Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Februari 2018

Tarus Bausaha Manjadi Uluh Rohani!

Tarus Bausaha Manjadi Uluh Rohani!

”Keleh Roh Hatalla mangagalan keton.”​—GALATIA 5:16.

NYANYIN: 22, 75

1, 2. Ije biti pahari sadar akan narai tahiu arep’ah, tuntang narai je ilalus’ah?

ROBERT impandui metuh masih tabela, tapi iye dia manomor ije katutu hong pambelum. Iye hamauh, ”Aku dia puji mawi gawi je sala, tapi jite kewajiban bewei. Ampi rohaniku dehen, harajur hapumpung tuntang merintis ektra pire-pire kali genep nyelu. Tapi tege je kurang.”

2 Robert dia katawan narai je kurang sampai limbah iye kawin. Iye tuntang kabali rancak misek sama arep tahiu Alkitab. Sawa are pangatawan Alkitab tuntang purah tumbah kare paisek. Tapi Robert rancak dia katawan jawaba tuntang mahamen. Iye mansanan, ”Ampi aku dia katawan en-en. Aku batekad, ’Amun aku handak manjadi kapala keluarga rohani akan sawangku, tege je musti ilalusku.’” Jadi iye malalus’ah. Iye mansanan, ”Aku balajar Alkitab tuntang tarus balajar, tuntang sasar tahi aku mandinun pangatawan. Je paling penting, aku tau rantep dengan Yehowa.”

3. (a) Narai je tau ilajar itah bara kesah Robert? (b) Narai paisek penting je akan imbahas itah?

3 Itah tau manduan palajaran penting bara kesah Robert.  Itah mungkin tege pangatawan tahiu Alkitab tuntang harajur hapumpung tuntang badinas, tapi jituh dia manampa itah manjadi uluh je bapikir rohani. Atawa itah mungkin jadi bausaha manjadi uluh je bapikir rohani, tapi metuh itah mariksa arep itah, itah manampayah tege je tau ingambuah. (Pilippi 3:16) Hong artikel tuh, itah akan manjawab telu paisek penting: (1) Narai je tau mandohop itah uka katawan en itah uluh je bapikir rohani? (2) Kilen ampi mangat kerohanian itah sasar dehen? (3) Kilen ampi kerohanian je dehen mandohop itah hong pambelum?

CARA MANGATAWAN EN ITAH ULUH JE BAPIKIR ROHANI

4. Nasehat hong Epesus 4:23, 24 baguna akan eweh?

4 Metuh nampara manempu Hatalla, itah manampa perubahan je mampengaruh uras pambelum itah. Dengan impandui dia berarti perubahan te tende. Alkitab mansanan, ”Keleh atei tuntang tirok keton inaheta lepa-lepah.” (Epesus 4:23, 24) Istilah Yunani ”inaheta” rima taluh je masih manjadi. Awi te, atei tuntang tiruk itah perlu harajur inaheta. Awi dia sempurna, itah perlu harajur manampa perubahan. Aluh jadi manempu Yehowa banyelu-nyelu, itah perlu mahaga hubungan Denga tatap dehen.​—Pilippi 3:12, 13.

5. Paisek narai je mandohop itah uka katawan en itah uluh je bapikir rohani?

5 Aluh itah tabela atawa bakas, itah perlu mariksa arep dengan jujur. Coba ngumang: ’En aku sadar amun aku manjadi uluh je bapikir rohani? En aku bausaha manyuntu Kristus? Narai je imparahan sikap tuntang taluh gawingku hong pumpung? Narai je imparahan panderku tahiu kanahuangku? Narai je imparahan kebiasaan, cara bapakaian, tuntang cara aku manarima nasehat? Narai je pangkasulak ilalusku metuh inggoda mawi je sala? En aku manjadi uluh Kristen je matang?’ (Epesus 4:13) Kare paisek tuh tau mandohop itah katawan sapire are itah jadi maju secara rohani.

6. Narai cara beken uka katawan en itah uluh je bapikir rohani?

6 Kanatek’ah itah perlu uluh beken uka mandohop mariksa en itah uluh je bapikir rohani. Rasul Paulus manjelas amun uluh jasmani dia katawan cara iye belum dia manyanang Hatalla. Tapi uluh je bapikir rohani katawan kilen ampi Hatalla manampayah taluh handiai. Iye katawan Yehowa dia setuju dengan cara belum jasmani. (1 Korintus 2:14-16; 3:1-3) Bakas ungkup je manyuntu pikiran Kristus langsung katawan metuh tege pahari mamparahan pikiran jasmani, tuntang bausaha mandohop.  Amun bakas ungkup mandohop itah, en itah akan manarima pandohop ewen tuntang manampa perubahan je imerlu? Dengan malalus’ah, jite mamparahan itah buju-bujur handak mampadehen kerohanian.​—Pangabar 7:5, 9.

