Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Juli 2017

Keleh Mangalindung Pikiran Pahari

Keleh Mangalindung Pikiran Pahari

PAHARI inyarang! Setan musuh’ah, tuntang iye mahapan senjata je tamam tutu. Senjata tuh inampa beken akan manyarang bitin Pahari, tapi khusus akan manyarang pikiran Pahari. Narai hal te? Propaganda!

Rasul Paulus katawan amun propaganda Setan bahaya tutu. Tapi dia uras uluh Kristen sadar akan bahaya tuh. Suntu, pire-pire pahari hong Korintus mangkeme amun ewen jadi segah huang katutu, awi te ewen dia tau inanjaru Setan. (1 Korintus 10:12) Jituh sabab’ah Paulus mampingat, ”Aku mikeh tirok keton inggoda mangat dia baketep tinai dengan Kristus, sama kilau Hawa bihin kea inggoda awi kapintar handipe te.”​—2 Korintus 11:3.

Kutak Paulus tuh mampingat itah mangat dia lalu percaya dengan arep itah kabuat. Mangat bahasil malawan propaganda Setan, Pahari musti mangatawan sapire bahaya hal tuh tuntang mangalindung arep Pahari.

SAPIRE HAI BAHAYA PROPAGANDA?

Huang artikel tuh, riman propaganda iete informasi je dia bujur atawa manyasat, je ihapan uka mananjaru uluh atawa maatur pikiran tuntang gawin ewen. Manumun buku Propaganda and Persuasion, propaganda te ”malanggar hak, bahaya, tuntang curang”. Propaganda kea tau inyama dengan ”mananjaru, manyasat, manipu, manipulasi, tuntang mangendali pikiran”.

Propaganda bahaya tutu awi tau isu-isut mampengaruh cara bapikir itah, tuntang mungkin itah dia sadar jite manjadi. Jite tau inyama kilau gas beracun je dia gitan tuntang dia kamean itah ewau’ah. Vance Packard, ije biti ahli je maneliti sipat kalunen, mansanan, ”Kakarean bara itah mungkin dia sadar amun itah jadi are buah pengaruh awi propaganda.” Manumun ahli je beken, propaganda manampa are uluh malalus gawi je bahaya tuntang dia tame akal. Propaganda kea manjadi sabab  genosida (mampatei uras uluh huang ije ras), parang, tuntang manindas awi suku atawa agama.​—Easily Led—A History of Propaganda.

Amun propaganda kalunen tau manyasat itah, mahin hindai propaganda Setan? Iye jadi manantuani sipat kalunen bara sulak kalunen inampa. Wayah tuh, iye kea manguasa ”hapus kalunen”, jadi iye tau mahapan narai bewei hong dunia tuh uka manyampai tanjaru. (1 Yohanes 5:19; Yohanes 8:44) Setan jadi ”manutup tirok atei” are uluh dengan propaganda tuntang wayah tuh iye ”manipu hapus kalunen”. (2 Korintus 4:4; Pangarinah 12:9) Kilen ampi Pahari tau malawan propaganda Setan?

PAABAS IMAN PAHARI

Yesus majar itah cara sederhana uka malawan propaganda Setan. Iye hamauh, ”Harati katoto; maka katoto te kareh mambebas keton.” (Yohanes 8:31, 32) Metuh baparang, ije biti tantara musti mangatawan hong kueh iye tau mandinun informasi je bujur, awi musuh akan manampa are tanjaru. Jadi, hong kueh Pahari tau mandinun informasi je bujur? Yehowa jadi manyadia Firman-Ai, Alkitab. Hong hete, tege uras je imerlu itah akan malawan propaganda Setan.​—2 Timoteus 3:16, 17.

