Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Januari 2018

Yehowa Tempun Taluh Handiai—Mbuhen Itah Manenga Aka?

Yehowa Tempun Taluh Handiai—Mbuhen Itah Manenga Aka?

”O Hatallan ikei, ikei manarimakasih intu Ikau, ikei manara kahain Aim.”​—1 KRONIKA 29:13.

NYANYIN: 95, 58

1, 2. Narai je mamparahan amun Yehowa te murah atei?

YEHOWA te Hatalla je murah atei. Uras ayun itah dumah bara Iye. Iye tempun taluh handiai hong bumi tuh tuntang mahapan jite mangat uras je injapa tau belum. (Masmur 104:13-15; Hagai 2:8) Alkitab mamparahan amun Yehowa kanatek’ah manampa mujizat uka manyadia narai je imerlu rewar-Ai.

2 Suntu, katahin 40 nyelu, Yehowa manyadia manhu tuntang danum akan bangsa Israel metuh ewen belum hong padang pasir. (Eksodus 16:35) Hasil’ah, ewen dia mangkeme katapas samasinde. (Nehemia 9:20, 21) Mahalau Nabi Elisa, Yehowa manampa mujizat akan ije biti balu je baiman. Balu te baya atun isut undus, tapi Yehowa manampa batambah labih are. Panengan Yehowa te manampa iye tuntang kawan anak’ah tau tatap belum tuntang mambayar kare utang ayu. (2 Raja 4:1-7) Yehowa kea  manenga Yesus kuasa uka manyadia panginan, mahin tau manyadia duit metuh imerlu.​—Mateus 15:35-38; 17:27.

3. Narai je akan imbahas itah hong artikel tuh?

3 Yehowa tau mahapan narai bewei je Ingahandak’ah uka manyadia narai je imerlu taluh je Injapa. Tapi, Iye handak kare rewar-Ai manyumbang uka mendukung organisasi Ayu. (Eksodus 36:3-7; mbasa Sewut Salomo 3:9.) Mbuhen Yehowa handak itah manenga ”panatau” itah Aka? Kilen ampi kare rewar Hatalla jaman huran mendukung Gawi? Kilen ampi organisasi Hatalla wayah tuh mahapan duit je inyumbang? Jituh je akan imbahas itah hong artikel tuh.

MBUHEN ITAH MANENGA AKAN YEHOWA?

4. Mbuhen itah handak manenga akan Yehowa?

Itah handak manenga akan Yehowa awi itah sinta Denga

4 Itah handak manenga akan Yehowa awi itah sinta tuntang marega Iye. Atei itah pasti inggerek amun itah mamikir uras je jadi inggawi Yehowa akan itah. Raja Dawid mangkeme kilau te metuh iye manarang narai bewei je imerlu uka mamangun bait. Iye hamauh narai bewei ayun itah, jite dumah bara Yehowa. Jadi narai bewei je inenga itah Aka sapuna bara Iye kea.​—Mbasa 1 Kronika 29:11-14.

5. Kilen ampi Alkitab mamparahan amun manenga te ije bagian penting bara ibadat itah akan Yehowa?

5 Manenga akan Yehowa te bagian bara ibadat itah Aka. Huang ije paite, Rasul Yohanes mahining kare taluh belum huang sorga hamauh, ”O Tuhan [Yehowa], o Hatallan ikei! Ikau wei je patut mandino tara, hormat tuntang kuasa. Awi ikau je manjapa kare taloh handiai, tuntang tagal kahandak Ayum kea kare taloh handiai te jari manjadi tuntang belom.” (Pangarinah 4:11) Yoh, Yehowa patut inara tuntang ihormat. Maka, itah handak manenga je pangkahalap Aka. Mahalau Moses, Yehowa balaku uluh Israel uka malalus telu pesta ibadat genep nyelu. Ije bara kare cara ewen baibadat iete dengan manenga Aka. Genep biti bara ewen mimbit parapah. (Deuteronomium 16:16) Wayah tuh, manenga dengan kahias te ije bagian penting bara ibadat itah kea. Dengan manenga, itah mamparahan amun itah marega tuntang mendukung organisasi Yehowa.

