Langsung ke konten

Langsung ke daftar isi

Saksi-Saksi Yehuwa

Pilih bahasa Dayak Ngaju

En Pahari Mangasene Yehowa Sama Kilau Noah, Daniel, tuntang Yob?

En Pahari Mangasene Yehowa Sama Kilau Noah, Daniel, tuntang Yob?

”Kaadilan dia ingasene awi oloh darhaka tapi oloh je manyembah TUHAN [Yehowa] toto-toto kasene jete.”​—SEWUT SALOMO 28:5.

NYANYIN: 126, 150

1-3. (a) Narai je akan mandohop itah tatap baketep dengan Hatalla hong andau je pangkarahia tuh? (b) Narai je akan ilajar itah hong artikel tuh?

ITAH belum hong pangkalepah bara andau je pangkarahia. Sasar are itah manampayah uluh papa. Ewen ”lembut bajewong sama kilau oru”. (Masmur 92:7) Jadi itah dia tarewen manampayah are uluh manolak narai auh Hatalla tahiu je bujur. Paulus manasehat uluh Kristen, ”Huang hal kapapa, keleh keton tetep kilau anak korik. Tapi huang tirok atei, keleh keton manjadi oloh je jari bakas.” (1 Korintus 14:20) Kilen ampi itah malalus’ah?

2 Jawaba tege hong ayat tema artikel tuh, je hamauh, ”Oloh je manyembah TUHAN [Yehowa] toto-toto kasene jete.” (Sewut Salomo 28:5) Jituh rima ewen tau katawan uras hal je penting uka tau manyanang Yehowa. Sewut Salomo 2:6-9 kea majar itah amun Yehowa manenga kaharati akan ewen je malalus taluh je bujur. Hasil’ah, ewen tau  ”katawan taloh je adil, bujur, tuntang bahalap”.

3 Noah, Daniel, tuntang Yob mandinun kaharati bara Hatalla. (Esekhiel 14:14) Kalute kea dengan rewar Hatalla wayah tuh. Kilen ampi dengan Pahari? En Pahari tege kaharati bara Hatalla? Uka ”toto-toto kasene” uras hal je imerlu akan manyanang Yehowa, Pahari perlu buju-bujur mangasene Iye. Jadi hong artikel tuh, itah akan balajar (1) kilen ampi Noah, Daniel, tuntang Yob mangasene Hatalla, (2) kilen ampi dengan mangasene Hatalla tau mandohop ewen, tuntang (3) kilen ampi itah tau mamangun iman kilau ewen.

NOAH HERET DENGAN HATALLA HONG DUNIA JE PAPA

4. Kilen ampi Noah mangasene Yehowa, tuntang kilen ampi jite mandohop iye?

Noah tau balajar kare sipat Hatalla dengan manantuani taluh je Injapa

4 Kilen ampi Noah mangasene Yehowa? Bara katika Adam tuntang Hawa tege anak, uluh balajar tahiu Yehowa mahalau telu cara: mahalau taluh je injapa, bara rewar Hatalla je baketep, tuntang mangkeme kabuat manpaat’ah taat Denga. (Yesaya 48:18) Dengan manantuani taluh je injapa Hatalla, Noah tau manampayah bukti amun Hatalla puna tege tuntang tau balajar kare sipat-Ai. Hasil’ah, Noah tau katawan amun Yehowa te hai Kuasa tuntang tikas Iye Hatalla je bujur. (Roma 1:20) Noah dia baya percaya Hatalla, tapi kea mamangun iman je dehen Denga.

