”Keleh ewen katawan baya Ikau bewei Je Pangkahai, [Yehowa], je manguasa hapus petak.”​—MASMUR 83:19.

NYANYIN: 46, 136

1, 2. (a) Sapuna, narai hal je paling penting akan hapus kalunen? (b) Mbuhen hal tuh penting tutu akan itah?

AKAN are uluh wayah tuh, duit hal je paling penting. Ewen baya mamikir duit. Ewen mahapan are waktu akan manggau labih are duit tuntang manabung. Akan je beken, je paling penting iete keluarga, karigas, atawa cita-cita.

2 Tapi, tege hal je labih penting bara uras hal te. Hal tuh iete mambukti amun baya Hatalla je tege hak marentah. Itah musti harajur mamikir hal tuh. Amun itah laya, kaderoh genep andau atawa masalah je inaharep itah tau manampa itah mangalapean sapire penting hal tuh. Sapuna, dengan mendukung hak Hatalla uka marentah, itah tau manaharep kare masalah genep andau dengan labih bahalap, tuntang itah akan sasar rantep dengan Yehowa.

MBUHEN HAL TUH PENTING?

3. Narai auh dawan Setan tahiu cara Hatalla marentah?

3 Setan Iblis manampa tanjaru je manyewut Hatalla  sapuna jatun hak uka marentah. Setan handak mangat kalunen bapikir amun cara Hatalla marentah te jahat tuntang Iye dia peduli dengan itah. Setan sapuna mansanan amun kalunen akan labih sanang amun ewen marentah arep ewen kabuat. (Genesis 3:1-5) Iye kea mansanan amun jatunti kalunen je akan tatap baketep dengan Hatalla amun pambelum ewen huang penda bahaya. (Yob 2:4, 5) Jadi, Yehowa manenga waktu uka mambukti akan uras taluh je Injapa amun belum lapas bara parentah Hatalla pasti pehe tutu.

4. Mbuhen masalah tahiu eweh je tege hak marentah musti imberes?

4 Sapuna, Yehowa mangatawan amun dawan Setan tuh dia bujur. Jadi, mbuhen Hatalla perlu manenga waktu? Awi dengan kalute, kalunen tuntang malekat tau manampayah tuntang mambukti kabuat en dawa te bujur atawa dia. (Mbasa Masmur 83:19.) Adam tuntang Hawa dia handak irentah awi Hatalla. Limbah te, are je malalus hal je sama. Awi te, tege je mungkin bapikir amun dawan Setan te bujur. Amun masalah tuh dia imberes, jituh akan manderoh pikiran kalunen tuntang malekat je tau manampa kadamai tuntang kapakat dia tau manjadi. Tapi, limbah tege bukti amun puna Yehowa je tege hak marentah, uras taluh je Injapa hong alam semesta akan belum damai hong penda pamarentahan-Ai akan katatahi.​—Epesus 1:9, 10.

5. Kilen ampi cara itah umba mendukung hak Hatalla marentah?

5 Dia pire hindai akan tabukti amun baya Hatalla bewei je tege hak marentah. Pamarentahan Setan tuntang kalunen akan tabukti buju-bujur dia bahasil tuntang akan imparutek. Pamarentahan Hatalla mahalau Karajaan Mesias-Ai akan bahasil. Kare uluh je baketep akan manjadi bukti amun kalunen tau tatap baketep dengan Hatalla tuntang manenga dukungan akan pamarentahan-Ai. (Yesaya 45:23, 24) En itah handak kilau ewen? Pasti. Jadi, itah perlu mangatawan amun sapuna hal tuh penting tutu.

HAK HATALLA MARENTAH IMBUKTI LABIH PENTING BARA ITAH INYALAMAT

6. Sapire penting hak Hatalla uka marentah imbukti?

6 Hak Yehowa marentah imbukti jite labih penting bara kasanang itah kabuat. Tapi jite beken rima Yehowa dia peduli en itah salamat atawa dia. Narai bukti?

Hak Yehowa marentah imbukti labih penting bara itah inyalamat tuntang kasanang itah kabuat

7, 8. Narai manpaat akan itah amun hak Hatalla uka marentah imbukti?

7 Yehowa sinta tutu dengan kalunen. Bukti, Iye pahias manenga Anak-Ai mangat itah mandinun pambelum katatahi. (Yohanes 3:16; 1 Yohanes 4:9) Amun Yehowa dia malalus kare janji, jite rima dawan Setan tuntang kare musuh Hatalla je beken bujur. Setan mandawa Yehowa pananjaru je dia peduli dengan kalunen tuntang cara Iye marentah dia adil. Kare musuh Hatalla mambaka janjin-Ai tuntang hamauh, ”Koan keton [Tuan]  bajanji akan dumah! Toh kueh ie? Kare tato hiang itah jari matei, tapi taloh handiai sama ih ampie kilau bara metoh langit petak injapa!” (2 Petrus 3:3, 4) Tapi, Yehowa pasti malalus kare janjin-Ai. Dengan bajanji manyalamat kalunen je panumun kea, Yehowa mambukti hak-Ai uka marentah. (Mbasa Yesaya 55:10, 11.) Dasar bara pamarentahan Yehowa iete sinta. Jadi, itah tau yakin amun Iye santar sinta tuntang marega kare rewar-Ai je baketep.​—Eksodus 34:6.

