Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Juni 2017

Yehowa Mandehen Itah Metuh Itah Manaharep Kapehe

Yehowa Mandehen Itah Metuh Itah Manaharep Kapehe

”Hatalla je mandehen pambelom hambaruan oloh kalunen . . . Mandehen atei-huang ikei hong gagenep kapehe je ingkeme ikei.”​—2 KORINTUS 1:3, 4.

NYANYIN: 38, 56

1, 2. Kilen ampi Yehowa mahibur itah metuh itah manaharep masalah, tuntang narai je injanji Yehowa huang Alkitab?

IJE BITI pahari tabela je masih bujang mangumang auh hong 1 Korintus 7:28. Ayat tuh mansanan amun uluh je kawin ”kareh manaharep are kasusah”. Limbah te, pahari tuh misek dengan ije biti bakas ungkup je jadi kawin tuntang tege pangalama, ”Kasusah narai je akan inaharep, tuntang amun aku kawin, kilen ampi cara manaharep’ah?” Helu bara manjawab paisek te, bakas ungkup tuh balaku pahari jituh mamikir auh Rasul Paulus je mansanan amun Yehowa ”Hatalla je mandehen pambelom hambaruan oloh kalunen. Ie mandehen atei-huang ikei hong gagenep kapehe je ingkeme ikei”.​—2 Korintus 1:3, 4.

2 Itah katawan amun Bapa itah, Yehowa, sinta itah tuntang siap mandehen atawa mahibur metuh itah manaharep masalah. Pahari mungkin ingat metuh Yehowa  manenga dukungan tuntang maninting Pahari mahalau kare auh kutak hong Alkitab. Percaya ih amun Yehowa handak Pahari mandinun je pangkahalap. Jituh je ilalus Yehowa akan kare rewar-Ai hong jaman huran.​—Mbasa Yeremia 29:11, 12.

3. Narai kare paisek je akan injawab hong artikel tuh?

3 Bahut, itah labih purah manaharep masalah tuntang kasusah amun itah katawan sabab’ah. Jadi, mbuhen masalah tau sampai manjadi huang pangawin atawa keluarga itah? Tuntang, suntu eweh bara Alkitab atawa bara jaman wayah tuh je tau mahibur itah? Ayo itah manggau jawaba mangat itah tau tahan manaharep kare kapehe.

MASALAH HUANG PANGAWIN

4, 5. Masalah narai je mungkin inaharep uluh je jadi kawin?

4 Limbah manampa uluh bawi je pangkasulak, Yehowa mimbit iye akan uluh hatue je pangkasulak, tuntang bawi tuh manjadi sawa. Limbah te Yehowa hamauh, ”Oloh hatue malihi bapae tuntang indue, tuntang hinje dengan sawae, balalu kadadue te manjadi ije.” (Genesis 2:24) Puna, itah uras dia sempurna. (Roma 3:23) Awi te, metuh uluh hatue tuntang uluh bawi kawin, ewen akan manaharep masalah. Suntu, metuh uluh bawi hindai kawin iye musti manumun narai kuan uluh bakas’ah. Tapi, Alkitab mansanan amun jadi kawin, kapala bara uluh bawi iete hatue. (1 Korintus 11:3) Sulak’ah, mungkin dia purah akan uluh hatue manenga petunjuk akan sawa. Sawa kea mungkin labih bahali manarima petunjuk bana bara manarima petunjuk uluh bakas’ah. Beken bara te, metuh haru kawin, uluh je jadi kawin mungkin dia cocok dengan empu tuntang sindah ewen, tuntang hal tuh tau manampa kapehe.

5 Coba mikir kea narai je ingkeme uluh je jadi kawin amun ewen mangatawan ewen handak dinun anak. Aluh ewen hanjak tutu, tapi ewen kea tege angat kikeh. Ewen mungkin bapikir en uras’ah tau lancar tuntang en awau akan lahir barigas. Beken bara te, ongkos pambelum ewen pasti batambah. Limbah anak te lahir, tege are hal je perlu iubah. Indu labih are waktu akan maurus anak. Jadi, ewen due dia lalau are waktu akan manantuani kabalin ewen kilau helu. Bapa kea labih are tanggung jawab. Iye musti mamasti narai je imerlu sawa tuntang anak’ah sukup.

6-8. Narai je mungkin ingkeme awi uluh je jadi kawin amun ewen tamanang?

6 Pire-pire uluh je jadi kawin manaharep masalah beken. Ewen puna handak tege anak tapi dia tau. Metuh uluh bawi je jadi kawin dia tau batihi, iye mungkin pehe atei. (Sewut Salomo 13:12) Hong jaman Alkitab, penting tutu akan uluh bawi uka kawin tuntang tege anak. Jite sabab’ah sawan Yakub, Rahel, pehe atei tutu awi iye tamanang padahal kaka dia. (Genesis 30:1, 2) Wayah tuh, hong pire-pire negara, are uluh maanggap tege anak te penting tutu. Kare utusan injil je melai hong kare negara kilau tuh rancak iisek  mbuhen ewen jatun anak. Aluh utusan injil te manenga penjelasan je paling bahalap akan ewen, tege je tatap hamauh, ”Oh, kareh ikei balakudoa akan ketun lah.”