6. Narai manpaat manenga? (Payah gambar hong tamparan artikel.)

6 Itah akan mandinun manpaat amun itah manenga dengan murah atei tuntang dia baya santar manarima bewei. (Mbasa Sewut Salomo 29:21.) Coba niruk, ije biti anak kurik je manabung bara duit je inenga uluh bakas’ah uka mamili hadiah akan ewen. Kilen ampi angat atei uluh bakas’ah? Atawa, coba niruk ije biti perintis je melai dengan uluh bakas’ah tuntang iye mandohop ewen mambayar sewa huma atawa mamili panginan akan ewen. Uluh bakas’ah  mungkin dia maharap jite, tapi ewen tatap manarima. Mbuhen? Awi panengan te mamparahan amun anak te marega uras je jadi ilalus uluh bakas’ah aka. Kalute kea, Yehowa katawan amun itah akan mandinun manpaat amun itah manenga.

CARA REWAR HATALLA MANENGA HONG JAMAN HURAN

7, 8. Kilen ampi rewar Yehowa hong jaman Alkitab manjadi suntu metuh manyumbang akan (a) pire-pire gawi khusus? (b) mendukung ibadat?

7 Alkitab mangesah tahiu kare rewar Yehowa je manyumbang uka mendukung ibadat akan Hatalla. Kanatek’ah, ewen manyumbang akan pire-pire gawi khusus. Suntu, Moses marawei uluh Israel manyumbang akan manampa tabernakel. Raja Dawid kea malalus je sama metuh bait handak imangun. (Eksodus 35:5; 1 Kronika 29:5-9) Hong jaman Raja Yoas, kare imam mangambuah bait bara sumbangan rakyat. (2 Raja 12:4, 5) Hong abad pangkasulak, Yuda puji mangkeme wayah kalau je paham tuntang uluh Kristen hong kanih mamerlu pandohop. Metuh mahining barita te, uluh Kristen bara kare eka je beken ”pakat uka . . . genep biti mangirim sumbangan manumon kaolihe”.​—Gawin Rasul 11:27-30.

8 Rewar Yehowa kea manyumbang akan are uluh je manempu Yehowa sepenuh waktu hong jaman huran. Suntu, tumun aturan Hukum Moses, uluh Lewi dia mandinun warisan kilau kare suku beken, maka ewen inenga sapersapuluh bara kare suku beken. Dengan kalute uluh Lewi tau buju-bujur melayani hong tabernakel. (Numeri 18:21) Hong abad pangkasulak, kare bawi je pahias atei mahapan panatau ewen kea uka mendukung Yesus tuntang kare rasul ai.​—Lukas 8:1-3.

Eweh bewei tau manyumbang, dia soal ewen uluh tatau atawa uluh miskin

9. Hong jaman huran, kilen ampi rewar Hatalla tau manyumbang?

9 Kilen ampi rewar Hatalla tau manenga uras sumbangan te? Uka manampa tabernakel, uluh Israel mungkin manyumbang kare ramu je barega je iimbit ewen bara Misir. (Eksodus 3:21, 22; 35:22-24) Hong abad pangkasulak tege uluh Kristen je manjual petak atawa huma tuntang manyarah duit’ah akan kare rasul. Limbah te kare rasul mambagi akan kawan pahari je puna tutu-tutu tapas. (Gawin Rasul 4:34, 35) Uluh Kristen je beken harajur mambagi duit ewen khusus akan mendukung ibadat. (1 Korintus 16:2) Jadi eweh bewei tau manyumbang, dia soal ewen uluh tatau atawa uluh miskin.​—Lukas 21:1-4.

CARA ITAH MANENGA WAYAH TUH

10, 11. (a) Kilen ampi itah tau manyuntu kahias atei rewar Hatalla hong jaman Alkitab? (b) Narai je ingkeme Pahari awi tau mendukung gawin Karajaan?

