Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Juli 2017

Keleh Yehowa Manampa Kare Rencanam Bahasil

Keleh Yehowa Manampa Kare Rencanam Bahasil

”Keleh manggau kasanang intu TUHAN, Ie kareh manggenep kanahuang ateim.”​—MASMUR 37:4.

NYANYIN: 89140

1. Keputusan narai je musti inampa anak tabela, tuntang mbuhen ewen dia perlu lalau mikeh? (Payah gambar hong tamparan artikel.)

KETUN anak tabela mungkin setuju amun helu bara manampa jalanan, ketun perlu mamutus helu akan kueh ketun handak manampa jalanan. Pambelum sama kilau manampa jalanan. Jadi bara wayah tuh, ketun musti manampa rencana akan kueh jalanan ketun. Manampa rencana kilau te dia purah. Ije biti bawi tabela je ara Heather hamauh, ”Sabujur’ah aku mikeh, awi keputusangku wayah tuh tau mampengaruh hapus pambelumku jeha.” Amun ikau mangkeme kilau te, mingat auh Yehowa, ”Ela mikeh awi Aku mampahayak ikau, ela meles, awi Aku Hatallam. Ikau akan indeheng-Ku tuntang indohop-Ku.”​—Yesaya 41:10.

2. Narai bukti amun Yehowa handak ketun sanang hong harian andau?

2 Yehowa handak ketun manampa rencana je bahalap akan arep ketun hong harian andau. (Pangabar 12:1; Mateus 6:20) Iye handak ketun sanang. Jituh imbukti bara narai je inampayah, ihining, tuntang je ingkeme itah bara taluh je  Injapa. Yehowa kea peduli dengan itah huang kare hal beken. Iye manenga akan itah nasehat tuntang majar cara belum je bahalap. Jadi, Iye dia rajin metuh uluh manolak nasehat-Ai. Iye hamauh dengan ewen je manolak nasehat-Ai, ’Oloh je manyembah Aku akan hanjak, tapi keton impahawen. Toto haliai, ewen akan basasurak hanjak, tapi keton manangis rundu-rundu.’ (Yesaya 65:12-14) Amun ketun manampa keputusan je bahalap, ketun manara Hatalla.​—Sewut Salomo 27:11.

RENCANA JE AKAN MANAMPA IKAU SANANG

3. Narai kahandak Yehowa dengan ketun?

3 Narai kahandak Yehowa dengan ketun? Yehowa manampa kalunen dengan kebutuhan rohani. Jadi mangat tau sanang, ketun perlu mangasene Yehowa tuntang manempu Iye. (Masmur 128:1; Mateus 5:3) Metu baya kuman, mihup, tuntang manak manjaria. Tapi, Yehowa handak kalunen manampa rencana je akan manampa pambelum ewen hanjak tuntang barega. Je Manjapa itah ”Hatalla je tempon sinta” tuntang ”Hatalla je sanang”, je manjapa kalunen ”hatamunan Arepe”. (2 Korintus 13:11; 1 Timoteus 1:11, Terjemahan Dunia Baru; Genesis 1:27) Ketun akan sanang amun ketun manyuntu Hatalla je sinta dengan ketun. Alkitab mansanan, ”Labih mangat manenga bara manarima.” (Gawin Rasul 20:35) Ketun pasti puji mangkeme kabujur auh tuh. Jituh prinsip dasar hong pambelum. Jadi, Yehowa handak ketun manampa rencana je indasar awi sinta akan sama arep tuntang Denga.​—Mbasa Mateus 22:36-39.

Ketun akan sanang amun ketun mamparahan sinta

4, 5. Narai je manampa Yesus sanang?

4 Yesus Kristus suntu je paling bahalap akan ketun uluh tabela. Metuh iye masih anak uluhan, iye pasti hanjak bangang dengan anak uluhan beken. Kilau je insanan Alkitab, tege ”katika akan tatawe” tuntang ”katika akan manari”. (Pangabar 3:4) Beken bara te, Yesus rantep dengan Yehowa awi iye balajar Surat Barasih. Metuh iye umur 12 nyelu, kare guru hong bait tarewen dengan ”auh tombah Ayue je cerdas te.”​—Lukas 2:42, 46, 47.

