Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Juli 2017

”Manangis dengan Ewen je Manangis”

”Manangis dengan Ewen je Manangis”

”Keleh keton tetep hatantiring tuntang mampaabas sama arep keton.”​—1 TESALONIKA 5:11.

NYANYIN: 12175

1, 2. Mbuhen itah perlu mambahas cara mahibur uluh je kapehe atei? (Payah gambar hong tamparan artikel.)

SUSI hamauh, ”Tukep ije nyelu limbah pampatei anak ikei, ikei mangkeme pehe atei tutu.” Ije biti pahari je sawa salenga matei mangesah amun iye mangkeme ”paham angat kapehe” sampai lembut kahaban. Je manjadi, are uluh je mangkeme kilau te. Hong ungkup Kristen wayah tuh, are kawan pahari je dia manyangka amun uluh je inyinta ewen matei helu bara Armagedon. Mungkin, ije biti uluh je inyinta Pahari matei atawa Pahari mangasene uluh beken je kapehe atei awi pampatei uluh je inyinta. Jadi, kilen ampi uluh je pehe atei awi pampatei tau tahibur?

2 Tege je mansanan amun waktu tau mampakeleh uras kapehe. Tapi, en bujur santar kalute? Ije biti pahari balu hamauh, ”Bara pangalamangku, je tau manampa ije biti uluh keleh iete cara iye mahapan waktu.” Mangat  himang hong biti tau keleh, perlu waktu tuntang iobat. Kalute kea, mangat himang hong atei tau keleh, perlu waktu tuntang iobat. Jadi, narai je tau mangurang kapehe je ingkeme awi uluh je ilihi matei?

YEHOWA IETE ”HATALLA JE MANDEHEN PAMBELOM HAMBARUAN”

3, 4. Mbuhen itah yakin Yehowa tau mangkeme narai je ingkeme itah metuh uluh je inyinta itah matei?

3 Je paling tau mahibur itah iete Bapa itah Yehowa. (Mbasa 2 Korintus 1:3, 4.) Iye tau mangkeme kapehen atei kalunen. Iye suntu je paling bahalap huang hal tuh, tuntang Iye bajanji dengan rewar-Ai, ”Aku toh ie, idje mampong keton.”​—Yesaya 51:12, Surat Barasih 1983; Masmur 119:50, 52, 76.

Yehowa manunggu-nunggu katika uka mampisik kare uluh hatue je baketep tuh

4 Yehowa kea puji mangkeme uluh je Inyayang’ah nihau, kilau Abraham, Ishak, Yakub, Moses, tuntang Raja Dawid. (Numeri 12:6-8; Mateus 22:31, 32; Gawin Rasul 13:22) Alkitab mansanan amun Yehowa manunggu-nunggu katika uka mampisik kare uluh hatue je baketep tuh. (Yob 14:14, 15) Tuntang limbah impisik, ewen akan sanang tuntang barigas. Yehowa kea mangkeme kilen ampi kapehe metuh anak tambakas-Ai nihau. Alkitab mansanan amun Yesus ’anak je eka sintan Hatalla’. (Sewut Salomo 8:22, 30) Itah dia ulih mamikir kilen ampi angat kapehe je ingkeme Yehowa metuh manampayah Anak-Ai inyiksa sampai matei.​—Yohanes 5:20; 10:17.

5, 6. Narai ije bara kare cara Yehowa mahibur itah?

5 Itah tau buju-bujur percaya amun Yehowa akan mandohop itah. Jadi, ela samasinde ragu balakudoa tuntang manusuh angat kapehen atei itah Aka. Itah pasti ihibur awi mangatawan amun Yehowa katawan angat atei itah tuntang siap manenga pandohop je imerlu itah. Tapi, kilen ampi Iye malalus’ah?

6 Ije cara iete dengan pandohop roh barasih. (Gawin Rasul 9:31) Yesus bajanji amun Yehowa akan manenga roh barasih akan uras uluh je balaku. (Lukas 11:13) Susi, je inyewut endau, hamauh, ”Ikei rancak tutu mandeku utut tuntang balaku Yehowa mahibur ikei. Genep ikei malalus’ah, kadamai bara Hatalla mahaga atei tuntang tiruk ikei.”​—Mbasa Pilippi 4:6, 7.

