Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Juli 2017

Nggau Panatau je Bujur

Nggau Panatau je Bujur

”Keleh mahapan panatau kalunen toh mangat mandino kawal.”​—LUKAS 16:9.

NYANYIN: 32154

1, 2. Hong sistem tuh, mbuhen uluh susah santar tege?

SISTEM dagang dunia tuh kejam tuntang dia adil. Suntu, are anak tabela wayah tuh bahali manggau gawi. Tege kea je manampa pambelum ewen huang bahaya dengan pindah akan negara je tatau. Tapi aluh hong negara kilau te, are kea uluh susah. Hong hapus dunia, uluh tatau sasar tatau, tuntang uluh susah sasar susah. Hasil ije penelitian haru-harun tuh, jumlah panatau 1 persen uluh hong dunia sama dengan jumlah panatau 99 persen uluh beken hong dunia. Jadi, aluh tege uluh je panatau’ah tau sampai uju turunan, tege bamiliar uluh je pambelum’ah susah tutu. Yesus mangaku hal tuh metuh iye hamauh, ”Oloh je belom susah harajur aton intu marak keton.” (Markus 14:7) Mbuhen hal tuh manjadi?

2 Yesus katawan amun baya Karajaan Hatalla je ulih mamberes sistem dagang dunia tuh. Alkitab mansanan amun ”kare oloh dagang”, atawa sistem dagang, tuntang kea sistem politik tuntang agama bagian bara dunia Setan. (Pangarinah 18:3) Rewar Hatalla tau buju-bujur lapas bara politik tuntang agama. Tapi, kakarean bara ewen dia tau buju-bujur lapas bara sistem dagang dunia Setan.

3. Paisek narai bewei je akan imbahas itah?

 3 Awi itah uluh Kristen, itah perlu mariksa cara pandang itah tahiu sistem dagang dunia. Jadi, coba mikir, ’Kilen ampi aku tau mahapan panatau uka mamparahan amun aku baketep dengan Hatalla? Kilen ampi mangat aku saisut mungkin umba huang sistem dagang dunia? Pangalaman narai bewei je mamparahan amun rewar Hatalla buju-bujur maandal Yehowa?’

KESAH TAHIU PAGAWAI KEUANGAN JE DIA BUJUR

4, 5. (a) Narai je inaharep pagawai keuangan huang kesah Yesus? (b) Yesus mansanan akan kare murid ai uka malalus narai?

4 Mbasa Lukas 16:1-9. Kesah Yesus tahiu pagawai keuangan je dia bujur perlu imikir itah bua-buah. Pagawai te indawa royal, tuntang majikan ayu mamutus uka mampaterai iye. * (Payah catatan penda.) Tapi, pagawai tuh ”pintar”. Sahindai balua bara gawi, iye bakawal dengan uluh je kareh tau mandohop iye. Tapi, Yesus mangesah hal tuh beken mangat kare murid ai malalus gawi je licik uka tau tatap belum, kilau je ilalus awi are uluh. Tapi, Yesus mahapan kesah tuh akan majar ije palajaran je penting.

5 Sama kilau pagawai je salenga manaharep masalah tuh, Yesus mangatawan amun are bara kare uluh je umba iye akan bahali manggau ongkos belum hong dunia je dia adil wayah tuh. Jadi iye mansanan, ”Keleh mahapan panatau kalunen toh mangat mandino kawal.” Mbuhen? Mangat amun panatau te dia tau mandohop hindai, ”Keton kareh inarima hong eka je katatahie” awi kare kawal te, iete Yehowa tuntang Yesus. Narai je tau ilajar itah bara nasehat Yesus?

6. Kilen ampi itah mangatawan amun sistem dagang dunia tuh beken bagian bara tujuan Hatalla?

6 Alkitab dengan jelas mamparahan amun mangumpul are duit tuntang panatau beken bagian bara tujuan Hatalla akan kalunen. Suntu, Yehowa manyadia uras je imerlu Adam tuntang Hawa labih bara sukup tuntang gratis. (Genesis 2:15, 16) Limbah te, metuh Hatalla manenga roh barasih-Ai akan uluh je iintih, ”jaton ije biti bara ewen te mitong kare ramoe kilau ayue kabuat. Kare taloh handiai je ain ewen, ewen mahapae sama-sama”. (Gawin Rasul 4:32) Nabi Yesaya mansanan kea amun tege katika kareh, uras kalunen akan bebas mahapan kare hasil bumi. (Yesaya 25:6-9; 65:21, 22) Tapi helu bara jite manjadi, uluh je maumba Yesus perlu ”pintar”. Ewen perlu manggau ongkos belum hong dunia je dia adil tuh tuntang hong katika je sama bausaha manyanang Hatalla.

