Langsung ke konten

Langsung ke daftar isi

Saksi-Saksi Yehuwa

Pilih bahasa Dayak Ngaju

Sinta Kilen Ampi je Manampa Itah Buju-Bujur Hanjak?

Sinta Kilen Ampi je Manampa Itah Buju-Bujur Hanjak?

’Hanjak ungkup je Hatallan ayue te Yehowa!’​—MASMUR 144:15.

NYANYIN: 75, 73

1. Mbuhen jaman itah belum wayah tuh dia sama dengan jaman je beken?

ITAH belum hong jaman je dia sama dengan bihin. Wayah tuh, kilau je inujum Alkitab, Yehowa kanjera mangumpul kumpulan hai kalunen ”bara genep bangsa, suku, negara, tuntang bahasa”. Ewen te ”bangsa je hai tuntang abas”. Tege hanya juta uluh je dengan hanjak ”manyembah [Hatalla] handau hamalem”. (Pangarinah 7:9, 15; Yesaya 60:22) Dia puji tege are tutu uluh je buju-bujur sinta Hatalla tuntang sama arep ewen.

2. Sinta je sala kilen ampi je imparahan kare uluh je dia mangasene Hatalla? (Payah gambar hong tamparan artikel.)

2 Tapi, Alkitab kea mansanan hong jaman itah, kare uluh je dia mangasene Hatalla akan labih mamenting arep. Rasul Paulus manyurat hong andau je pangkarahia kare uluh akan ”manggau taloh akan kepentingan arepe kabuat, tantai handak manggau duit bewei”, tuntang ”labih rajin dengan kasanang kalunen bara manumon kahandak Hatalla”. (2 Timoteus 3:1-4) Sinta je mamenting  arep tuh hakalawan dengan sinta akan Hatalla. Uluh je mamenting arep bapikir dengan manomor ije kanahuang ewen kabuat akan manampa ewen hanjak. Tapi, ewen sala. Jite malah manampa pambelum uras uluh manjadi susah.

3. Narai je akan imbahas itah? Mbuhen?

3 Rasul Paulus katawan tapaare uluh akan mamenting arep tuntang uluh Kristen tau tapangaruh. Maka, iye mampingat mangat ewen mangejau kare uluh je kilau te. (2 Timoteus 3:5) Tapi kanatek’ah, itah musti baurusan dengan ewen. Jadi, kilen ampi cara mangat itah dia tapangaruh tuntang tatap tau manyanang Yehowa, iete Hatalla sinta? Ayo itah mbahas narai beda sinta je Yehowa handak uka itah mamparaha tuntang sinta je inyewut hong 2 Timoteus 3:2-4. Limbah te, itah akan mambahas kilen ampi cara itah tau mariksa arep tuntang mamparahan sinta je tau buju-bujur mampahanjak itah.

SINTA HATALLA ATAWA AREP KABUAT?

4. Mbuhen dia sala amun itah sinta arep kabuat?

4 Paulus manyurat, ”Oloh kareh manggau taloh akan kepentingan arepe kabuat.” En jituh rima itah dia tau sinta arep itah? Beken kalute. Dia sala itah sinta arep itah awi Yehowa puna manjapa itah kilau te. Malah, itah sapuna perlu malalus’ah. Yesus hamauh, ”Sinta sama arepm kilau ikau sinta arepm kabuat.” (Markus 12:31) Yoh, itah dia tau sinta uluh beken amun itah dia sinta arep itah kabuat. Alkitab kea hamauh, ’Oloh hatue musti sinta sawae sama kilau ie sinta bitin Ayue kabuat. Oloh je sinta sawae rimae ie sinta arepe kabuat. Jaton puji oloh je basingi dengan bitin Ayue kabuat. Tapi ie mahaga tuntang manjagae.’ (Epesus 5:28, 29) Maka jelas, itah perlu sinta arep kabuat.

5. Kilen ampi uluh je baya sinta arep kabuat?

5 Tapi, 2 Timoteus 3:2 bapander tahiu uluh je sinta arep kabuat. Uluh kilau te sinta arep’ah lalau malabien. Iye mangkeme arep’ah labih gantung bara je sapuna. (Mbasa Roma 12:3.) Iye dia peduli dengan uluh beken. Amun tege masalah, iye santar manyala uluh beken. Ije ulasan Alkitab manyama uluh kilau te dengan tahatung (landak) je mangarekot. Tahatung te mangat huang bulu je balemu, tapi je beken baya mangkeme duhi je batajim. Uluh je kilau te dia akan buju-bujur hanjak.