YESUS KEA MANGATAWAN NARAI JE INGKEME ITAH

7, 8. Mbuhen itah yakin amun Yesus akan mahibur itah?

7 Metuh melai hong bumi, Yesus manyuntu kare sipat Bapa dengan sempurna mahalau kutak tuntang taluh  gawi. (Yohanes 5:19) Yehowa mautus Yesus akan bumi uka mahibur ”oloh je jaton bara kaharap” tuntang ”kakare oloh je kapehe atei”. (Yesaya 61:1, 2; Lukas 4:17-21) Yesus tau mangkeme kapehe je ingkeme kakare uluh hong jaman te tuntang handak mandohop ewen. Tuntang ewen mangatawan hal te.​—Ibrani 2:17.

8 Metuh Yesus masih tabela, mungkin jadi tege tundah kula atawa sobat’ah je matei. Ije suntu, bapa angkat Yesus je ara Yosep mungkin jadi matei metuh Yesus masih tabela. * (Payah catatan penda.) Coba niruk, pasti dia purah akan Yesus je paduli tutu dengan uluh beken metuh iye bausaha manaharep kapehe atei awi uluh je inyayang matei, tuntang hong katika je sama iye musti mahibur indu tuntang kea awang andi.

9. Narai je mamparahan amun Yesus mangatawan narai je ingkeme uluh beken?

9 Katahin pelayana, Yesus mamparahan amun iye buju-bujur mangatawan narai je ingkeme uluh are. Akan suntu, metuh sobat ayu Lasarus matei, Yesus mangkeme kapehe atei je ingkeme Maria tuntang Marta sampai-sampai iye manangis, padahal dia pire hindai iye mampisik Lasarus.​—Yohanes 11:33-36.

10. Mbuhen Yesus mangatawan narai je ingkeme itah wayah tuh?

10 Narai pengaruh auh Yesus je mahibur akan itah wayah tuh? Alkitab mamparahan dengan jelas amun Yesus dia hubah. ”Yesus Kristus tetep sama, aloh bihin, metoh toh, tuntang sampai katatahie.” (Ibrani 13:8) Iye inyewut ”Batang pambelom”, awi iye tau manampa itah belum katatahi. Yesus kabuat puji kea manaharep kapehe atei, awi te ”Ie tau mandohop oloh je buah tingkes”. (Gawin Rasul 3:15; Ibrani 2:10, 18) Jadi, itah tau yakin amun Yesus mangkeme kea kapehen uluh je manaharep pampatei uluh je inyinta. Yesus katawan narai je ingkeme ewen tuntang tau mahibur ewen ”hong katikae je buah”.​—Mbasa Ibrani 4:15, 16.

’SURAT BARASIH MAWI ITAH ABAS’

11. Akan Pahari, ayat kueh je paling mahibur?

11 Kesah tahiu Yesus je pehe atei awi pampatei Lasarus baya ije bara are ayat hong Firman Hatalla je tau mahibur itah. Tutu, ”Kakare taloh je tarasurat hong Surat Barasih jete hapa majar itah. Basa auh ajar je inarima itah bara Surat Barasih mawi itah baketep tuntang abas sampai itah tau manaharep Hatalla.” (Roma 15:4) Amun Pahari metuh kapehe atei, Pahari tau tahibur kea dengan mambasa kare ayat je manyalawah atei, kilau:

  • ”TUHAN tokep dengan oloh je korik ateie; Ie manyalamat oloh je balemo atei huange.”​—Masmur 34:18, 19.

  • ”Amon ateiku bagalabah tuntang  balisah, Ikau mampong tuntang mampahanjak aku”—Masmur 94:19.

  • ”Keleh Tuhan itah Yesus Kristus kabuat, tuntang Hatalla Bapa itah mampong tuntang mampaabas atei keton, . . . Basa Hatalla sinta itah, tuntang tagal kahalap atei Aie Ie manenga akan itah kamenteng je toto, hayak maharap taloh je bahalap.”​—2 Tesalonika 2:16, 17. *—Payah catatan penda.