PINTAR MANGGUNA PANATAU JE DIA BUJUR

7. Nasehat narai je inenga Yesus hong Lukas 16:10-13?

7 Mbasa Lukas 16:10-13. Pagawai hong kesah Yesus bakawal mangat tege guna aka. Tapi, Yesus handak mangat uluh je maumba iye manggau kawal hong sorga beken akan tujuan je mamenting arep. Iye handak itah paham amun cara itah mahapan panatau je dia bujur  tau mamparahan en itah baketep dengan Hatalla. Kilen ampi cara?

8, 9. Nenga pire-pire suntu kaketep kare paharin itah mangguna panatau je dia bujur.

8 Ije cara itah mamparahan kaketep itah iete dengan manyumbang panatau itah akan gawin mangabar hong hapus dunia je inujum Yesus akan manjadi. (Mateus 24:14) Ije biti anak bawi hong India rajin manabung hong sarangan tabungan je kurik. Iye sampai manahan kahandak mamili usik. Metuh tabunga kuntep, iye manyumbang uras’ah akan gawin mangabar. Tege kea ije biti pahari hong India je tege kabun enyuh. Iye manyumbang are enyuh akan kantor penerjemahan bahasa Malayalam. Kantor penerjemahan tuh puna mamerlu enyuh, jadi pahari tuh mangkeme amun iye manenga enyuh, labih barega bara amun iye manenga duit. Pahari tuh mamparahan gawi je ”pintar”. Kalute kea, kawan pahari hong Yunani rancak manyumbang minyak saitun, keju, tuntang panginan beken akan keluarga Betel.

9 Ije biti pahari je beken manyadia bangunan ayu hong Sri Lanka akan ihapan uka hapumpung, kebaktian, tuntang eka melai pelayan sepenuh waktu. Pahari te mangorban panatau ayu, tapi jituh pandohop hai akan kare penyiar hong kanih je belum baya-baya. Hong kare negara je gawin itah dia lalau bebas, human kare pahari ihapan manjadi Balai Karajaan. Dengan kalute, kare perintis tuntang ewen je belum baya-baya tau tege eka hapumpung je dia perlu manyewa.

Rewar Hatalla mahapan panatau ewen akan mandohop uluh beken

10. Narai bewei manpaat’ah amun itah pahias manenga?

10 Kare suntu tuh mamparahan amun rewar Hatalla ”tau imercaya huang kare taloh je korik”. (Lukas 16:10) Ewen mahapan panatau ewen akan mandohop uluh beken. Jituh manampa ewen manjadi sobat Yehowa. Kilen ampi angat atei ewen limbah bakorban akan uluh beken? Ewen hanjak tutu awi ewen katawan amun ewen mandinun panatau je bujur hong sorga. (Lukas 16:11) Ije biti pahari bawi je harajur manyumbang duit akan mendukung gawin Karajaan mansanan amun limbah pire-pire katahi, iye hubah manjadi labih bahalap. Iye mangesah, ”Sasar aku rajin manenga, sipatku sasar bahalap. Aku labih purah manarima nasehat, maampun, tuntang sabar, tuntang kea dia purah kacewa.” Tege are je mangkeme amun rajin manenga baguna kea akan arep ewen kabuat.​—Masmur 112:5; Sewut Salomo 22:9.

11. (a) Mbuhen dengan manyumbang, Pahari mamparahan gawi je ”pintar”? (b) Narai hasil panengan Pahari? (Payah gambar hong tamparan artikel.)

11 Amun itah mahapan panatau uka mendukung gawi pangabaran, jite rima itah mamparahan gawi je ”pintar”.  Mbuhen? Awi dengan manyumbang, itah tau mendukung dinas kawan pahari beken aluh itah dia tau melayani sepenuh waktu atawa pindah akan eka je labih are mamerlu tenaga. (Sewut Salomo 19:17) Suntu dengan manyumbang, are uluh hong daerah je susah tutu tau mandinun basaan itah tuntang kajaria mandinun katutu. Hong kare negara kilau Kongo, Madagaskar, tuntang Rwanda, regan Alkitab hai tutu. Je rancak manjadi, regan ije Alkitab sama dengan upah katahin ije minggu atawa ije bulan. Katahin banyelu-nyelu, kawan pahari musti mintih en ewen akan mamili panginan akan keluarga atawa mamili Alkitab. Tapi, awi tege sumbangan tuntang ”satimbang”, atawa dana imbagi rata, organisasi Yehowa tau manerjemah tuntang mambagi Alkitab gratis akan genep anggota keluarga tuntang je balajar Alkitab. (Mbasa 2 Korintus 8:13-15, Surat Barasih 1983) Jadi, aluh je manenga atawa je manarima sama-sama manjadi sobat Yehowa.

