pambelum katatahi akan itah tuntang akan uluh je mahining

9. Narai je tau ilalus itah uka mamparahan amun itah sinta pelayanan?

9 Ije cara Paulus mamparahan amun iye sinta pelayana iete dengan mangesah akan uluh beken pea bewei tege kesempatan. Kilau Paulus tuntang uluh Kristen abad pangkasulak, itah kea handak mambagi barita bahalap akan kare uluh hong huma huma, hong eka umum, tuntang hong kueh bewei itah tau hasundau dengan ewen. (Gawin Rasul 5:42; 20:20) Itah handak bagawi labih are huang pelayanan sasuai dengan kaadaan itah. Suntu, itah tau manjadi perintis ekstra atawa perintis biasa, balajar bahasa beken, pindah akan luar kota, atawa akan negara beken.​—Gawin Rasul 16:9, 10.

10. Manpaat narai je indinun Irene awi mawi usaha je hai huang mangabar barita bahalap?

10 Ije biti pahari bawi bujang hong Amerika Serikat je ara Irene handak mangabar akan uluh je mahapan bahasa Rusia. Jadi hong nyelu 1993, iye umba dengan kelompok bahasa Rusia hong New York City. Metuh te, baya tege kira-kira 20 penyiar hong kanih. Limbah 20 nyelu, Irene hamauh, ”Bahasa Rusia-ku hindai lalau bahalap.” Tapi, Yehowa mandohop iye tuntang penyiar beken mangat tau mangabar hong bahasa te. Hasil’ah, wayah tuh tege jahawen ungkup je mahapan bahasa Rusia hong New York City. Are je balajar Alkitab dengan Irene, tuntang tege 15 je jadi impandui. Wayah tuh  tege je bagawi hong Betel, merintis, tuntang manjadi bakas ungkup. Irene hamauh, ”Metuh mamikir cita-cita beken je tau ingguangku, jituh je paling mampahanjak aku.” Irene sinta tutu dengan pelayana!

En Pahari sinta dinas tuntang manampa jadwal manggawi jite genep minggu? (Payah paragrap 11, 12)

11. Narai hasil’ah amun itah harajur badinas aluh ingapehe?

11 Amun itah sinta pelayanan, itah tau manyuntu Rasul Paulus tuntang tatap mangabar aluh ingapehe. (Gawin Rasul 14:19-22) Suntu, bara nyelu 1930 sampai nyelu 1944, kawan paharin itah hong Amerika Serikat paham ingapehe. Tapi ewen tatap badinas. Metuh pamarentah handak mampatende ewen, kawan pahari mimbit masalah tuh akan pengadilan tuntang ewen rancak manang. Hong nyelu 1943, Pahari Knorr mangesah ije bara kare kamanang itah hong Mahkamah Agung AS. Iye mansanan amun kasus kilau tuh dia sampai akan Pengadilan amun kawan pahari dia tatap badinas. Iye mansanan kea, awi kawan pahari hong hapus dunia tatap mangabar, ewen mambukti amun tantangan kilau te dia bahasil. Kawan pahari hong kare negara beken kea mandinun kamanang hong kasus hukum je sama. Awi sinta dengan pelayanan, itah dia akan tende aluh ingapehe.

12. Narai tekad Pahari?

12 Amun itah puna sinta dengan pelayanan itah, itah dia akan baya mamikir pire jam je handak ilapor itah. Itah akan malalus narai bewei uka ”mangabar barita bahalap”. (Gawin Rasul 20:24; 2 Timoteus 4:5) Tapi narai je akan iajar itah akan uluh beken? Jituh panatau beken je inenga Hatalla.

KATUTU JE BAREGA

13, 14. Narai riman kuan Yesus tahiu ’eka panatau’ hong Mateus 13:52, tuntang kilen ampi itah tau manyuang’ah?

13 Panatau katelu je inenga Yehowa  akan itah iete uras katutu je jadi ilajar itah. Bara Yehowa uras katutu. (2 Samuel 7:28; Yohanes 17:17) Tuntang, awi Bapa itah tau, Iye manenga akan itah kare katutu tuh. Itah mangatawa dengan mambasa Alkitab, publikasi, tuntang dengan dumah akan kebaktian tuntang pumpung genep minggu. Kuan Yesus, amun itah santar mangumpul katutu je indinun itah, itah akan tege ’eka panatau’ je huang’ah tege katutu ”je taheta tuntang je usang”. (Mbasa Mateus 13:52.) Amun itah manggau katutu tuh kilau manggau panatau je basilim, Yehowa akan manyuang ’eka panatau’ ayun itah. (Mbasa Sewut Salomo 2:4-7.) Kilen ampi cara?

14 Itah perlu harajur balajar Alkitab tuntang publikasi itah. Itah kea perlu mangali labih handalem. Dengan kalute, itah akan manyundau katutu ”je taheta” je hindai ingatawan itah. (Yosua 1:8, 9; Masmur 1:2, 3) Majalah Mambarita je pangkasulak impalua hong bulan Juli 1879 manyama katutu dengan kambang je basahukan hong marak tingen. Amun handak mandinu kambang kalute, ije biti uluh perlu manggau bua-buah. Tuntang metuh iye manyundau’ah, iye dia hanjak awi baya dinun ije kambang. Iye perlu manggau labih are kambang hindai. Kalute kea, ela mangkeme sukup amun itah manyundau baya ije katutu. Itah perlu basemangat manggau labih are hindai katutu.