10 Wayah tuh, itah mungkin irawei manyumbang akan tujuan khusus.  Ungkup itah mungkin akan mangambuah Balai Karajaan atawa mamangun je taheta. Kantor Cabang mungkin perlu ingambuah kea. Itah kea tau manyumbang akan ongkos kebaktian. Atawa, kare paharin itah hong eka beken mungkin kapehe awi bencana alam tuntang perlu pandohop. Sumbangan itah kea akan mandohop utusan injil, perintis istimewa, pengawas daerah, tuntang kare pahari je bagawi hong Kantor Pusat atawa Kantor Cabang. Ungkup itah kea mungkin harajur mangirim sumbangan akan mamangun Balai Kebaktian tuntang Balai Karajaan hong hapus dunia.

11 Itah uras tau manenga uka mendukung organisasi Yehowa hong andau je pangkarahia tuh. Tapaare sumbangan inenga awi uluh je dia inyewut ara. Metuh itah manamean duit akan kotak sumbangan hong Balai Karajaan atawa manyumbang mahalau jw.org, itah dia akan mansanan sapire hai sumbangan itah. Tapi ela mangkeme sumbangan Pahari lalau isut atawa jatunti guna. Sapuna, tapaare sumbangan je inarima Organisasi te bara sumbangan kurik je ingumpul, beken sumbangan hai. Kawan paharin itah je tapas duit manyuntu uluh Kristen hong Makedonia jaman huran je murah atei. Ewen ”belom susah toto”, tapi ewen handak tutu manenga sumbangan.​—2 Korintus 8:1-4.

12. Kilen ampi Organisasi bausaha uka mahapan sumbangan dengan bahalap?

12 Badan Pimpinan mahapan hasil sumbangan dengan baketep tuntang pintar harati. (Mateus 24:45) Kare anggota balakudoa uka manampa keputusan je bahalap, tuntang ewen bua-buah manampa rencana. (Lukas 14:28) Hong jaman Alkitab, kare uluh je imercaya uka maurus sumbangan mamasti sumbangan te ihapan uka kepentingan ibadat akan Yehowa. Suntu, Esra haluli akan Yerusalem dengan mimbit sumbangan bara raja Persia, iete amas, perak, tuntang ramu barega beken, je rega labih bara 1,3 triliun rupiah wayah tuh. Ezra katawan sumbangan te panengan akan Yehowa. Jadi, iye manenga petunjuk je jelas mangat kare uluh je mimbit’ah tau mahaga sumbangan te dengan bahalap, awi ewen musti mahalau daerah je bahaya. (Esra 8:24-34) Rasul Paulus kea puji mangumpul sumbangan akan uluh Kristen je mamerlu pandohop hong Yuda. Iye mamasti mangat kare uluh je mimbit duit te ”malaluse dengan kabujur atei dia baya intu taharep Tuhan [Yehowa], tapi intu taharep olon kea”. (Mbasa 2 Korintus 8:18-21.) Wayah tuh, organisasi itah manyuntu Esra tuntang Paulus tuntang bua-buah mahapan sumbangan.

13. Haru-harun tuh, mbuhen Organisasi manampa pire-pire penyesuaian?

13 Ije keluarga mungkin perlu bua-buah mampalua duit mangat dia labih hai bara je indinun ewen. Ewen kea mungkin bausaha manyederhana pambelum mangat tau malalus labih are akan Yehowa. Jite je ilalus organisasi Yehowa. Haru-harun tuh, tege are gawin taheta, tuntang kanatek’ah, pengeluaran itah labih hai bara je indinun. Jadi kilau keluarga endau, Organisasi bausaha uka bua-buah mahapan duit tuntang manyederhana are hal.  Dengan kalute, sumbangan Pahari tau ihapan dengan cara je paling bahalap akan kepentingan Yehowa.

HASIL BARA SUMBANGAN PAHARI

Sumbangan Pahari mendukung gawin itah hong hapus dunia (Payah paragrap 14-16)

14-16. (a) Sumbangan Pahari ihapan akan narai bewei? (b) Narai manpaat je ingkeme Pahari kabuat bara hal je inyadia Organisasi?

14 Are pahari je jadi tahi manempu Yehowa hamauh amun wayah tuh, Organisasi manyadia hal bahalap labih are bara je jadi-jadi. Suntu, wayah tuh itah tege jw.org tuntang JW Broadcasting. Alkitab Terjemahan Dunia Baru kea inyadia hong labih are bahasa. Hong nyelu 2014 sampai 2015, Kebaktian Internasional je bajudul ”Teruslah Cari Dahulu Kerajaan Allah” ilalus hong pire-pire stadion hai intu 14 kota hong hapus dunia. Uras je dumah mangkeme hanjak!