5 Metuh Yesus jadi dewasa, iye sanang awi malalus narai je ilaku Hatalla. Suntu, Hatalla handak mangat iye ”mansanan Barita Bahalap akan oloh je belom susah” tuntang ”karigas akan oloh babute”. (Lukas 4:18) Masmur 40:9 mangesah narai je ingkeme Yesus, ”Aku sanang malalus kahandak Ayum, o Hatalla.” Yesus rajin mangesah tahiu Bapa akan uluh beken. (Mbasa Lukas 10:21.) Sinde katika, limbah bapander dengan ije biti uluh bawi tahiu ibadat je bujur, Yesus hamauh dengan kare murid ai, ”Panginangku iete malalus kahandak Ayue je manyoho Aku tuntang mampajadi gawi je inyarah Awie akang-Ku.” (Yohanes 4:31-34) Yesus sanang awi iye malalus kare hal je mampahanjak Hatalla tuntang uluh beken. Amun ketun malalus hal je sama, ketun kea akan sanang.

6. Narai guna mangesah rencana ketun hong harian andau akan uluh beken?

 6 Are kawan pahari je nampara merintis metuh katabelan ewen. Jituh manampa ewen sanang. Coba ngesah rencana ketun akan ewen. ”Rencana gagal, amon dia inirok bua-buah; rencana aton hasile, amon are je manenga nasehat.” (Sewut Salomo 15:22) Ewen mungkin akan bakesah amun merintis iete pelatihan je baguna akan hapus pambelum. Helu bara muhun akan bumi, Yesus balajar are hal bara Bapa. Limbah te, katahin pelayana hong bumi, iye tatap balajar. Iye sanang awi mangabar akan uluh beken tuntang baketep katahin wayah kapehe. (Mbasa Yesaya 50:4; Ibrani 5:8; 12:2) Ayo itah mambahas mbuhen dinas sepenuh waktu tau manampa ketun sanang.

MBUHEN MANAMPA MURID TE GAWI JE PALING BAHALAP?

7. Mbuhen are anak tabela sanang manampa murid?

7 Yesus marentah itah uka manampa murid tuntang majar uluh beken. (Mateus 28:19, 20) Amun gawi tuh manjadi tujuan pambelum ketun, ketun akan sanang tuntang kea tau mimbit tara akan Hatalla. Sama kilau gawi je beken, perlu waktu mangat apik manggawi. Ije biti pahari je ara Timothy je nampara merintis metuh katabela hamauh, ”Aku hanjak melayani Yehowa sepenuh waktu, awi dengan cara tuh aku mamparahan amun aku sinta Denga. Sulak’ah, jatun je balajar Alkitab dengangku. Tapi, limbah pindah akan daerah beken, huang ije bulan tege pire-pire je balajar Alkitab dengangku. Ije bara kare je balajar Alkitab dengangku nampara dumah akan pumpung. Limbah aku umba Sekolah Alkitab bagi Saudara Lajang katahin due bulan, aku mandinun tugas taheta. Hong hete, aku manampara epat palajaran Alkitab. Aku sanang majar uluh beken, awi aku tau manampayah roh barasih maubah pambelum ewen.” * (Payah catatan penda.)—1 Tesalonika 2:19.

8. Narai je ilalus pire-pire anak tabela mangat mangabar akan labih are uluh?

8 Tege anak tabela je balajar bahasa beken. Suntu, Jacob bara Amerika Utara manulis, ”Metuh baumur uju nyelu, are kawal ije kelasku uluh Vietnam. Aku handak bapander tahiu Yehowa akan ewen. Jadi limbah pire-pire katahi, aku manampa rencana balajar bahasa ewen. Cara je paling rancak ihapangku balajar bahasa te dengan mambanding Menara Pengawal bahasa Inggris dengan bahasa Vietnam. Aku kea bakawal dengan kawan pahari hong ungkup bahasa Vietnam je tukep humangku. Metuh umurku 18 nyelu, aku nampara merintis. Limbah pire-pire nyelu, aku umba Sekolah Alkitab bagi Saudara Lajang. Sakula tuh mandohop tutu hong eka tugasku je taheta. Hong hete aku melayani manjadi perintis tuntang bakas ungkup ije-ije hong kelompok bahasa Vietnam. Are uluh Vietnam hanjak awi aku tau bapander hapan bahasa ewen. Ewen mamalus aku, tuntang rancak aku tau balajar Alkitab dengan ewen. Pire-pire biti jadi impandui.”​—Payah kea Gawin Rasul 2:7, 8.