15. Mbuhen tege katutu je inyewut katutu ”je usang”, tuntang je kueh je irajin Pahari?

15 Metuh nampara balajar Alkitab, itah mangatawan pire-pire katutu je bahalap. Jituh inyewut katutu ”je usang” awi jite je pangkasulak ingatawan itah. Narai bewei suntu? Sulak’ah, itah balajar amun Panjapa itah iete Yehowa, tuntang Iye tege tujua akan kalunen. Itah kea balajar amun Hatalla mautus Anak-Ai akan bumi uka matei manjadi tewusan mangat itah lapas bara dosa tuntang pampatei. Beken bara te, itah balajar amun Karajaan Hatalla akan mampatende uras kapehe, tuntang itah akan belum sanang palus katatahi hong bumi je damai.​—Yohanes 3:16; Pangarinah 4:11; 21:3, 4.

16. Narai je musti ilalus itah amun tege pemahaman katutun Alkitab je inyasuai?

16 Kanatek’ah, pemahaman itah tahiu tujum Alkitab atawa ije ayat mungkin perlu inyasuai. Metuh hal tuh manjadi, itah perlu balajar narai je inyasuai tuntang mangumang’ah. (Gawin Rasul 17:11; 1 Timoteus 4:15) Itah perlu mangatawan narai beda pemahaman je helu tuntang je taheta. Beken bara te, itah kea perlu mangatawan perincian bara pemahaman je taheta te. Dengan kalute, katutu taheta tuh pasti akan manjadi bagian bara ramu hong eka panatau katutun Alkitab ayun itah. Narai manpaat amun itah malalus uras hal tuh?

17, 18. Kilen ampi roh barasih tau mandohop itah?

17 Yesus majar amun roh barasih Hatalla tau mampingat itah akan kare hal je jadi ilajar itah. (Yohanes 14:25, 26) Narai manpaat hal tuh metuh itah mambarita kabar bahalap? Coba mikir pengalaman ije biti pahari je ara Peter. Metuh 1970 iye umur 19 nyelu  tuntang nampara bagawi hong Betel Inggris. Metuh mangabar bara huma kan huma, iye hasundau dengan ije biti uluh hatue bajanggut je labih bakas bara iye. Iye misek en uluh hatue tuh handak mengerti Alkitab. Uluh hatue tuh ije biti rabi Yahudi, tuntang iye tarewen awi anak tabela tuh handak majar iye Alkitab. Akan mauji Peter, iye misek, ”Amun kute ken, aku misek ikau. Buku Daniel te inyurat huang bahasa narai?” Peter tumbah, ”Belah’ah inyurat huang bahasa Aram.” Peter mingat, ”Rabi te tarewen, tapi aku labih tarewen awi aku tau katawan jawaba. Bara kueh aku katawa? Metuh buli, aku mariksa majalah Menara Pengawal tuntang Sedarlah! bara pire-pire bulan je jadi mahalau, aku mandinu artikel je manjelas amun buku Daniel inyurat huang bahasa Aram.” (Daniel 2:4) Jadi, roh barasih tau mampingat itah akan kare hal je jadi imbasa tuntang iingkes huang ramu eka panatau itah.​—Lukas 12:11, 12; 21:13-15.

18 Amun itah sinta tuntang marega kare katutu je ilajar itah bara Yehowa, itah sasar handak manambah panatau huang ramu eka panatau itah. Sasar rancak itah malalus hal te, itah akan sasar siap uka majar uluh beken.

KELEH MANGALINDUNG PANATAU PAHARI

19. Mbuhen itah musti mangalindung panatau rohani itah?

19 Artikel tuh majar itah penting tutu marega panatau rohani itah. Tapi, itah musti rende-rendeng awi Setan tuntang dunia tuh handak mampalemu sinta itah akan panatau tuh. Amun itah dia bua-buah, itah tau buah pengaruh awi kare janji tahiu gawi je mahasil are duit tuntang mipen belum mangat atawa kahandak mampatamam panatau. Rasul Yohanes mampingat itah amun dunia tuh tuntang uras je injanji dia pire hindai lilap. (1 Yohanes 2:15-17) Jadi, itah musti harajur marega tuntang mangalindung panatau rohani itah.

20. Narai je handak ilalus Pahari uka mangalindung panatau rohani Pahari?

20 Keleh pahias malapas narai bewei je tau mampalemu sintan Pahari akan Karajaan Hatalla. Keleh batekad mangabar dengan basemangat tuntang ela peda badinas. Tarus nggau katutun Alkitab. Dengan kalute, Pahari akan sasar are ”Ramo je inyimpan hong sorga. Panatau jete dia tau nihau basa maling dia olih manduae tuntang gagat dia tau marusake. Basa hong kueh panatau keton, intu hete kea atei keton!”​—Lukas 12:33, 34.