5. Kilen ampi Noah balajar tahiu kahandak Hatalla akan kalunen?

5 Alkitab mansanan amun ”mahining barita maka kare oloh manjadi percaya”, jite rima narai je ihining itah bara uluh beken tau mandohop itah baiman. (Roma 10:17) Ampi, Noah mahining tahiu Yehowa bara kula jalahan ayu. Bapa, Lamekh, baiman dengan Hatalla tuntang lahir sahindai Adam matei. (Payah gambar hong tamparan artikel.) Kalute kea dengan bue Noah je ara Metusalah, tuntang bapa bara datun Noah iete Yared, je matei 366 nyelu limbah Noah lahir. * (Payah catatan penda.) (Lukas 3:36, 37) Mungkin kare hatue te tuntang sawan ewen majar Noah amun Yehowa manjapa kalunen tuntang Iye handak ewen manak, manguntep bumi, tuntang manempu Iye. Noah kea balajar amun Adam tuntang Hawa dia taat dengan Yehowa, tuntang iye tau manampayah hasil dia bahalap bara keputusan ewen. (Genesis 1:28; 3:16-19, 24) Noah sanang dengan narai je ilajar’ah, tuntang jite manampa iye handak manempu Yehowa.​—Genesis 6:9.

6, 7. Kilen ampi harapan mampadehen iman Noah?

6 Harapan mampadehen iman. Mikir kilen ampi iman Noah impadehen metuh  iye katawan amun riman ara ”Kamangat” atawa ”Ampung”, hal tuh tau kea mamaksud harapan. (Genesis 5:29) Yehowa manantiring Lamekh uka hamauh tahiu anak’ah Noah, ”Anak toh akan mampahian gawin itah metoh itah bagawi babehat nguan petak je inyapa TUHAN [Yehowa].” Jadi Noah percaya amun Hatalla akan mangambuah kaadaan. Kilau Abel tuntang Henokh, iye baiman amun ije ’turunan’ akan mamparutek takuluk handipe.​—Genesis 3:15.

7 Noah dia mangatawan uras perincian bara janjin Hatalla je inyurat hong Genesis 3:15. Tapi iye katawan amun tujum tuh manenga harapan hong andau rahian. Henokh kea mambarita peteh je sama, iye mansanan amun Yehowa akan mampalumus uluh papa. (Yudas 14, 15) Peteh bara Henokh, je akan buju-bujur manjadi hong Armagedon, pasti mampadehen iman tuntang harapan Noah.

Iman tuntang kaharati bara Hatalla akan mangalindung itah bara kare rencana Setan tuntang pengaruh dunia

8. Kilen ampi dengan buju-bujur mangasene Hatalla mangalindung Noah?

8 Kilen ampi pangatawan je bujur tahiu Hatalla mandohop Noah? Awi Noah balajar tahiu Yehowa, iye mamangun iman tuntang kaharati bara Hatalla. Jituh mangalindung iye, khusus’ah bara taluh gawi je akan mangapehe atei Yehowa. Kilen ampi? Noah handak basobat dengan Hatalla, jadi iye dia bakawal dengan uluh je dia baiman tuntang manolak Yehowa. Dia kilau ewen, Noah dia tapangaruh awi kawan kambe je dumah akan bumi. Uluh metuh te impahengan awi kuasan kawan kambe tuntang mungkin handak manyembah ewen. (Genesis 6:1-4, 9, 10) Noah kea katawan amun Yehowa handak kalunen manak tuntang manguntep bumi. (Genesis 1:27, 28) Jadi metuh kawan kambe kawin dengan uluh bawi tuntang manak, Noah katawan amun jite sala. Jite sasar gitan metuh anak ewen labih hai tuntang labih abas bara anak beken. Kajaria, Yehowa mansanan akan Noah amun Iye akan mampadumah banjir uka mampalumus uras uluh papa. Awi Noah baiman dengan pingat bara Yehowa, iye mamangun bahtera, tuntang iye dengan keluarga inyalamat.​—Ibrani 11:7.

9, 10. Kilen ampi itah tau mamangun iman kilau Noah?