Sinta Hatalla akan mahasil kare sipat bahalap

6. Narai manpaat amun itah sinta Hatalla?

6 Metuh Paulus manyewut tahiu kare sipat papa hong 2 Timoteus 3:2-4, sinta arep kabuat pangkasulak inyewut. Kuan pire-pire ahli Alkitab, jite awi sinta arep kabuat mahasil kare sipat papa beken je inyewut Paulus limbah te. Kabalika, sinta Hatalla akan mahasil kare sipat bahalap, kilau kahanjak, kadamai, kasabar,  asi, kahalap, iman, kalemu atei, tuntang mangendali arep. (Galatia 5:22, 23) Je manyurat Masmur mansanan, ”Salamat [atawa, hanjak] ungkup je Hatallan ayue te [Yehowa]!” (Masmur 144:15) Yehowa te Hatalla je hanjak, maka rewar-Ai kea hanjak. Beken bara te, ewen hanjak awi rajin manenga. (Gawin Rasul 20:35) Ewen dia kilau kare uluh je sinta arep kabuat, je baya mamikir narai je tau inarima ewen.

Narai je musti ilalus itah mangat dia lalau manyinta arep kabuat? (Payah paragrap 7)

7. Narai bewei paisek je tau mandohop itah mamasti amun itah sinta Hatalla?

7 Kilen ampi itah tau mamasti amun itah labih sinta Hatalla bara arep itah kabuat? Ngumang nasehat bahalap tuh: ”Ela malalus taloh en-en akan kapentingan arep kabuat, atawa handak mampatamam arep. Tapi keleh keton genep biti dengan randah atei maanggap oloh beken labih bahalap bara arep kabuat. Keleh manantuani kapentingan oloh beken; ela baya kapentingan arep kabuat.” (Pilippi 2:3, 4) Coba niruk: ’En aku malalus nasehat tuh? En aku bausaha malalus kahandak Yehowa? En aku siap mandohop uluh beken hong ungkup tuntang huang dinas lapangan?’ Puna, dia purah malalus uras’ah. Itah musti pahias mahapan waktu tuntang kaabas itah. Mungkin, itah kea perlu mangorban kare hal je irajin itah. Tapi amun itah malalus’ah, itah akan hanjak awi katawan itah manyanang Panguasa alam semesta!

8. Narai je ilalus are uluh Kristen awi ewen sinta Hatalla?

8 Awi sinta Hatalla tuntang handak manempu Iye dengan labih handalem, are uluh Kristen mangorban gawin ewen, je mungkin tau manampa ewen tatau tutu. Ericka, ije biti dokter,  mamutus uka dia manomor ije gawi. Iye mintih uka merintis. Ericka tuntang kabali jadi melayani hong pire-pire negara. Iye hamauh, ”Awi ikei mandohop kare daerah je mahapan bahasa beken, ikei mandinu are pengalaman tuntang sobat, jite buju-bujur manampa pambelum ikei sasar tatau.” Ericka masih bagawi manjadi dokter, tapi tapaare waktu tuntang kaabas’ah ihapan akan majar tahiu Yehowa tuntang mandohop kare pahari. Iye mansanan amun uras tuh manampa iye ”mangkeme kahanjak tuntang buju-bujur puas”.

PANATAU HONG SORGA ATAWA HONG BUMI

9. Mbuhen uluh je sinta duit dia akan hanjak?

9 Paulus kea manyurat amun kare uluh akan ”tantai handak manggau duit bewei”. Pire-pire nyelu je mahalau, ije biti perintis hong Irlandia bapander tahiu Hatalla akan ije biti uluh hatue. Hatue te mambuka dompet’ah limbah te mampalua duit tuntang hamauh, ”Tuh hatallangku!” Are uluh mangkeme je sama aluh ewen dia mangaku. Ewen sinta duit tuntang taluh je tau imili hapan duit. Tapi Alkitab mampingat, ”Oloh je gila panatau, dia puji ombet huange dengan kaontong.” (Pangabar 5:9) Yoh, uluh je sinta duit akan santar manggau labih are. Iye akan mahapan pambelum’ah uka manggau duit. Awi te, iye mangekeme ”are buah kapehe”.​—1 Timoteus 6:9, 10.