8 Jadi, mendukung hak Yehowa uka marentah iete hal je paling penting. Tapi, jituh beken rima Iye dia peduli en itah salamat atawa dia. Yehowa sinta tutu dengan itah. Itah perlu harajur mingat narai je paling penting tuntang manenga dukungan akan pamarentahan Yehowa.

CARA BAPIKIR YOB HUBAH

9. Narai auh dawan Setan tahiu Yob? (Payah gambar hong tamparan artikel.)

9 Uka mendukung hak Hatalla marentah, itah perlu tege cara bapikir je bujur. Itah tau manampayah jituh dengan mambasa buku Yob, ije bara kare buku Alkitab je inyurat pangkasulak. Buku tuh mangesah tahiu dawan Setan je mansanan amun Yob ingapehe, iye akan malihi Hatalla. Setan nyamah balaku Hatalla mangapehe Yob. Yehowa di handak malalus’ah. Tapi, Hatalla manalua Setan mauji Yob dengan hamauh, ”Taloh handiai idje ajue uras huang lengem.” (Mbasa Yob 1:7-12, Surat Barasih 1983.) Dia tahi limbah te, kare panatau tuntang jipen Yob uras nihau. Dia pire limbah te, iye mahining kabar amun sapuluh anak’ah matei. Setan manampa kilau uras kapehe tuh dumah bara Yehowa. (Yob 1:13-19) Limbah te, Setan manampa Yob buah panyakit je bakaike-ikeh tuntang mangapehe. (Yob 2:7) Beken bara te, sawa kabuat tuntang telu sobat palsu mampalembut auh kutak je manampa iye kurik atei tuntang pehe atei.​—Yob 2:9; 3:11; 16:2.

10. (a) Kilen ampi Yob mamparahan kaketep’ah akan Hatalla? (b) Mbuhen cara bapikir Yob perlu inyasuai?

10 En auh dawan Setan bujur? Dia. Aluh Yob paham kapehe, iye dia puji malihi Yehowa. (Yob 27:5, Terjemahan Dunia baru) Tapi, cara bapikir Yob sampet sala. Iye rancak mansanan amun iye dia basala. Yob kea mangkeme amun iye perlu mangatawan sabab kapehe je ingkeme. (Yob 7:20; 13:24) Itah mungkin paham narai je ingkeme Yob. Tapi, Yehowa katawan amun cara bapikir Yob sala tuntang Iye mandohop Yob manyasuai cara bapikir’ah. Kilen ampi cara?

11, 12. Narai je handak iajar Yehowa akan Yob, tuntang kilen ampi tanggapan Yob?

11 Kare auh Yehowa dengan Yob incatat hong buku Yob pasal 38 sampai 41. Yehowa dia mangesah narai sabab kapehe Yob. Tapi, Yehowa handak mandohop Yob paham amun iye jatun nara-narai amun imbanding dengan Hatalla. Hatalla majar Yob tege hal je labih penting bara kapehe je inaharep Yob. (Mbasa Yob 38:18-20.) Auh Yehowa mandohop Yob manyasuai cara bapikir’ah.

12 En kah auh Yehowa dengan Yob lalau kasar padahal Yob haru manaharep are kapehe? Dia. Tuntang Yob kabuat mangaku hal tuh. Yob paham tuntang  marega nasehat Hatalla. Iye mahin hamauh, ”Aku mahamen mingat kare auhku tuntang dengan kanyasalku, aku mondok hong petak tuntang kawo.” (Yob 42:1-6) Helu bara te, tege kea ije biti uluh hatue tabela je ara Elihu je mandohop Yob manyasuai cara bapikir’ah. (Yob 32:5-10) Limbah Yob mahining nasehat pamasi bara Yehowa tuntang maubah cara bapikir’ah, Yehowa mansanan akan uluh beken amun Iye sanang dengan kaketep Yob.​—Yob 42:7, 8.

13. Kilen ampi nasehat Yehowa tau mandohop Yob limbah kare kapehe je ingkeme terai?

13 Nasehat Yehowa masih baguna akan Yob limbah kare kapehe je ingkeme terai. ”Yob imberkat [Yehowa] labih are hong tisan pambelome, bara metoh pambelome helo bara ie buah calaka.” Iye kea ”mandino uju biti anak hatue tuntang telo biti anak bawi”. (Yob 42:12-14) Yob pasti sinta dengan kare anak tuh. Tapi iye mungkin taharu dengan kare anak’ah je jadi matei. Iye kea mungkin masih mingat dengan kapehe je mawi iye tuntang keluarga. Aluh amun Yob kajaria mangatawan narai je manampa iye kana kapehe, iye mungkin tatap bingung mbuhen Hatalla manalua iye musti manaharep kapehe je hai kalute. Amun jituh je imikir Yob, iye tau mingat nasehat Yehowa. Jite pasti mahibur iye tuntang mandohop iye bapikir dengan cara bapikir je bujur.​—Masmur 94:19.