9 Kilen ampi itah tau mamangun iman kilau Noah? Penting tutu balajar Firman Hatalla bua-buah, sanang dengan narai je ilajar itah, tuntang mahapa akan mangambuah tuntang manampa keputusan je bahalap. (1 Petrus 1:13-15) Limbah te iman tuntang kaharati bara Hatalla akan mangalindung itah bara kare rencana Setan tuntang pengaruh dunia. (2 Korintus 2:11) Are uluh hong dunia tuh sinta kakaras tuntang gawi je dia bamoral tuntang maumba kanahuang ewen je sala.  (1 Yohanes 2:15, 16) Ewen ihat mangalapean amun pangkalepah dunia Setan jadi tukep. Amun itah jatun iman je dehen, itah tau nampara bapikir kilau ewen kea. Ela kalapean metuh Yesus manyama jaman itah dengan Noah, iye dia bapander tahiu kakaras atawa gawi dia bamoral tapi tahiu bahaya je tau manderoh pelayanan itah akan Hatalla.​—Mbasa Mateus 24:36-39.

10 Mikir: ’En pambelumku mamparahan amun aku buju-bujur mangasene Yehowa? En imanku manggerek aku malalus narai bewei je bujur hong pandangan Yehowa tuntang majar uluh beken tahiu narai je ingahandak Hatalla bara ewen?’ Jawaban kare paisek tuh akan mandohop Pahari katawan en Pahari kea heret dengan Hatalla kilau Noah.

DANIEL MAMPARAHAN KAHARATI BARA HATALLA HONG BABEL

11. (a) Narai je tau ilajar itah bara uluh bakas Daniel? (b) Narai sipat Daniel je handak inyuntu Pahari?

11 Kilen ampi Daniel mangasene Yehowa? Uluh bakas Daniel pasti majar iye uka sinta dengan Hatalla tuntang Firman Ayu. Tuntang Daniel malalus’ah katahin iye belum. Metuh iye bakas, iye mahin tarus balajar bua-buah Surat Barasih. (Daniel 9:1, 2) Daniel buju-bujur mangasene Yehowa. Iye kea katawan uras je jadi ilalus Yehowa akan bangsa Israel. Itah tau katawan hal tuh bara lakudoan Daniel je randah atei tuntang tulus hong Daniel 9:3-19. Mbasa tuntang ngumang lakudoan tuh. Mikir, ’Bara lakudoa tuh narai je tau ilajarku bara Daniel?’

12-14. (a) Kilen ampi Daniel mamparahan kaharati bara Hatalla? (b) Kilen ampi Yehowa mamberkat kahanyi tuntang kaketep Daniel?

12 Kilen ampi pangatawan je bujur tahiu Hatalla mandohop Daniel? Dia purah akan ije biti uluh Yehudi je baketep uka manempu Hatalla hong Babel je kapir. Suntu, Yehowa hamauh dengan uluh Yehudi, ”Keleh bagawi akan kasanang kamangat kare lewu eka ketun iawi-Ku jadi tawanan.” (Yeremia 29:7) Tapi, Iye kea marentah ewen uka tikas manempu Iye salepah atei. (Eksodus 34:14) Kilen ampi Daniel tau taat dengan due parentah tuh? Kaharati bara Hatalla mandohop Daniel uka labih manomor ije Hatalla, haru limbah te pamarentah kalunen. Baratus nyelu limbah te, Yesus majar prinsip je sama.​—Lukas 20:25.

13 Coba mikir narai je ilalus Daniel metuh tege hukum amun eweh bewei dia tau balakudoa dengan hatalla atawa kalunen kueh bewei kecuali raja katahin 30 andau. (Mbasa Daniel 6:7-10.) Iye sapuna tau manampa alasan tuntang hamauh, ’Jituh baya 30 andau.’ Kabalika, Daniel dia manalua hukum kalunen manjadi labih penting bara ibadat’ah akan Hatalla. Daniel sapuna tau balakudoa dengan Yehowa hong eka je dia gitan uluh. Tapi iye katawan amun are uluh manampayah iye balakudoa genep andau. Jadi aluh jite bahaya, Daniel tatap balakudoa hong eka je tau inampayah uluh, awi iye dia handak uluh bapikir amun iye tende manempu Yehowa.

