Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Juli 2017

Mbuhen Itah Musti Manara Yehowa?

Mbuhen Itah Musti Manara Yehowa?

”Tara [Yehowa]! Basa . . . bahalap tuntang manyanang uka manyanyi tara Akae.”​—MASMUR 147:1.

NYANYIN: 104152

1-3. (a) Pea kira-kira Masmur 147 inulis? (b) Narai je tau ilajar itah bara Masmur 147?

BAHUT itah manara ije biti uluh awi itah rajin dengan auh kutak atawa taluh gawi. Jadi, itah kea pasti tagerek uka manara Hatalla Yehowa awi katamam kuasa-Ai. Jituh tau inampayah bara hasil gawi je mampahengan. Itah kea manara Iye awi Iye sinta tutu dengan itah. Hal tuh imbukti bara tewusan Anak-Ai.

2 Metuh mambasa Masmur 147, itah ulih mangkeme amun je manulis Masmur buju-bujur handak manara Yehowa. Iye handak kea uluh beken manara Hatalla haya-hayak denga.​—Mbasa Masmur 147:1, 7, 12.

3 Itah dia katawan eweh je manulis Masmur 147. Mungkin, iye belum hong katika uluh Israel haluli akan Yerusalem limbah Yehowa mambebas ewen bara Babel. (Masmur 147:2) Je manulis Masmur manara Yehowa awi rewar-Ai jadi tau baibadat dengan Yehowa hong petak danum ewen kabuat. Je manulis Masmur kea manyewut alasan beken mbuhen manara Yehowa. Narai bewei alasa? Tuntang, mbuhen itah kea  tau hamauh ”Tara [Yehowa]”?​—Masmur 147:1.

YEHOWA MAMPAKELEH ATEI JE RAMUK

4. Kilen ampi angat atei uluh Israel metuh ewen imbebas awi Raja Kores, tuntang mbuhen?

4 Coba niruk angat atei uluh Israel metuh ewen inawan hong Babel. Hong kanih, ewen imbaka awi uluh Babel je hamauh, ”Nyanyi akan ikei kare lagu bara Sion!” Tapi, uluh Yahudi dia handak manyanyi awi Yerusalem, eka je paling inyinta ewen, jadi impahancur. (Masmur 137:1-3, 6) Atei ewen ramuk, tuntang ewen perlu ihibur. Tapi kilau je jadi inujum Firman Hatalla, Yehowa puna mandohop ewen. Kilen ampi? Raja Kores bara Persia mampakalah Babel. Limbah te iye hamauh tahiu Yehowa, ”[Iye] manyoho aku uka mawi huma Akae intu Yerusalem.” Kores kea mansanan akan uluh Israel, ”Ketun uras je jadi ungkup Hatalla musti buli haluli akan hete! Keleh [Yehowa] mangalindong keton.” (2 Kronika 36:23) Hal tuh pasti mahibur uluh Israel hong Babel!

5. Manumun kuan je manulis Masmur, narai je inggawi Yehowa dengan uluh je atei’ah ramuk?

5 Yehowa puna mahibur hapus bangsa Israel. Tapi, Iye kea mahibur ewen mije-mije. Yehowa malalus hal je sama wayah tuh kea. Je manulis Masmur mansanan amun Hatalla ”mampakeleh oloh je bageto kampongan ateie tuntang mameteng himang ewen”. (Masmur 147:3) Metuh itah haban atawa pehe atei, keleh yakin amun Yehowa peduli dengan itah. Yehowa handak mahibur itah tuntang mampakeleh himang atei itah. (Masmur 34:18; Yesaya 57:15) Iye manenga akan itah kapintar-kaharati tuntang kaabas mangat itah tau bahasil manaharep masalah narai bewei je inaharep itah.​—Yakobus 1:5.

