Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Februari 2018

Narai Rima Manjadi Uluh Rohani?

Narai Rima Manjadi Uluh Rohani?

”Keleh atei keton sama kilau Yesus Kristus.”​—PILIPPI 2:5.

NYANYIN: 17, 13

1, 2. (a) Narai je ingkeme are pahari tahiu kerohanian? (b) Paisek penting narai je akan imbahas itah hong artikel tuh?

IJE BITI pahari bawi hong Kanada mansanan dengan menjadi uluh rohani, jite manampa pambelum hanjak tuntang mandohop iye manaharep kare masalah’ah. Ije biti pahari hatue hong Brasil je jadi kawin 23 nyelu mansanan dengan manjadi uluh je bapikir rohani jite tau mandohop iye tuntang sawa labih hanjak huang pangawin’ah. Ije pahari hong Filipina mansanan dengan manjadi uluh je bapikir rohani jite manenga kadamai aka tuntang mandohop iye labih rantep dengan kakare pahari bara budaya je hakabeken.

2 Jelas, itah dinun are manpaat metuh itah manjadi uluh rohani. Narai je tau ilalus itah uka manjadi labih rohani tuntang mangkeme kare manpaat’ah? Je pangkasulak, itah musti katawan narai je insanan Alkitab tahiu uluh rohani, je inantiring awi roh barasih Hatalla tuntang bapikir kilau Yehowa. Hong artikel tuh, itah akan manjawab telu paisek penting: (1) Narai rima manjadi uluh rohani, atawa uluh je bapikir secara rohani? (2) Narai suntu je tau mandohop itah  mamangun kerohanian itah? (3) Kilen ampi usahan itah mahapan ”tirok-atei je sama dengan Kristus” mandohop itah manjadi uluh rohani?

NARAI RIMA ULUH JE BAPIKIR ROHANI?

3. Kilen ampi Alkitab manjelas narai je mambeda uluh jasmani tuntang uluh rohani?

3 Rasul Paulus mandohop itah mangatawan narai beda kalunen rohani tuntang kalunen jasmani. (Mbasa 1 Korintus 2:14-16. Surat Barasih 1983) * (Payah catatan penda.) Uluh jasmani te dia ”manarima idje ain Roch Hatalla; djete kilau kagila bewei akae, ie djaton tau haratie”. Kabalika, uluh rohani ”mamariksa uras hal” tuntang bausaha mahapan ”tirok-atei je sama dengan Kristus”, jite rima iye bausaha uka bapikir kilau Kristus. Paulus maanjur itah uka manjadi uluh rohani. Huang hal narai je mambeda uluh jasmani tuntang uluh rohani?

4, 5. Kilen ampi itah tau mangasene uluh jasmani?

4 Kilen ampi cara bapikir uluh jasmani? Uluh jasmani maumba sikap bara dunia tuh, je labih manomor ije kapentingan arep kabuat. Paulus manjelas sikap tuh kilau ”roh je manguasa atei kare oloh je dia taat”. (Epesus 2:2) Sikap tuh mampangaruh are uluh uka maumba sikap je are imparahan hong kaliling ewen. Ewen baya malalus narai je bujur tumun pikiran ewen tuntang dia paduli dengan standar Hatalla. Uluh jasmani, atawa je bapikir daging, labih mamikir tahiu kare hal jasmani tuntang rancak mangkeme amun kedudukan, duit, tuntang hak kabuat labih penting bara je beken.

5 Uluh jasmani rancak malalus gawi je inyewut Alkitab ”kipen sipat kaolon”. (Galatia 5:19-21) Hong surat Paulus je pangkasulak akan uluh Kristen hong Korintus, iye manyewut hal beken je ilalus uluh jasmani. Ewen dia handak hapakat, handak mamisah uluh, maanjur uluh mambarontak, mimbit sama arep akan pengadilan, dia hormat dengan kekepalaan, tuntang kuman-mihup manjadi labih penting huang pambelum ewen. Uluh jasmani dia bausaha manolak metuh tagoda malalus hal je sala. (Sewut Salomo 7:21, 22) Yudas mansanan amun uluh je jasmani mahin tau nihau roh Hatalla.​—Yudas 18, 19.