CARA MANGAT DIA LALAU ARE UMBA HUANG SISTEM DAGANG DUNIA

12. Narai je inggawi Abraham uka mamparahan amun iye percaya dengan Hatalla?

12 Itah kea tau manjadi sobat Yehowa amun itah manggau panatau je bujur tuntang dia umba sakalepah huang sistem dagang dunia. Jite je inggawi Abraham. Iye manumun kuan Yehowa dengan malihi kota Ur je tatau tuntang melai hong kare kemah awi iye handak manjadi sobat Yehowa. (Ibrani 11:8-10) Iye santar maandal Hatalla, beken panatau. (Genesis 14:22, 23) Yesus handak kare murid ai manyuntu iman macam te. Iye puji bapander dengan uluh tabela je tatau, ”Amon ikau handak manjadi oloh je tinduh barasih, lius jual salepah ramom. Tenga duite akan oloh je belom susah, tuntang ikau kareh mandino ramo hong sorga. Limbah te dumah ih omba Aku!” (Mateus 19:21) Uluh tabela tuh dia baiman kilau Abraham. Tapi, tege uluh beken je percaya dengan Hatalla.

13. (a) Nasehat narai je inenga Paulus akan Timoteus? (b) Kilen ampi itah tau malalus nasehat Paulus?

13 Timoteus ije biti uluh je baiman. Paulus manyewut iye ”prajurit ain Kristus je baketep”. Limbah te Paulus mansanan aka, ”Ije biti prajurit je magon malalus gawie, ie dia manderoh arepe kabuat dengan urusan ayue kabuat, basa ie mipen manyanang atei pangkalima ayue.” (2 Timoteus 2:3, 4) Kare murid Yesus wayah tuh, dengan labih bara ije juta hong marak ewen je manjadi pelayan sepenuh waktu, buju-bujur bausaha malalus nasehat Paulus tuh. Ewen dia kana pengaruh awi kare iklan bara dunia je bakuhu tuh. Ewen mingat prinsip tuh, ”Oloh je minjam inguasa awi oloh je mahanjaman.” (Sewut Salomo 22:7) Setan handak mangat itah mahapan uras waktu tuntang kaabas itah uka bagawi akan sistem dagang dunia ayu. Tege je nyamah bautang hai uka mamili  huma, mobil, mambayar sakula, atawa malalus pesta kawin. Amun itah dia bua-buah, itah tau mampalepah waktu banyelu-nyelu uka mambayar uras utang te. Jadi, itah perlu malalus gawi je ”pintar” dengan manyederhana pambelum, mangejau arep bara utang, tuntang belum hemat. Dengan kalute, itah tau bebas manempu Hatalla tuntang dia manjadi jipen sistem dagang wayah tuh.​—1 Timoteus 6:10.

14. Narai je musti manjadi tekad itah? Nenga suntu.

14 Mangat pambelum itah sederhana, itah musti batekad manomor ije Karajaan Hatalla. Suntu, tege ije keluarga je tege usaha hai je bahalap. Ewen due handak melayani sepenuh waktu hindai. Jadi, ewen manjual usaha, kapal, tuntang panatau ewen. Limbah te, ewen manjadi sukarelawan konstruksi hong kantor pusat je taheta hong Warwick, New York. Hal tuh istimewa awi ewen tau melayani haya-hayak hong Betel dengan anak bawi tuntang manantun ewen, tuntang bagawi haya-hayak dengan uluh bakas pahari hatue te je melayani hong proyek Warwick kea katahin pire-pire minggu. Suntu beken iete ije biti pahari bawi je merintis hong Kolorado, AS. Iye bagawi satengah andau hong ije bank. Hasil gawi bahalap tutu sampai-sampai bos hong eka iye bagawi manawar mangat bagawi janda-jandau dengan gajih telu kali lipet. Tapi, amun iye manduan tawaran te, iye bahali badinas. Jadi, iye manolak tawaran te aluh tawaran te bahalap tutu. Jituh baya pire-pire suntu bara are pengorbanan je inampa kare rewar Yehowa. Kalute kea, amun itah manomor ije kapentingan Karajaan, jite rima itah labih marega hubungan itah dengan Hatalla tuntang panatau je bujur labih bara panatau dunia.