SASAR DEHEN SECARA ROHANI

7. Mbuhen pangatawan Alkitab bewei dia sukup uka manjadi uluh rohani?

7 Pangatawan Alkitab dia sukup manampa itah manjadi uluh je bapikir rohani. Raja Salomo kasene dengan Yehowa, tuntang pire-pire nasehat Salomo mahin manjadi bagian bara Alkitab. Tapi rahian limbah te, hubunga dengan Yehowa balemu, tuntang iye dia baketep hindai. (1 Raja 4:29, 30; 11:4-6) Jadi, beken bara pangatawan Alkitab, narai hindai je imerlu itah? Itah perlu tarus mampadehen iman itah. (Kolose 2:6, 7) Kilen ampi itah tau malalus’ah?

8, 9. (a) Narai je tau mandohop uka mampadehen iman itah? (b) Narai tujuan itah metuh balajar tuntang mangumang? (Payah gambar hong tamparan artikel.)

8 Hong abad pangkasulak, Paulus maanjur uluh Kristen uka bausaha manampa kamaju. (Ibrani 6:1) Ije cara utama malalus nasehat tuh iete balajar buku Cara agar Tetap Dikasihi Allah. Jituh akan mandohop Pahari katawan cara mahapan prinsip Alkitab hong pambelum. Amun Pahari jadi balajar buku te, masih are basaan beken je tau ilajar uka mampadehen iman. (Kolose 1:23) Itah kea perlu mangumang narai je ilajar tuntang balaku Yehowa mandohop itah malalus’ah.

9 Itah perlu manampa tujuan mamangun kanahuang je handalem uka manyanang tuntang taat dengan Yehowa metuh balajar tuntang mangumang. (Masmur 40:8; 119:97) Itah kea perlu manolak narai bewei je tau mahalang itah mamangun kerohanian.​—Titus 2:11, 12.

10. Narai je tau ilalus pahari tabela uka mampadehen kerohanian?

10 Amun Pahari masih tabela, en Pahari tege cita-cita rohani? Ije pahari je melayani hong Betel rancak bapander  dengan anak tabela je handak impandui hong kebaktian daerah tuntang misek cita-cita rohani ewen. Iye tau manampayah are je buju-bujur jadi mamikir kilen ampi ewen handak melayani Yehowa rahian andau. Pire-pire handak melayani Yehowa sepenuh waktu atawa pindah akan daerah je labih mamerlu penyiar. Tapi tege anak tabela dia manjawab paisek endau. En jite rima ewen mangkeme dia perlu cita-cita rohani? Amun Pahari anak tabela, mikir: ’En aku dumah hapumpung tuntang badinas awi inyuhu uluh bakas? Atawa en aku kabuat basobat dengan Yehowa?’ Jelas, itah uras perlu tege cita-cita rohani, aluh itah tabela atawa bakas. Cita-cita rohani tuh mandohop itah mampadehen kerohanian.​—Pangabar 12:1, 13.

11. (a) Narai je perlu ilalus itah uka manjadi uluh rohani? (b) Narai suntu hong Alkitab je tau inyuntu itah?

11 Limbah itah katawan narai je tau ingambuah, itah perlu manampa perubahan. Jite penting tutu awi jite mampengaruh pambelum itah. (Roma 8:6-8) Yehowa dia balaku itah musti sempurna, tuntang Iye manenga roh barasih-Ai uka mandohop itah. Tapi itah kabuat tatap perlu bausaha karas. Pahari John Barr, je puji manjadi anggota Badan Pimpinan, puji mambahas Lukas 13:24 tuntang mansanan, ”Are uluh dia bahasil awi ewen kurang bausaha uka  manjadi abas.” Itah perlu manyuntu Yakob, je hatangkarap dengan ije malekat tuntang dia manyarah sampai iye imberkat. (Genesis 32:26-28) Aluh balajar Alkitab mungkin mangat, keleh itah dia maanggap Alkitab hiburan sama kilau saritan dongeng. Itah perlu bausaha manggau katutu barega je tau mandohop itah.

12, 13. (a) Narai je mandohop itah malalus Pilippi 2:5? (b) Kilen ampi suntu tuntang nasehat Petrus tau mandohop itah? (c) Narai je tau ilalus Pahari uka mampadehen kerohanian? (Payah kotak ” Je Tau Ilalus Pahari Uka Maju Secara Rohani”.)

12 Metuh itah bausaha mampadehen kerohanian, roh barasih akan mandohop itah maubah cara bapikir itah. Sasar tahi, itah tau balajar bapikir kilau Yesus. (Pilippi 2:5) Roh barasih tau mandohop itah malawan kanahuang je sala tuntang mamangun kare sipat je manyanang Hatalla. (Galatia 5:16, 22, 23) Amun itah katawan itah manomor ije panatau atawa kasanang, keleh itah dia manyarah. Itah musti tarus balaku Yehowa manenga roh barasih uka mandohop itah manomor ije kare hal je bujur. (Lukas 11:13) Keleh mingat Rasul Petrus. Iye dia santar bapikir kilau Yesus. (Mateus 16:22, 23; Lukas 22:34, 54-62; Galatia 2:11-14) Tapi iye dia manyarah, tuntang Yehowa mandohop iye. Sasar tahi, Petrus balajar uka bapikir kilau Kristus. Kalute kea dengan itah.