6. Kilen ampi itah tau mangasene uluh rohani?

6 Dia kilau uluh jasmani, uluh rohani buju-bujur paduli tahiu hubunga dengan Hatalla. Iye pahias inantiring awi roh barasih Hatalla tuntang bausaha manyuntu Yehowa. (Epesus 5:1) Iye kea bausaha balajar cara bapikir Yehowa tuntang manampayah kare hal sama kilau pandangan Yehowa. Hatalla buju-bujur nyata aka. Beken kilau uluh jasmani, uluh rohani marega kare standar Yehowa genep katika. (Masmur 119:33; 143:10) Iye dia malalus ”kipen sipat kaolon” tapi bausaha malalus ”buah Roch”. (Galatia 5:22, 23, Surat Barasih 1983) Akan gambaran narai rima uluh je bapikir rohani, coba mikir: Ije biti uluh je tamam hong  bisnis inyewut uluh je bapikir bisnis, tuntang ije biti uluh je paduli ibadat’ah akan Hatalla inyewut uluh je bapikir rohani.

7. Narai je insanan Alkitab tahiu uluh je bapikir rohani?

7 Yesus mansanan amun uluh je bapikir rohani te hanjak. Mateus 5:3 (NW) mansanan, ”Keleh hanjak ewen je sadar akan kebutuhan rohani ewen, awi Karajaan sorga ayun ewen.” Roma 8:6 manjelas amun pambelum itah bergantung dengan cara itah bapikir sasuai pikiran Yehowa, ”Amon tirok keton inguasa awi sipat olon, maka kajariae keton buah pampatei. Tapi amon tirok keton inguasa awi roh Hatalla, maka kajariae keton belom tuntang badamai dengan Hatalla.” Jadi, amun itah bapikir rohani, wayah tuh itah tau badamai dengan Hatalla tuntang arep kabuat, tuntang tau mandinun harapan belum katatahi.

8. Mbuhen bahali mamangun tuntang mahaga kerohanian?

8 Aluh kalute, itah belum hong dunia je bahaya. Awi itah ingaliling awi uluh je dia bapikir sasuai pikiran Hatalla, itah musti buju-bujur bausaha mahaga tiruk itah. Amun itah dia manyuang tiruk itah dengan pikiran Yehowa, dunia akan manyuang tiruk itah dengan sikap tuntang pikiran jasmani ayu. Kilen ampi itah tau mahakan hal te? Kilen ampi itah tau mamangun kerohanian?

BALAJAR BARA SUNTU JE BAHALAP

9. (a) Narai je tau majar itah uka manjadi uluh je bapikir rohani? (b) Suntu bahalap narai je akan imbahas itah?

9 Kilau anak kurik je perlu balajar bara suntu bahalap uluh bakas’ah, itah kea perlu balajar uka manyuntu kare uluh je atun hubungan rantep dengan Yehowa. Jituh tau majar itah cara manjadi uluh je bapikir rohani. Beken bara te, itah balajar  narai je musti ihakan dengan manantuani uluh je bapikir jasmani. (1 Korintus 3:1-4) Hong Alkitab tege suntu je bahalap tuntang suntu je dia bahalap. Nantuani kare suntu bahalap je tau ilajar itah bara: Yakob, Maria, tuntang Yesus.

Narai je tau ilajar itah bara suntu Yakob? (Payah paragrap 10)

10. Kilen ampi Yakob mamparahan amun iye uluh je rohani?

10 Sama kilau tapaare bara itah, pambelum Yakob dia purah. Paharin ayu kabuat, Esau, handak mampatei iye. Empu je hatue tarus mananjaru iye. Tapi iman Yakob akan janjin Yehowa dengan Abraham tatap dehen. Yakob katawan amun keluarga ayu akan manjadi bagian bara janji tamam je akan inggenep, jadi iye mahaga keluarga bua-buah. (Genesis 28:10-15) Yakob dia manalua sikap jasmani bara uluh hong kaliling ayu manampa iye mangalapean janjin Yehowa. Suntu, Yakob balaku Yehowa mandohop iye metuh iye bapikir manaharep bahaya bara paharin ai. Iye balakudoa, ”Ingat je TUHAN [Yehowa] jari hajanji handak mawi taloh samandiai bahalap akangku tuntang manenga akangku are turonan. Ije mahin jaton je tau misee awi karee kilau baras hong sarang tasik.” (Genesis 32:6-12) Iman Yakob dengan janjin Yehowa dehen tuntang iye mambukti hal te dengan cara belum’ah.