Setan pasti katawan hal tuh. Jadi, iye mahapan dunia tuh mangat itah bakulas tuntang jatun waktu uka mambasa tuntang kea balajar Alkitab. Ela inanjaru awi ”kare tirok papa ain Setan”! (Epesus 6:11) Baya tege pangatawan dasar Alkitab dia sukup. Itah perlu bausaha mangat pangatawan itah tahiu katutu sasar handalem. (Epesus 3:18) Ije biti penulis je ara Noam Chomsky hamauh, ”Uluh beken dia akan mampasuap Pahari dengan katutu. Pahari kabuat je musti manggau.” Jadi, itah kabuat je musti manggau katutu dengan ’genep andau mariksa Surat Barasih’.​—Gawin Rasul 17:11.

Mangat bahasil mangalindung pikiran Pahari, Pahari musti mangatawan sapire kahai bahaya propaganda tuntang mangalindung arep Pahari bara hal te

Setan dia handak Pahari bapikir dengan bahalap tuntang harati tahiu katutu je indinun Pahari. Mbuhen? Awi ije biti uluh ”akan labih purah impengaruh” propaganda amun iye katahin tuh ”dia imatuh bapikir”. (Media and Society in the Twentieth Century) Ela purah percaya dengan uras je ihining Pahari helu bara mamikir’ah. (Sewut Salomo 14:15) Hatalla manenga Pahari ”kapintar”, atawa kasanggup bapikir, tuntang ”kaharati”. Jadi, hapan jite akan mampaabas iman Pahari.​—Sewut Salomo 2:10-15; Roma 12:1, 2.

 TATAP HINJE

Tantara je impengaruh awi propaganda akan nihau kahanyi tuntang semangat akan baparang. Propaganda mahin tau manampa ewen baparang sama arep atawa mamisah arep’ah bara pasukan. Kuan ije biti jenderal pasukan Jerman, ije bara kare sabab mbuhen Jerman kalah hong Perang Dunia I iete awi propaganda. Iye mangesah amun rakyat Jerman tapangaruh tutu. Pikiran ewen kilau ingendali awi propaganda. Setan mahapan cara je sama akan marusak kahinje uluh Kristen wayah tuh. Suntu, iye bausaha mangat kawan pahari je hinje dia tau pakat. Atawa, iye handak ewen malihi organisasi dengan manampa ewen bapikir amun organisasi Yehowa jadi dia adil tuntang jadi manampa kasala.

Ela handak impahumung! Keleh maumba nasehat bara Firman Hatalla tuntang keleh santar hinje dengan kawan paharin itah. Alkitab, manasehat itah uka harajur ”handak mampun sama arep keton” tuntang jeleng mangambuah masalah narai bewei. (Kolose 3:13, 14; Mateus 5:23, 24) Alkitab kea mampingat itah uka dia mamisah arep bara ungkup. (Sewut Salomo 18:1) Itah musti siap malawan propaganda Setan. Coba niruk, ’Haru-harun tuh, metuh ije biti pahari mangapehe aku, en tanggapanku manyanang Hatalla atawa manyanang Setan?’​—Galatia 5:16-26; Epesus 2:2, 3.

ELA SAMPAI INYASAT

Ije biti tantara je nampara dia percaya dengan pemimpin ai dia akan baparang buju-bujur. Awi te, musuh mahapan propaganda uka marusak angat percaya tuntang yakin tantara dengan pemimpin ewen. Amun pemimpin te manampa kasala, musuh akan bausaha mahapan jite tuntang hamauh, ”Iye dia tau imercaya hindai!” atawa ”Iye tau manampa ketun kapehe!” Setan kea manggawi hal je sama. Iye bausaha marusak angat yakin itah dengan uluh je ihapan Yehowa uka mamimpin rewar-Ai.

Kilen ampi itah tau mangalindung arep? Keleh batekad uka tarus tege huang organisasi Yehowa. Keleh harajur baketep tuntang mendukung ewen je mamimpin, aluh kare hatue tuh dia sempurna. (1 Tesalonika 5:12, 13) Kawan uluh murtad tuntang kawan panyasat beken mungkin manyarang Organisasi. (Titus 1:10) Aluh je insanan ewen ampi bujur, ”ela murah bingung atawa gogop”. (2 Tesalonika 2:2)  Keleh umba nasehat je inenga Paulus akan Timotius uka, ”Keleh ikau tetep mimbing kare auh ajar je [iajar] akam” tuntang keleh mingat bara eweh Pahari balajar hal te. (2 Timoteus 3:14, 15) Keleh mamikir uras bukti amun Pahari tau percaya dengan jipen je baketep, je jadi ihapan Yehowa katahin tukep seratus nyelu akan majar itah katutu.​—Mateus 24:45-47; Ibrani 13:7, 17.

