Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Juli 2017

Paisek bara je Mambasa

Paisek bara je Mambasa

En tau uluh Kristen mingkes senjata api, kilau pistol atawa sanapang, akan mangalindung arep bara uluh beken?

Metuh manampa keputusan tahiu cara mangalindung arep, uluh Kristen maumba prinsip Alkitab. Bara prinsip te, itah mangatawan amun uluh Kristen dia tau mahapan senjata kilau pistol, dum-duman, sanapang, atawa senjata api beken akan mangalindung arep bara uluh beken. Nantuani pire-pire alasa:

Akan Yehowa, pambelum kalunen te barasih. Dawid, je manulis Masmur hamauh tahiu Yehowa, ”Ikau tahasak pambelom.” (Masmur 36:9) Jadi, amun ije biti uluh Kristen mintih uka mangalindung arep atawa ramu, iye akan mamasti mangat je inggawi dia manampa iye utang daha, awi manampa matei uluh beken.​— Deuteronomium 22:8; Masmur 51:16, Surat Barasih 1983.

Ramu narai bewei je ihapan uluh akan mangalindung arep tau manampa iye utang daha. Tapi dengan senjata api, uluh tau labih purah mampatei, en jite sengaja atawa dia. * (Payah catatan penda.) Mungkin kea uluh je mawi kajahat jadi tegang. Jadi, amun iye manampayah senjata api, kaadaa tau sasar bahaya tuntang mungkin akan tege je matei.

Hong alem sahindai pampatei’ah, Yesus balaku kare murid ai mimbit padang. Tapi tujua beken akan mangalindung arep. (Lukas 22:36, 38) Yesus handak majar ije palajaran: Kare murid ai dia tau mahapan kakaras, aluh ewen musti manaharep ije kelompok uluh je mimbit senjata. (Lukas 22:52) Limbah Petrus manyarang jipen Imam Hai mahapan padang, Yesus marentah Petrus, ”Ngumpang haluli padangm.” Limbah te, Yesus manenga ije prinsip je manantiring uluh Kristen sampai tuh, ”Oloh samandiai je mahapan padang akan matei awi padang.”​—Mateus 26:51, 52.

Kilau tujum hong Mikha 4:3, rewar Hatalla ”maninih kare padang ewen jadi luku, tuntang kare lunju ain ewen jadi taja”. Uluh Kristen ingasene awi sinta damai. Ewen manumun parentah Hatalla je inenga mahalau Rasul Paulus, iete ”ela mambaleh kapapa” tuntang ”keleh manggau jalan saoli-olih uka belom damai dengan oloh samandiai”. (Roma 12:17, 18) Aluh Paulus manaharep are masalah, kilau ”bahaya parampok”, iye dia puji malanggar prinsip Alkitab akan mangalindung arep. (2 Korintus 11:26) Tapi, iye percaya dengan Hatalla tuntang mangatawan amun nasehat bara Alkitab te ”labih baguna bara pakakas parang”.​—Pangabar 9:18.

Akan Uluh Kristen, pambelum kejau labih barega bara kare panatau. ”Pambelom olon dia bahapang dengan panatau.” (Lukas 12:15) Jadi, amun parampok je mimbit senjata dia handak tende aluh itah jadi bapander bua-buah, itah manumun nasehat Yesus, ”Ela keton malawan oloh papa.” Jituh mungkin dengan manalua iye manduan narai bewei je ingahandak’ah. (Mateus 5:39, 40, Surat barasih 1983; Lukas 6:29) * (Payah catatan penda.) Je paling bahalap dengan mahaga mangat dia manjadi korban kajahat. Cara,  dengan manumun nasehat Alkitab tuntang panatau itah dia ”impatamam” akan uluh beken. (1 Yohanes 2:16) Beken bara te, itah kea labih aman amun uluh tukep human itah mangatawan amun itah Saksi Yehowa je sinta damai.​—Sewut Salomo 18:10.

Uluh Kristen marega atei nurani uluh beken. (Roma 14:21) Tege kare pahari je tarewen atawa tersinggung metuh mangatawan amun tege paharin Kristen ewen je mingkes senjata api akan mangalindung arep. Aluh itah mungkin tege hak je sah sasuai hukum akan mingkes senjata api, tapi awi sinta dengan kawan pahari, itah dia handak manggawi hal je tau manampa ewen tersinggung.​—1 Korintus 10:32, 33; 13:4, 5.

Uluh Kristen handak manjadi suntu akan uluh beken. (2 Korintus 4:2; 1 Petrus 5:2, 3) Amun tege uluh Kristen je mingkes senjata api akan mangalindung arep, kare bakas ungkup akan manenga iye nasehat bara Alkitab. Amun iye mintih tatap mingkes senjata api, iye dia manjadi suntu bahalap. Jadi, iye dia tau mandinun tanggung jawab atawa hak istimewa narai bewei hong ungkup. Jituh kea sama akan uluh Kristen je bagawi hong gawi je manampa iye musti mimbit senjata api. Labih bahalap amun iye manggau gawi taheta. *—Payah catatan penda.

Ije biti uluh Kristen musti manduan keputusan kabuat tahiu cara mangalindung arep, keluarga, tuntang ramun panatau tuntang kea tahiu gawi je iintih. Metuh manduan keputusan tuh, iye perlu mahapan prinsip Alkitab. Hatallan itah je harati manenga itah kare prinsip tuh awi Iye sinta dengan itah. Jite alasa uluh Kristen je tukep dengan Yehowa mintih uka dia mingkes senjata api akan mangalindung arep bara uluh beken. Ewen yakin amun ewen percaya dengan Hatalla tuntang manumun kare prinsip Alkitab, ewen akan buju-bujur aman sampai katatahi.​—Masmur 97:10; Sewut Salomo 1:33; 2:6, 7.

Metuh kasusah je hai, uluh Kristen akan maandal Yehowa tuntang dia bausaha mangalindung arep

^ par. 3 Ije biti uluh Kristen mungkin manampa keputusan mingkes senjata api akan mengan metu akan pangina. Atawa, iye mungkin mahapa akan mangalindung arep bara metu basiak. Tapi metuh senjata te dia ihapan, iye musti mampalua peluru, atawa mungkar senjata te, tuntang mingkes hong eka je aman tuntang bakunci. Amun hong ije daerah pamarentah mangahana atawa manampa batasan mingkes senjata api, uluh Kristen perlu taat dengan hukum te.​—Roma 13:1.

^ par. 6 Akan mangalindung arep mangat dia imerkosa, mbasa artikel ”Cara Mencegah Pemerkosaan” hong Sedarlah! 8 Maret 1993.

^ par. 2 Akan keterangan labih are tahiu gawi je manampa ije biti uluh musti mimbit senjata, mbasa Menara Pengawal 1 November 2005, halaman 31 tuntang Menara Pengawal No. 59, halaman 27-28.