UNGKUP SUMBER KAABAS

12. Kilen ampi cara mahibur uluh je pehe atei awi ilihi matei?

12 Ungkup kea tau mahibur uluh je pehe atei awi ilihi matei. (Mbasa 1 Tesalonika 5:11.) Narai je tau inggawi Pahari akan mahibur tuntang mampaabas ”atei je susah”? (Sewut Salomo 17:22) Perlu iingat kea tege ”katika akan suni tuntang katika akan hakotak”. (Pangabar 3:7) Ije biti balu je ara Dalene mansanan amun uluh je pehe atei awi pampatei perlu manusuh pikiran tuntang angat atei ewen. Awi te, hal je paling bahalap je tau ilalus Pahari iete mahining bua-buah narai kuan ewen. Limbah pahari je hatue mampatei arep, Junia hamauh, ”Aluh Pahari dia tau buju-bujur mangatawan kilen ampi kapehen atei ewen, je penting iete Pahari jadi bausaha uka mangkeme kapehen atei ewen.”

13. Narai je perlu iingat itah?

13 Itah perlu mingat amun kapehen atei genep biti uluh tuntang cara ewen manusuh angat atei ewen dia sama. Kanatek’ah itah dia ulih mangesah kilen ampi sapuna je ingkeme itah. Alkitab mansanan, ”Hanjak atawa susah aton intu atei; oloh beken dia olih omba mangkemee.” (Sewut Salomo 14:10) Aluh mungkin ije biti uluh tau mangesah narai je ingkeme, hindai pasti uluh beken tau buju-bujur mangatawan narai je handak inyampai’ah.

Bahut, hal je paling bahalap je tau ilalus Pahari iete ”manangis dengan ewen je manangis”

14. Narai je tau imander itah akan mahibur uluh je kapehe atei?

14 Itah mungkin bingung handak mander narai akan uluh je kapehe atei. Tapi Alkitab mansanan amun ”kare auh je pintar kaharati kilau tatamba je mampakeleh”. (Sewut Salomo 12:18) Are uluh mandinun kare auh je mahibur bara brosur Bila Seseorang yang Anda Kasihi Meninggal. * (Payah catatan penda.) Tapi bahut, hal je paling bahalap je tau ilalus Pahari iete ”manangis dengan ewen je manangis”.  (Roma 12:15) Gaby, je ilihi matei bana, mansanan amun kanatek’ah, iye dia tau mamparahan narai je ingkeme beken bara dengan cara manangis. Iye mansanan kea, ”Awi te, aku tahibur metuh kakawalangku umba manangis. Jadi, aku mangkeme dia baya aku kabuat je pehe atei.”

15. Amun angat’ah itah bahali bapander langsung uka mahibur, narai je tau ilalus itah? (Payah kea kotak ” Kare Auh Kutak je Mampaabas”.)

15 Amun angat’ah Pahari bahali bapander langsung, Pahari tau mahibur mahalau kartu, e-mail, SMS, atawa surat. Pahari tau manulis ayat je mahibur, mangesah tahiu kare sipat je bahalap bara uluh je nihau, atawa mangesah hal bahalap je puji ingkeme Pahari dengan uluh te. Junia hamauh, ”Manarima SMS je mampaabas atawa parawei uka kumpu-kumpul dengan kawan pahari beken mandohop tutu. Aku mangkeme inyayang tuntang inantuani.”

16. Narai ije cara uka mahibur uluh je kapehe atei?

16 Kare lakudoan itah tau mandohop kawan paharin itah je kapehe atei. Itah tau balakudoa akan ewen atawa balakudoa haya-hayak dengan ewen. Mungkin, Pahari mangkeme jituh bahali inggawi awi Pahari tau manangis metuh balakudoa. Tapi, lakudoan Pahari je tutu-tutu bara atei tau mahibur. Dalene mingat, ”Kanatek’ah, metuh kare pahari je bawi dumah mahibur aku, aku balaku ewen balakudoa akangku. Metuh nampara balakudoa,  ewen kanatek’ah gagap, tapi limbah pire-pire kutak, kutak ewen nampara lancar tuntang lakudoan ewen tutu-tutu balua bara atei. Iman, sinta, tuntang perhatian ewen je hai buju-bujur mampaabas imanku.”