10. Narai je insanan Alkitab tahiu katatau tuntang kasusah?

10 Itah uras puna perlu duit, awi ”duit panyalawah atei”. (Pangabar 7:12) Tapi, en itah tau hanjak amun duit itah baya sukup akan kaperluan utama itah? Yoh! (Mbasa Pangabar 5:12.) Agur anak Yake manyurat, ”Ela manalua aku belom susah atawa tatau. Tenga akangku baya taloh je imerlu awiku.” Hatue tuh dia handak belum susah awi iye tau manakau. Iye katawan amun iye manakau, jite tau mamapa aran Hatalla. Tapi, mbuhen iye dia handak manjadi tatau? Iye manyurat, ”Awi, amon aku tatau, tau aku hamauh aku dia perlu Dengam.” (Sewut Salomo 30:8, 9) Pahari mungkin katawan kare uluh je maandal panatau ewen, beken Hatalla.

11. Narai je insanan Yesus tahiu panatau?

11 Uluh je sinta duit dia tau manyanang Hatalla. Yesus hamauh, ”Ije biti mahin jaton oloh tau bagawi akan due tuan. Basa ie kareh labih sinta dengan ije bara dengan je beken te. Atawa ie kareh labih heret dengan tuan ije te bara je beken. Kalote kea dengan keton. Keton dia tau bagawi akan Hatalla tuntang akan ramon panatau kea.” Yesus kea hamauh, ”Ela manampunan panatau akan arep keton hong kalunen toh, je eka gagat tuntang tagar tau marusake tuntang maling tau manakaue. Tapi tampunan panatau sorga, je eka gagat tuntang tagar dia tau marusake, tuntang maling dia tau dumah manakaue.”​—Mateus 6:19, 20, 24.

12. Narai manpaat manyederhana pambelum? Nenga suntu.

12 Are rewar Yehowa manyederhana pambelum ewen mangat ewen tege are waktu uka manempu Yehowa. Ewen manjadi labih hanjak. Jack, je melai hong Amerika Serikat manjual huma je hai tuntang bisnis ai mangat iye tau merintis  dengan sawa. Iye bakesah, ”Bahali angat’ah manjual huma tuntang ramun ikei je bahalap hong daerah saran kota. Tapi, katahin banyelu-nyelu, aku rancak buli huang kaadaan stres awi masalah hong ekaku bagawi. Sawangku je manjadi perintis biasa, gitangku hanjak. Iye rancak hamauh, ’Bosku te bos je paling bahalap!’ Wayah tuh aku kea merintis, tuntang ikei bagawi akan bos je sama, Yehowa.”

’En cara aku belum mamparahan amun aku manumun nasehat Alkitab tahiu duit?’

Narai je musti ilalus itah mangat dia lalau manyinta duit? (Payah paragrap 13)

13. Kilen ampi itah tau mariksa pandangan itah tahiu duit?

13 Itah perlu jujur mariksa arep itah tahiu pandangan dengan duit. Coba niruk: ’En cara aku belum mamparahan amun aku manumun nasehat Alkitab tahiu duit? En manggau duit manjadi hal je utama huang pambelumku? Akangku, en kare ramu manjadi hal je labih penting bara hubungangku dengan Yehowa tuntang uluh beken? En aku buju-bujur yakin amun Yehowa tau manyadia narai bewei je imerluku?’ Itah tau yakin Yehowa dia akan manampa kare uluh je maandal Iye kecewa!​—Mateus 6:33.

SINTA HATALLA ATAWA KASANANG?

14. Narai pandangan je bahalap tahiu kasanang?

14 Alkitab kea hamauh hong andau je pangkarahia, uluh akan ”labih rajin dengan kasanang”. Itah jadi mambahas dia sala amun itah sinta arep kabuat tuntang manggau duit, asal dia malabien. Kalute kea, dia sala itah sana-sanang asal dia malabien. Pire-pire uluh mangkeme amun kalunen dia tau samasinde sana-sanang. Tapi, beken jite je ingahandak Yehowa. Alkitab hamauh, ”Ayo, keleh kuman tuntang hanjak, ihop anggorm dengan kahanjak.”​—Pangabar 9:7.