Yehowa handak mahibur itah tuntang mampakeleh himang atei itah

6. Narai gunan Masmur 147:4 akan itah? (Payah gambar hong tamparan artikel.)

6 Limbah te, je manulis Masmur manampayah akan langit tuntang hamauh amun Yehowa ”manukas pire kare bintang” tuntang ”gagenepe uras inenga aran Awie”. (Masmur 147:4) Je manulis Masmur tau manampayah kare bintang te, tapi iye dia katawan pire karen bintang te. Wayah tuh, paneliti katawan amun tege bamiliar bintang hong galaksi itah. Tuntang, tege triliunan galaksi hong hapus alam semesta! Kalunen dia ulih mise jumlah uras bintang. Tapi, Je Manjapa itah tau. Iye mahin manenga aran akan uras bintang. (1 Korintus 15:41) Yehowa je mangatawan eka genep bintang pasti mangasene itah kea. Iye mangatawan hong kueh bewei itah melai, narai je ingkeme itah, tuntang taluh je imerlu itah.

7, 8. (a) Narai bewei je ingatawan Yehowa tahiu itah? (b) Nenga suntu je mamparahan amun Yehowa paduli.

7 Yehowa mangatawan masalah je inaharep itah, tuntang Iye ulih mandohop itah. (Mbasa Masmur 147:5.) Mungkin itah mangkeme amun masalah je inaharep itah bahali tuntang babehat tutu. Tapi, Hatalla mangatawan kakurang itah  tuntang Iye ”mingat je itah toh baya tunek petak”. (Masmur 103:14) Itah kea dia sempurna, jadi itah mungkin mawi kasala je sama baula-ulang, tuntang hal tuh tau manampa itah kurik atei. Itah mungkin manyasal awi sala bapander, awi kanahuang je papa, atawa awi bahiri. Yehowa jatun Kakurang’ah, tapi Iye buju-bujur mangatawan narai je ingkeme itah.​—Yesaya 40:28.

8 En puji Pahari mangkeme amun lengen Yehowa mandohop Pahari metuh manaharep wayah kasusah? (Yesaya 41:10, 13) Ije biti perintis je ara Kyoko puji manaharep hal tuh. Iye mangkeme kurik atei metuh pindah akan eka tugas’ah je taheta. Tapi, Kyoko katawan amun Yehowa paham masalah narai je inaharep’ah. Hong ungkup je taheta, are je ulih paham narai je ingkeme. Iye kila-kilau mahining Yehowa hamauh, ”Aku sinta dengam, beken baya awi ikau perintis, tapi awi ikau anak-Ku tuntang ikau jadi manenga arepmu Akangku. Aku handak ikau sanang manjadi ije biti bara kare saksi-Ku.” Narai je jadi ilalus Yehowa akan Pahari, je mamparahan amun ”kapintar kaharatin Aie jaton bara tikas”?

YEHOWA MANYADIA TALUH JE IMERLU ITAH

9, 10. Narai cara utama Yehowa mandohop itah? Nenga suntu.

9 Itah uras perlu panginan, pakaian, tuntang eka melai. Itah mungkin mikeh panginan itah tapas. Tapi Yehowa jadi manampa bumi mangat tau mahasil sukup panginan akan uras, akan ”anak burong kak je teha-tehau” mahin tege. (Mbasa Masmur 147:8, 9.) Amun Yehowa mampakanan burung kak, itah tau yakin Yehowa kea pasti manyadia narai je imerlu itah.​—Masmur 37:25.