7 Coba mikir suntu beken. Ije biti pahari bawi hong Inggris handak tutu tege anak. Tapi metuh iye mangatawan amun iye dia tau manak wayah tuh, atei’ah hancur. Limbah te, iye tuntang bana mamutus uka maangkat anak. Tapi kanatek’ah iye masih tau mangkeme pehe atei. Iye hamauh, ”Aku katawan, puna dia sama angat’ah anak angkat dengan anak kabuat.”

8 Alkitab mansanan amun ije biti ”oloh bawi akan salamat awie luas anake”. (1 Timoteus 2:15) Tapi, jituh dia baarti amun uluh bawi tege anak iye pasti mandinun pambelum katatahi. Jadi, narai riman ayat tuh? Ije biti ibu akan deroh maurus anak tuntang huma. Jadi, jatun hindai waktu aka bagosip atawa umba campur urusan uluh beken. (1 Timoteus 5:13) Tapi, iye dia lapas bara masalah pangawin tuntang keluarga.

Yehowa jadi manenga are janji huang Alkitab uka mahibur itah metuh manaharep kapehe

9. Kapehe narai hindai je mungkin inaharep uluh je jadi kawin?

9 Kapehe beken je mungkin inaharep uluh je jadi kawin iete amun kabali matei. Tege je mungkin bapikir hal tuh dia akan manjadi dengan ewen. Tapi, are je musti manaharep kapehe tuh. Uluh Kristen tahibur awi yakin dengan janji kamisik. (Yohanes 5:28, 29) Yehowa, Bapa itah, jadi manenga are janji huang Alkitab uka mahibur itah metuh manaharep kapehe. Tuh, ayo itah manampayah kilen ampi Yehowa mahibur tuntang mandohop rewar-Ai.

Amun kabalin itah matei, narai bewei je tau mahibur itah? (Payah paragrap 9, 12)

INDEHEN METUH MANAHAREP KAPEHE

10. Narai je mandehen Hana? (Payah gambar hong tamparan artikel.)

10 Coba mikir narai je manjadi dengan Hana, sawan Elkana je paling inyinta. Iye handak tege anak tapi dia tau. Tapi, sawan bana je beken, Penina, are anak. (Mbasa 1 Samuel 1:4-7.) Je manampa labih babehat, Penina manawah Hana ”sining nyelo” awi iye tamanang. Atei Hana pehe tutu. Jadi, narai je ilalus Hana? Iye balakudoa dengan Yehowa. Hana mahin sampai haguet akan human Yehowa tuntang balakudoa tahi tutu. Iye balaku ije biti anak hatue bara Yehowa, tuntang iye percaya Yehowa akan mandohop. Limbah balakudoa, atei’ah salawah tuntang ”ie dia kapehe atei tinai”. (1 Samuel 1:12, 17, 18) Iye yakin amun Yehowa tau manenga iye ije biti anak hatue atawa mahibur iye dengan cara beken.

11. Kilen ampi lakudoa tau mahibur itah?

11 Awi itah dia sempurna tuntang belum hong dunia Setan, itah masih akan manaharep masalah. (1 Yohanes 5:19) Tapi, itah tau balakudoa dengan  Yehowa, ”Hatalla je mandehen”. Jite je ilalus Hana. Iye manusuh angat atei’ah akan Yehowa tuntang balaku pandohop-Ai. Jadi, metuh itah manaharep kapehe, ela baya mansanan masalah itah akan Yehowa. Itah perlu balaku Pandohop’ah tuntang mangesah uras kilen ampi sapuna angat atei itah.​—Pilippi 4:6, 7.

12. Mbuhen Hana tau tatap sanang aluh manaharep masalah?

12 Amun itah jatun anak atawa ilihi matei awi uluh je inyinta itah, perasaan itah mungkin hancur. Tapi tege je tau mahibur itah. Coba mikir suntu Hana je belum hong jaman Yesus. Baya uju nyelu limbah iye kawin, bana matei. Ampi lagu, iye jatun anak. Tapi, narai je mahibur iye? ”Dia puji ie malihi Human [Yehowa].” Aluh umur’ah jadi 84 nyelu, Hana masih mangguang bait uka balakudoa tuntang manyembah Yehowa. (Lukas 2:37) Jite je mahibur iye tuntang mandohop iye tau tatap sanang aluh manaharep kapehe.