15. Narai rima labih rajin kasanang?

15 Nantuani 2 Timoteus 3:4 mansanan amun kare uluh akan ”labih rajin dengan kasanang kalunen bara manumon kahandak Hatalla”. Tapi jite beken rima sintan ewen akan Hatalla tapas. Kuan ije biti ahli, jite rima ”ewen dia sinta Hatalla samasinde”. Alkitab hamauh amun uluh kilau te impipen awi kasanang pambelum. (Lukas 8:14) Jituh buju-bujur serius tuntang musti imikir awi ewen je labih rajin kasanang.

16, 17. Kilen ampi Yesus manenga itah suntu tahiu mangkeme kasanang?

16 Yesus mamparahan amun pandanga tahiu kasanang seimbang. Iye puji dumah akan ”pesta kawin” tuntang ije ”pesta” hai beken. (Yohanes 2:1-10; Lukas 5:29) Metuh anggur hong pesta kawin te lepah, Yesus manampa mujizat dengan maubah danum manjadi anggur. Hong katika beken, metuh uluh manyalan Yesus awi kuman tuntang mihup, Yesus manjelas amun pandangan ewen dia seimbang.​—Lukas 7:33-36.

17 Tapi akan Yesus, mangkeme kasanang jite beken je nomor ije huang pambelum’ah. Iye santar manomor ije  Yehowa tuntang bausaha saulih’ah uka mandohop uluh beken. Iye nyamah pahias manaharep pampatei je mangapehe uka manyalamat kalunen. Yesus mansanan akan kare uluh je maumba iye, ”Salamat keton amon keton ihalalea atawa ingapehe, tuntang imapa tagal Aku. Kare nabi je belom helo bara keton mahin jari ingapehe kilau te. Buah keton hanjak rantang, basa hai upah je inatap Tuhan akan keton.”​—Mateus 5:11, 12.

Narai je musti ilalus itah mangat dia lalau manyinta kasanang? (Payah paragrap 18)

18. Paisek narai bewei je tau mandohop itah mariksa pandangan itah tahiu kasanang?

18 Kilen ampi itah tau mariksa pandangan itah tahiu kasanang? Keleh ngumang: ’En aku manomor ije hiburan bara hapumpung tuntang mangabar? En aku pahias mangorban kare hal je inyanangku uka manempu Yehowa? En aku mamikir pandangan Yehowa metuh mintih hiburan?’ Awi itah sinta Hatalla tuntang handak mampahanjak Iye, itah dia baya mahakan kare hal je itah katawa sala, tapi kea kare hal je ingkeme itah tau manampa Yehowa basingi.​—Mbasa Mateus 22:37, 38.

CARA ITAH TAU HANJAK

19. Uluh kilen ampi je dia akan buju-bujur hanjak?

19 Dunia Setan jadi manampa kalunen kapehe katahin 6.000 nyelu. Wayah tuh, hong kare andau je pangkarahia tuh, bumi kuntep dengan kare uluh je baya mamikir arep kabuat, duit, tuntang kasanang. Je imikir ewen baya narai je tau indinun ewen. Ewen manomor ije kanahuang ewen kabuat. Uluh je kute dia tau buju-bujur hanjak! Kabalika, Alkitab mansanan, ”Salamat oloh je maandal [Yehowa] Hatallae, tuntang tempon Hatallan Yakob kilau pandohop ayue.”​—Masmur 146:5.

20. Kilen ampi Pahari mangkeme kabuat kahanjak awi sinta dengan Hatalla?

20 Sasar tahi, kare rewar Yehowa buju-bujur sinta Iye. Tuntang genep nyelu, are uluh handak mangasene Yehowa tuntang sinta Denga kea. Jite mambukti amun Karajaan Hatalla kanjera mamarentah tuntang dia pire hindai akan mampadumah kare berkat je tamam tutu! Amun itah malalus kahandak Yehowa, Iye akan sanang tuntang itah kea buju-bujur hanjak. Yoh, uluh je sinta Yehowa akan hanjak katatahi! Hong artikel je harian, itah akan mambahas kare sipat papa je lembut awi sinta je mamenting arep. Itah kea akan manampayah kilen ampi kare sipat te beda dengan kare sipat bahalap rewar Yehowa.