13 Rahian limbah te Petrus manyewut kare sipat je tau mandohop itah. (Mbasa 2 Petrus 1:5-8.) Itah perlu bausaha karas uka mangendali arep, sabar, sinta kare pahari, tuntang kare taluh gawi bahalap beken. Genep andau itah tau mangumang, ’Sipat narai je tau ilalusku uka mandohop aku sasar dehen secara rohani?’

LALUS PRINSIP ALKITAB GENEP ANDAU

14. Kilen ampi manjadi uluh rohani akan mampengaruh pambelum itah?

14 Amun itah bapikir kilau Kristus, jite akan mampengaruh taluh gawi hong eka bagawi tuntang sakula, cara bapander, tuntang cara manampa keputusan genep andau. Keputusan itah akan mamparahan amun itah bausaha manyuntu Kristus. Awi itah bapikir rohani, itah dia handak narai bewei marusak hubungan itah dengan Yehowa. Metuh tagoda malalus hal je sala, kerohanian akan mandohop itah malawa. Sahindai manampa keputusan, itah akan mangumang, ’Narai prinsip Alkitab je tau mandohop aku? Narai je ilalus Kristus hong kaadaan tuh? Narai je akan manyanang Yehowa?’ Itah perlu mawi cara bapikir tuh manjadi kebiasaan. Ayo itah mambahas pire-pire suntu kaadaan. Akan genep kaadaan, itah akan manampayah prinsip Alkitab je tau mandohop itah manampa keputusan bahalap.

15, 16. Kilen ampi manyuntu pikiran Kristus mandohop itah manampa keputusan metuh (a) mintih kawal belum? (b) mintih kawal?

15 Mintih kawal belum. Prinsip Alkitab’ah hong 2 Korintus 6:14, 15. (Mbasa.) Paulus manjelas amun pandangan uluh rohani tahiu kare hal hakalawan dengan uluh jasmani, atawa je bapikir daging. Kilen ampi prinsip tuh mandohop Pahari mintih kawal belum?

16 Mintih kawal. Prinsip Alkitab’ah hong 1 Korintus 15:33. (Mbasa.)  Uluh rohani dia bakawal dengan uluh je tau mampalemu iman. Coba mikir kilen ampi Pahari tau malalus prinsip tuh hong pire-pire kaadaan. Suntu, kilen ampi prinsip tuh mandohop Pahari manampa keputusan tahiu jejaring sosial? Kilen ampi jite mandohop Pahari manampa keputusan en Pahari handak main game online dengan uluh je dia ingasene?

En keputusangku akan mandohop aku manjadi labih rohani? (Payah paragrap 17)

17-19. Kilen ampi manjadi uluh rohani mandohop Pahari (a) mahakan taluh gawi je sia-sia? (b) manampa cita-cita je bahalap? (c) metuh dia hapakat?

17 Taluh gawi je mambahaya kerohanian. Tege pingat hong Ibrani 6:1. (Mbasa.) Narai ”kare hal je dia baguna” je perlu ihakan? Jite kare hal dia baguna je dia mampadehen kerohanian itah. Pingat tahiu kare hal te tau mandohop itah manjawab kare paisek kilau, ’En gawi tuh baguna atawa sia-sia? En aku perlu umba rencana bisnis tuh? Mbuhen aku dia umba kelompok je bausaha mangambuah kaadaan dunia?’

En keputusangku akan mandohop aku manampa cita-cita rohani? (Payah paragrap 18)

18 Cita-cita rohani. Hong Hotbah intu Hunjun Bukit, Yesus manenga nasehat tahiu cita-cita. (Mateus 6:33) Uluh rohani manomor ije Karajaan hong pambelum’ah. Prinsip tuh mandohop itah manjawab kare paisek, ’En aku perlu kuliah limbah lulus sakula? En aku perlu manarima kare tawaran gawi?’

En keputusangku akan mandohop aku manjadi labih badamai dengan uluh beken? (Payah paragrap 19)

19 Dia hapakat. Nasehat Paulus akan ungkup hong Roma tau mandohop metuh itah dia hapakat dengan uluh beken. (Roma 12:18) Itah manyuntu Kristus, jadi itah bausaha ”belom damai dengan oloh samandiai”. Kilen ampi tanggapan itah metuh dia hapakat dengan uluh beken? En itah bahali manarima pendapat uluh beken? Atawa en itah ingasene uluh je sinta damai?​—Yakobus 3:18.

20. Mbuhen Pahari handak maju secara rohani?

20 Jituh bukti amun prinsip Alkitab te tau mandohop uluh rohani manampa keputusan je bujur. Dengan bapikir rohani, pambelum itah akan labih hanjak tuntang puas. Robert, je inyewut endau, hamauh, ”Limbah aku mamangun hubungan dengan Yehowa, aku manjadi bana tuntang bapa je labih bahalap. Aku puas tuntang hanjak.” Dengan bausaha salepah’ah maju secara rohani, itah kea akan mangkeme are manpaat. Pambelum itah akan labih hanjak, tuntang andau rahian itah akan mandinu ”pambelom je bujur”.​—1 Timoteus 6:19.