PANATAU DUNIA KAREH DIA TAU MANDOHOP

15. Panatau narai je buju-bujur manampa itah sanang?

15 Hatalla dia santar mamberkat dengan manenga are panatau. Yehowa mamberkat uluh je ”are malalus kare hal je bahalap”. (Mbasa 1 Timoteus 6:17-19.) Suntu, ije biti pahari bawi je ara Lucia katawan amun hong Albania mamerlu labih are penyiar. * (Payah catatan penda.) Jadi hong nyelu 1993, bara Italia iye pindah akan kanih. Iye dia katawan handak bagawi narai melai kanih, tapi iye percaya amun Yehowa akan maurus iye. Iye balajar bahasa Albania tuntang mandohop labih bara 60 biti uluh sampai manampa janji tuntang impandui. Mungkin, itah dia mandinun hasil kilau te hong daerah dinas itah. Tapi, narai bewei usaha itah uka mandohop uluh manjadi sobat Yehowa akan manjadi panatau je batahan sampai katatahi tuntang manampa itah buju-bujur sanang.​—Mateus 6:20.

Itah tau bujur-bujur sanang amun itah manenga je pangkahalap akan Yehowa tuntang Karajaan-Ai

16. (a) Narai je akan manjadi dengan sistem dagang? (b) Kilen ampi sapuna itah mangguna panatau?

16 Yesus mansanan dengan jelas amun sistem dagang akan hapus. Metuh iye mansanan ”amon panatau kalunen toh dia barega hindai”, iye sapuna handak itah mangatawan amun panatau akan jatun guna. (Lukas 16:9) Hong kare andau  pangkaharia tuh, are bank bangkrut tuntang are negara je kapehe secara keuangan. Tuntang dia pire hindai, kaadaan tuh akan sasar pehe. Sistem politik, agama, tuntang dagang je ayun dunia Setan tuh akan hapus. Amas tuntang perak je wayah tuh barega hong sistem dagang tuh kajaria dia barega, kilau jadi inyurat Nabi Esekhiel tuntang Sepanya. (Esekhiel 7:19; Sepanya 1:18) Coba niruk, amun itah dia pire handak matei, itah haru katawan amun katahin tuh itah jadi mangorban panatau je bujur uka manggau ”panatau kalunen” bara dunia tuh, kilen ampi angat atei itah? Itah mungkin mangkeme kilau ije biti uluh je hapus pambelum’ah manggau duit, tapi uras duit je indinu palsu. (Sewut Salomo 18:11) Uras panatau hong dunia tuh pasti kareh jatun guna. Jadi, ela manganan kesempatan uka mangguna panatau Pahari uka tau bakawal dengan Yehowa tuntang Yesus. Itah tau buju-bujur sanang amun itah manenga je pangkahalap akan Yehowa tuntang Karajaan-Ai.

17, 18. Narai je ientai awi kare sobat Hatalla?

17 Metuh Karajaan Hatalla marentah bumi, itah dia perlu hindai mambayar sewa atawa utang. Tege are panginan tuntang uras’ah gratis. Itah dia perlu mampalua duit akan mamili obat atawa mangguang dokter. Kare sobat Yehowa akan mangkeme kare hasil bahalap bara bumi. Amas, perak, tuntang permata akan ihapan awi kahalap’ah, beken uka manampa uluh manjadi tatau. Itah tau mamangun huma je bahalap bara kayu, batu, tuntang sanaman je bahalap je uras’ah gratis. Kare kawal itah akan mandohop itah awi ewen handak, beken awi ewen imbayar. Kareh, itah akan habagi kare hasil bumi.

18 Jituh haru belah’ah bara kare berkat je bahalap tutu akan ewen je manggau kawal hong sorga. Rewar Yehowa hong bumi akan basasurak awi hanjak metuh ewen mahining Yesus hamauh, ”Kantoh keton je imberkat awi Bapa-Ku. Tame akan huang Karajaan je inatap akan keton bara tamparan kalunen.”​—Mateus 25:34.

^ par. 4 Yesus dia mansanan en dawan te bujur atawa dia. Sapuna, kata ”laporan” hong Lukas 16:1 maksud’ah tau pagawai te inuduh uluh maroyal. Tapi, je utama akan Yesus iete tanggapan pagawai te, beken sabab iye impaterai bara gawi.

^ par. 15 Kesah pambelum Lucia Moussanett tege hong Sedarlah! 22 Juni 2003, hlm. 18-22.