Ayat akan nyelu 2018: ”Oloh je maandal TUHAN [Yehowa], harajur mandino kaabas taheta.”​—YESAYA 40:31.

NYANYIN: 152, 67

1. Narai bewei masalah je inaharep itah, tapi narai hal je manampa Yehowa sanang? (Payah gambar hong tamparan artikel.)

BELUM huang dunia wayah tuh dia purah. Suntu, are bara ketun haban paham. Tege kea je jadi bakas, tapi musti maawat keluarga je bakas kea. Je beken bahali manyukup kebutuhan keluarga. Ikei katawan are bara ketun dia baya manaharep ije, tapi pire-pire masalah! Ketun are mampalua waktu, kaabas, tuntang duit manaharep uras tuh. Tapi, ketun yakin Yehowa akan mandohop. Ketun kea yakin dengan harapan bahalap je injanji Yehowa. Ikei sinta ketun. Tuntang, iman ketun pasti manampa Yehowa sanang!

2. Kilen ampi Yesaya 40:29 mahibur itah, tapi narai keputusan sala je tau inampa itah?

2 Tapi, en kanatek’ah ketun mangkeme dia ulih hindai manaharep masalah? Ketun dia kabuat. Pire-pire rewar Hatalla je baketep jaman huran puji kea mangkeme kalute. (1 Raja 19:4; Yob 7:7) Tapi, mbuhen ewen ulih manyarena? Awi ewen balaku kaabas bara Yehowa. Alkitab  mansanan amun Hatalla ”mampaabas oloh je heka”. (Yesaya 40:29) Sayang, metuh manaharep masalah, pire-pire rewar Hatalla wayah tuh mangkeme manempu Yehowa te mambehat, beken mimbit berkat. Jadi, ewen mamutus tende helu manempu Yehowa. Ewen dia mambasa Alkitab hindai, hapumpung, tuntang mangabar. Jituh je ingahandak Setan.

3. (a) Kilen ampi itah tau manolak usahan Setan mampalemu itah? (b) Narai je akan imbahas itah hong artikel tuh?

3 Iblis dia handak itah abas secara rohani. Tuntang iye katawan itah akan abas amun itah deroh melayani Yehowa. Jadi, metuh biti tuntang pikiran itah heka, ela mangejau Yehowa. Itah musti sasar tukep denga. Alkitab hamauh, ”Ie kareh mampendeng hayak mampaabas keton palus mandehen keton.” (1 Petrus 5:10; Yakobus 4:8) Huang artikel tuh, itah akan mambahas Yesaya 40:26-31, je mamparahan kaulih Yehowa uka mandohop itah. Itah kea akan mambahas due kaadaan je tau manampa itah balemu tuntang kare nasehat Alkitab je akan mandohop itah baketep.

”OLOH JE MAANDAL YEHOWA, HARAJUR MANDINO KAABAS TAHETA”

4. Narai je tau ilajar itah bara Yesaya 40:26?

Yehowa tau manenga Pahari kaabas uka manaharep uras masalah

4 Mbasa Yesaya 40:26. Jatun uluh je ulih mise uras bintang hong alam semesta. Kare paneliti percaya tege kira-kira 400 miliar bintang je tukep dengan itah. Tapi, Yehowa katawan aran uras bintang te. Narai palajara? Amun bintang je dia belum ih Inantuani, ngumang angat atei Yehowa dengan Pahari, je mintih manempu Iye awi sinta Denga. (Masmur 19:1, 3, 14) Bapa itah te kasene tutu dengan itah. Alkitab mansanan amun ”kare balau hong takolok keton mahin uras jari iise” Yehowa. (Mateus 10:30) Yehowa kea manampayah ”pambelom oloh barasih”. (Masmur 37:18) Jadi, Yehowa katawan uras masalah Pahari, tuntang Iye tau manenga Pahari kaabas uka manaharep uras’ah.