10 Tapi je paling penting, Yehowa manyadia panginan rohani mangat iman itah tatap abas. Tuntang Iye manenga itah ”kasanang bara Hatalla je manangkalau batas kaharatin itah”. (Pilippi 4:6, 7) Ije biti pahari je ara Mutsuo tuntang sawa jadi mangkeme pandohop Yehowa. Hong nyelu 2011, metuh tege tsunami hong Japang, ewen karenga dia matei, tapi ewen salamat awi ewen ulih mandai sapau human ewen. Hong andau te, handak uras ramun ewen lepah nihau. Hamalem ewen tiruh hong loteng human ewen je kaput tuntang sadingen. Pas andau hanjewu, ewen manggau taluh je tau mampaabas iman ewen. Je indinun ewen baya Buku Kegiatan Saksi-Saksi Yehuwa 2006. Mutsuo mambuka buku te tuntang manampayah judul ”Tsunami Terdahsyat yang Pernah Dicatat”. Jite bagian je mangesah tahiu petak hagerek hong Sumatra nyelu 2004 je manjadi sabab tsunami je paling marusak. Metuh mambasa pangalaman kawan pahari je manaharep hal tuh, Mutsuo tuntang sawa manangis. Ewen mangkeme amun Yehowa manenga akan ewen narai je cocok hong katika ewen buju-bujur mamerlu. Yehowa kea manyukup taluh beken je imerlu ewen. Kawan pahari bara daerah beken hong Japang manyadia panginan tuntang pakaian akan ewen. Tapi je paling mampaabas iman ewen iete metuh kawan pahari je ingirim awi organisasi Yehowa maja akan kare ungkup hong hete. Mutsuo hamauh, ”Aku mangkeme amun Yehowa tege hong balikat ikei tuntang Iye maawat ikei. Salawah angatku!” Je  pangkasulak, Hatalla akan manyadia narai je imerlu itah secara rohani mangat iman itah tatap abas, limbah te Iye akan manyadia hal beken je imerlu itah.

CARA MANGAT MANDINUN MANPAAT BARA PANDOHOP HATALLA

11. Narai je perlu ilalus itah mangat mandinun manpaat bara pandohop Hatalla?

11 Yehowa ”mampendeng oloh je buah katulas”. Iye sinta itah tuntang santar siap mandohop. (Masmur 147:6a) Kilen ampi itah tau mandinun manpaat bara Pandohop’ah? Itah perlu bakawal Denga. Awi te, itah perlu balemu atei. (Sepanya 2:3, Surat Barasih 1983) Uluh je balemu atei akan maandal Yehowa manganan gawi je dia adil tuntang kapehe narai bewei je inaharep ewen. Yehowa rajin dengan kare uluh kilau tuh.

12, 13. (a) Narai je musti ingejau itah mangat mandinun pandohop Hatalla? (b) Yehowa rajin dengan kare uluh je kilen ampi?

12 Tapi, ”oloh papa inempak Awie akan  petak”. (Masmur 147:6b) Itah pasti dia handak jite manjadi dengan itah! Itah handak mangkeme sintan Hatalla je baketep. Jadi, itah musti bajilek dengan narai je Injilek’ah. (Masmur 97:10) Suntu, itah musti bajilek dengan gawi seksual je dia bamoral. Jituh rima itah kea mangejau arep bara kare hal je tau mimbit akan gawi te, kilau pornografi. (Masmur 119:37; Mateus 5:28) Mungkin hal tuh bahali tutu, tapi itah perlu malalus’ah awi dengan kalute itah tau manarima berkat Yehowa.

13 Itah dia tau bahasil dengan maandal arep itah kabuat. Itah musti maandal Yehowa. En Iye rajin amun itah maandal narai je iandal awi kalunen? Dia, ”eka karajin [Yehowa] dia ie kuda je abas”. Kilen ampi amun itahmaandal arep kabuat atawa uluh beken? Yehowa dia maanggap tamam ”pahlawan je bahanyi”. (Masmur 147:10) Awi te, itah perlu harajur badoa balaku pandohop Yehowa tuntang balaku mangat itah tau malawan kalemun itah. Yehowa dia puji peda mahining kare lakudoan itah. ”[Yehowa] rajin dengan oloh je baketep, dengan oloh je harajur maharap Asie.” (Masmur 147:11) Yehowa te baketep tuntang sinta itah. Iye akan harajur mandohop itah mampakalah kare kanahuang je sala.