13. Amun itah pehe atei awi keluarga, kilen ampi sobat tau mahibur itah?

13 Sobat itah hong ungkup tau mahibur itah kea. (Sewut Salomo 18:24) Umur Paula haru lime nyelu metuh indu tende manempu Yehowa. Paula pehe atei, tuntang kaadaan tuh babehat aka. Tapi tege ije biti perintis je ara Ann harajur manenga semangat aka tuntang paduli denga. Paula mansanan, ”Aluh Ann beken keluargaku, katau te mandohop aku. Jite je manampa aku harajur manempu Yehowa. Tuh, Paula hanjak tutu awi iye tuntang indu tau sama-sama hindai manempu Yehowa hong ungkup. Ann hanjak kea awi tau mandohop Paula uka harajur manempu Yehowa.

14. Narai manpaat’ah amun itah mahibur uluh beken?

14 Amun itah rancak malalus kahalap akan uluh beken, bahut jite manampa itah talingau dengan masalah itah  kabuat. Suntu, are pahari je masih bujang atawa jadi kawin, katawan amun ewen badinas, ewen bagawi dengan Yehowa tuntang malalus kahandak-Ai. Jituh manampa ewen sanang. Sapuna, itah uras tau mamparahan amun itah paduli dengan uluh beken iete dengan mangesah barita bahalap akan ewen. Tuntang, itah tau sasar rantep dengan kawan paharin itah, amun itah malalus kahalap akan ewen. (Pilippi 2:4) Jituh je ilalus awi Rasul Paulus. Iye paduli dengan uluh beken ”sama kilau ije biti ibu je halaluan kare kawan anake”. Paulus kea mahibur tuntang manenga semangat akan kawan pahari ”sama kilau ije biti bapa halaluan kare anake”.​—Mbasa 1 Tesalonika 2:7, 11, 12.

 CARA KELUARGA INDEHEN

15. Majar kare anak tahiu Yehowa te tanggung jawab eweh?

15 Kilen ampi itah tau mahibur kare keluarga hong ungkup? Kanatek’ah, kawan pahari je masih taheta huang katutu mungkin balaku pandohop itah uka majar anak ewen tahiu Yehowa. Alkitab mamparahan amun Yehowa manenga tanggung jawab akan uluh bakas uka majar tuntang malatih anak ewen. (Sewut Salomo 23:22; Epesus 6:1-4) Aluh hong pire-pire kaadaan uluh beken mungkin tau mandohop, penting tutu akan uluh bakas uka majar anak ewen kabuat. Uluh bakas perlu harajur bapander dengan kawan anak ewen.

Uluh bakas perlu harajur bapander dengan kawan anak ewen

16. Metuh majar anak uluhan, narai je musti iingat itah?

16 Amun tege uluh bakas Kristen je balaku itah majar anak ewen, itah musti mingat amun itah beken uluh bakas anak te. Kanatek’ah, itah mungkin majar Alkitab akan anak je uluh bakas’ah beken Saksi-Saksi Yehowa. Metuh majar anak uluh beken, Pahari musti malalus hal te hong human ewen metuh uluh bakas’ah atawa uluh Kristen matang beken tege hong huma, atawa balajar denga hong eka je tau gitan uluh. Dengan kalute, uluh beken dia akan bapikir macam-macam. Tuntang mungkin tege katika, uluh bakas anak te tau majar anak ewen kabuat tahiu Yehowa.

17. Narai je tau ilalus anak uka mahibur keluarga ewen?

17 Anak je jadi balajar tahiu Yehowa, tau mahibur tuntang mampaabas keluarga ewen. Kilen ampi cara? Dengan mahormat uluh bakas ewen tuntang bausaha mandohop ewen. Beken bara te, amun anak tatap baketep dengan Yehowa, uras uluh hong keluarga pasti impaabas. Helu bara Danum Suhu, tege ije biti rewar Yehowa je ara Lamekh. Iye hamauh tahiu Noah, anak’ah, ”Ie toh kareh mampong itah tagal gawin itah tuntang tagal kare kaheka lengen itah, tagal petak tana, idje djari injapa [Yehowa].” Auh tuh manjadi limbah Danum Suhu, iete metuh Yehowa manjawut sapa bara petak. (Genesis 5:29, Surat Barasih 1983; Genesis 8:21) Wayah tuh kea, anak je baketep dengan Yehowa tau mahibur uluh bakas ewen. Ewen tau mandohop keluarga ewen uka tahan manaharep kapehe je tege wayah tuh tuntang andau harian.

18. Narai je tau mandohop itah tahan manaharep kapehe?

18 Wayah tuh bajuta rewar Yehowa indehen awi lakudoa, mangumang suntu bahalap bara Alkitab, tuntang awi tege sobat hong ungkup. (Mbasa Masmur 145:18, 19.) Yakin ih amun Yehowa santar siap mahibur itah tuntang mandohop itah tahan manaharep masalah narai bewei!