5. Mbuhen itah tau yakin amun Yehowa tau mampaabas itah?

5 Mbasa Yesaya 40:28. Yehowa asal uras tanaga hong alam semesta. Coba niruk tanaga je Inenga akan matanandau. David Bodanis, je manyurat buku ilmu pangatawan, mansanan amun genep detik matanandau mampalua tanaga je sama dengan bamiliar bom atom je manyalentup haya-hayak. Paneliti beken percaya amun tanaga je impalua matanandau huang ije detik tau sukup akan mahasil listrik katahin 200.000 nyelu akan hapus bumi! Jadi Yehowa, je manenga tanaga akan matanandau, pasti ulih manenga itah tanaga akan manaharep masalah pambelum.

6. Narai rima manumun parentah Yesus te mangat, tuntang narai manpaat’ah akan itah?

 6 Mbasa Yesaya 40:29. Manempu Yehowa buju-bujur mampahanjak itah. Yesus mansanan akan kare murid’ah, ”Keleh manumon auh parentah-Ku.” Tuntang iye hamauh, ”Maka keton kareh mangkeme kamangat. Karana kare parentah-Ku mampangat, tuntang tanggongan je inenga-Ku akan keton te mahian.” (Mateus 11:28-30) Jite puna bujur! Kanatek’ah, itah mungkin heka metuh handak tulak hapumpung atawa mangabar. Tapi, kilen ampi angat itah metuh buli? Itah mangkeme impaabas tuntang labih siap manaharep masalah. Manumun parentah Yesus puna mangat tuntang mampahanjak.

7. Ngesah ije pangalaman je mamparahan amun Mateus 11:28-30 te bujur.

7 Coba mikir pangalaman pahari bawi itah tuh. Iye kana panyakit kelelahan kronis, depresi, tuntang rancak pehe takuluk. Jadi kanatek’ah, tulak hapumpung te bahali aka. Tapi, sinde katika, limbah hapumpung, iye manyurat, ”Hotbah’ah mambahas tahiu angat kurik atei. Cara hotbah te inyampai sasuai dengan kaadaan uluh je kurik atei. Aku sampai manangis. Aku impingat amun hapumpung te penting tutu.” Iye hanjak tutu awi andau te iye bausaha dumah hapumpung!

8, 9. Narai maksud Paulus metuh manyurat, ”Metoh aku balemo, maka metoh te kea aku abas”?

8 Mbasa Yesaya 40:30. Itah mungkin tege are katau, tapi awi kaabas itah tege batas’ah, are je dia tau inggawi itah. Itah musti sadar hal te. Jite je ingkeme Rasul Paulus kea. Metuh iye mangesah angat atei’ah akan Yehowa, Yehowa tumbah, ”Kuasangku paham hai amon ikau huang kalemo.” Paulus paham. Iye hamauh, ”Metoh aku balemo, maka metoh te kea aku abas.” (2 Korintus 12:7-10) Narai rima?

9 Paulus katawan amun tege are hal je dia tau inggawi dengan kaabas’ah kabuat. Iye perlu indohop awi je labih abas bara arep’ah. Kuasan Hatalla tau mampaabas Paulus metuh iye balemu. Beken bara te, kuasan Hatalla tau mandohop Paulus uka malalus hal je dia ulih inggawi dengan kaabas’ah kabuat. Kalute kea, kuasa Yehowa buju-bujur akan mampaabas itah!

10. Kilen ampi Yehowa mandohop Dawid manaharep masalah’ah?

10 Dawid, je manyurat are masmur, rancak mandinun kaabas bara kuasan Hatalla. Iye manyanyi, ’Karana awi dohopm aku manyarang kawan parang, awiku impahayak Hatallangku aku manangkajok pagar batu.’ (Masmur 18:29, Surat Barasih 1983) Kilau pagar batu gantung je dia ulih indai itah, kanatek’ah masalah itah hai tutu tuntang dia tau imberes kabuat. Itah perlu pandohop Yehowa.

11. Kilen ampi roh barasih mandohop itah manaharep masalah?

11 Mbasa Yesaya 40:31. ”Burong nasar” hong ayat tuh rima antang. Antang tau tarawang tahi beken baya awi kaabas kabuat. Tege riwut balasut je manjuju iye kahunjun. Jadi, antang tau tarawang kejau dengan isut tanaga. Jadi, metuh Pahari manaharep  masalah hai, coba niruk burung antang. Laku Yehowa manenga Pahari kaabas mahalau ”Roh Hatalla, Pandohop” te. (Yohanes 14:26) Itah tau balaku kuasa Yehowa pea bewei, 24 jam jandau. Itah mungkin khusus’ah mangkeme perlu pandohop Yehowa metuh tege masalah dengan paharin itah. Mbuhen masalah tuh tau manjadi?