Narai je tau ilajar itah bara suntu Maria? (Payah paragrap 11)

11. Kilen ampi itah tau katawan amun Maria uluh je bapikir rohani?

11 Coba mikir Maria. Yehowa mintih iye uka manjadi indu Yesus awi iye uluh je bapikir rohani. Mbasa narai je insanan Maria metuh iye maja jalaha Sakaria tuntang Elisabet. (Mbasa Lukas 1:46-55.) Itah tau manampayah Maria sinta Firman Hatalla tuntang mangasene Kare Kitab Ibrani. (Genesis 30:13; 1 Samuel 2:1-10; Maleakhi 3:12) Limbah Maria tuntang Yosep jadi kawin, ewen mahin mentai sampai Yesus lahir uka bahubungan  seksual. Tugas bara Hatalla labih penting akan ewen bara kanahuang ewen kabuat. (Mateus 1:25) Maria kea manantuani buju-bujur narai je manjadi huang pambelum Yesus tuntang mahining kare auh ajar’ah. Jite ”iingkes . . . huang ateie”. (Lukas 2:51) Iye buju-bujur basemangat handak katawan tujuan Hatalla je tege hubunga dengan Mesias. En itah tau manyuntu Maria tuntang harajur bausaha malalus narai je ingahandak Hatalla?

12. (a) Kilen ampi Yesus manyuntu Bapa? (b) Kilen ampi itah tau manyuntu Yesus? (Payah gambar hong tamparan artikel.)

12 Bara uras uluh je puji belum, Yesus suntu pangkahalap tahiu uluh je bapikir rohani. Katahin pambelum tuntang pelayana hong bumi, iye mambukti amun iye handak manyuntu Bapa. Pikiran, angat atei, tuntang gawin Yesus sama kilau Yehowa. Iye malalus kahandak Hatalla tuntang marega kare standar Ayu. (Yohanes 8:29; 14:9; 15:10) Suntu, nantuani cara Sakharia mangesah tahiu kataun Yehowa dengan cara Markus mangesah angat atei Yesus. (Mbasa Sakharia 2:8; Markus 6:34.) En itah manyuntu Yesus dengan harajur siap mamparahan katau dengan uluh je perlu pandohop? Kilau Yesus, en itah manomor ije mangabar tuntang majar barita bahalap? (Lukas 4:43) Uluh je bapikir rohani mamparahan katau tuntang bausaha mandohop je beken.

13, 14. (a) Narai je tau ilajar itah bara uluh je bapikir rohani wayah tuh? (b) Nenga suntu.

13 Wayah tuh, are paharin itah je bapikir rohani bausaha manyuntu Kristus. Pahari tau manantuani amun ewen basemangat hong dinas, rajin manarima uluh, tuntang mamparahan katau. Aluh dia sempurna, ewen bausaha karas uka mamangun kare sipat bahalap tuntang malalus narai je ingahandak Yehowa. Rachel, ije biti pahari bawi hong Brasil hamauh, ”Aku sanang maumba gaya bapakaian dunia. Awi te, aku mahapan pakaian je dia patut. Tapi balajar katutu manggerek aku manampa perubahan je imerlu uka manjadi uluh rohani. Manampa perubahan dia purah, tapi aku manjadi labih hanjak tuntang mandinun tujuan je bujur huang pambelum.”

14 Reylene, ije biti pahari bawi hong Filipina, manaharep masalah je beken. Aluh iye manjadi Saksi, iye labih manomor ije pendidikan je gantung tuntang gawi je bahalap. Sasar tahi, cita-cita rohani manjadi dia lalau penting aka. Iye hamauh, ”Aku mangkeme tege je kurang hong pambelumku, taluh je kejau labih penting bara gawingku.” Reylene maubah cara bapikir’ah tuntang manomor ije pelayanan akan Yehowa huang pambelum’ah. Wayah tuh iye percaya janjin Yehowa hong Mateus 6:33, 34 tuntang hamauh, ”Aku yakin amun Yehowa akan mahaga aku!” Mungkin Pahari kasene kawan pahari hong ungkup itah je tege sikap je sama. Metuh itah manampayah kilen ampi ewen manyuntu Kristus, itah kea handak manyuntu ewen.​—1 Korintus 11:1; 2 Tesalonika 3:7.