9. Narai guna gawi manampa murid akan itah?

9 Gawi manampa murid majar ikau  labih bahalap huang kebiasaan bagawi tuntang cara bapander je bahalap. Ketun kea akan labih percaya diri tuntang pintar-harati. (Sewut Salomo 21:5; 2 Timoteus 2:24) Tapi, gawi tuh khusus’ah manampa ketun sanang awi ketun tau balajar cara mambukti narai je imercaya ketun bara Alkitab. Ketun kea akan balajar kilen ampi bagawi dengan Yehowa.​—1 Korintus 3:9.

10. Kilen ampi ketun tau tatap sanang aluh isut uluh je handak balajar hong daerah ketun?

10 Ketun tau tatap sanang aluh isut uluh je handak balajar hong daerah ketun. Uka manampa murid, uras anggota ungkup pakat bagawi kilau ije kelompok. Aluh baya tege ije je bahasil manampa murid, itah uras sanang awi itah umba mangabar. Suntu, Brandon je merintis katahin 9 nyelu hong daerah je dia are uluh je handak balajar. Iye hamauh, ”Aku sanang mangabar awi jite je ilaku Yehowa bara itah. Aku nampara merintis limbah lulus sakula. Aku sanang manenga semangat akan kawan pahari tabela hong ungkup tuntang manampayah kemajuan rohani ewen. Limbah umba Sekolah Alkitab bagi Saudara Lajang, aku mandinun tugas taheta. Hindai puji tege uluh je balajar Alkitab dengangku sampai impandui. Tapi, tege pahari beken je puji. Aku hanjak awi bara sulak aku marencana gawi manampa murid manjadi jalan pambelumku.”​—Pangabar 11:6.

RENCANA JE INAMPAM TAU MAMBUKA KESEMPATAN TAHETA NARAI?

11. Narai ije macam dinas akan Yehowa je puji ilalus tuntang mampahanjak are anak tabela?

11 Tege are kesempatan huang melayani Yehowa. Suntu, are anak tabela je mandohop hong proyek mamangun. Baratus Balai Karajaan imerlu, tuntang kare bangunan kilau tuh mimbit tara akan Yehowa. Jadi, ketun akan sanang amun ketun umba mamangu. Ketun kea akan sanang awi tau bagawi haya-hayak dengan kawan pahari beken. Tuntang, ketun kea akan balajar are hal, kilau cara bagawi je aman tuntang tau pakat dengan pengawas.

Ewen je melayani sepenuh waktu akan mandinun are berkat (Payah paragrap 11-13)

12. Kesempatan taheta narai je indinum limbah merintis?

12 Ije biti pahari je ara Kevin hamauh, ”Bara kurik, aku tege cita-cita uka melayani Yehowa sepenuh waktu. Aku nampara merintis metuh umur 19 nyelu. Akan maongkos arepku, aku bagawi satengah andau dengan ije biti pahari je tukang bangunan. Aku balajar cara mamasang sapau, baunsengok, tuntang bauntunggang. Limbah te, aku umba huang tim je mandohop korban bencana alam katahin due nyelu. Ikei mamangun haluli kare Balai Karajaan tuntang huma kawan pahari. Metuh mahining tege kebutuhan hong Afrika Selatan huang bidang pembangunan, aku maisi formulir limbah te irawei akan kanih. Hong Afrika, aku pindah bara ije proyek mamangun Balai Karajaan akan proyek beken  genep pire-pire minggu. Kawan pahari hong kelompok pembangunan ikei jadi kilau keluarga. Ikei melai, balajar Alkitab, tuntang bagawi haya-hayak. Aku kea sanang mangabar dengan kawan pahari hong hete genep minggu. Aku dia manyangka amun rencana je inampaku metuh kurik tau mahasil kasanang akangku.”