15 Are pahari basukur awi are hal je inyadia organisasi Yehowa. Suntu, ije biti pasangan je melayani hong Asia manyurat, ”Ikei inugas akan kota je kurik. Kanatek’ah ikei mangkeme kejau bara je beken tuntang kalapean amun hong are eka, tege kawan pahari je melayani Yehowa kea. Metuh manonton JW Broadcasting, ikei jadi mingat amun ikei tuh bagian bara persaudaraan hapus dunia. Kawan pahari hong daerah ikei hanjak tutu manonton JW Broadcasting. Ewen rancak hamauh limbah ewen manonton, ewen mangkeme amun ewen tukep dengan kare anggota Badan Pimpinan. Ewen sasar sanang awi manjadi bagian bara organisasi Yehowa.”

16 Hong hapus dunia, tege kira-kira 2.500 Balai Karajaan je kanjera imangun atawa ingambuah. Ije ungkup hong Honduras hamauh amun ewen jadi tahi mentai mangat tege Balai Karajaan kabuat. Wayah tuh kanahuang ewen buju-bujur manjadi. Ewen manyurat, ”Ikei sanang tutu tau manjadi  ije bagian bara keluarga hai ain Yehowa tuntang bara persaudaraan je tamam hong hapus dunia.” Jite kea je ingkeme are pahari metuh ewen manarima Alkitab tuntang basaan hong bahasa ewen kabuat, metuh indohop awi kawan pahari limbah bencana alam, atawa metuh mandinun hasil je bahalap bara kesaksian hong daerah metropolitan tuntang kesaksian hong eka umum.

17. Narai bukti Yehowa mendukung organisasi-Ai wayah tuh?

17 Are uluh je beken Saksi Yehowa rancak hengan metuh mahining uras je ilalus itah te indukung awi sumbangan sukarela. Ije biti pamimpin perusahaan hai puji maja akan ije percetakan itah, tuntang iye paham hengan awi uras gawi itah ilalus awi uluh je pahias bagawi tuntang indukung bara sumbangan, aluh jatunti acara uka mangumpul sumbangan. Aka, jituh bahali imercaya. Yoh, itah tau malalus uras tuh baya awi Yehowa je mendukung gawin itah.​—Yob 42:2.

BERKAT AWI MANENGA AKAN YEHOWA

18. (a) Narai berkat’ah amun itah manyumbang akan gawin Karajaan? (b) Kilen ampi itah tau majar anak tuntang kare uluh je taheta uka umba manyumbang?

18 Yehowa manenga itah hak istimewa tuntang kesempatan uka mendukung gawin Karajaan je tamam tuh. Iye bajanji amun itah malalus’ah, itah akan imberkat. (Maleakhi 3:10) Yehowa bajanji amun uluh je murah atei dia akan mangkeme katapas. (Mbasa Sewut Salomo 11:24, 25.) Manenga kea akan manampa itah hanjak. Alkitab hamauh, ”Labih mangat manenga bara manarima.” (Gawin Rasul 20:35) Mahalau kare auh tuntang gawin Pahari, ajar akan anak Pahari tuntang kare uluh je masih taheta amun ewen kea tau manyumbang tuntang mangkeme berkat’ah.

19. Narai tekad Pahari limbah mambahas artikel tuh?

19 Uras ayun itah puna dumah bara Yehowa. Tapi, amun itah manenga Aka, itah mamparahan amun itah sayang Denga tuntang marega uras je jadi ilalus Yehowa akan itah. (1 Kronika 29:17) Metuh uluh Israel manyumbang uka mamangun bait, ewen ”manenga dengan kahias atei akan TUHAN [Yehowa] tuntang ewen hanjak awi jari are je inenga ewen”. (1 Kronika 29:9) Keleh itah harajur manenga akan Yehowa bara narai je jadi Inenga akan itah. Itah pasti akan mangkeme hanjak tuntang puas.