14 Yehowa mamberkat kahanyi tuntang kaketep Daniel. Iye manampa mujizat tuntang manyalamat Daniel bara  singa. Hasil’ah, are uluh hong Karajaan Media-Persia balajar tahiu Yehowa!​—Daniel 6:25-27.

15. Kilen ampi itah tau mamangun iman kilau Daniel?

15 Kilen ampi itah tau mamangun iman kilau Daniel? Mangat iman tau dehen, dia sukup baya mambasa Firman Hatalla. Itah perlu buju-bujur mengerti. (Mateus 13:23) Itah handak mangatawan kilen ampi pikiran tuntang angat atei Yehowa tahiu kare hal. Jadi itah perlu mangumang narai je imbasa itah. Penting kea uka rancak balakudoa, khusus’ah metuh itah manaharep masalah. Itah tau yakin Yehowa pahias manenga itah kaharati tuntang kaabas je ilaku itah hong lakudoa.​—Yakobus 1:5.

YOB MALALUS PRINSIP HATALLA HONG WAYAH MANGAT TUNTANG PEHE

16, 17. Kilen ampi Yob mangasene Yehowa?

16 Kilen ampi Yob mangasene Yehowa? Yob beken uluh Israel. Tapi  Abraham, Isaak, tuntang Yakob jalahan kejau’ah, tuntang Yehowa jadi majar ewen tahiu Arep’ah tuntang narai Kahandak’ah akan kalunen. Hong pire-pire hal, Yob kea are balajar katutu je barega. (Yob 23:12) Iye hamauh dengan Yehowa, ’Pangatawangku tahiu Ikau baya ihiningku.’ (Yob 42:5) Tuntang Yehowa kea manyewut amun Yob mansanan tahiu Iye akan uluh beken.​—Yob 42:7, 8.

Iman itah sasar dehen amun itah manantuani taluh je injapa tuntang balajar tahiu kare sipat Yehowa (Payah paragrap 17)

17 Yob kea mangasene kare sipat Yehowa mahalau taluh je injapa. (Yob 12:7-9, 13) Elihu tuntang Yehowa mahapan taluh je injapa uka majar Yob amun kalunen te kurik tutu imbanding dengan Hatalla. (Yob 37:14; 38:1-4) Auh Yehowa mampengaruh Yob tuntang manampa iye dengan randah atei mansanan akan Hatalla, ”Aku katawan, o TUHAN [Yehowa], tahiu Ikau Je Jaton Tikas Kuasam; Ikau olih malalus narai bewei.” Iye mansanan kea, ”dengan kanyasalku, aku mondok hong petak tuntang kawo.”​—Yob 42:2, 6.

18, 19. Kilen ampi Yob mamparahan amun iye buju-bujur mangasene Yehowa?

18 Kilen ampi pangatawan je bujur tahiu Hatalla mandohop Yob? Yob buju-bujur katawan prinsip Hatalla. Iye buju-bujur mangasene Yehowa, tuntang jituh manggerek iye uka malalus taluh je bujur. Suntu, Yob katawan iye dia tau mangaku sinta Hatalla amun iye dia masi dengan uluh beken. (Yob 6:14, NW) Iye dia bapikir amun iye labih gantung bara uluh beken, tapi kabalika, iye mawi ewen kilau keluarga, dia soal ewen tatau atawa susah. Yob hamauh, ”En dia Hatalla je manjapa aku, manjapa kea kare rewarku te?” (Yob 31:13-22) Aluh Yob tatau tuntang bakuasa, iye dia mambangga arep tuntang dia maanggap uluh beken dia penting. Jituh hakabeken dengan are uluh je tatau tuntang bakuasa wayah tuh.