ELA MIKEH

Setan kea bausaha mampengaruh Pahari dengan cara je labih jelas. Kanatek’ah, iye bausaha mampikeh itah. ”Ije bara kare propaganda je pangkasulak ihapan” iete ancaman. (Easily Led—A History of Propaganda) Philip M. Taylor, ije biti profesor bara Inggris, manulis amun bangsa Asur manjadi suntu uluh je mahapan propaganda impahayak dengan ancaman uka mampakalah musuh ewen. Setan mangguna angat kikeh itah, kilau kikeh dengan kalunen, mikeh ingapehe, tuntang kikeh dengan pampatei, uka manampa itah tende manempu Yehowa.​—Yesaya 8:12; Yeremia 42:11; Ibrani 2:15.

Ela manalua Setan mampikeh Pahari! Yesus hamauh, ”Ela mikeh dengan ewen je mampatei biti tapi dia olih mawi labih bara te.” (Lukas 12:4) Keleh yakin amun Yehowa akan malalus janjin-Ai uka mahaga Pahari, manenga Pahari ”kuasa je labih bara je biasa”, tuntang mandohop Pahari malawan senjata je ihapan Setan manyarang.​—2 Korintus 4:7-9, Terjemahan Dunia Baru; 1 Petrus 3:14.

Kanatek’ah, itah tau mikeh atawa mangkeme balemu. Tapi keleh mingat narai je insanan Yehowa uka mampaabas Yosua, ”Aku jari marentah ikau uka ikau toto-toto percaya tuntang bahanyi! Ela ikau mikeh atawa tapas kamentengm, awi aku [Yehowa] Hatallam mampahayak ikau akan kueh bewei ikau haguet.” (Yosua 1:9) Amun Pahari mikeh, jeleng balakudoa dengan Yehowa. Keleh yakin amun ”kasanang bara Hatalla je manangkalau batas kaharatin itah, akan manjaga atei tuntang tirok keton”. Dengan kalute, Pahari akan tege kaabas uka malawan uras propaganda Setan.​—Pilippi 4:6, 7, 13.

En Pahari mingat propaganda je ihapan Rabsyake, je mimbit peteh bara bangsa Asur, akan mampikeh rewar Hatalla? Iye handak mangat rewar Hatalla percaya amun jatunti je tau mangalindung ewen bara bangsa Asur, Yehowa mahin dia. Limbah te, iye mangaku amun Yehowa je manyuhu uluh Asur uka mampahancur Yerusalem. Limbah te, narai kuan Yehowa? ”Dia usah mikeh mahining kare auh rewar Raja Asur te je [Yehowa] dia olih malapas.” (2 Raja 18:22-25; 19:6) Yehowa mangirim ije malekat uka mampatei 185.000 tantara Asur huang ije alem!​—2 Raja 19:35.

KELEH SANTAR MAHINING YEHOWA

En puji Pahari manampayah ije biti uluh hong film je dia katawan iye inanjaru? En Pahari handak mansanan aka, ’Ela percaya! Ikau kana tanjaru!’ Coba niruk, kare malekat kea mansanan akan Pahari, ”Ela percaya! Setan te mananjaru!”

Ela mahining propaganda Setan. (Sewut Salomo 26:24, 25) Keleh mahining Yehowa tuntang percaya Denga huang uras hal. (Sewut Salomo 3:5-7) Iye sinta Pahari tuntang handak mangat itah maumba auh-Ai, ”Anakku, keleh ikau pintar harati, mangat aku sanang.” (Sewut Salomo 27:11) Dengan malalus’ah, Pahari pasti bahasil mangalindung pikiran Pahari!