14. Je manulis Masmur yakin akan hal narai?

14 Yehowa manampa itah yakin amun Iye akan mandohop itah metuh itah manaharep masalah. Metuh bangsa Israel haluli akan Yerusalem, je manulis Masmur maniruk kare pandohop bara Yehowa. Iye manyanyi, ”Ie mandehen kare bauntonggang lawang, tuntang mamberkat oloh Ayue. Ie manjaga daerah aim mangat tetep aman.” (Masmur 147:13, 14) Yehowa mansanan amun Iye akan mandehen kare lawang lewu. Jituh manampa je manulis Masmur aman tuntang yakin amun Yehowa akan mangalindung rewar-Ai.

Kilen ampi Firman Hatalla tau mandohop itah metuh itah kurik atei awi masalah itah? (Payah paragrap 15-17)

15-17. (a) Kanatek, kilen ampi angat atei itah dengan masalah je inaharep itah, tapi kilen ampi Yehowa mahapan Firman-Ai uka mandohop itah? (b) Nenga suntu je mamparahan amun Firman Hatalla capat mandohop itah.

15 Pahari mungkin pehe atei awi masalah je inaharep Pahari. Tapi, Yehowa  tau manenga itah kapintar-kaharati uka tahan manyarenan kapehe. Je manulis Masmur hamauh amun Hatalla ”manenga parentah akan petak, tuntang auhe balalu ilalus”. Limbah te, je manulis Masmur bapander tahiu salju, ambun baku, tuntang ujan es. Limbah te iye mansanan, ”Jaton ije je olih manyarenan taharep kasadingee.” Limbah te, iye mansanan kea amun ”tagal parentah Ayue es te jadi danum”. (Masmur 147:15-18) Hatallan itah katawan taluh handiai tuntang tau malalus narai bewei, suntu kilau mangendali es tuntang salju. Jadi, Iye pasti tau mandohop itah manaharep masalah narai bewei.

En Pahari mangkeme amun Yehowa capat manantiring Pahari?

16 Wayah tuh, Yehowa manantiring itah mahalau Firman-Ai, Alkitab. Je manyurat Masmur hamauh amun ”auhe balalu ilalus” uka mandohop itah. Yehowa manantiring itah dengan cara je cocok tuntang huang katika je buah. Coba niruk manpaat je indinun Pahari bara Alkitab, basaan bara ’jipen je baketep tuntang pintar harati’, JW Broadcasting, jw.org, kare bakas ungkup, tuntang kawan pahari. (Mateus 24:45) En Pahari mangkeme amun Yehowa capat manantiring Pahari?

17 Ije biti pahari bawi je ara Simone mandinun pandohop bara Firman Hatalla. Iye mangkeme dia baguna tuntang Yehowa dia peduli denga. Tapi, metuh pehe atei, iye harajur badoa balaku pandohop Yehowa. Iye kea harajur balajar Alkitab. Simone hamauh, ”Metuh aku balaku pandohop Yehowa, Iye santar manenga aku kaabas tuntang manantiring aku.” Jituh mandohop iye manjadi uluh je bapikir labih bahalap.

18. Hak istimewa narai je indinun Pahari, tuntang narai bewei alasan Pahari manara Yehowa?

18 Je manulis Masmur katawan amun hong marak kare bangsa hong bumi, Yehowa mintih bangsa Israel uka manjadi rewar-Ai. Baya ewen je manarima ”peteh Aie” tuntang ”kare atoran” Ai. (Mbasa Masmur 147:19, 20.) Wayah tuh itah mandinun hak istimewa awi tau mawakil aran Hatalla. Itah hanjak awi tau mangasene Iye, manarima Firman-Ai je manantiring itah, tuntang bakawal rantep Denga. Kilau je manulis Masmur 147, itah tege are alasan uka ’manara [Yehowa]’ tuntang marawei uluh beken uka malalus hal je sama.