”Aku dia manyangka amun rencana je inampaku metuh kurik tau mahasil kasanang akangku”

13. Mbuhen are anak tabela sanang melayani hong Betel?

13 Are je bihin merintis wayah tuh melayani hong Betel. Dinas hong Betel tau manampa ketun sanang awi uras je ilalus ketun hong kanih akan Yehowa. Keluarga Betel mahasil Alkitab tuntang basaan je mandohop uluh mangat tau balajar katutu. Ije biti pahari hong Betel je ara Dustin hamauh, ”Metuh baumur jalatien nyelu, aku tege cita-cita melayani sepenuh waktu. Tuntang, aku nampara merintis limbah lulus sakula. Limbah ije nyelu satengah, aku irawei akan Betel. Hong kanih aku balajar manjalan masin cetak tuntang limbah te bagawi manampa program komputer. Hong Betel, aku sanang awi tau mahining langsung laporan je mamparahan amun gawin manampa murid hong hapus dunia sasar maju. Aku sanang melayani hong hetuh awi narai je ilalus ikei tau mandohop uluh labih rantep dengan Yehowa.”

 NARAI RANCANAM?

14. Sahindai melayani sepenuh waktu, narai je tau ilalus ketun bara wayah tuh?

14 Narai je inyiap ketun mangat tau melayani sepenuh waktu? Mangat tau melayani Yehowa dengan cara je paling bahalap, ketun perlu malatih kare sipat Kristen. Keleh harajur balajar Alkitab, mangumang’ah, tuntang bausaha manenga komentar bara atei hong pumpung. Katahin masih sakula, ketun tau bausaha mampahalap cara mangabar. Keleh balajar peduli dengan uluh beken dengan misek kilen ampi kuan ewen tahiu ije hal tuntang mahining jawaba. Ketun kea tau manawar pandohop akan ungkup, kilau mamparasih tuntang mangambuah Balai Karajaan. Yehowa sanang mahapan uluh je randah atei tuntang pahias bagawi. (Mbasa Masmur 110:3; Gawin Rasul 6:1-3) Suntu, Rasul Paulus mimbit Timoteus uka melayani manjadi utusan injil awi ”ingasene puna ie oloh bahalap”.​—Gawin Rasul 16:1-5.

Katahin masih sakula, ketun tau bausaha mampahalap cara mangabar

15. Narai je tau ilalusmu uka tau mandinun gawi je tau mendukung dinas perintismu?

15 Are perintis perlu bagawi uka maongkos arep. (Gawin Rasul 18:2, 3) Mungkin, ketun tau manampa rencana uka manduan kursus je dia lalau tahi. Jituh tau manampa ketun mandinun gawi je dia lalau are mahapan waktu hong eka ketun. Ngesah rencana ketun akan pengawas daerah tuntang kawan perintis beken, tuntang laku nasehat ewen. Limbah te, kilau je insanan Alkitab, ”sarah akan [Yehowa] uras rencana aim, palus ikau akan mandino hasil awim malaluse”.​— Sewut Salomo 16:3; 20:18.

16. Narai manpaat dinas sepenuh waktu akan ketun harian andau?

16 Keleh yakin amun Yehowa handak mangat ketun mimbing segah andau harian je sanang. (Mbasa 1 Timoteus 6:18, 19.) Dengan melayani sepenuh waktu, ketun bagawi dengan pelayan sepenuh waktu beken. Jite mandohop ketun manjadi uluh Kristen je matang. Tuntang, are je mangkeme amun pangawin ewen tau labih dehen awi ewen nampara melayani sepenuh waktu bara tabela. Bahut, ewen je merintis helu bara kawin akan tarus merintis dengan kabali limbah ewen kawin.​—Roma 16:3, 4.

17, 18. Mbuhen ketun perlu salepah atei metuh manampa rencana?

17 Masmur 20:5 hamauh tahiu Yehowa, ”Keleh Ie manenga uras taloh je ingahandakm tuntang mawi hapus rencana bahasil.” Metuh ketun manampa rencana akan harian andau, niruk narai je buju-bujur handak inggawi ketun hong pambelum. Niruk narai je inggawi Yehowa metuh tuh tuntang narai je tau inggawi ketun akan mandohop Iye. Limbah te nampa rencana akan harian andau uka mampahanjak Iye.

18 Metuh ketun mahapan pambelum ketun akan melayani Yehowa salepah’ah tuntang manara Iye, ketun akan hanjak. Ketun akan mandinun ”kasanang intu [Yehowa]” tuntang ”Ie kareh manggenep kanahuang ateim”.​—Masmur 37:4.

^ par. 7 Sakula tuh ingganti manjadi Sekolah bagi Penginjil Kerajaan.