En itah tau labih mamikir hak Yehowa uka marentah bara mamikir masalah itah kabuat? (Payah paragrap 14)

14. Palajaran narai je indinun itah bara kesah Yob?

14 Dengan mangumang kesah Yob, itah tau tahibur tuntang manyasuai cara bapikir itah. Buku Yob ije bara kare catatan je inamean Yehowa huang Alkitab ”Hapa majar itah. Basa auh ajar je inarima itah bara Surat Barasih mawi itah baketep tuntang abas.” (Roma 15:4) Buku Yob manenga palajaran je bahalap akan itah iete: Ela lalau mamikir kapehen itah kabuat sampai itah dia hindai mendukung  hak Hatalla marentah. Kilau Yob, itah handak mendukung hak Hatalla uka marentah dengan tatap baketep Denga aluh manaharep kapehe.

15. Narai hasil’ah amun itah baketep aluh manaharep kapehe?

15 Kesah Yob tau mahibur itah kea. Kesah tuh mamparahan amun itah manaharep kapehe, jite beken tanda amun Yehowa basingi dengan itah. Metuh itah manaharep kapehe, jite kesempatan akan itah uka mandukung hak Yehowa uka marentah. (Sewut Salomo 27:11) Amun itah tatap baketep tuntang tahan manyarenan kapehe, Yehowa akan sanang, tuntang harapan itah akan sasar dehen. (Mbasa Roma 5:3-5.) Kesah Yob mamparahan amun ”[Yehowa] te pamasi tuntang bahalap atei Aie”. (Yakobus 5:11) Amun itah mendukung pamarentahan Yehowa, Iye akan mamberkat itah. Dengan kalute, itah ”olih manyarenan kakare kapehe dengan sabar tuntang dengan sanang atei”.​—Kolose 1:11.

TARUS MINGAT HAL JE PALING PENTING

16. Mbuhen itah perlu tatap mingat amun hak Yehowa marentah imbukti jite penting tutu?

16 Metuh itah manaharep kapehe, dia purah uka tarus mingat amun hak Yehowa marentah imbukti te puna penting. Aluh masalah te kurik, tau gitan hai tutu amun itah lalau mamikir’ah. Jadi, itah perlu harajur mendukung pamarentahan Hatalla aluh manaharep kapehe je hai.

Amun itah tatap sibuk hong organisasi Yehowa, jite manampa itah labih purah uka tarus mingat hal je paling penting

17. Narai manpaat’ah amun itah tatap sibuk huang organisasi Yehowa?

17 Amun itah tatap sibuk hong organisasi Yehowa, jite manampa itah labih purah uka tarus mingat hal je paling penting. Suntu, ije biti pahari bawi je ara Renee kana stroke, kanker, tuntang bereng’ah harajur pehe. Metuh hong rumah sakit, iye mangabar akan kakare uluh je bagawi hong hete, pasien beken, tuntang uluh je maja. Metuh Renee  melai rumah sakit katahin due minggu satengah, iye mangabar katahin 80 jam. Renee katawan amun iye dia pire akan matei. Tapi, iye dia mangalapean narai je buju-bujur penting. Mendukung hak Hatalla uka marentah manampa iye tenang.

18. Narai je tau ilajar itah bara pangalaman Jennifer?

18 Itah kea tau mendukung hak Hatalla uka marentah metuh manaharep masalah genep andau. Ije biti pahari bawi je ara Jennifer musti manunggu katahin telu andau hong bandara. Pire-pire pesawat je cagar indai santar balang tulak. Jite manampa iye heka tuntang kesepian. Iye tau ih nampara masi arep’ah kabuat. Tapi, iye balakudoa dengan Yehowa mangat tau mangabar akan uluh beken je manunggu hong bandara te kea. Ije kajaria tau mangabar akan are uluh tuntang mambagi are basaan. Jennifer hamauh, ”Aluh manaharep masalah tuh, aku mangkeme Yehowa buju-bujur mamberkat tuntang mampaabas aku uka manara Ara.”

19. Narai tanda ibadat je bujur?

19 Baya rewar Yehowa je buju-bujur mengerti amun mambukti Yehowa ih je tege hak marentah te penting. Jituh mamparahan amun ibadat ewen iete ibadat je bujur. Jadi, itah uras perlu mingat uka harajur mendukung hak Hatalla uka marentah.

20. Kilen ampi angat atei Yehowa tahiu uras je ilalus Pahari Aka?

20 Yehowa manantuani tuntang marega uras je ilalus Pahari uka mendukung hak-Ai uka marentah, kilau kaketep Pahari metuh manaharep kapehe. (Masmur 18:26) Artikel limbah tuh akan manjelas labih are mbuhen itah perlu mendukung hak Yehowa uka marentah tuntang cara itah tau manenga dukungan.