KELEH TARUS MAHIBUR

17-19. Mbuhen itah perlu tarus mahibur ewen je kapehe atei?

17 Itah dia katawan pasti pire katahi ije biti uluh manyarenan kapehen atei. Katika ije biti uluh nihau uluh je inyayang’ah, sulak’ah pasti tege are kawal tuntang keluarga je mahibur. Tapi, dia tahi limbah te, ewen haluli malalus pambelum ewen kilau bahut. Tapi sapuna, uluh je pehe atei masih perlu ihibur. Jadi, itah perlu santar siap mandohop. ”Sobat toto haradjur sinta, tuntang inakan mandjadi pahari, mangat mandohop huang kadjake.” (Sewut Salomo 17:17, Surat Barasih 1983) Itah perlu tarus mahibur kare uluh je kapehe atei katahin ewen manyarenan kapehen atei ewen.​—Mbasa 1 Tesalonika 3:7.

18 Keleh mingat amun kanatek’ah ije biti uluh tau salenga mangkeme pehe atei. Mungkin jituh manjadi awi tanggal pangawin, musik, poto, kare gawi, atawa awi kare ewau, suara, atawa kare musim. Metuh ije biti uluh je ilihi matei awi bana atawa sawa nampara manggawi kare hal kabuat, kilau dumah akan kebaktian atawa Pampingat, jite tau mangapehe atei. Ije biti pahari hamauh, ”Aku bapikir amun limbah sawangku nihau, tanggal pangawin ikei tau manjadi katika je babehat tuntang dia purah akangku. Tapi tege pire-pire pahari je manampa acara mangat aku tau bakumpul haya-hayak dengan kare kawal tukepku. Jadi, aku dia kabuat hong tanggal pangawin ikei.”

19 Keleh ingat amun itah perlu mahibur uluh je kapehe atei dia baya hong kaadaan khusus. Junia mangesah, ”Bahut, amun tege je dumah mandohop atawa mangawal aku hong katika je dia khusus, hai tutu pengaruh’ah. Tuntang jite tau buju-bujur mahibur.” Itah puna dia tau mampanihau kapehen atei ewen. Tapi, itah tau mahibur ewen dengan malalus pire-pire hal akan ewen. (1 Yohanes 3:18) Gaby hamauh, ”Aku basukur tutu awi Yehowa manenga kawan bakas ungkup je manyayang aku. Ewen mandohop aku uka tarus manyuru wayah kapehe. Ewen buju-bujur manampa aku mangkeme amun Yehowa mamangkut aku.”

20. Mbuhen kare janji Yehowa tau mahibur itah?

20 Itah pasti salawah awi mangatawan amun Yehowa, Hatalla je mahibur, akan mampanihau uras kapehen atei metuh kamisik. (Yohanes 5:28, 29) Hatalla bajanji amun Iye ”akan mambinasa pampatei palus katatahie! Ie akan mampuas danum mata bara genep baun oloh”. (Yesaya 25:8) Jadi metuh te, jatun hindai je ”manangis dengan ewen je manangis”, tapi uras uluh hong bumi akan ”hanjak dengan kare oloh je hanjak”.​—Roma 12:15.

^ par. 8 Alkitab mamparahan amun Yosep masih belum metuh Yesus baumur 12 nyelu. Tapi, bara katika Yesus manampa mujizat pangkasulak maubah danum manjadi anggur, Yosep dia puji inyewut hindai. Mungkin, iye jadi matei. Beken bara te, metuh Yesus hong tihang pampatei, iye balaku rasul Yohanes uka mahaga indu. Hai kemungkinan iye dia mansanan hal tuh amun Yosep masih belum.​—Yohanes 19:26, 27.

^ par. 11 Kare ayat beken je jadi bahasil mahibur are uluh iete Masmur 20:2, 3; 31:8; 38:9, 10, 16; 55:23; 121:1, 2; Yesaya 57:15; 66:13; Pilippi 4:13; tuntang 1 Petrus 5:7.

^ par. 14 Payah kea artikel ”Hiburlah Yang Berduka, seperti Yesus” je tege hong Menara Pengawal 1 November 2010.