19 Yob dia handak narai bewei, termasuk ramu panatau, manjadi labih penting bara Yehowa. Iye katawan amun jite manjadi, iye akan manolak ”Hatalla Je Jaton Tikas Kuasae”. (Mbasa Yob 31:24-28.) Yob kea maanggap pangawin te janji barasih ije biti hatue tuntang bawi je jadi kawin. Iye mahin bajanji dengan arep kabuat amun iye dia manampayah ije biti uluh bawi dengan cara je dia patut. (Yob 31:1) Jite tamam tutu, awi Yob belum hong jaman metuh Yehowa manalua uluh hatue kawin dengan labih bara ije uluh bawi. Sapuna Yob tau kawin hindai amun iye handak. Tapi iye pasti jadi katawan pangawin je pangkasulak je iatur awi Yehowa iete ije biti hatue tuntang ije biti bawi, tuntang Yob mintih belum kilau te. * (Payah catatan penda.) (Genesis 2:18, 24) Kira-kira 1.600 nyelu limbah te, Yesus majar prinsip je sama, amun seks tuntang pangawin baya ilalus awi ije biti hatue tuntang ije biti bawi huang pangawin.​—Mateus 5:28; 19:4, 5.

20. Kilen ampi dengan mangasene Yehowa tuntang standar Ayu mandohop itah mintih kawal tuntang hiburan?

20 Kilen ampi itah tau mamangun  iman kilau Yob? Sinde hindai, itah musti buju-bujur mangasene Yehowa tuntang keleh pangatawan te mampangaruh uras gawin itah. Suntu, Alkitab mansanan amun Yehowa ”basingi dengan oloh je rajin dengan kakaras” tuntang mangahana itah bakawal dengan uluh je rajin mananjaru. (Mbasa Masmur 11:5; 26:4.) Keleh mikir: ’Narai je ilajarku bara due ayat tuh tahiu Yehowa? Kilen ampi hal te mampengaruh narai je paling penting hong pambelumku? Kilen ampi hal te mampangaruh narai je inampayahku hong Internet, mintih eweh je manjadi kawalku, tuntang narai hiburan je iintihku?’ Jawaban Pahari tau mandohop mariksa sapire bahalap Pahari kasene Yehowa. Itah dia handak tapangaruh awi dunia Setan. Jadi, itah perlu malatih ’pangatawan’ itah, awi te, itah perlu balajar mangabeken narai je bujur tuntang je sala, je bahalap tuntang je dia bahalap.​—Ibrani 5:14; Epesus 5:15.

21. Narai je akan mandohop itah ”kasene” narai bewei je imerlu uka manyanang Yehowa?

21 Awi Noah, Daniel, tuntang Yob malalus narai bewei je ulih inggawi ewen uka mangasene Yehowa, Iye mandohop ewen ”kasene” narai bewei je penting uka Manyanang’ah. Suntu ewen mambukti amun malalus kahandak Yehowa manampa pambelum bahasil. (Masmur 1:1-3) Jadi mikir, ’En aku mangasene Yehowa sama kilau Noah, Daniel, tuntang Yob?’ Sapuna, wayah tuh itah tau labih purah mangasene Yehowa imbanding dengan ewen, awi Yehowa jadi manenga itah labih are keterangan tahiu Arep’ah. (Sewut Salomo 4:18) Keleh balajar Alkitab bua-buah. Keleh mangumang’ah. Tuntang laku roh barasih mahalau lakudoa. Hasil’ah Pahari dia akan tapangaruh awi dunia Setan. Kare gawin Pahari akan mamparahan kaharati bara Hatalla tuntang Pahari akan sasar rantep dengan Bapa itah hong sorga.​—Sewut Salomo 2:4-7.

^ par. 5 Datun Noah, Henokh, ”harajur heret dengan Hatalla” kea. Tapi iye matei 69 nyelu sahindai Noah lahir.​—Genesis 5:23, 24.

^ par. 19 Noah kea malalus je sama. Sawa baya ije, aluh kare hatue jadi kawin dengan labih bara ije sawa dia tahi limbah Adam tuntang Hawa dia taat dengan Hatalla.​—Genesis 4:19.