KELEH MAHAPAN ”TIROK-ATEI JE SAMA DENGAN KRISTUS”

15, 16. (a) Narai je perlu ilalus itah mangat sama kilau Kristus? (b) Kilen ampi mangat itah inantiring awi ”tirok-atei je sama dengan Kristus”?

15 Kilen ampi itah tau manyuntu Kristus? 1 Korintus 2:16 manjelas amun itah  perlu mahapan ”tirok-atei je sama dengan Kristus”. Pilippi 2:5 mampingat itah, ”Keleh atei keton sama kilau Yesus Kristus.” Mangat sama kilau Kristus, itah perlu balajar pikiran, angat atei, tuntang gawin ai. Yesus labih paduli hubunga dengan Hatalla bara narai bewei. Jadi, manyuntu Yesus manampa itah sasar sama kilau Yehowa. Awi te, balajar uka bapikir kilau Yesus penting tutu.

16 Kilen ampi itah tau balajar bapikir sama kilau Yesus? Kare murid ai manampayah iye malalus mujizat, mahining iye majar uluh are, manantuani kilen ampi iye mawi kakare macam uluh, tuntang manantuani kilen ampi iye inantiring awi pikiran Hatalla. Ewen hamauh, ”Ikei toh ie kare oloh je jari mitee kabuat taloh handiai je ilaluse.” (Gawin Rasul 10:39) Wayah tuh, itah dia tau manampayah Yesus. Tapi itah tege Injil je tau mandohop mangasene iye. Metuh itah mambasa tuntang mangumang buku Mateus, Markus, Lukas, tuntang Yohanes, itah balajar kilen ampi cara bapikir Yesus. Jituh mandohop itah uka ”manuntut awan pain Aie” mangat itah tau mahapan ”tirok je sama kilau” ayun Yesus.​—1 Petrus 2:21; 4:1.

17. Kilen ampi bapikir kilau Kristus mandohop itah?

17 Narai manpaat amun itah bapikir kilau Kristus? Sama kilau kuman panginan je bahalap manampa bitin itah abas, manyuang tiruk itah dengan pikiran Kristus jite akan mampaabas kerohanian itah. Sasar tahi, itah katawan narai je akan ilalus Yesus hong uras kaadaan. Limbah te, itah tau manampa keputusan bahalap je manyanang Hatalla tuntang manenga itah atei nurani je barasih. En Pahari setuju jituh alasan bahalap uka ’hapakaian Tuan Yesus Kristus’?​—Roma 13:14.

18. Narai je ilajar Pahari tahiu manjadi uluh je bapikir rohani?

18 Artikel tuh jadi mandohop itah uka katawan narai rima manjadi uluh je bapikir rohani. Itah jadi balajar bara suntu bahalap kare uluh je inantiring awi roh barasih. Itah kea balajar amun mahapan ”tirok-atei je sama dengan Kristus” mandohop itah uka bapikir sama kilau pikiran Yehowa tuntang mandinun hubungan je rantep Denga. Tapi masih are je tau ilajar itah. Suntu: Bara kueh itah katawan amun kerohanian itah abas? Narai je tau ilalus itah uka labih abas secara rohani? Tuntang kilen ampi kerohanian mampangaruh pambelum itah? Nantuani hong artikel je rahian.

^ par. 3 1 Korintus 2:14-16 (Surat Barasih 1983): ”Tapi oloh idje tumon puna dasare, ie djaton manarima idje ain Roch Hatalla; djete kilau kagila bewei akae, ie djaton tau haratie, basa djete patut inirok sara Roch. Tapi oloh idje tumon Roch, tau mariksa taloh handiai, tapi bitie djaton tau iriksa oloh. Karana eweh djari katawan tirok Tuhan [Yehowa], sampai tau madjar ie? Tapi intu itah aton tirok Kristus.”