12, 13. (a) Mbuhen masalah tau lembut dengan paharin itah? (b) Bara kesah Yosep, narai je ilajar itah tahiu Yehowa?

12 Masalah tau manjadi awi itah uras dia sempurna. Kanatek’ah, itah mungkin dia rajin dengan taluh gawin atawa auh kutak uluh beken, atawa kabalika. Jituh mungkin mauji kasabar itah. Tapi, jituh kesempatan uka mambukti amun itah baketep dengan Yehowa. Kilen ampi? Keleh bausaha hapakat dengan kawan pahari. Yehowa sinta ewen aluh ewen dia sempurna. Awi te, itah musti sinta ewen kea.

Yehowa dia malihi Yosep, Iye kea dia akan malihi Pahari (Payah paragrap 13)

13 Yehowa dia mangejau kare rewar-Ai bara ujian. Suntu, Yosep. Metuh masih tabela, kawan kaka Yosep bahiri denga tuntang manjual iye akan manjadi jipen. Iye iimbit akan Misir. (Genesis 37:28) Yehowa pasti pehe atei manampayah sobat-Ai je baketep iawi papa kalute. Tapi, Yehowa dia palus mampatende narai je manjadi. Rahian limbah te, Yosep imenjara awi indawa handak mamperkosa sawan Potipar. Yehowa kea manalua hal te. En jite rima Hatalla malihi Yosep? Dia. Alkitab mansanan amun Yehowa ”mandohop Yosep sampai ie tau mandino hasil huang kare gawie”.​—Genesis 39:21-23.

14. Narai bewei manpaat’ah amun itah dia tarus sangit?

14 Suntu beken iete Dawid. Tapaare bara itah dia puji iawi papa nyamah kilau Dawid. Tapi, rewar Hatalla tuh dia manalua arep’ah tarus sangit. Iye manyurat, ”Ela sangit tuntang bahiri, jete baya mimbit calaka.” (Masmur 37:8) Alasan utama itah dia tarus sangit awi itah handak manyuntu Yehowa. Iye mampun itah tuntang  ”dia mahukum itah tumon dosan itah”. (Masmur 103:10) Tege hindai manpaat beken. Suntu, amun itah tarus sangit, tekanan daha itah tau mandai. Atei tuntang pankreas itah tau rusak. Pernapasan tuntang pencernaan itah kea tau bamasalah. Beken bara te, metuh sangit itah bahali bapikir. Itah kea tau mamander atawa mawi taluh je mangapehe uluh beken. Jite tau manampa itah sasar pehe atei. Jadi, keleh itah tatap tenang. Alkitab mansanan, ”Atei je tanggar mamparigas biti.” (Sewut Salomo 14:30) Jadi, narai je tau inggawi itah metuh uluh beken mangapehe itah? Kilen ampi itah tau badamai dengan paharin itah? Itah tau malalus nasehat bahalap bara Alkitab.

METUH INGAPEHE AWI PAHARI

15, 16. Narai je perlu inggawi itah amun tege je mangapehe itah?

15 Mbasa Epesus 4:26. Amun itah iawi papa awi uluh je dia manempu Yehowa, itah mungkin dia tarewen. Tapi, amun je mawi te keluarga atawa pahari hong ungkup, itah mungkin pehe atei. Kilen ampi amun itah dia ulih mangalapea? En itah akan tarus sangit, nyamah sampai banyelu-nyelu? Atawa en itah akan manumun nasehat Alkitab tuntang mamberes masalah te bajeleng? Sasar tahi itah manunggu, sasar bahali akan itah badamai dengan paharin itah.

16 Narai je tau ilalus itah uka badamai? Pangkasulak, balakudoa dengan Yehowa. Laku mangat Iye mandohop itah bapander bua-buah dengan paharin itah. Keleh mingat, pahari te sobat Yehowa kea, tuntang Hatalla sinta denga. (Masmur 25:14) Yehowa mawi kare Sobat’ah dengan kahalap atei, tuntang Iye handak itah manyuntu Iye. (Sewut Salomo 15:23; Mateus 7:12; Kolose 4:6) Je kadue, niruk narai je handak imander itah akan pahari te. Ela bapikir amun iye ihat handak mangapehe itah. Mungkin iye dia sengaja atawa itah je sala paham. Keleh mangaku amun itah mungkin basala kea. Itah tau manampara pander dengan hamauh, ”Mungkin aku lalau malabien, tapi male, metuh ikau bapander kilau te, aku mangkeme . . .” Amun masalah te hindai beres limbah itah bapander, ela manyarah. Keleh balakudoa akan pahari te. Laku Yehowa mamberkat iye tuntang mandohop itah maniruk kare sipat bahalap’ah. Yehowa pasti hanjak amun itah buju-bujur bausaha badamai dengan paharin itah.

METUH ITAH MANGKEME BASALA AWI DOSA JE JADI MAHALAU

17. (a) Kilen ampi Yehowa mandohop itah mangambuah hubungan Denga limbah itah badosa? (b) Mbuhen itah musti manarima Pandohop’ah?

17 Tege je mangkeme dia patut manempu Yehowa awi puji mawi dosa serius. Angat basala tau mampanihau kadamai, kahanjak, tuntang kaabas itah. Raja Dawid puji mangkeme. Iye hamauh, ”Katahin aku dia mangaku dosangku, aku susah awi manarahing hapus andau. Handau hamalem Ikau mahenyek aku.” Sukur, Dawid malalus narai je ingahandak Yehowa.  ”Palus aku mangaku dosangku Akam,” kua, ”tuntang Ikau mampun kakare dosangku.” (Masmur 32:3-5) Amun Pahari puji mawi dosa serius, Yehowa siap mampun Pahari. Iye handak mandohop Pahari mangambuah hubungan Denga. Tapi, Pahari musti handak manarima pandohop je Inyadia mahalau kare bakas ungkup. (Sewut Salomo 24:16; Yakobus 5:13-15) Lalus jite wayah tuh kea awi jite bapengaruh tutu dengan pambelum Pahari katatahi! Tapi, kilen ampi amun Pahari masih mangkeme angat basala aluh Yehowa jadi mampun Pahari?

18. Kilen ampi pengalaman Paulus tau mandohop ewen je mangkeme dia patut manempu Yehowa?

18 Rasul Paulus kanatek’ah pehe atei awi kare dosa je puji iawi. Iye hamauh, ”Aku toh rasul Tuhan je paling randah. Aku dia patut inyewut rasul, awi aku jari mangapehe ungkup ain Hatalla.” Tapi, iye mansanan hindai, ”Tapi awi asin Hatalla, aku manjadi sama ampingku kilau je aton wayah toh.” (1 Korintus 15:9, 10) Yehowa katawan Paulus dia sempurna. Tapi, Iye tatap manarima Paulus tuntang manenga iye tugas istimewa. Yehowa handak Paulus yakin akan sintan-Ai. Narai kesimpula? Amun Pahari jadi batobat, balaku ampun dengan Yehowa, tuntang amun perlu, bapander dengan kawan bakas ungkup, Yehowa pasti mampun Pahari. Ela ragu tahiu hal te!​—Yesaya 55:6, 7.

19. Narai ayat akan nyelu 2018, tuntang mbuhen jite cocok?

19 Awi dunia tuh dia pire impalumus, sasar are masalah. Tapi, santar mingat Yehowa harajur ”mampaabas oloh je heka, manenga semangat akan oloh je jaton kaabas.” Iye akan manenga Pahari narai bewei je imerlu Pahari uka baketep manempu Iye. (Yesaya 40:29; Masmur 55:22; 68:19) Katahin nyelu 2018, itah akan santar impingat tahiu hal tuh metuh hapumpung hong Balai Karajaan tuntang manampayah ayat akan nyelu 2018: ”Oloh je maandal TUHAN [Yehowa], harajur mandino kaabas taheta.”​Yesaya 40:31.